Anera aika A Uanao n Taai Aikai
Kam na mauri n te tairki aei, tariu ao mwaaneu aika tangiraki. I namakina te kakabwaiaaki n tibwangau ni marooro nakoimi n te tairiki aio ngkai ti bukamarua te tai ae moan te mimitong n rongorongon aonaba—rokon Natin te Atua nako aon te aba. Bungiakin Kristo, maiuna, ao Ana Mwakuri ni Kamaiu bon ana bwaintangira Tamara are i Karawa nakoira ni bane.
Ngkai ti bukamarua bungiakin te Tia Kamaiu n te ririki ae kakakurei aio, Ana tangira te Atua ae reitinako man akea tokina e taraa n roota riki nanora, ni buokiira n rairi nanora nakoia ara utu, raoraora, ao kaain rarikira, ao n buokiira n taben nanoia riki nake a namakina te tionako, maroa, ke ake a kainnanoa te karaunano ao te rau.
I aki toki n rootaki bwa, n karakinan baike a riki n tain bungiakin Iesu, ana Euangkerio Ruka e tibwauai tabeua katooto iaon te karaunano ao te rau are a anganaki nake a kunea bwa a mena inanon baikai. Katooto aikai a kona n noraki ngke Tamara are i Karawa ae tatangira e kanakoia Ana anera ni kawaria taan kawakin tibu ake a tionako ma aomata n te tairiki ni katanoata bungiakin Natina, ao ngke taan kawakin tiibu a kawara Maria ao Iotebwa, ake a tabeakina te merimeri n te tabo ae raroa man mwengaia i Kariraia.
Mwanangaia ae abwabwaki Iotebwa ma Maria mai Natareta nako Betereem n anga roon rabwataia bon tiaki te bwai ae e aki baireaki, ibukina bwa inanon tienture, e a kaman taetae ni burabetiiaki irouia burabeti ake ngkoa bwa te Tia Kamaiua te aonaaba e na bungiaki i Betereem, are ana Kaawa Tawita.1 Ti noria bwa Tamara are i Karawa e abwabwaki ana atataii ao ana mwakuri ni baike a uarereke ake a riki n tain bungiakin Natina are Ana Rikitemanna. “Ao ngke e mena iai, ao e a roko naba ana bong ni bung.”2
Ngkana I iangoia aron aia waaki taan kawakin tiibu ao te taanga n ataei ae, Maria ao Iotebwa, I titiraki bwa e kanga kaotiia te taanga n anera nakoia taan kawakin tiibu n te tawaana ao rokoia taan kawakin tiibu n te tabo are a mena iai Maria ao Iotebwa n uota nakon maiuia te raunnano, te rau, ao te kimwareirei.
Ibukiia taan kawakin tiibu, tao a tia anea ni uota te karaunnano are a kainnanoia bwa e kinaiia te Atua ao e nora kakaawakia bwa taan moan kakoauaa Ana tiibuteteei te Atua are e a tibwa bungiaki. Ibukin Maria ma Iotebwa, tao a tia taan kawakin tiibu ni uota te karaunnano are bati kainanoana bwa iai tabeman ake a ataa te kakai ae tabu are a mena inanona.3
Eang, ibuakora bon taan kawakin tiibu n taai aikai—mwaane ao aine ake a mwakuri ni kabwakanakotai n te tairiki ao n moantaai n te ingabong ibukin maiuia. Tabeman mai irouia taan kawakin tiibu aikai bon taan tararua te rau, taan mwakuri n te onaoraki ao taan ibuobuoki n te kabuanibwai, taan mwakuri n titooa ake a uki n te tairki ao n taabo ni bwaa, ao taan kanakobwana. N tabetai ao te mwakuri n te uatei n te tairiki e kona ni karika namakinan akean te reitaki ma naake a bon mwakuri n aoan te mwakuri are e bon tataneiai te aba iai. N reitaki ma anne, iai naba Iotebwa ao Maria n taai aikai ake a tia ni kitana oin abaia ao ake a bon kataia naba ni keiaki n aron te maiu ae boou ngkai a bukamarui taai aika kakaawaki n aron te kakiritimati, rekenibong, taian mare, ao taian mate.
Ngkai ti uakaan ma te Kiritimati, I titiraki bwa ti kona ni katotongia riki anera man kawarakiia taan kawakin tiibu n anga nakoia te rongorongo ae tamaroa ibukin Kristo, te rau, ao te raunnano. Ao I titiraki bwa ti kona ni katotoongia riki taan kawakin tiibu man kaekan te wewete ni kawaria ao ni tobwai kainnanoia Iotebwa ma Maria n taai aikai n ara kaembwa ao ara kaawa ni anga te karaunano bwa te Atua e tangiriia ao e tararuaia man mutiakiniia.
Ngai ao au utu ti a tia n rinanon namakinan te karaunano ao te rau ae a kona n uotia anera ake i bon ibuakora. N te tairiki aei I tangiria n ururing rikaaki iaon teuan te tai ae aekan anne. Inanon 2003 ti mwaing mai abara nako Utah. N tain te kamwaitoro anne, e bon rangi ni korakora buakan te tinooi i Utah nakon ake n ririki tabeua. Ti tuai man nonoora aekakin aei inanon maiura, ngkai ti bon ikawairake ma taian nii ao te bikebike ae bati. Mweengara e mena ni koonan te katabuki i Bountiful are iai ite tabo n nakonako ae abwabwaki iai. Ngke e a roko te tinoo, kainnabau e kabongana te mitiin ni kanako tinoo ma te ninikoria ni kanakoi tinoo man te kawai ao te tabo n nakonako ngkai I a bon tia ni marannako iaon te aiti ao ni mwaota toman baiu ngke I nakonako n te kawai bwa N na kawara temanna kaain rarikira. Te kabuanibwai anne e uotai nakon te korokoro ao e kaibaeaki angau inanon uoua te namwakaina. Ngke e moana kanakoan te tinoo man ara tabo temoan tai inanon maiuna, kainnabau ae tangiraki e aki ataia bwa e riai ni bita tabon te mitiin ni kanako tinoo imwin kaitiakin iteran te kawai are teuana. Ngaia are, ngke e nakon te tabo are te iterana, e a manga tiinako te tinoo nakon are e a tia ni itiaki. E okioki karaoan aei irouna, ao bon akea bongana. E aki reke bwainakina! Ibukina ae e rangi n maan iaan ite kamwaitoro, e rootaki taningana ake uoua n te manaoraki ao e kuri bonotaninga inanon uoua te namwakaina. N te tai naba anne natiu ae tebwi ma onoua ana ririki e ikoaki nukana imwin te takakaro ae te tikii iaon te tinoo ao e bon tiku n ana kainiwene ni kamaoa ikoakina. Ao anne ngaira, temanna ae mena n te kainiwene, temanna e bonotaninga, ao temanna ae kaibaeaki baina, ao ti bane ni mariri. Irou ngai ti bon rangi ni kakamataku irouia kaain rarikira. N teuanga te moaningabong are rangi ni kamwaitoro imarenan 5:00 a.m., I a uti n tangin te mitiin ni kanako tinoo i tinanikun au wintoo. I taraa tinanikun au winto ao I nora kaain rarikiu are maeka ni iteran te kawai are teiterana, Te Tari Blain Williams. E a kan koro itibwi ana ririki, e a tia ni kitana mwengana ae aabue man kamwengaraoi ao e roko n aki ataaki ao e katiaka kawaira ao te tabo n nakonako, ngkai e ataia bwa e kaangaanga karaoan aio iroura. Ao ngke e kaoti n te aro ae rau man bebete aio, temanna riki raraou, te Tari Daniel Almeida, e kaoti ni mwengara bwa e na kabwakaai i Salt Lake ibukin au mwakuri, ngkai I aki kona n turaiwa bwa e rang tinebu kaibaean baiu. A karaoa aei ma te akoi ao te rau ni katoa moaningabong ni karokoa ae a marurung au utu ao ti a kona ni manga karaoi baikai ibon iroura. N tain te Kiritimati ae kamwaitoro anne n 2003, taari aika kanga anera a kanakoaki nakoira, n ai aroia anera ni ibuobuoki ake a kanakoaki nakoia taan kawakin tiibu aika mangori ake ngkoa. Taari aika uoman aikai a tia n ira ara katooto te Tia Kamaiu ao a tabeakin riki kainnanora imwain moa are bon oin kainnanoia.
Tariu ao maneu, maiun Iesu bon te katooto ae tamaroa ni kaotan te tangira ao nanoangaeakiia aomata. E aki toki ni karimoaia aomata nakon moa nanona. A na mwakuri are e anga ngaia e oti n Arona inanon Maiuna ni katoa bong ao ti aki n tii te taina ke n tain te motirawa. Ngkai ti karekea te nano n akoi n aron are e karaoia te Tia Kamaiu, I berita bwa ti na kona n rinanon raoi nanon te Kiritimati. Ngkana e reke te nano anne, I kona n taekina raoi bwa a na kaoti taai aikai bati ike ti na kona iai n anga ara ibuobuoki ma te akoi ao te rau nakoia aomata ake a kainnanoira. Aio e na buokiira ni kinaa riki te Tia Kamaiu ao ni kunea ibon iroura te rau i aonaba ao te nano n akoi nakoia tabeman, are e na, kaotaki n ae mwaiti, te tangira, te rau, ao te korakora ae boou ae bati are ti kona namakinna ao n angania tabeman. Ngkai ti toua mwanekan te Tia Kamaiu, au kaantaninga bwa ti na karekea te ungannano ao te korakora mairoun te Tia Kamaiu. Ngkai ti ukora te Tia Kamaiu ni bwaai ni kabane ake ti karaoi, te Kiritimati e na aki riki bwa ti tebongina ke te taina ma e na riki bwa katein te nano ma te iango, ao te kimwareirei ao te tangira are namakinaki n te Kiritimati e na kaan n taainako. I kakoaua bwa Iesu Kristo,te merimeri are e bungiaki i Betereem, bon ngaia te Tia Kamaiua te aonaaba.
Tekeraoi n te Kiritimati ngkami ni kabane. I a atong bwaai aikai n aran Iesu Kristo, amen.