Bwaintangira mai Karawa
Iroun Beretitenti Russell M. Nelson
Ritembwa 6, 2020
Tariu ao mwaneu aika kam tangiraki, aio te tairiki ae bon rangin n tamaroa. A atia n rotaki tamneira man taian katangitang ao taian rongorongo. Titita Craven e a tia n ringii nanora n ana rongorongo iaon te inga mai karawa ao te burangketi ni karaunano. Ana rongorongo unimwaane Nielson e a tia n rotiira ngke e karakina maiun tamana, are e aki rereke ana tai ni Kakiritimati ibukin ana beku n te tanga ni buaka ianon tenua te ririki ae reitinako. Unimwaane Holland e a tia ni kairiira ni mwaakan te tamanei ngke e reireiniira aron maiun te Tia Kamaiua te aonaaba.
Ngkana I kona n anaa te tai aei ni karabwai ngkami ibukin ami kaeka nakon au kakao are kam na kaotii ami kakaitau iaon bwaai ni kaongora ibukin ara kakabwaia aika mwaiti. Mirion ae a kaeka. Ao I rangi ni kakaitau riki ngkai kam reitinako n tataro ni katoa bong nakon Tamara are i Karawa, ni kaitaua ibukin Ana kairiiri, kakawakin, iango mai iroun te tamnei, ao, ae moamoa riki, ibukin Ana bwai n tangira Ana Rikitemana, Iesu Kristo.
Te Kiritimati e kaokii iango aika tamaroa. Ni bon te ririki ae nako, Ngai ao Wendy e reke ara tai ni bukamarua te bong ni kiritimati ma te teinnaine ae kakateke, Claire Crosby, are e anenea anenen te Kiritimati. Tao na tibwa ara tanmei are ti raweia ibukin wakinan “Kaotaan te Aonaaba”.1
N aron are e kauringiira iai Unimwaane Holland, ni koauana te tairiki ae kakawaki are e riaon uoua tenga te ririki nako bon te tairiki ae tabu man bungiakin Temanna are e a kaman taekinaki bwa e na uota te rau nakon te aonaaba ao ni karika te akoaki imarenaia aomata.2 E bungiaki Iesu Kristo bwa e na kakabwaiaia aomata nako, ake rimoa, ngkai, ao n taai aika a na roko.
E ngae ngkai ti anenea, “E Rau te Bong,” ti ataia bwa maiun te Merimeri mai Ierutarem e aki moanaki ikekei, ke e toki iaon Kaewari. N te maiu are imwain te maiu aei, Iesu e katabuaki iroun Tamana bwa te Metia, te Kristo, te Tia Kamaiu ao te Tia Kabooia aomata ni kabane. E a kaman rineaki bwa E na mate ibukira. “E kaikoakaki ibukin riaoan tua iroura [ao] ni maraki ibukin ara kairua.3 E roko bwa e na karika te aki mamate bwa e na riki ao te maiu are akea tokina bwa e na reke nakoia ni kabane ake a na roko n te maiu aei.4
Are nanona bwa ngaira ni kabane ti na manga kautaki—ni ikotaki ma naake a tangiraki ake a kaman mate n tain te kangaanga n te ririki aei, ao are a maeka ngkai ni iteran te rabuna are teuana. Nanona bwa ngaira ni kabane ti kona n reitinako n rikirake. Nanona bwa ti kona ni karekea te kantaninga ibukin bwaai aika a tamaroa bwa a na riki.
Ko a tia n iangoia bwa e aera te Uea e rineia bwa E na bungiaki n te tabo are e bungiaki iai? E kona ni bungiaki n taabo riki tabeua n te aonaaba. Ma e rinea te aba are E karikia bwa e na tabu.
Iesu e bungiaki i Betereem. Te taeka n Ebera, bet lehem, nanona “te auti ni bwerena.” Ai nakoraoira bwa Ngaia, bon te “bwerena ni kamaiu,”5 are e na roko man te “auti ni bwerena.”
Bungiakina e riki n te tabo ae mangori ibuakoia maan. Ikekei “Ana Tiibu te Tei te Atua”6 e bungiaki n tain te Toa are Teriao ibuakoia maan ake a tauraoi ibukin te Amarake n angakarea. Ao n te bong teuana, E na “kairaki n ai aron te tiibu te tei nakon te kamateaki.”7 E bungiaki bwa Te Tiibu te tei ao te Tia Kamaiu.
Ni bungiakin Teuare ngaia ae e aranaki bwa te “tia kaawakin tiibu ae tamaroa,”8 taan kawakin tiibu bon ngaiia taan moan karekea te rongorongo iaon Bungiakina ae tabu.9
Ni bungiakin Teuare ngaia ae e aranaki bwa te “itoi ni ngaina,”10 e oti te itoi ae boou i karawa.11
Ni bungiakin Teuare ngaia bon “otan te aonaaba,”12 te rotongitong e buanako man te aonaaba bwa kanikinaean Bungiakina ae tabu.13
E bwabetitoaki Iesu n te tabo n ran ae moan te mangori n te aonaaba, ni kanikinaea arona n rinanon te kangaanga bwa e aonga ni kamaiura ao n arona ngke E na tokanikai iaon bwaai nako—ni manga, kamiura.14 Man Ana banna ni katooto, E reireiniira bwa ngaira naba, ti kona n tokanikai man ara kangaanga nako ake ti kaitarai—nanokawakira, mamarara, ao tabeaiangara—n roota are ieta are bon arora ae kakukurei ao rikira ae mairoun te Atua. A kona n riki aikai bon man Ana akoi ao Ana nanoanga.
Ribuakon mautereteren ao bubun te rereua, te Tia Kamaiu e reireia taian reirei aika a ti kona ni butimwaeaki irouia naake ataia bwa aekakira aron te bwatakataka ni kan mooi.
Nakon te aine are n te mwanibwa, e reirei Iesu:
“Ane moi n te ran aei e na manga taka:
“Ma ane e mooi n te ran ae N na anganna ao e na bon aki manga taka; ma te ran ae N na anganna ao bon te mwanibwa n ran inanona ae koburake nako nanon te maiu are aki toki.”15
Te kibu aei e kauringai te taneiai ae tamaroa are I rinanona ma Unimwaane Mark E. Petersen.16 N te tai anne bon ngaia kaain te kooram n Abotoro n te Tengaun ma Uoman, ao bon imwaain weteau nakon te kooram anne, E reke au tai n iria nakon te Aba ae Tabu are e kakoauaaki bwa bon ana kabanea ni mwananga n te maiu ae mamate aei.
E rotaki Unimwaane Petersen n te aoraki ae te kaentia. Inanon te tairiki are e rangi n rotaki iai n te maraki, I kata au konaa n kabebetea. I noria bwa e kona n amwarake ao ni moi ma bon tii teutana. N te bong are imwina, e baireaki bwa ngaia ae na anga te maroro ae kakawaki.
E roko te ingabong. Ma te ninikoria, e mwananga Unimwaane Petersen nakon meangin mataniwin Namani Kariraia, ike e tataningaaki irouia aomata aika mwaiti. E rineia bwa E na reirei man ana Reirei te Tia Kamaiu iaon te Maunga. Ngke Unimwaane Petersen e taekina te mwakoro are “A kabwaia akana barua te raoiroi,”17 a onrake matana n te ranimata. E katuka ana taeka are e koreia, e taraia aomata, ao n titirake, “Ko ataia bwa tera raoi aron ae te baki ao te taka?” I ataia bwa e bon ataia. Ngkanne e reirei, “Ngkana ko bon kona raoi ni baki ao n taka ibukin te raoiroi, ngkanne ko kona n riki n ai aron Kristo.” Unimwaane Petersen bon ngaia te banna ni katooto n te maiu ae aron anne. E aki maan imwiin anne, e a tae ana kai man te maiu ae mamate aei.18
Ngkana I uringa te bora ni baki ao te bwatakataka ibukin te raoiroi, I uringa te Abotoro ae karineaki ae kabanea ana kabanea ni marooro n reirei bwa tera raoi nanon te ukeuke n rimwiin te Uea Iesu Kristo, ni baki ao n taka ibukin te raoiroi, n riki raoi n ai Arona.
N te ririki aei, Titita Nelson ao ngai ti moantaai ni mwakuri iaon tabera n ara Kiritimati n te tangira ibukiia ara utu. Ni moan Nobembwa, e a kaman taekina Wendy ae tia tauraoi nakon te Kiritimati. Au kaeka ae tawe bon, “O, e rang n tamaroa! Ngkai tia kabotoa ara iango iaon te Tia Kamaiu.”
Inanon te ririki ae akea aekakina mai imwaina, ngkai angiia aomata n te aonaaba a korakai n rotaki man te buti n aoraki ae kabutaa te aonaaba, bon akea riki te bwai ae kakawaki ae ti kona ni karaoia n te Kiritimati aei nakon riki katuruan ara iango iaon te tia Kamaiu ao iaon te bwai n tangira bwa tera raoi nanon Maiuna nakoira.
Tamara are i Karawa ae tangira “e tangira aomata, n te aro are e anga Natina ae te riki-temanna iai, ba e aonga n aki mate ane onimakinna, ma e na reke i rouna te maiu are aki toki.”19
Natin te Atua ngkanne e berita nakoira bwa “ane maiu ma n onimakinai ao e na bon aki mate.” 20 Te bwai ae akea arona, ae akea kabotauana ni bwai n tangira mai iroun te Tama ao te Nati!
I karabwa te Atua ibukin te bwai n tangira ae Ana Rikitemana ae Tangiraki. Ao I karabwa te Uea Iesu Kristo ibukin Ana anga karea ae akea kabotauana ao ana mition. Ngke E moan roko, Iesu e roko kanga ni karaba. Ma ni Manga Kauaokina, mimitongin te Uea “a na kaotaki ao bwaai ni kabane aika maiu a na noorai”21 Ngkane E na “riki bwa aia King King ao n tautaeka bwa aia Uea Uea.”22
Ngkai ngai, ana toro ae kariaiakaki te Tia Kamaiu, I tangiria n taekina nako aomii n tatabemanii ngkami te kakabwaia, tariu ao maneu. Kam na kakabwaiaaki ma ami utu n te rau, ma te kona n ongo bwanaan te Uea, ao ni karekei kaotioti ma te konabwai ni namakina ana tangira te Tama ao Natina bwa a tangirii ngkami, a tabe ibukimii, ao a tatauraoi ni kairiia nikabane naake a uokoukoriia. I reitaki ma ana taeka Moronaai ao“ n tuangkami bwa kam na ukoukora Iesu aio ake a korea rongorongona burabeti ma abotoro, bwa e aonga n ae ana akoi te Atua te Tama, ao te Uea naba ae Iesu Kristo, ao te Tamnei ae Raoiroi, … a na tiku iroumi n aki toki.”23 Aikai I a taekin n aran Iesu Kristo, amen.