Te Euangkerio n Rau
N tain te Kirimati aio, aonaaban Kiritian ae bwainin a bukamarua bungiakin Iesu Kristo, are “Uean te Rau.” Ti bane ni kimwareirei n ana katanoata te anera ni bungiakina anne:
“Ba e bungiaki n ana kaawa Tawita n te bong aei te Tia Kamaiu, are bon Kristo te Uea. …
“Ao a karina naba ni mena iroun te anera kaini karawa aika uanao ni kamoamoa te Atua ao a kangai,
“E na neboaki te Atua ike moan te rietata, ao a na raoi aonaba; a na akoaki aomata.”1
Te kabwarabwara ae tamaroa n te kawai are Kiritian a karinea te Tia Kamaiu bon taeka ake e korei Charles Dickens ibukiia oin natina:
“Natiu aika tangiraki, I rangi ni ingainga bwa kam riai n ataa te bwai teuana ibukin Rongorongon Iesu. Bwa a riai aomata ni bane ni kinaa Teuarei. Akea ae e a tia ni maeka, ae e rangi n raoiroi, ae rangi n aamarau, ao ae rangi n nanoanga ibukiia aomata ni kabane ake a karaoa ae kairua.”
Anne ana kabwarabwara Dickens. Aio ana kainiin:
“Uringnga!—Te Katei ni Kiritian bon karaon ae raoiroi n taainako—aio naba nakoia naake a karaoa ae buakaka nakoira. Bon te Katei ni Kiritian tangiraia kaain rarikira n aron tangirara ibon iroura, ao ni karaoa nakoia aomata ni kabane are ti tangiria bwa a na Karaoia nakoira. Bon te Katei ni kiritian te aamarau, te nanoanga,ao te kabwarabure, ao kaawakinan anua akanne n te aro ae raba n oin nanora, ao n aki kanikatonga iai, ke n ara tataro ke n ara tangira ibukin te Atua, ma n aki toki ni kaotia bwa ti tangiria man karaon bwaai ni kabane n etiia ma te nanorinano. Ngkana ti karaoa aio, ao n uringa maiun ao ana reirei Ara Uea Iesu Kristo, ao ni kataia ni mwakurii, ti na kaantaninga ma te aki nanokokoraki bwa e na kabwarai burera ma kaairuara te Atua, ao e na kakorakoraira bwa ti na maiu ao ni mate inanon te Rau.”2
N aron are koreia Dickens, “maiun ao ana reirei Ara Uea Iesu Kristo” e kariira nakon te rau. Te Abotoro Bauro e arana ana reirei Ara Tia Kamaiu bwa ana “euangkerio te rau.”3
Te taeka ae rau e mwaiti nanona inanon booki aika tabu. Ngke e taku Iesu, “Ke mena iroumi te rau,” E oti raoi kabwarabwaraan te aekaki n rau are e katanoataa te Burabeti Itaia: “Ao ana mwakuri te raoiroi bon te rau, ao korakoran te raoiroi bon te rau ma te aki nanokokoraki n aki toki.”4 Te Tia Kamaiu e kakoroa nanon te taetae ni burabeti anne. E kabwarabwaraa: “Bwaai aikai I a tia n taekin nakoimi, bwa irou kam na karekea te rau.”5
N ana kabanea ni kaetieti, te Uea Iesu Kristo e tuangiia ana Abotoro, “Te rau i roumi, I anganingkami au rau: I aki anganingkami n ai aron te aba, ngkana e anga. A na tai rawawata nanomi,ao a na tai maku.”6
Boni imwiin anne, n Rokona nakoia aika raoiroi n te aba ae boou, te Tia Kamaiu e mwanewei ana taeka Itaia aikai: “Ao natimi ni kabane ana reireiaki iroun te Uea; ao e na bati te rau irouia natimi.”7
Te reirei are e anga te Tia Kamaiu n taekan te rau ni maiun temanna te aomata e nanonaki naba n te rau n te utu, te rau n te aba, ao te rau n te aonaaba.
Te Tia Kamaiu ao ana Aboroto akea riki aia burokuraem ibukin te rau n te aonaaba irarikin maiuakinan te raoiroi iroun temanna ma temanna. Akea te bwai ae a karaoia ni kaitaraa ana tautaeka Rome ke aia tautaeka taan kairoro ni kaawa. A tataekina te raoiroi iroun temanna ma temanna ao a reirei bwa natin te Atua a riai n tangiriia aia kairiribai8 ao “ni maeka ma te rau ma aomata ni kabane.”9
Te buaka ma te itabaraara a roko man te buakaka; te rau bon uaan te raoiroi. Ana kakabwaia te euangkerio e tabangaki, ao ai uana naba ibukin te rau: tou mwiin ana tua nako te Atua.
Beretitenti Howard W. Hunter e reirei aio:
“Te rau are e ukoukoria te aonaaba bon tain akean te kakaaitara, ma aomata a aki ataia bwa te rau bon te waaki are e roko nakon te aomata tii man tuua ao aaro are e katei te Atua, ao akea riki te kawai irarikin aio. …
“…Ngkana ti rairaki nakon te aomata ao ana kawai nako te aonaaba, ti na kunea te kangaanga ao te aki oota. Ma ngkana ti rairaki nakon te Atua, ti na kunea te rau ibukin te tamnei ae kua. …
“Te aeka n rau aio e kamanoira man kangaangan te aonaaba.”10
Ni kaotioti ni boong aikai ti wareka: “Ma reiakinna bwa ane e karaoi mwakuri aika a raoiroi e na karekea kanoangana, ae te rau n te aonaaba aio, ao te maiu ae akea tokina n te aonaaba ae e na roko.”11
Te rau bon ana berita ara Tia Kamaiu, ao te rau bon ara kouru. Te rau ae beritanaki aio bon aron te maiu ao te rau are roko man kaawakinan Ana tua nako. E taku Beretitenti Spencer W. Kimball:
“Te rau bon uaan te raoiroi. E aki kona ni kabooaki n te mwane, ao e aki kona ni booraraoiakinaki ke ni kaaibibitaki. E riai ni mwakuriiaki.”12 Ti anenea, “E karewe te rau are e uotia te euangkerio,”13 ao n teuana te anene n taromauri ti bootaki n anenea te anene n tataro aio:
“Ke kaoti te rau n te aonaaba
Ao ke waaki mai irou.”14
Ti aki kona ni karekea te rau imarenaia aaba nako ngkana tiaki moa karekea te raoiroi ae tabangaki ibuakoia aomata ake a maeka iai. N ririki ni kaangaanga n te Kauoua ni Buaka Unimwaane John A. Widtse e reirei aio:
“Te kawai are a na tii kona iai ni kateaki kaawa aika rau bon man karikirakeaia mwaane ma aine aika a tangira man kakaraoa te rau. Temanna ma temanna, man ana reirei Kristo ao Ana Ekaretia, e taua inanon oin baina te rau n te aonaaba.
“Anne e anganai katabeau ibukin te rau n te aonaaba, ao e angani ngkami katabeami ibukin te rau n te aonaaba. Te tabe aio e aki kona n kamwaingaki nakon temanna riki.”15
Tao tenibwi te ririki imwiina, temanna riki te mataniwi ni kabuta, Eldred G. Smith, e reirei te koaua naba anne:
“Ngkana temanna ma temanna e reke irouia te rau n tamneia, ngkanne e na reke te rau n te utu. Ngkana iai te rau n utu nako, ngkanne iai te rau n te aba. Ngkana iai te rau n aaba nako, iai te rau n te aonaaba.
“Ke tiaki tii anenea, ‘Ke mena te rau iaonteaba ao ke waaki mai irou,’ ma ti riai n nanonna raoi. Karikia bwa au kouru—am kouru.”16
Teuana ibuakon karakin te Kiritimati ae I tatangiria e boreatiaki n te Deseret News inanon 30 te ririki n nako. E karakina te ataeinnaine ae 11 ana ririki ao te bwai ae reiakinna rinanon marakina ngke e aki karekea te bwaintangira are tangiria ao ana rau n ataakin nanon baike ti bukamarui n bwaintangira n tain te Kiritimati. I tibwaua aio riki ibukiia ataei ao te roronrikirake aika ibuakora.
Te ataeinnaine ae 11 ana ririki e nanokaawaki ibukina bwa e aki karekea te taoree ae boou are e kaman tangiria.
Ni kataia n anga te karaunano, e taku tinana, “Ko aaki roro nakon bwaai akanne.” E a tia ni “bwakanako ma te Kiritimati? e titirakina natina . Tamana e kabwarabwaraa:
“Natiu ae uarereke, ae moan te tangiraki. E bati te maraki, ao te kimwareirei, n te tai n rikirake. Tiaki, natiu, ko tuai bwakanako ma te Kiritimati. Iai riki te bwai ae kaakawaki are e na riki nakoim. Ko a ikawai rake n nooria bwa e mwaiti bwaai aika a nano man kakaawaki riki nanoia nakon are ko oota iai ngke ko ataei. … Ko a tia n ongo ae taekinaki bwa ti anga bwaintangira n te Kiritimati ibukina bwa taan kaawakin tiibu a uoti bwaintangira nakon Iesu te Ataei, ma N na tuangko te moan bwaintangira n te Kiritimati.”
Tamana e kabwarabwaraa ngkane ana tangira ae abwaabwaki Tamara are i Karawa ibukin Ana karimoa ni mwaane, “are e tia ni kakaonimaki nakoina rinanon te kaangaanga ao te kakaaitara ae bati ao are e a tia ni buokia naba ni karika te aonaaba are ti maeka iai.” E tuangnga bwa Tamara are i Karawa e a tia n anganira Natina, te Uea Iesu Kristo, bwa ara Tia Kamaiu.
E wareware man ana Boki Moomon bwa te Nati aio “e na ruo ma te mwaaka mai karawa, nako buakoia natiia aomata, ao e na maeka i nanon te rabwata ae mamate. … Ao nooria, e na rinanon te kaririaki, ma marakin te rabwata, te baki, te taka, te korakai, n riaon riki bwaai ake e kona n rinanoi te aomata, are e na aki mate iai; bwa taraia, e na waanako te raraa man bwangabwangan kunin rabwatana ni kabuta, e na rawawata korakaina ibukin buakakaia ma aia mwakuri ana botanaomata aika bati n ribaki. “E na aranaki bwa Iesu Kristo, ae Natin te Atua, ae Taman karawa ma te aonaaba” (Motiaea 3:5, 7–8).
E kaina te boki, ao e kabwarabwaraa:
“E ngae ngke Tamara are i Karawa e atai bwaai aikai bwa a bon riki nakon Natina ae tangiraki, n Ana tangira ao wanawanana ae akea tiana, e anga Ngaia nakon te aonaaba. Ao kauouan mwakoron te bwaintangira ae kamiimi aio bwa Kristo, te Nati, e atai, naba bwaai aikai, e anga Ngaia ma nanona bwa ti aonga ni karekea te maiu ae akea tokina.”
Ririki imwiina, te aine aei are e a ikawai ngkai e koroboki:
“Anne te moan tairiki n te Kiritimati are I kona n uringnga bwa I aki matu ma au taoree ni kakiritimati iaon uningau. Iai riki au bwai ae tamaroa. Inanou bon te rau ae boou man korakora. I a kunea te bwaintangira are e aki kona n uruaki ke ni bua, te bwaintangira are I aki kona n bwakanako ma ngaia, ma teuana ae, man ana ibuobuoki te Atua, I riai n rikirake inanona. … Ao I tataro … bwa n te bong teuana ngkana a reke oin natiu, ao ngkanne E na reke irou bwaninin ana Bwaintangira te Tangira .”17
I kaina ana reirei Beretitenti Russell M. Nelson n te ririki ae nako n ana Bwabwaro te Moan Beretitentii n te Kiritimati: “Iesu Kristo bon ana bwaintangira te Atua ae akea kabotauana—ana bwaintangira te Tama nakoia natina ni kabane.”18
“Ba E tangiria aomata te Atua n te aro are E anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”19
I tataro bwa te koaua ae akea tokina anne e na ninianako bwaai ni kabane ake ti karaoi n tain te Kiritimati aio, n aran Iesu Kristo, amen.