Tz’aqal xjayal li Ralankil
Jwal nawulak chiwu xq’ehil li Ralankil naq naqach’utub’ qib’ sa’ komonil re xjultikankil xyo’lajik laj Kolol qe li Jesukristo ut re xb’antioxinkil lix yu’am ut lix tojb’al rix li maak. Jwal nawulak chiwu rilb’al reetalil li Ralankil yalaq ta b’ar, ut toj nawaklesiik inch’ool jo’ nawaklesiik sa’ lin ka’ch’inal, ma wankin sa’ li ke aran Inglaterra malaj sa’ li tiq aran Arabia.
Jo’ k’aynaqex laa’ex chixk’ulb’al, sa’ li xamaan xnume’ laa’in ajwi’ xin’ok sa’ yalok-u rik’ineb’ li kok’ luz li tint’uy sa’ wochoch, xb’aan naq ink’a’ neke’lochman. Naq xintaw b’ar wan xjotb’al rib’ ut xinyiib’, chixjunileb’ li kok’ luz xe’lochman, ut xtuqla inch’ool xb’aan li ch’ina q’axok-u xinb’aanu.
Sa’ xq’ehil li Ralankil, ninchunla chixk’atk li che’ re Ralankil chi chupchu li luz sa’ ochoch, ut ninkanab’ li wilob’aal chi hilank re naq taamoyq ru li kok’ luz chiru li che’. Naq moymoy ru, lix saqenkil li kok’ luz naniman ut nalemtz’un chiru li kaqi lem t’uyt’u sa’ li che’. Jwal sa ninkana. K’iila sut, yoo ajwi’ chi ab’imank li b’ich li naxye, “Sahaq eech’ool, li Qaawa’ xchal!”1 ut naq “a’inaq lix k’ab’a’: Aj sachol ch’oolej, Aj k’ehol na’leb’, Li Dios Kaw Xmetz’ew, Li Yuwa’b’ej li junelik taawanq, Li Awa’b’ej re Tuqtuukilal.”2
Naq li kok’ luz najayok wi’chik ru, nink’e reetal chi ak’il lix k’anjel laj Kolol qe, li nak’utunchi saqen ru naq wanko sa’ xyaalal. Chan li Jesus, “Laa’in lix saqenk li ruchich’och’. Li taataaqenq we, ink’a’ taab’eeq sa’ li aak’ab’, wanq b’an lix saqenk li yu’am rik’in.”3 Nink’oxla li santil q’ojyin naq kiyo’la, ut ninb’antioxi naq li Yuwa’b’ej xmaatani chaq li sahil ch’oolejil, li yo’onink, ut li rahok sa’ li ruchich’och’ rik’in li Ralal.4
Wan naq jwal latz’ li qu sa’ xq’ehil li Ralankil ut ch’a’aj xtawb’al xhoonalil li hilank re naq taqak’oxla li na’leb’ a’an. Sa’ diciembre wan li ninq’e ut li wajb’ak, li ch’utam ut li maatanink. Natam li k’anjel, ut wan naq li k’a’ru naqateneb’ qib’ chixb’aanunkil naxram ru xsahilal li Ralankil ruuchil xwaklesinkil.
Aajel ru li aatin kixye li Awa’b’ej Nelson: “Lix sahil li qach’ool ink’a’ nayo’la sa’ li k’a’ru naqak’ul. Nayo’la b’an sa’ li k’a’ru naqataaqe. Naq naqataaqe lix k’uub’anb’il na’leb’ li kolb’a-ib’ re li Dios … jo’ ajwi’ li Jesukristo ut lix evangelio, naru naqeek’a xsahil qach’ool, maak’a’ naxye k’a’ru li nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut xb’aan li Jesukristo. A’an lix yo’leb’aal chixjunil li sahil ch’oolejil.”5
Li Ralankil nokoxtenq’a chi tijok re naq taqatz’il rix k’a’ru li naqataaqe. K’a’ru taawajchoq’ re li Ralankil a’in? K’a’ru tz’aqal aawajomchoq’ re laa yu’am ut choq’ reheb’ laa komon sa’ li santil kutan a’in?
Sa’ wiib’ xamaan chik, ak taak’ulunq li Ralankil. K’e reetal k’a’ru taab’aanu sa’eb’ li wiib’ xamaan a’in. Maare numtajenaq aak’a’uxl xb’aan naq ok re chi tamk naab’al li k’anjel sa’ laa b’een. Ma jwal latz’ aawu? Ma k’aynaq laa tenamit chixb’aanunkil junaq k’anjel li tixtamresi laa k’a’uxl, ut tixram aawu chixk’ulb’al li sahil ch’oolejilre lix yo’lajik li Kristo? Chan ru taak’os ru laa k’anjel sa’ li Ralankil 2019, ut taapa ru laa b’e choq’ re li Ralankil 2020?
Aajel ru naq ink’a’ toolub’q sa’ naab’al li k’anjel toj reetal naq ink’a’ taqak’ul xyaalalil li Ralankil, ut anchal ink’a’ chik tooruuq chi wiq’laak chiru li santil k’uula’al, ut chixyeechi’inkil jun li qamaatan choq’ re.
Ex na’b’ej, ut chiqajunilo ajwi’, ma jwal laatz’ eeru? K’a’ru teetaaqe? Maare sa’ li Ralankil a’in, ink’a’ teetz’iib’a ut teetaqla naab’aleb’ li hu, malaj ink’a’ teeyiib’ k’a’aq chik re ru li xwulak cheru sa’ internet. Lix sachb’al aatumin malaj aahoonal tixkub’si aametz’ew chixk’oxlankil li Kolonel ut chi saho’k sa’ laa ch’ool chirix.
Ex yuwa’b’ej, ut chiqajunilo ajwi’, k’a’ru teetaaqe? Maare sa’ li Ralankil a’in teeyib’ xk’iihaleb’ li maatan sa’ ochochnal, malaj teemaatani li tenq’ank, xb’aan naq xyalb’al eeq’e chixtojb’al li loq’b’il maatan jwal nalub’tesin, ut tixkub’si lee metz’ew chixk’oxlankil li Kolonel ut chi tuqlaak eech’ool chirix.
Wan naq nim wi’chik xyaalalil li k’anjelak sa’ santil ochoch chiru xkutankil li Ralankil. Naxyiib’ li qajayalihom, naxnima li sahil ch’oolejil, ut naxjunajiheb’ li junkab’al sa’ xyanqeb’ li yo’yo ut li kamenaq. Maare texk’anjelaq sa’ santil ochoch ruuchil jalan chik li k’anjel li ink’a’ texxtenq’a chixtawb’al li tuqtuukilal re li Ralankil. Li santil k’anjel a’an—li tuqtuukilal ut li wankilal li naxk’e reheb’ li ani neke’roxloq’i—naru taab’anumanq b’antiox re li K’ajolb’el Junaj Chirib’il chiru li Yuwa’b’ej, li Karneer kamsinb’il “chalen chaq sa’ xk’ojlajik li ruchich’och’,”6 li naqaninq’ehi xyo’lajik anajwan.
Naq haye’k re li Ralankil, chiqab’aanu li k’a’ru aajel ru, ut chiqakanab’ li k’a’ru ink’a’ na’ajman. Chiqab’aanu xk’anjelli Jesus aj Nazaret—xwaklesinkileb’ li ra xch’ool, xk’irtesinkileb’ li rahob’tesinb’il, rula’aninkileb’ li preex, xk’eeb’al xwa li ani natz’okaak ut xt’ikr li t’ust’u, ut xkolb’aleb’ rix li ani maak’a’ xwankil, li tz’eqtaananb’il, ut li xik’ ilb’il.7
Ex li wankex sa’ch’a’ajkilal anajwan, chetawaq li rahok li naxmaatani li Kolonel choq’ eere tz’aqal. Naab’alex ak wankex sa’ li nimla rahilal re xkamik jun laa komon xb’aan yajel, xb’aan li cheeko’k, malaj li k’a’ru xuwajel. Wankex li xek’ul nimla rahilal sa’ jun li Ralankil junxil, ut jwal ra xk’oxlankil wi’chik anajwan. Wankex li yookex chi raho’k xb’aan naq jun lee komon yoo chixtaaqenkil li ink’a’ us. Wankex li nekenumsi junaatal, maa’ani lee junkab’al, wan ch’a’ajkilal, malaj ut k’a’aq chik re ru li ink’a’ k’aynaqex chixk’ulb’al sa’ li Ralankil.
Paab’ahomaqnaq wan tz’aqal jun li maatan choq’ eere sa’ li Ralankil. Sik’ li ch’ina hoonal choq’ re li k’oxlak, li tijok, ut reek’ankil lix rahom li ani xyo’la re xk’eeb’al li sahil ch’oolejil sa’ xyu’am yalaq ani. Naqanaw naq sa’ jun kutan, “ink’a’ chik taawanq li kamk, chi moko li japok-e chi moko li yaab’ak, chi moko li rahilal.”8 “Ink’a’ chik te’tz’okaaq chi moko te’chaqiq reheb’. … “Xb’aan naq li Karneer li wank sa’ xyi li nimajwal k’ojarib’aal tixb’eresiheb’ ut tixk’am xbeheb’ toj sa’ xyo’leb’aal li yu’amha’. Ut li Dios taachaqihob’resinq re chixjunil lix ya’aleb’ ru.”9
Hilan, musiq’an, okan sa’ sachb’a-ch’oolej. Taqsi laa wilob’aal. K’e reetal li maatan—a’an xnawb’al anihat, ut xtawb’al ru naq na’oso’ li ch’a’ajkilal sa’ li yu’am a’in, ut naq li sahil ch’oolejil arin, a’an yal xtiklajik li toj chal re. Chijultiko’q eere, “Lix sahil li qach’ool ink’a’ nayo’la sa’ li k’a’ru naqak’ul. Nayo’la b’an sa’ li k’a’ru naqataaqe.”
“Anajwan ut, nawaj raj xtzʼaamankil cheru naq chesikʼ li Jesus aʼin li keʼxtzʼiibʼa wiʼ resil li profeet ut ebʼ li apostol, re naq li rusilal li Dios Yuwaʼbʼej, joʼ ajwiʼ li Qaawaʼ Jesukristo, ut li Santil Musiqʼej, li nachʼolobʼank xyaalal chirixebʼ, chiwanq ut chikanaaq eerikʼin chi junelik.”10 Re naq taaruuq taqaye, “Yaal, at Qaawa’, yo’lajenaqat. … Chalqex chixnimankil.”11
Sa’ xk’ab’a’ li Jesukristo, amen.