12CRAVEN -1
Ana Botaki n Taromauri ni Ka Kiritimati te Moan Beretitentii
Ritembwa 6, 2020
Te Bautaki n te Kunikai ao Te Inga mai Karawa
Iroun Titita Becky Craven
Kauoman ni Kauntira, Beretitentii ni Kabuta irouia Kairake n Ataeinnaine
Au moan ururing ae mamaten nanou ibukin te Kiritimati e riki ngke 6 au ririki. Bon tairikin te Kiritimati, ao I matu iaon te kainiwene ae kataboro mai ieta ae I uaia ni kamanena ma tariu ae uarereke ni mweengara i Berline, i Tiaman. E bon rangi n tokarake nanou ibukin rokon ingabongin te Kiritimati—I rangi ni ingaraake are e aki reke ae N na manionako n matu, ibukina bwa inanon auan te tairiki anne I a uti man tangitangin beero. Ngkanne I a ongo karongoan ara mataroa ni uki ni karaurau. Ngke te oota man te ruu are teuana e a teke matau iai, I waetata n teirake n tara te mataroa. Te bwai are I noria I a bon aki kakoaua! Te aomata are tei inanon kawain te mataroa bon Santa Claus. I bon kakoaua raoi bwa—Bon ngaia! E tatakarua, “Ho, ho, ho,” ao ngkanne e tuangai bwa N a rimwina nakon te ruu ni katangaina n noora uran te Kai ni Kiritimati. I mimi ao n aki kona n taetae, ma I ruo rikaki n te kai n tamwarake n au kainiwene ao n rimwina nakon te katangaina ike tinau ao mwaneu ae e ikawai a tei irarikin te kai. Ma ngke I tarataranako, I aki noora au karo—e aera E na katibanakoa aei? E taku tinau bwa akea bwa e uotanako te maange, ma nooria e maan n tuai n oki! Ni karokoa te bong aei I nanokawaki bwa e aki reke ana tai n noora Santa Claus. E titiraki Santa ngkana te ataeinaine ngai ae ongotaeka, ao I kukurei n taekinna bwa I ongotaeka. Imwiin kakoauakina bwa e katonga te kuukii ao te miriki are ti katauraoia ibukina, I oki rikaki ni matu ao tabeua te aoa imwiina, I uti ni ingabongin te Kiritimati ae kakukurei.
Tibun kainabau te mwane, Heaton Lunt, e rang kaokoro ingabongin ana Kiritimati ngke te ataeinimwane ae maeka n aia tabo kain Mexico n te 1800 tabun. E taekina te karaki aio n rongorongona: “E roko te Kiritimati, ao ti n nea te tibu ni nena iaan nneia maan, ike e abue iai, ibukina bwa e a bon tino aontano n te tai anne. I moantaai n nako ni ingabongin te Kiritimati bwa N na noria bwa e uara au tiibu. I ongo te tangitang n te tabo ni man te tang ae maaraara. I rinako ao I noora Nelly ma uoman tiibu aika uarereke—taian bwebwe. I kabanea biriu n oki … [ao] I uboi baiu ao I taku nakon tinau, ‘I a tia ni karekea te kabanea n tamaroa ni Kiritimati ibukimi ni kabane: O. Nelly e a tia ni bungiia uoman tiibu aika uarereke.’ A bane ataei ni kitan kanaia te aoranti ao bwaai iaon te taibora, ao a biri nakon te tabo ni man n noori tiibu aika uarereke ake natin Nelly. Bon te kamimi ae korakora nakon bwaai nako aika ti karekei n te Kiritimati.”1 Kamimina, ni bon te ririki are imwiina ao ririki ake imwiina, a bungiaki tiibu aika boou nakon ana tibu Heaton ni ingabongin te Kiritimati.
Ngke I moan ongo te karaki aio, nanou ao au iango a waetata ni katikaki nakon iangoan te Tibu riki temanna ni moan bongin raoi te Kiritimati: Ana Tibu te Tei te Atua. N aekan Heaton are biri n nako n noori ana tibu aika boou, I iangoia taan kawakin tibu ni kawaetataia n noora Natin te Atua. Kam kona ni katamneia te bwai are a noria n te tabo ae tabu man mangori? I iangoa aron Iotebwa n tabeakina buuna are, Maria, ngke a iangoa bungiakin te Metia ae beritaaki. Taekan Maria n aron mwanean natina ae uarereke n niniria n te kunikai ma te tangira.
N te tai ae tibwa nako ti butimwaea tibura te aine nakon ara utu. I matakuakinna ngke tinana e ninira natina n te kunikai ae aabue, ao ni bwabwakoia ni kaniia. N niniria nanona ni bautia ni kakooa. Kunikai aika ninira ao burangketi a bon kamanenaaki inanon rooro ni kamwengaraoa ao n akoako, ao ni kamwengaraoa te ataei ae aki rau. Ngke I matakuakina ai natira te aine n ninira natina ae tibwa bung, I iangoia tabeman ake a na kainanoa te ninira n tangira, tao ae kanakoaki n te witeo. Te taeka n akoi, te taninga ae kakauongo ke te nano ae atatai e kona ni kamwengaraoa ao ni bauta kainanon tamnein temanna.
Tao teniua te ririki n nako, ai natira te mwane e rotaki ni kangangan te aoraki ae korakora. Ni kakaeakin bukin aorakina, e rinanon tutuo aika mwaiti ao mwakuri are n tokina e a kainanoaki te korokoro nakon buroona. Ngke koreaki ai natira te mwane, natira te aine e kanakoa te rongorongo nakoia ana koraki buuna bwa a na ataa taekan natiia. Man te tabo ae raroa n te aba teuana ike a mwaakuri n aia mition, ai tinana e kaeka n taeka ni karau nano aikai: I a kanakoa nakoim te inga mai karawa.”
Bon tabeua te tai imwiina, te neeti e rinnako ma e a manga tei. E tarai matan natira te aine aika a on n ranimata ao n tuangnga ngkana e na tangira te burangketi, ma e aki kariaia, e taku bwa e RAOIROI. E a nako te neeti ma n te tai ae waetata e oki ma te burangketi ae aabue. E ninira iai natira te aine ao e taku nakoina, “I namakinna bwa ko kainanoa te inga mai karawa.”
Ana Tibu te Atua, e ataaki naba bwa te Tia Kawakin Tibu ae Raoiroi, e ataia Ana Nanai n tatabemania. Inanon ara tai ni kainano, E aki toki ni kanakoia aneran aonnaba, n aekan te neeti are nanoanga nakon natira te aine, ni bautiira ao n rabwatira ni baina n Ana tangira.2 E roko n uota te rau n te aonaaba ao te akoaki nakoia aomata ni kabane.3 E karau nanoia ake a kainanoa karauan nanoia ao n tang ma ake a tang.4
Ngkana I iangoi ana kawai aika a mwaiti te Uea n tangirira ao n tararuaira n tatabemaniira, I namakina te nano ni kan karaoa ae raka riki n tibwa te tangira anne ma tabeman. I kan atai riki taian inga n tangira mai ikarawa ake I a tia ni karekei ma I waeremwe ni karabwarabwa ibukiia.
N te aonnaba ae rang kainanoa te rau, ara taeka aika riai, ara mwakuri n nanoanga ao n akoi a kona n nanonaki bwa niniran temanna n te burangketi, n tangira. I ataia bwa mwaitin ae ti karaoia ni kan karaoan te mwakuri ibukiia tabeman, a na mwaiti riki burangketi mai karawa ae e na anganira te Uea bwa ti na kaonono iai. Tera bwaika ko a tia ni karekei? Antai ae ko ataia ae e kainanoa te inga mai karawa? Arora nakon temanna ke arora aika raraoi rinanon te intanete a kona ni karika te kaokoro inanon maiun temanna ae tangiraki, ke te iruwa.
I tataro ngkai ti bukaamarua bungiakin ara Tia Kamaiu bwa ti na aki tii namakina Ana tangira, ana nanoanga, ao ana rau, ma ti na tibwai kakabwaia aikai nakoia tabeman. Ngkai I iangoa te bwai n tangira ae Ana Tibu Tetei te Atua, te ataei ae niniraki ao ni kaweneaki ni nneia maan n amwarake, I a manga taekina ana taeka Heaton te ataei. Boni ngaia “te kabanea ni korakora ni kamimi ni bwaai ni kabane ae ti karekea [ke ti na karekea] n tain te Kiritimati.”5
N aran Iesu Kristo, amen.