E regalo Perfekto
Un aña, rònt di tres dia promé ku un Pasku den di niñes, mi kasá Rob, a deskubrí dos di su rumannan muhé mas grandi den nan kamber ta habri dos di nan regalonan di Pasku sekretamente. Despues, ora ku nan a kaba di wak aden, su rumannan a lora e regalo atrobe. Rob su rumannan a bisé, “si bo no bisa Mama, nos lo mustra bo kon pa hasié.”
Finalmente el a entregá na e tentashon, spesialmente pasó tabatin un pakete di tamaño di un basketbòl bou di e palu di Pasku ku su nòmber ariba.
Sinembargo, e regalo a parse kuriosamente leve ora ku den sekreto el a karg’é pa su kamber. Kuidadosamente el a habrié i a hañ’é bashí, eksepto pa un nota. E nota tabata bisa, “Mi sa kiko bo ta hasiendo. No daña bo Pasku. Ku amor, Mama.” El a siña su lès, i esei tabata fin di e gran kaweta pa wak e regalo di Pasku.
Konsiderá bo rekuerdonan, e bistanan bunita, e sonidonan angelikal, i e holónan inolvidabel ku ta bini na mente ora bo pensa riba Pasku. Mas tierno ainda ta e rekuerdonan ku hopi di nos for di infansia ta karga den nos kurason di e santidat di Pasku—e selebrashon di nasementu di nos Salbador. E sentimentunan sagrado aki nunka ta laga nos.
Nos ta sinti nan kada biaha ku nos refleshoná riba e pesebre chikitu di Bètlehèm ku asina tantu profesianan, durante siglonan, tur a bini huntu bou di un nochi di strea —ora nos Salbador a yega den e mundu aki komo Rei di Reinan i Señor di Señornan.
Hopi biaha nos ta tende ku Pasku ta pa mucha, pero nos tur no ta mucha den nos kurason? Un dia un mama i su yu muhé di nuebe aña tabata masha okupá ku kompranan di Pasku. Segun nan tabata pasa purá den e pakus dor di e sekshon di prenda, e yu a mira un banderin enorme riba e vitrina. Den lèternan kòrá grandi, e banderin proklamá, “E Regalo Ku Nunka ta Stòp di Duna.”
E yu a lesa e mensahe, a kontempl’é pa un momentu, i despues a sonreí. Ku orguyo el a bisa su mama, “Mama, mi sa kiko e regalo ta ku nunka no ta stòp di duna.”
“O, kiko?” su mama a puntra segun nan tabata move lihé den e multitut.
Inosentemente e yu a anunsiá, “Ta Jesus!”
Eróneamente e mama a respondé, “No, Dushi. Ta diamante”
Isaías ta kòrda nos, “I un mucha chikitu lo guia nan.”1
Buskando riba Internèt, mi a haña míles di kosnan di propaganda ku e frase “E regalo ku nunka ta stòp di duna.” Sinembargo kuantu ku nos purba, ningun regalo material ku nos duna lo dura pa semper.
Komo kontraste, permití mi kompartí ku boso un di mi rekuerdonan tierno di Pasku di dos persona ku mi ta kere, nunka a stòp di duna. Nan tabata mi mayornan, Aldo i Eleanor Harmon.
Tabata un invierno ku hopi sneu den nos siudat chikitu e aña ei, pero esei no a stòp mi tata pa sali ku nos famia pa buska un palu di Pasku perfekto. Una bes ku e palu tabata na kas i sigurá den e stándart pa palu, e lusnan rondó, adornonan di angel, i blachinan koló di oro a wòrdu poné ku amor riba e takinan. Nos hogar humilde tabata ofisialmente kla pa Pasku bin.
E katálogo di ko’i hunga a yega den pòst, i mi rumannan i ami tabata bira e páginanan ku animo deseando pa tesoronan di Pasku. E holó di pan di gèmber i bolo di fruta a yena nos hogar, i dezèmber a pasa poko poko riba e kalènder di atvènt. Nos a laga sorpresanan riba stupi di bisiñanan i a purba pa sirbi famianan ku tabata den nesesidat di un tiki di alegria di Pasku.
Kada anochi, despues ku mi a bai kama, mi mama tabata pasa un tempu eksesivo aisla den su kamber. Tur lokual mi por a skucha tbata e sonido di su mashin di kose. Di ummanera òf otro e tabata kose paña asina tantu pa nos ku mi no a pensa mashá di esaki.
Pero segun Pasku tabata serka, mi mama tabata kompletamente kansá. E dia promé ku Pasku e tabata malu na kama. Ora e dòkter a bisa mi tata ku e lo mester keda den kama por lo ménos un siman, mi tabata preokupá—pero tambe hopi desapuntá. Kon Pasku por a sigui sin Mama? Kon por ni sinti manera Pasku? I tambe, ken lo kushiná [e] sena di Pasku?
Segun mi tata tabata kuida mi mama ku amor, el a realisá ku e tarea pa kushiná e sena di Pasku lo ta pa e. Atrobe, mi tabata preokupá! Ounke un hòmber masha sabí i talentoso, kushinamentu no tabata algu ku e por a hasi bon.
Noche buena a haña mi riba mi rudia hasiendo orashon pa mi mama por kura milagrosamente i ku Pasku mainta lo ta manera ku e tabata semper—nos famia reuní rònt di e palu di Pasku. Desepshon a bini riba nos ora ku Pasku mainta nos a haña nos mama ainda masha malu den kama. Ora nos a habri nos regalonan, mi tabata sorpresá pa sa ku mi regalo spesial tabata un surtido di paña pa pòpchi hasí na man ku mi mama a kose pa mi durante e hopi nochi lat di dezèmber. Mi no por a warda pa kore bai na dje i pone mi brasanan rònt di su garganta. Kuantu el a sakrifiká pa mi.
Tata stimá a purba ma tur manera posibel pa hasi Dia di Pasku por sinti normal pa nos e aña ei, mes normal posibel ku tabata por sin Mama. I el a logra. Despues di sena, mi tata dushi a bai soño den e stul banda di e fogon ora mi tabata hunga ku mi rumannan i mi pòpchi i su pañanan nobo. Mi kerida mama a rekuperá despues di hopi sosiegu, i tur kos tabata bon. Pero den mi bida, mi mayornan tabata pa mi un regalo ku nunka no ta stòp di duna.
Laga nos konsiderá e frase aki un momentu. Un regalo ku nunka no ta stòp di duna no por wòrdu konsiderá un regalo perfekto? Promé, un regalo perfekto lo revelá algu tokante di e dunadó di e regalo. Di dos, e lo reflehá algu tokante di e nesesidat di e persona ku ta risibí e regalo. I por último, e regalo, si e tabata realmente un regalo perfekto, lo a tene su balor no djis segun tempu ta pasa pero pa semper.
Nos Salbador stimá, hasta e Salbador di e mundu, no ta kumpli ku e tres rekisitonan aki? E regalo di JesuCristu Su nasementu, ministerio, i sakrifisio ekspiatorio ta revelá algu tokante e Dunadó di e regalo? Klaro. “Pasó Dios a stima e mundu asina tantu, ku El a duna Su Yu únigénito.”2 Nos Tata den Shelu a sakrifiká Su Yu for di amor puru pa nos, Su yunan.
E Regalo di JesuCristu mester demostrá ku nos Tata Selestial sa eksaktamente kiko nos mester? Atrobe, un si enfátiko! Nos ta kaí pa naturalesa, i desesperadamente nos tin mester di un Salbador i Redentor. Manera Nefi a siña, JesuCristu “no ta hasi nada a ménos ku ta pa benefisio di e mundu; pasó E ta stima e mundu.”3
I e último rekisito pa e regalo perfekto? E mester tin su balor pa semper. E Buki di Mormon klaramente ta siña nos ku e Ekspiashon di JesuCristu ta infinito i eterno.4
Boso ta kòrda e banderin di e departamentu di prenda? E hobensita tabata sa pa intuishon kiko e regalo berdadero ta. Den e mundu skur aki, nos ta mira mas leu ku ejoya na e Lus di e Mundu. E Salbador Su mes a siña:
’’Di manera ku, tene boso lus na haltu pa e bria pa e mundu.’ Mira Ami ta e lus ku boso mester tene na haltu.”5
“Ami ta e lus ku ta bria den skuridat.”6
Mi ta testifiká ku Cristu ta e regalo perfekto—e regalo ku nunka ta stòp di duna. Ku nos tur por tin e bèrdat aki den nos kurason e Pasku aki i pa semper. E ta bibu. Den e nòmber sagrado di JesuCristu, amèn.