12nielson
Fas Presidensi Krismes Divosen
6 Disemba 2020
Prins blong Pis
I Kam long Elda Brent H. Nielson
Blong Presidensi blong Olgeta Seventi
Long wan nara taem bifo, long wan ples longwe, longwe long ples ia, papa blong mi, Norman Nielson, i bin wan yangfala man we i stap spendem nambatu aot long fo yia blong faet long Pasifik eria long Wol Wo 2. Oli tekem pikja blong hem hemia long fored blong tenet blong hem; hem i wan speselis we wok blong sutum daon ol plen, we i stap laef long ol dakbus blong Papua Niu Gini. Long Krismes Dei long yia 1943, taem hem i bin raetem leta ia i go long wido mama blong hem: “Olsem we bae yu luk long deit blong tedei, hem i Krismes. Mi wekap long 7 klok moning, kakae, mo afta go wok kasem 3 klok aftenun. Mi go daon long krik blong wasem klos mo swim. Long sapa tunaet, mifala i kakae smol pis teki, sam kumala, kon, sos, mo grep pae. O, mi wantem tumas stap wetem yu mo famli long homples, we mi pusum leg andanit tebol, mo kakae evri samting we yumi stap kakae olsem oltaem taem we yumi bin stap tugeta bifo. Mifala i no hapi tumas we Krismes katen blong mifala i no kasem mifala bifo Krismes. Plante long mifala i no kasem wan samting long Krismes ia. Mi tingbaot se, plante taem, yu talem se bae yu neva mestem wota kasem taem we wel i go drae.”
Long las yia, waef blong mi, Marsia mo sista blong mi, Susan, tufala i bin raetemdaon histri blong papa blong mi, abaot ol fo yia ami seves blong hem long taem blong Wol Wo 2. Tufala i putum tugeta evri leta we hem i bin raetem i gohom long mama blong hem. Mi mas talem se taem mi ridim sore Krismes leta ia, mi no save bilivim hemia. Nomata se hemia i no impoten long hem, from se hemia papa blong mi, we mi lavem hem, mi bin wantem blong jenisim ol samting we i bin hapen long Krismes Dei ia. Mi talemaot hat blong mi: “Hamas safaring nao bae yang man ia blong Aedaho i save tekem i go?” Hem i lusum papa blong hem we i ded long hat atak taem papa blong mi i gat 12 yia nomo. Mama blong hem i lukaotem hem, oli sendem hem i go long ami, mo naoia i stap long dakbus long medel blong wan strong faet. ?Bae hem i no save kasem wan presen long Krismes? Taem mi stap tingting i go long situesen blong boe ia, mi filim Spirit i toktok long mi: “Brent, yu yu save se stori ia i finis olsem wanem. Long en, papa blong yu i bin kasem presen ia we i moa impoten, mo i laef long wan laef we i fulap long fet, wetem Krismes olsem fevret taem blong hem long yia.”
Taem mi stap rid i go moa long histri blong papa blong mi, mi kam long wan long ol las leta blong hem long mama blong hem, long Febwari 1945. Long ol fo yia blong hem, anda long lidasip blong Jenerol Douglas MacArthur, hem i bin faet long Dawin, Ostrelia, i go long Papua Niu Gini, i go long Leti Golf long Filipin, mo long en long Manila, ples ia we ami seves blong hem i finis mo hem i gobak hom. Plante taem we hem i bin spendem long wo ia, i no gat eni miting blong Jos Ia blong Jisas Kraes blong Ol Lata-dei Sent, be taem hem i bin kasem Filipin, kolosap long en blong seves blong hem, hem i bin save faenem wan miting blong Jos. Afta we hem i go long miting ia, hem i raetem intresting leta ia i go hom long mama blong hem: “Mi go long Jos yestedei, be mi no kea tumas long toktok we i kamaot. Mama, plante samting we bifo oli impoten long mi, naoia oli olsem nating nomo. Mi no stap tokbaot bilif blong mi long God, we i strong gud nomo i stap, be mi lukluk long God olsem wan man we i gat lav, mo i andastanem man, be i no olsem wan man we oltaem i stap blong panisim yu from evri mistek we yu stap mekem.”
Wanem Spirit i bin tijim mi, i we, tru long ol bigfala taem blong tes, mo from hem i bin tekpat long wan nogud wo we plante soldia, nes, selman, plen-man, mo pipol we i no gat rong long tugeta saed, oli bin lusum laef blong ol, nao papa blong mi i bin faenem presen ia—hem i faenem tru spirit blong Krismes. Hem i bin lanem se wan Papa we i stap long Heven i bin lavem mo andastanem hem, mo i stap lukaotgud long hem. Moa impoten lesen blong laef we hem i bin lanem, i hemia: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”1 Long wan taem we i pusum hem i go kasem ful paoa blong hem, papa blong mi i faenem wan Papa long Heven we i gat lav mo i kaen. Wanem we papa blong mi i faenem, i tekem pis mo glad, mo hapines long hem insaed long wan wol ia we i fulap long fasfas tingting, mo harem nogud mo safaring. Taem hem i lego wo i stap, hem i tekem presen ia i gohom wetem hem.
Mi mi no save se bae mi save stanap strong long ol hadtaem we papa blong mi i bin fesem long ol trifala Krismes ia we hem i longwe long hom, be mi mi save se lesen we hem i bin lanem, mo mi mi lanem, i we, tru presen long Krismes taem, we Papa blong yumi we i Stap long Heven i givim, i Sevya ia, Jisas Kraes. Long Krismes ia, from ol situesen long wol, sam long yumi i stap long ol situesen longwe long famli, o no save luk famli we i stap kolosap. Sam long yumi, bae oli save filim olsem papa blong mi long Krismes Dei ia long yia 1943. Maet bae yumi askem yumiwan se from wanem yumi no kasem eni presen, o visit. Be, sapos yumi lukluk i go antap, long God mo stap laef, bae yumi faenem se Jisas Kraes i presen ia we i moa bigwan. Taem yumi openem presen ia, bae i givim yumi ki blong wan laef we i gud tumas mo i gat pis.
Long Mak, japta 4 long Niu Testeman, ol disaepol blong Sevya oli gat wan eksperiens we i mekem oli fraet tumas. Oli bin stap long wan bot wetem Sevya long Si blong Galili, taem wan strong win i girap. Ol disaepol oli bin fraet, mo Sevya i toktok long olgeta, i talem: “?From wanem yufala i fraet olsem? “?Yufala i no bilif yet?”2 Wetem voes blong givim oda, Sevya i mekem ol win mo ol wef oli stap kwaet. Nao ol disaepol oli askem strong kwestin ia we mi askem yufala blong tingting hevi long hem long Krismes ia: “?Wanem man ya? !Nating we win mo wota, be tufala i harem tok blong hem, tufala i obei long hem!”3 Bae mi traem ansarem kwestin ia. Jisas Kraes hem i “‘Nambawan Man blong Givhan long Man, God we i Gat Paoa, mo Papa we bambae I Stap Oltaem, mo Pikinini ya blong King, we Hem i Stamba blong Pis.”4 “Se from hem, mo tru long hem, mo aot long hem, ol wol oli stap mo oli bin krietem olgeta.”5 Hem i Sevya mo Ridima blong yumi; Hem i Fasbon blong Papa.
Aesea i tokbaot Sevya long wei ia: “?Weswe? ?Yufala i no save? ?Yufala i no harem stori blong hem? Hae God ya, hem i God we i stap oltaem, mo bambae i stap gogo i no save finis. Hem nao i mekem olgeta samting long wol ya. Neva hem i save kam taed, neva hem i save harem se i slak. Be olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta, i stap mekem olgeta oli strong bakegen. Bambae oli girap olsem we oli gat wing olsem bigfala pijin ya igel. Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.”6
Wetem pikja ia nao Sevya i stap invaetem yumi evriwan long Krismes taem ia, mo oltaem, “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi mi mekem we yufala i spel gud. From we mi mi wan kwaet man, mo tingting blong mi i stap daon. Mo … bambae yufala i save faenem pis long laef blong yufala. From we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.”7 Invitesen blong Hem i kam long yumi, i blong “kam.”
Hop blong mi, long Krismes taem ia, i we, nomata situesen blong yumi, i nomata se yumi stap wea, mo i nomata se yumi seperet long famli o fren, bae yumi tingbaot se Hem, Sevya Jisas Kraes, Hem nao i presen ia; se, taem yumi kam long Hem, bambae Hem i mekem ol hevi trabol oli no hevi; bae yumi faenem niu samting abaot Hem, semmak olsem papa blong mi i bin faenem long medel blong wan rabis wo. Sevya i talem: “Mi nomo mi givim pis ya long yufala. Mo pis ya we mi mi givim, i no olsem pis we ol man blong wol oli save givim. Yufala i no letem tingting blong yufala i trabol, yufala i no fraet.”8 Taem yumi stap trastem Hem, bambae Hem i faenem pis mo hapines, i nomata situesen blong naoia.
Mi wisim yufala evriwan wan Meri Krismes, mo mi prea se, long yia ia, taem wol ia we i taed i stap glad, bambae yufala i kasem mo luksave presen ia we wan Papa we i gat lav i bin givim long yumi taem we Hem i bin letem sakrifaes blong Stret Pikinini Ia Nomo blong Hem, i hapen. Mi mi witnes blong Papa long Heven ia we i gat lav, mo Pikinini blong Hem we i stret evriwan, we i Prins blong Pis. Long nem blong Jisas Kraes, amen.