Mii n te Tairiki
2020 Ana Botaki n Taromauri ni Ka Kiritimati te Moan Beretitentii
Tabati, Ritembwa 6, 2020
Tein te tabo ae taekinaki bon te tabo ae rangi n rau, te moan tairiki n tain te tiburing. Karawa e rang itiaki, ma itoi ake a rikirake n oti otaia i karawa a moa man bwi, imwiina bubua, ao n tokina a ngaa. Taan kawakin tiibu a kakaea te tabo ae mwaitoro ni motirawa iai man kabuebuen riringan te ngaina ao te korakai imwiin te mwakuri koaua. Te bwai ae aki ririki—ma e rang n tamaroa—bwai ake a taraaki n te tamnei aei bon nnen kanaia maan iaon te maunga n uakaan ma te kaawa, are uoman aomata a katenaia i etan te merimeri are e wene n nnen kanaia maan, ma tabeman maan ake a kakoaua n te kamimi ae a tibwa nooria.
Naaka teniman aikai, ake akea raraoia ke aia koraki n te kaawa are i Betereem ae ibetutu, bon, te moan, te kairake n tina ae baraoi ae te naweai ae arana Maria (tao kaain te roro are e katauaki ni iein n aia katei), are ninikoriana ao ana onimaki ae e ootara a rang n anaa te nano ibuakon bwaai ake a tia n rekootinaki inanon koroboki aika a tabu. Te kauoman, bon kainnaban neienne ae arana Iotebwa, ae ikawai riki nakon buuna ma, man te kabwarabwara ngaia te mwaane are te kabanea n tau iaon te aba ae kona ni kaikawa te teei ae tiaki raoi natina are e a riki bwa natina, ngkana e teimatoa te maiu, e riki ngaia bwa Iotebwa te karo n te maiu n tamnei. Te kateniman, ao te kabanea n tikiraoi ibuakoia ni kabane: te teei are e na aranaki bwa Iesu, ni wene n te ninira iaon te uteute ae te kabanea n itiaki are e kona ni karekei te karo.
Teuana te kakakai aei, te tabo ae aki nonoraki are e kaweneaki iai bwa akea te merimeri ae e a tia ni bungiaki ae e a kaman ataaki rongorongona, are e a kaman koreaki taekana, are e rang korakora kaman kakantaningakina. Ni koauana, ataakina bwa antai ao tera Arona e waaki n abanuean karawa imwain bungiakiia aomata! Ngkai ana moan nati te Tama1 n te aonaaba n tamnei, E a tia n rineaki ikekei bwa ena riki bwa te Tia Kamaiua te aonaaba,2 e a kaman rineaki bwa e na riki bwa “te Tibu te teei are e tiringaki ibukin aan te aonaaba.”3 Imwiina, ma bon imwain bungiakina, E riki bwa Iehova ae korakora n te O Tetemanti, are e buoka Noa ni kamaiuia ana utu n tain te ieka4 ao n taratara Iotebwa ngke e kamaiuia ana utu n tain te rongo.5 Ngaia Iehova ae karineaki are e aranaki bwa “Moan te Raoiroi, Te Tia Reirei, te Atua ae Mwaaka, te Tama ae e Akea Tokina, Uean te Raoi.”6 Ngaia bon te Arebwa ao Omeka7 n te baire n nanoanga ae korakora are n tokin te tai e na “tataekina te rongorongo ae raoiroi nakoia akana a nanorinano; … ni bautiia akana a uruaki nanoia, … n tuatuangiia taenikai te kanakoaki, ao akana a kabaeaki [kaukan] te nne ni kababae.”8
Ni katiaan aei, E na toutou nneni taonan kureebe ni kabooan maiura i bon irouna ao n tii ngaia, n akea raona are e na Buokia ao akea kain karawa are e kona n raonna. Ni uotii rawawata ni kabane n te maiu n rabwata, E na uota te bwaintangira ae akea kabotauana n te kamaiuaki nakoia utuia aomata mairoun Atam ni karokoa tokin aonaaba. N te kawai ae bwanin iaon Kawaina, E na riki bwa “te Tia Kawakin Tibu ao te Bitiobi n tamnei [ra],”9 te kabanea n “Rietata n Ibonga n nakoara,”10 te bwaro n ran ae akea boona “n te koburake n ran ibukin raoiroi ni kabane.”11 Ni kabane mwakuri n rabwata ao kairoro aikai a na bane ni kakoroaki bukiia. Ma tiaki n te tairiki are bungiaki iai Iesu. Tiaki n te tairiki aei. Ikai E riki bwa te merimeri inanon bain te tina are e tangiria, n tararuaki iroun te karo ae rau man korakora.
N te tai ae waekoa taan kawakin tiibu akanne a roko ni kanikinaea te waaki ae te kabanea ni mangori ao ni kainnano irouia aomata n aia mwakuri. Imwiina, Uea a roko, taan rabwakau mai mainiku, kanikinaean te tokanikai ae rietaata are karekea te aomata ao aomata aika kaubwaia ao aia mwakuri. Iaoia ni kabane—ae kakaawaki iaoia ni kabane—anera a roko n anenea “E na neboaki te Atua ike moan te rietata,”12 e koaua ae kain karawa aika uanao a neboa te merimeri aei are e a ruo nako aon te aba n tokin te tai. A tia anera, ni bon, kanikinaea raoi te kawai n tataekina nakoia aomata taekan rokon te tia Kamaiu. Te anera e roko nakon Maria n anga te rongorongo ae moan te tamaroa n te bwai are e a rineaki nako iai bwa e na karaoia ao are e na mena inanona.13 Te anera e roko iroun Iotebwa n anganna te ninikoria bwa e na kainrou ma te ataeinnaine are e a kaman bikoukou inanon te kakai, te rongorongo are e kakaonimaki ni ira nanona.14 Imwiin bungiakina, te anera e tuangiia taanga aikai bwa a na birinako—birinako ni kararoa a na tiritiri Erote iaoia aika akea aia bure (ataei aika uarereke ake taan moan Kiritian n tiringaki n te Nu Tetemanti), ao te anera naba anne e tuangiia taanga bwa ningai are a na kona iai n oki mai Aikubita ma ana aki maeka i Beterem ke i Ierutarem ma n te aba ae raroa i Natareta.15 E matata, aneran karawa a atatai riki nakoia aomata iaon te aba ni kaineti ma te bwai are nanonaki n te bungiaki aei ao n ana mition te ataei, are e na atongaki bwa “[e anai] rawawatara, ao n [uoti] nanokawakira … [ni] kaikoakaki ibukin riaoan tua iroura, [ao] e maraki ibukin ara kairua: [ao e na reke raura] man te kangaanga are e rinanona; ao [bwa] ti [kamaiuaki] man ikoakina.”16
I bon irou, e kakaawaki bwa ni kabane a kabwaranakoaki n te tairiki, te tai anne ngke a rau mwatireti ao kainnano a kaweneaki ni kamotirawaaki, ngke a taekinaki tatatro, ngke a kantaningaaki kaotioti ao kain karawa a rangi ni kaan. N te taina n te ririki, te tairiki ngke natira a kuri n aki kona ni kamatui mataia ibukin te kimwareirei are inanoia ibukin te bwai are e na riki nakon te ingabong are a ataia bwa ingabongin te Kiritimati. Eng, E ngae n anne kangaanga ake a riki n ara bong, miira n te tairiki anne e kona ni kanakoraoi bwaai ni kabane. N aron are Unimwaane Parley P. Pratt e koreia n te taina:
“Te Atua e a tia ni kaoti kaetieti aika a mwaaiti aika kakaawaki … rinanon te mii. … [Ikanne] taian ia [a] aikoa maraki, ao rabwatan te aomata ae mamate e wene ni matu n rau [ni motirawa, ao] … bwain rabwatan te tamnei … a marooro ma Atuan karawa, … ma anera, ao ma tamneia aomata aika a tibwa kakororaoaki.”17
Ao aio te tairiki ae kamiimi, ae ni koauana “kantaninga ao maaku ni kabane n te ririki”18 a kakoroaki bukiia n te mii i Betereem.
N te tairiki anne i karawa i etan Iuta
Te Itoi ae kamimi e kaotanako otana nakon te aba inano,
Te mwaane ae mataki e [kakae nako] inanon matuna,
Ao e mii [bwa] e manga nooraba.
N te tairiki anne ngke a ongo te anene taan kawakin tibu
Aia kuaea anera a anene,
Te mwaane ae bonotaninga e mwaing man ana tabo ngke e matu,
Ao e mii [bwa] ea kona ni manga ongo.
N te tairiki anne inanon aia auti maan
Te Tei ao te Tina a matu [n aki taetae],
Te [mwaane] ae mwauku e kamwakura tomanrina ae rairaki,
Ao e mii [bwa] e a kona [n nakonako].
N te tairiki anne iaon te merimeri ae tibwa bungiaki
Maria ae tatangira e teirake ni mwanoka te merimeri,
Te rebera ae rawawata e moangare ni matuuna,
Ao e mii [bwa] e a itiaki ao akea reberana.
N te tairiki anne ngke E mamma iroun tinana
Te Uea ae te merimeri e mwaneaki raoi,
Te kabekau e matu ma te kukurei,
Ao e mii [bwa] e a kaitiaki ao e aki kabuakakaaki n ana bure.
Te tairiki anne ngke e wene inanon nen kanaia man
Teuare e Katabuaki, are e roko bwa e na kamaiua aomata,
Te mwaane are e a tia ni mate e mii ibukin te kantaninga,
Ao e mii ae ai akea te ruanimate.19
I katikua iaomi, bwa au bwai ni Kakiritimati, te mii i Betereem. Ao I karaoia n aran te merimeri are e kakoroi nanon mii aikai bwa a na riki, ae te Uea Iesu Kristo, amen.