12NIELSON-0
Primera Presidencia Navidagua Devocional
Diciembre 6, 2020
Pe Príncipe de Paz
Élder Brent H. Nielson rupive
Setenta Presidencia-gua
Ambue ára ha ambue tendápe, mombyryete ko’águi, che ru, Norman Nielson, ha’ékuri peteĩ mitãkuimba’e ohasáva ary mokõiha yrundýgui oñorãirõvo Pacífico frente-pe Segunda guerra mundial-pe. Ha’e ha’ekuri peteĩ especialista anti-aereo oikóva hína peteĩ tienda de campaña Papúa Nueva Guinea selva-pe. Navida ára 1943-pe ohai ko karta isy viúdape: “Rehechakuaaháicha fecha-re estedia Navida. Apu’ã a la 7.00, arambosa ha upéi amba’apo 15:00hr peve, ha upei aguejy arroyo peve ajohéi hag̃ua che ao ha ajahu hag̃ua. Ore sénape ko pyharépe ro’u peteĩ pavo pehengue’imi, batata, avati, adereso ha torta pasa de uva rehegua. Hi’ãnte ningo chéve aĩ ógape nendie ha familiakuéra ndie amoĩvo che py mesa guýpe ha ha’u jeývo opa umi mba’e ja’úva jepi ñaĩrõ guare oñondivepa umi pokã ary ohasávape. Roñembyasy ore pakete navideño nog̃uahẽimo’ãi haguére Navida mboyve. Heta ore ndorohupytýi mba’eve Navida rehe. Chemandu’a erehague chéve heta jey ndajahechanga’uiha pe y ykua ikã meve”.
Ary ohasava’ekuépe, che rembireko Marcia ha che hermana Susan ohai che ru rembiasakue umi irundy ary servicio-gui Segunda Guerra Mundial aja. Ombyaty hikuái opa umi kárta ohai’akue isýpe. Ha’eva’erã amoñe’ẽvo upe Navida kárta oñembyasýva, ndaroviasei’imiha. Ikatu kóva ojogua peẽme vyrorei, ha katu ha’égui che ru, ahayhúvape, amoambuesékuri oimeháicha umi oikova’ekue upe Navida árape. Ha’e asy che py’ápe, “¿Mboy jehasa’asy piko ogueropu’akakuaa ko mitãkaria’y Idaho-gua?”. Operde itúvape oguerekorõguare 12 áño peteĩ atáke cardiaco rupi. Isy omongakuaa chupe, oñehenói ehérsitope ha ko’á g̃a oiko selva-pe peteĩ ñorairõguasu mbytépe. ¿Ndaikatúi piko orresivi peteĩ regalo jepe Navidápe? Ajepy’amongetávo hembiasakuére, añandu pe Espiritu oñe’ẽrõ chéve: “Brent, nde reikuaa mba’éichapa opa ko tembiasa. Nde ru ipahápe ohupyty pe regalo iñimportantevéva ha oikove henyhẽvo jeroviágui, ha Navida ha’ékuri hi’époka favorita pe arýpe”.
Amoñe’ẽvévo che ru rembiasakue, ag̃uahẽ peteĩ ikárta paha isýpe febrero 1945-pe. Umi irundy ary aja general Douglas MacArthur sambyhy guýpe, ha’e oñorairõkuri oñepyrũvo Darwin. Autralia-pe, ohasávo Papúa Nueva Guinea, golfo de Leyte Filipinas-pe ha, ipahápe Manila-pe, opahápe iservisio militar ha oho jey hógape. Hetave ára oservi aja guerra-pe ndaipóri Iglesia de Jesucristo de los Santos de los Ultimos Dias-gua reunión-kuéra, ha katu og̃uahẽvo Filipinas-pe, iservísio opakuévo, ojuhu peteĩ tupaogua reunión. Oasisti rire upe reunión-pe ohai isýpe ko kárta iñinteresánteva: “Kuehe aha tupaópe, ha katu nacheinteresái guasu umi oje’éva. Che sy, heta mba’e ko’ág̃a vyroreíma chéve yma iñimportantevaicha’akue . Nañe’ẽi hína che jerovia Tupãre rehe, imbaretéva jepiguáicha, ha katu ahecha Tupãme peteĩ persona oporohayhukuaáva ha ipy’aporãva ramo, ha’e rangue peteĩ oĩva tapiate nde’ári ndehavira hag̃ua peteĩ teĩ mba’e rejapovaíva rehe”.
Pe Espiritu chembo’é’akue ha’e jehasa’asy vai árape, ohasávo peteĩ ñorairõguasu vaiete rupi heta soldado, enfermera, marino, aviador ha civil-kuéra iñinosénteva mokõive ládogui omanohápe, che ru ojuhu hague upe regalo: ojuhu pe Navida espíritu añetéva. Oaprende oguerekoha peteĩ Túva Yvagagua ohayhúva, ontende ha oñangarekóva hese. Upe tekove ñehekombo’e iñimportantevéva oaprende’akue ha’e kóva: “Tupã ohayhuetereígui opa yvypórape, ome’ẽva’ekue Ta’ýra peteĩete, ani haguã omano umi hese ojeroviáva, ha katu oguereko hag̃ua vida eterna”.1 Umi momento hasyvévape, ojejopyhápe ikatuha peve ogueropu’aka personalmente, che ru ojuhu peteĩ Túva Yvagaguápe oporohayhu ha oporoiporiahuverekóva. Ha upe ojuhúva ome’ẽ chupe py’aguapy, vy’apavẽ ha tory peteĩ mundo henyhẽvape apañuái, ñembyasy ha jehasa’asýgui. Ohejávo tapykuépe pe ñorairõguasu, ogueraha hendive hógape upe regalo.
Naĩri seguro agueropu’akáne raka’épa umi jehaha’asy che ru ombohovakeva’ekue umi mbohapy Navida aja mbombyry hógagui, ha katu aikuaa upe ñehekombo’e ha’e ha che roaprendeva’ekue ha’e pe Navida regalo añetéva, Ñande Ru Yvagagua ome’ẽva’ekue ñandéve, ha’eha pe Salvador Jesucristo. Ko Navidápe, mundo condición rupi, oĩ ñande apytépe ñaiméva mombyry ñane familia-gui térã aislado chuguikuéra oiko ag̃uirõ jepe. Oĩ ñande apytépe ikatúva oñeñandu ko arýpe che rúicha upe Navida ára 1943-pe. Ikatu ñañeporandu mba’érepa ndajahupytýi regalo térã visita jepe. Ha katu ñamañarõ yvate ha jajerure Tupãme jaikove hag̃ua, jahechakuaáta Jesucristo ha’eha pe regalo tuichavéva. Jaipe’ávo upe regalo ome’ẽ ñandéve kláve peteĩ tekove hechapyrã ha ipy’aguapývape g̃uarã.
Nuevo Testamento, Marcos capitulo 4-pe, umi Salvador discípulo oguerekókuri peteĩ jehasa oporomondýiva. Oĩ hikuái pe Salvador ndie peteĩ ygápe Galilea mar-pe opu’ãrõ peteĩ araivai guasu. Umi discípulo oñemondýi, ha pe Salvador oñe’ẽ chupekuéra, he’ívo: “¿Mba’ére piko pekyhyjete? ¿Moõ piko oime pende jerovia?”2 Peteĩ ñe’ẽ reheve, pe Salvador ojapo umi yvytu ha ola-kuéra toñekalma. Umi discípulo upéi ojapo ko porandu ñanepy’amovãva, ha ajerure peẽme tapejepy’amongeta hese ko Navidápe: “¿Máva piko kóva, yvytu ha yguasu jepe iñe’ẽrenduha hese?”3 Añeha’ãta ambohovái upe porandu. Jesucristo ha’e pe “[Mbo’ehára Ojehecharamóva], Tupã Ipu’akapáva, Túva opa ára oikovéva, pe Py’aguapy Reruha.”4 “Ha’e, ha hese rupive, ha ha’éva imba’e mundokuéra ha ha’e ojapova’ekue, Ipo rupive.”5 Ha’e ñande Salvador ha ñane Redentor; Ha’e pe Túva Primogénito.
Isaías odescrivi pe Salvador-pe kóicha: “¿Peẽpa ndapeikuaai? ¿Napehendúiva, Dios Eterno, Ñandejára, ha’éva ko yvy apohare, ojapova’ekue opa mba’e oĩva ko mundo-pe, Ha’e araka’eve naikane’õiva ni naikangýiva? Opavave orekóva esperánsa Jehováre imbarete pyahu jeýta; ovevéta hikuái ipeporamoguáicha peteĩ águilaicha; ha’ekuéra odiparáta ha naikaneʼõmoʼãi; oguatáta ha naikangymoʼãi.”6
Ha’e upe márkope pe Salvador ñane’invitaha opavavépe ko époka navidéñape ha akoiete: “Peju che rendápe opavave pemba’apo ha pende carga pohýiva, ha che pombopytu’úta. Che ndachepochyreíri ha che py’a mirĩva, ha upévare pejuhúta pytu’u pende ángakuérape g̃uarã. Che yugo ningo ndahasýi ha ivevyi’asy che carga.”7 Pe invitación ojapóva ñandéve ha’e “Peju.”
Che esperanza ko Navida épokape ha’e oimporta’ỹre ñane circunstacia, ni moõpa ñaime, ñaimerõ jepe separado ñane familia ha angirũnguéragui, tañanemandu’a Ha’e, pe Salvador Jesucristo, ha’eha pe regalo; ñañemo’ag̃uivo Hese, Ha’e ombovevúitaha umi ñande kárga, ha tajahechaakuaa Chupe, che ru ohechakuaa haguéicha peteĩ ñorairõguasu mbytépe. Pe Salvador he’i: “Py’aguapy ahejáta peẽme, che py’aguapy ame’ẽta peẽme: che name’ẽi peẽme ko mundo ome’ẽháicha. Upévare anítei pene korasõ oñemondýi ni peneangekóitei.”8 Jajeroviarõ Hese, jajuhúta py’aguapy ha vy’apavẽ, oimporta’ỹre ñane circunstancia ko’ág̃agua.
Adesea peẽme peteĩ Navida roryete ha ajerure’asy ko ary, ko mundo ikane’oitéva ovy’a aja, tapehupyty ha pehechakuaa pe regalo peteĩ Túva Yvagagua ñanderayhuetéva ome’ẽva’ekue ñandéve opermitívo Ita’ýra Unihénito sacrifísio. Ame’ẽ che testimonio personal upe Túva Yvagagua oporohayhúva ha Ita’ýra perfecto-gui, pe Principe de Paz. Jesucristo rérape, Amén.