Gospel in Aenōm̧m̧an
Ilo jijen in Kūriijm̧ōj in, laļ eo an aolep Rikūriijtin ro rej kemeeme raan in ļotak eo an Jisōs Kraist, “Irooj in Aenōm̧m̧an.” Jej aolep lan̄lōn̄ kōn ennaan eo an enjeļ eo kōn ļotak eo:
“Bwe rainin e ļotak ñan kom̧ ilo jikin kweiļo̧k an Devid, Rilo̧mo̧o̧r, E Kraist Irooj. …
“Im e m̧ōkaj weaaktok ippān enjeļ tok elōn̄ iaan ro ri lan̄, im rej nōbar Anij im ba,
“Aiboojoj n̄an Anij ilo uteijtata, im aenōm̧m̧an ioon laļ, ippān armej raņ.”1
Juon waanjon̄ak eaibojooj kōn wāween an Rikūriijtin ro kautiej Rilo̧mo̧o̧r rej naan ko an Charles Dickens ekar je n̄an ajri ro nejin make:
“Ro nejū jitōnbōro, elukkuun itok limoū bwe kom̧ ej aikuj jeļā juon men kōn Bwebwenatoon Jisōs Kraist. N̄an aolep armej rej aikuj jeļā kōn E. Ejjeļo̧k juon ej mour, eo em̧m̧antata, jouj tata, ettā tata, im ej burom̧ōj kōn aolep armej ro me rekar kōm̧m̧an bōd.”
En̄in ekar kadkadin naan ko an Dicken. En̄in ej naan in kōjem̧ļo̧k eo an:
“Kemeemej!—Ej katak an kūriijtin n̄an kōm̧m̧an em̧m̧an aolep iien—barāinwōt n̄an ro me enana aer kōm̧m̧an n̄an kōj. Ej katak an Rikūriijtin n̄an iakwe ro rūtūrūr āinwōt kōj make im n̄an kōm̧m̧an n̄an aolep armej āinwōt ad kōņaan bwe armej ren Kōm̧m̧an n̄an kōj. Ej katak an Rikūriijtin n̄an mour ettā, tūriam̧o̧, im jeorļo̧k bōd, im n̄an ettā kōn em̧m̧an kein me repād ippād, im jamin dāpij em̧m̧an ko ilo lur ilo buruōd, ak jar ko ad ak ad iakwe Anij, ak aolep iien kwaļo̧k bwe jej iakwe E ilo ad ettā im kajjieon̄ kōm̧m̧ani aolep men ko rejim̧we. Eļan̄n̄e kwoj kōm̧m̧ane menin, im kemeemej mour eo im katak ko an Ad Irooj Jisōs Kraist, im kajjieon̄ mour kōn ta ko rej katakin kōj kaki, jemaron̄ kōjatdikdik eļap bwe Anij enaaj jeorļo̧k jerawiwi im bōd ko ad, im kōmaron̄ kōj n̄an mour im mej ilo Aenōm̧m̧an.”2
Āinwōt an kar Dickens je, “mour im katak ko an Ad Irooj Jisōs Kraist” ej tōl kōj n̄an aeņōm̧m̧an. Rijilōk Paul ekar ņa etan katak ko an Rilo̧mo̧o̧r “gospel in aenōm̧m̧an.”3
Naan in aenōm̧m̧an elōn̄ meļeļein ko me reoktak jān doon ilo jeje ko rekwojarjar. Ke Jisōs eaar ba, “Aenōm̧m̧an n̄an kom̧,” Ekar lukkuun kōmeļeļeik kain aenōm̧m̧an rōt eo me Rikanaan Aisea ekar kwaļo̧k: “Im jerbal in wānōk enaaj aenōm̧m̧an; im tōprak in wānōk, tōt im lōke n̄an indeeo.”4 Rilo̧mo̧o̧r ekar kakūrm̧ool kanaan eo. Ekar kōmeļeļeik: “Men kein Iar kōnono n̄an kom̧, bwe ilo N̄a kom̧win aenōm̧m̧an.”5
Ilo kōmeļeļe eo An āliktata, Irooj Jisōs Kraist ekar ba n̄an Rijilōk ro, Aenōm̧m̧an ij likūt ņa ippemi, Aō aenōm̧m̧an Ij lewōj n̄an kom̧. N̄a Ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄.”6
Ejjab to jān iien eo, ilo loļo̧k eo An n̄an armej ro retiljek ilo laļ eo ekāāl, Rilo̧mo̧o̧r ekar kouti naan ko an Aisea: “Im ro nejūm̧ otemjej Irooj enaaj katakin er; im eļap naaj aenōm̧m̧an eo an ro nejūm̧.”7
Ta eo Rilo̧mo̧o̧r ekar katakin kōn aenōm̧m̧an ilo mour ko ad āinwōt armej ro me rej barāinwōt ekkeijel n̄an aenōm̧m̧an eo ilo juon baam̧le, aenōm̧m̧an ilo juon laļ, im aenōm̧m̧an ilo laļ in.
Rilo̧mo̧o̧r im Rijilōk ro an ekar ejjeļo̧k aer kar būrokūraam n̄an aenōm̧m̧an an laļ ijjeļo̧k mour jim̧we an kajjojo. Rekar jab ejaake kijejeto n̄an jum̧ae kakien ko an Rom ak tōl an ro ritōl ro ilo jikin eo. Rekar kwaļo̧k naan kōn mour jim̧we an kajjojo armej im kar katakin er bwe ajri ro nejin Anij rej aikuj iakwe rikōjdat ro aer8 im “kom̧win aenōm̧m̧an ippān armej otemjej.”9
Tariņae im poktak rej tōprak in jerawiwi; aenōm̧m̧an ej tōprak in mour jim̧we. Kōjeram̧m̧an ko an gospel eo rej an aolep laļ in, im kōn menin barāinwōt wāween n̄an aenōm̧man: kōjparok kien ko an Anij.
Būreejtōn Howard W. Hunter ekar katakin menin:
“Aenōm̧m̧an eo me laļ in ej o̧o̧n̄ kake ej iien eo kōbōjrak nana ko; ak armej rejjab kile bwe aenōm̧m̧an ej juon iien waļo̧k me ej itok n̄an armej wōt ium̧win iiō ko im jōkjōk ko me kar kōm̧m̧an in Anij, im ilo ejjeļo̧k bar wāween. …
“… Eļan̄n̄e jej kalimjōk armej im wāween ko an laļ in, jenaaj lo poktak im tarpok. Eļan̄n̄e jenaaj ak oktak n̄an Anij, jenaaj lo aenōm̧m̧an n̄an jetōb ejjab maron̄ kakkije. …
“Aenōm̧m̧an in ej kaliboboik kōj jān poktak ko an laļ in.”10
Ilo revelesōn eo raan kein jej riit: “Ak kom̧in jeļā bwe eo ej kōm̧m̧ani jerbal ko rejim̧we enaaj bōk wōņāān, em̧ool aenōm̧m̧an ilo laļ in, im mour indeeo ilo laļ eo ej itok.”11
Aenōm̧m̧an ej kallim̧ur eo an ad Rilo̧mo̧o̧r, im aenōm̧m̧an ej ad kōttōpar. Aenōm̧man eo kar kallim̧ur kake ej kōn ājmour im inem̧m̧an me ej itok jān ad kōjparok kien ko An. Būreejtōn Spencer W. Kimball ekar ba:
“Aenōm̧m̧an ej leen mour jim̧we. Jab maron̄ wiaki kōn jāān, im jab maron̄ jānij n̄an bōk bar jet men. Ej aikuj ejaake im bōke.”12 Jej al, “Em̧m̧an ej aenōm̧m̧an eo me gospel ej bōktok,”13 im ilo bar juon al eļap an em̧m̧an jej koba ippān doon im al kōn al in jar me ej bōktok jar in al in:
Kōtļo̧k bwe aenōm̧m̧an en pād ioon laļ in
Im en jino ippa.”14
Ejjab maron̄ wōr aenōm̧m̧an ilubwiljin laļ ko ilo ad jab aolep mour jim̧we ilubwiljin armej ro me rej jukjuk im amņak ilo jikin eo. Ilo iiō ko repoktak kōn Pata eo an Laļ in kein karuo Elder John A. Widtsoe ekar katakin menin:
“Wāween eo de in n̄an kaļōk juon jukjuk in pād eo eaenōm̧m̧an ej n̄an kaļōk m̧aan im kōrā ro me rej iakwe im rikōm̧m̧an aenōm̧m̧an. Kajjojo armej, kōn katak eo an Kraist im kabun̄ eo An, dāpij ilo pein make aenōm̧m̧an eo an laļ in.
“Menin ej kōm̧m̧an bwe in eddoik aenōm̧m̧an eo an laļ in, im kōm̧m̧an an kajjojo bōk eddo kōn aenōm̧m̧an eo an laļ in. Eddo in ejjab maron̄ em̧m̧akūt n̄an bar juon.”15
Tarin jiln̄uul iiō tokālik, bar juon ritōl eutiejl an Kabun̄ in, Elder G. Smith, ekar katakin ejja m̧ool in wōt:
“Eļan̄n̄e kajjojo armej en kar wōr ippāer aenōm̧m̧an ilo jetōb eo an, innām enaaj kar wōr aenōm̧m̧an ilo baam̧le eo. Eļan̄n̄e ewōr aenōm̧m̧an ilo kajjojo baam̧le, innem elōn̄ aenōm̧m̧an ilo laļ eo. Eļan̄n̄e ewōr aenōm̧m̧an ilo laļ ko, ewōr aenōm̧m̧an ilo laļ in.
Jen jab al wōt, jen kōm̧m̧an aenōm̧m̧an ilo laļ im en jino ippa,’ ak jen m̧ool ilo ad kōm̧m̧ane. Kōm̧m̧an bwe en aō kōttōpar—am̧ kōttōpar.”16
Juon iaan bwebwenato in Kūriijm̧ōj eo aō em̧m̧an tata ippa ekar waļo̧k ilo Deseret News ium̧win 30 iiō ko rem̧ootļo̧k. Ej kwaļo̧k kōn juon leddik 11 an iiō im ta eo ekar ekkatak kōn an inepata kōn an jab bōk menin letok eo an me ekōņaan im an aenōm̧m̧an im e ilo an ekkatak meļeļein ta eo jej kemeeme kōn menin letok ko ilo iien Kūriijm̧ōj. Ij kwaļo̧k menin eļaptata kōn ajri ro im jodikdik ro ilubwiljid.
Leddik in me 11 iiō dettan ekar buromōj kōnke ekar jab bōk tole eo nejin ekāāl me elukkun to an kar kōņaan.
Kajjieon̄ leļo̧k kaeņōm̧m̧an, jinen ekar ba, Kolukkuun rūtto n̄an men rōt kein. Elukkun ke rūtto n̄an Kūriijm̧ōj? leddik eo ekar bwūlōn̄. Jemān ekar kōmeļeļeiki:
Aō jitōnbōro, leddik jidikdik in ejitōnbōro. Eļap metak, im lan̄lōn̄, ilo am̧ rūttoļo̧k. Ejjab, ajri en nejū, kwojjan̄in rūtto n̄an Kūriijm̧ōj. Juon men eo eļap an aorōk ej waļo̧k n̄an kwe. Kwoj rūttoļo̧k n̄an am̧ kile elōn̄ men ko me rem̧ūlaļ ļo̧k im ļap aorōkin meļeļein ijjeļo̧kin āinwōt juon ajri kwar maron̄ meļeļe kake. … Em̧ōj am̧ kar ron̄ me ej ba bwe jej leļo̧k menin leļo̧k ko ilo Kūriijm̧ōj kōnke rilale sip ro im rimālōtlōt ro rekar bōkļo̧k menin leļo̧k n̄an Ajri Kraist, ak ij ba n̄an eok kōn m̧ool in menin letok eo jinointata an Kūriijm̧ōj.
Jemān ekar kam̧ool kōn iakwe eo eļap an Jemedwōj Ilan̄ n̄an eo Nejin Erūtto tata, “eo me eto an ettā n̄an E ilubwiljin elōn̄ poktak ko im jum̧ae im eo ekar barāinwōt jipan̄ E ejaake juon laļ eo me jej pād ie.” Ekar ba n̄an e wāween an Jemedwōj Ilan̄ kar letok n̄an kōj Nejin, Irooj Jisōs Kraist, bwe en ad Rilo̧mo̧o̧r.
Ekar riit jān Bok in Mormon wāween an in Nejin, “naaj wanlaļtak jān lan̄ ilubwiljin ro nejin armej, im naaj jokwe ilo ānbwinnin kle. … Im lo, Enaaj en̄taan kōn kapo ko, im metak in ānbwin, kwōle, maro, im kijeļo̧k, em̧ool eļapļo̧k jān armej emaron̄ en̄taan, ijello̧kun wōt n̄e n̄an mej; bwe lo, bōtōktōk enaaj itok jān aolep ānbwinnin, āindein naaj ļap in An en̄taan kōn jero̧wiwi ko im mennin jōjō ko an armej ro An. Im naaj ān̄inn̄in E Jisōs Kraist, eo Nejin Anij, Jemān lan̄ im laļ” (Mosaia 3:5, 7–8).
Kilōk bok eo, jemān ekar kōmeļeļeiki:
“Men̄e Jemed Ilan̄ ekar jeļā men kein repojak n̄an Eo Nejin Ejitōnbōro, E, kōn iakwe eo An ejjeļo̧k jem̧ļo̧kin im An mālōtlōt, kar aje E n̄an laļ in. Im m̧ōttan eo kein karuo kōn menin letok in em̧m̧an tata ej bwe Kraist, eo Nejin, ejeļā, barāinwōt, aolep men kein, kar leļo̧k n̄an E kōn m̧ool in bōro bwe je maron̄ bōk mour indeeo.
Iiō ko tokālik, kōrā eo me ekar rūttoļo̧k jān leddik jidikdik in ekar je,
“Ekar juon bon̄ in Kūriijm̧ōj eo jinointata me ikar kemeemej ke ikar jab kiki kōn Kūriijm̧ōj tole eo nejū ilo bet eo aō. Ekar wōr juon aō menin letok em̧m̧anļo̧k. Ilo buruō ekar juon aenōm̧m̧an eo ekāāl im ekam̧ōņōņō. Ikar lo juon menin letok eo me ijjab maron̄ kar kaņōke ak kōjakoiki, juon menin letok eo me ijamin kar eddōkļo̧k kake, ak juon men me, kōn jipan̄ eo an Anij, ij aikuj rūttoļo̧k ilowaan. … Im ikar jar … bwe juon raan enaaj wōr nejū ajri ilo m̧ool, innem inaaj jeļā aolepān Menin Letok an Iakwe.”17
Ij kilōk naan kein aō kōn katak ko an Būreejtōn Russell M. Nelson iiō eo ļo̧k ilo Kūrijm̧ōj Nokon in Jota eo an Būreejtōnji eo Kein Kajuon: “Jisōs Kraist ej menin letok eo em̧m̧an tata an Anij—menin letok eo an Jemān n̄an aolep ajri ro Nejin.”18
“Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.”19
Ij jar bwe m̧ool indeeo enaaj m̧ōttanļo̧k aolep men ko jej kōm̧m̧ani ilo Kūriijm̧ōj jijen in, ilo etan Jisōs Kraist, amen.