Ol Drim blong Betlehem
Ples ia i kwaet, olsem we neja i givim long wan naet we i stap kam long wan eli Springtaem. Ol skae oli klia gud, wetem samfala sta oli stap kamkamaot, plante grup blong ten, mo handred mo laswan, taosen. Ol man blong stap lukaot long sipsip oli glad long ples mo spel long hot blong dei mo taed blong wan ones hadwok. Wanem we i defren—be i naes tumas—hem i pikja ia long wan haos blong animol antap long saed blong vilej, we i soem wan man mo woman we i holem kolosap long tufala wan bebi we i ledaon long ples blong kakae blong animol mo stap witnesem spesel taem ia.
Olgeta trifala ia, we oli no gat fren o wan we i glad blong help long bisi taon blong Betlehem, oli, faswan, wan naes yang mama, nem blong hem Meri (maet hem i jes wan yang gel folem ol kastom blong tetaem ia), we i gat strong paoa long tingting mo strong fet we i save tajem man, olsem oli raetemdaon long skripja. Nambatu, hem i hasban blong hem, Josef, we i moa olfala long yangfala waef blong hem, be, wan man we i moa klin inaf long wol ia blong lukaotem wan bebi we i no pikinini blong mit mo bun blong hem, be i wan we, long taem i kam, bae i kam papa blong Josef long saed blong spirit. Nambatri, laswan mo hemia we i moa naes, bebi ia we bae oli singaotem Hem, Jisas, we oli kavremap long wan naes taet kaliko mo i ledaon long drae gras we i klin gud we wan papa i save pikimap.
Fani samting abaot tru kwaet pikja ia, we oli no tokbaot tumas, i we, i no gat wan bebi i eva bon i kam long wol, we oli bin save plante finis abaot Hem, mo oli wet long plante samting aot long Hem. !I tru! !Save ia abaot huia Hem, mo wanem bae Hem i mekem, i bin stat finis long ol ples long heven, bifo eniwan i bin bon i kam long wol ia! Olsem Fasbon blong Papa1 long wol blong ol spirit, oli bin jusum Hem finis blong kam Sevya blong wol,2 we oli bin odenem Hem finis blong Hem i “Smol Sipsip ia we oli kilim hem i ded stat long stat blong wol.”3 Afta, be bifo Hem i bon i kam long wol ia, bae Hem i Hae Jehova blong OlTesteman, we i bin helpem Noa blong sevem famli blong hem long taem blong bigfala wota i ron,4 mo i helpem Josef blong sevem famli blong hem long wan taem blong kaekae i sot.5 Hem i Hae Jehova ia we, sam long ol nem blong Hem oli, Gudfalawan, Kaonsela, Hae God, Papa we I No Gat En, Prins blong Pis.6 Hem, Hem i Alfa mo Omega7 insaed long bigfala plan ia blong sore, we bae long en, bae i prijim gud nius long olgeta we oli no stap flas; … i hilim olgeta we hat i brok, … i talem se ol man we oli slef oli kam fri mo bae i openem ol doa blong kalabus long olgeta we oli prisena.8
Blong mekem hemia i hapen, bae Hem i purumbut long masin blong waen we i pemaot man, fulwan mo hemwan, we i no gat fren long wol ia i helpem Hem, mo i no gat fren long heven we i save mekem. Taem bae i tekem evri sin mo harem nogud blong wol ia, bae Hem i tekem i kam presen ia we man i no save andastanem, we i fasin blong sevem ful famli blong man, stat long Adam i go kasem en blong wol. Long ful rod blong wokbaot blong Hem ia, bae Hem i Gudfala Man blong Lukaot long Sipsip mo Bisop blong sol blong yumi,9 bigfala Hae Pris blong ol wok blong yumi,10 fri springwota blong evri stret mo gud fasin.11 Evri diuti ia mo wanem i nid blong mekem long wol ia, i stap yet blong yumi mekem. Be i no tunaet. I no long naet ia. Longwe, Hem i jes wan bebi we i stap long han blong wan mama we i lavem hem, we wan papa we i naes mo strong i lukaotgud long hem.
I no longtaem afta, ol man blong lukaot long sipsip oli kam, we i simbol blong ol fasin blong wol ia we oli moa daon, mo olgeta man we oli moa pua mo wok blong olgeta we i moa daon. Afta, ol king oli bin kam, Ol Waes Man blong Is, we oli simbol blong ol wok blong wol ia we oli moa hae, oli simbol blong ol man we oli moa rij mo wok blong olgeta we oli moa hae. Antap long evriwan—antap long evriwan stret—ol enjel oli kam, oli singsing “Glori long God, Hem i Hae tumas;”12 wan bigfala grup blong ol pipol blong heven oli presem smol bebi ia we i kam nao long wol ia. Ol enjel, i tru, oli makem rod we i go long haos blong animol ia blong plante handred yia. Afta, wan enjel i bin kam long Meri blong mekem bigfala anaonsmen long hem we i talem wanem God i bin jusum hem blong mekem mo hu nao God i bin jusum hem blong kam.13 Wan enjel i kam long Josef blong givim hem paoa long tingting blong maredem yang woman ia we, olsem wan mistri, i gat bel finis, mo hem i wan komanmen we hem i fetful blong obei.14 Afta long bebi i bon, wan enjel i talem long yang kapol ia se bae Herod bae i kilimded olgeta we oli no gat rong (ol smol pikinini we oli ol fasfala man we oli ded from Kristin fasin), mo wan enjel i talem long kapol wetaem bae oli aot long Ijip mo gobak, blong stap longwe long Nasaret be i no Betlehem, o iven Jerusalem.15 I klia se ol enjel long heven oli bin save plante moa samting bitim ol man long wol ia long saed blong mining blong taem Jisas i bon i kam long wol ia, mo misin blong Hem, we i blong “karem … ol sobodi blong yumi”; blong “oli stap wipim hem from ol fasin nogud ya blong yumi; blong “hem i karekil from ol sin ya blong yumi. Panis ya we hem i kasem, i mekem we yumi gat pis. Nao ol sobodi ya we hem i karem,i mekem yumi i gud bakegen.16
Long miwan, i impoten tumas se evri samting ia oli stap hapen long naet, taem ia we ol masel oli nomo soa, mo yumi spel from yumi taed, taem we oli talem prea finis, mo yumi wet long revelesen, mo taem olgeta long heven oli stap kolosap long yumi. Long wan taem long wan yia, naet i taem we ol pikinini oli no save sarem ae from glad ia we i boel insaed long olgeta, from oli save se tumoro bae i Krismes. Be i nomata se dei i bin had olsem wanem, ol drim blong naet oli save mekem evri samting i kam stret. Olsem we Elda Parli P. Prat i bin raetem long wan taem:
“God i bin talemaot plante impoten instraksen tru long revelesen we oli olsem ol drim. … Afta, ol string blong bodi oli nomo taet, mo ful bodi ia we i save ded i slip long kwaet ples mo … ol pat blong spirit bodi oli toktok wetem God, ol enjel, mo spirit blong olgeta we oli stret, oli kam stret gud evriwan.”17
Mo i bin olsem long naet ia blong sapraes, we, i tru, ol hop mo ol fraet blong evri yia,18 oli bin hapen long ol drim blong Betlehem.
Naet ia we, long skae blong Judia
Mistri Sta i saenem laet blong hem,
Wan blaen man i wekap long slip blong hem,
Mo i drim se ae blong hem i open.
Long naet ia we, ol man blong lukaot long sipsip oli harem singsing ia.
Wan grup blong kwaea blong ol enjel oli kam kolosap
Wan man we sora i fas i wekap
Mo i drim se sora blong hem i open.
Naet ia we, long haos blong buluk,
Pikinini mo Mama i silip.
Wan man we i no save wokbaot i tanem hem,
Mo i drim se hem i save wokbaot.
Naet ia we, niufala bebi i bon
Taem we naes Meri i girap mo luk hem,
Wan wetem leprosi i smael long slip blong hem,
Mo i drim se skin blong hem i klin.
Naet ia we, long jes blong Mama blong Hem
Smol King ia i filim se Hem i sef,
Wan woman blong rod i slip we hem i hapi
Mo i drim se hem i kam klin evriwan.
Naet ia we, long haos blong animol,
Hem we i Tabu i slip, we Hem i kam blong sevem man,
Wan i muv i go long slip blong ded,
Mo i drim se i no gat gref i stap.19
Mi livim wetem yufala, olsem Krismes presen blong mi, ol drim blong Betlehem. Mo mi mekem hemia long nem blong bebi ia we i mekem evriwan long ol drim ia oli kamtru, we i nem blong Lod Jisas Kraes, amen.