12NIELSON-0
Táa’go Alą́ąjį’ Naat’áanii Késhmish Yá Dahodísin
Níłch’itsoh 6, 2020
Hózhǫ́ǫ́jí Yinant’á’í
Elder Brent H. Nielson Áyiilaa
Tsosts’ídiin Dabi’di’nínígíí biNaat’áaniidóó
Lahgo yoołkááł dóó łahgo naahastą́ą’di, nizaadi, shizhé’é, Norman Nielson, tsíłkéí nilį́įgo naakigóne’ ntsaago da’ahijooghą́’ígíí atah naazbaa’. Binídaal yidáahgi abi’dóolkid, chidí naat’a’í bee wóldon anéiil’į́įgo Papua New Guinea bitsiyi’ bighan. 1943 Késhmish bijį́įgi, díí naaltsoos bimá hooghangóó yich’į’ áyiilaa: “Yoołkáłii binahjį’ nił bééhózin, Késhmish lá díijį́. Tsosts’idi oolkiłgo nídiishna’, dóó ííyą́ą́’, áádóó t’aadi o’oolkidjį’ nishíshnish, áádóó tó nilínídi shi’éé’ ségiz dóó nisíbį́į́’. I’íí’ą́ągo t’áá ałchįdígo tą́zhii, dóó nimásii, náádą́ą́’, dóó baah łikaní deidą́ą́’. Ałki’dą́ą́’ hoghandi ahił nída’iidį́į́h dóó t’áadoo le’é baa nínéíkah yę́ę éí k’ad t’áá íiyisíí bóhósááh. Késhmishgo nihich’į’ áńdaal’įįh yę́ę t’áadoo Késhmish bijį́į́ góne’ ńdadiinil da. T’áá éí binahjį’ niidlą́’í da t’áadoo Késhmish nihich’į’ ádaalyaa da. Tó ádįįhgo índa tó bóhojisááh łeh dinínée t’ah bénáshniih.”
Díí naahai’ígíí biyi’ shich’óoní, Marcia, dóó shilah, Susan, shizhé’é ntsaago naaki góne’ da’ahijoogháá’go atah naazbaa’ yę́ę baa hane’go naaltsoos yikáá’ néíyízoh. Bimá naaltsoos yich’į’ áyiilaa yę́ę t’áá át’é ałhą’ áyiilaa. Díí Késhmish góne’ naaltsoos bimá yich’į’ áyiilaa yę́ę yííłta’go, doo shił aaníígóó baatsídékééz. Azhą́ shį́į́’ díí naaltsoos doo nídéít’į’ da ndi, díí shizhé’é nilíinii biniinaa, éí ayóó ííníshnii ńt’éé’, shí Késhmishgo ádahoot’įįd yę́ę bá łahgo át’é ánjódle’ niizį́į́’. Shijéí bii’ ádishní, “Díí tsiłkéí haash nízááhjį’ nimasii bikéyahdę́ę́’ naagháii yéego tí’nááhwiidoo’nih?” Bizhé’é naakits’áadah binááhao bijéí niiltłahgo dah nídiidzá. Bimá t’éiyá bineesą́, siláołtso’íjí bízhi’ haatą́ dóó k’ad yéego da’ahijigándi tsiyi’di bighan. Áko haaléít’áó lá Késhmishgo naa’niihígíí ndi t’áadoo ła hach’į’ alyaa da? Bił ahoot’éegi yéigo baa ntséskeesgo, Diyin Ii’sizį́į shich’į’ yałti’íi baa ákoniizį́į́’. Nizhé’é t’áá íiyisíí t’áadoo le’é ílį́įgo bił ííshjání ályaa áádóó oodlą́ągo Késhmish yidísingo ts’ída t’áá nináhíhááh bik’eh iiná áyiilaa.”
Shizhé’é bináhane’ náásgóó náánéínishta’go akéédi Atsá Biyaazh yiiziłígíí biyi’ 1945 bimá naaltsoos yich’į’ áyiilaa yę́ę yiyííłta’. Siláółtso’í binaa’táanii Douglas MacArthur, yiyaadóó dį́į́’ naahai naabaahgo, Australia, New Guinea, dóó nilei Philippines, díí kéyah dahnaazjaa’go t’ádííbaa’, áádóó hooghandi nádzah. Naabaahgo sodizin báhooghan ałah nda’adleehgo doo ła’ dahólǫ́ǫ da ńt’éé’, Phillipinesdi niyáago índa sodizin báhooghan góne’ yah anáádzá. Sodizin báhooghan yah anáádzáádóó bikéé’dóó kóníigo bimá naaltsoos yich’į’ áyiilaa: ”Adáádą́ą́’ sodizin báhooghan góne’ yah iiyá, ákondi, doo t’áá íiyisíí shił nilį́įgo hada’iisdzíí’ da. Shimá ałkidą́ą́’ la’ída da’ilínée eíí k’ad doo t’áá íiyisíí shił nilį́į da. Shimá ałkidą́ą́ la’ída da’iilinée k’ad doo t’áá íiyisíí shił nilį́į da, Diyin God yinishdláanígíí éí doo ááh bidishníi da, éí t’ahdii t’áá íiyisíí shił nilį́, ndi Diyin God éí nihokáá’ dine’é ayóó ayóó’ó’ní dóó yik’idiit’į́į́hgo nésh’į́ áádóó t’áá áłahjį’ ni’iisíhée doo éí shik’ihjį’ yis’ą́ą da.”
Díí íiyisíí ach’į’ nahwii’ná biyi’ Ii’sizį́ Diyinii náshineezt’ą́ą́’, azhą́ shį́į́’ ałts’ą́ą́jí siláółtso’í, azee’ ndeikáhí, dóó diné t’áá ákǫ́ǫ́ kéédahat’ínígíí daneeznáa ndi, shizhé’é íiyisíí iiná ílį́įnii yik’i’diit’ą́—Késhmish t’áá íiyisíí biniyé hodílzinígíí bił bééhoozin. Bizhé’é Yá’ąąshdi Hólónígíí ayóó ábóoníinii dóó bik’idééz’į́’ígíí bił bééhoozin. Iiná íiyisíí bits’ą́ą́dóó na’nitinígíí éí kóní: “Haalá Diyin God nahasdzáán ayóo áyó’ní, éí biYe’ t’ááłá’í bá yizhchíinii ninéédiní’ą, áko haiíshį́į́ bodłą́ąnígíí doo dadoots’ałda, ndi iiná doo ninít’í’íí bee hólǫ́ǫ doo.”1 T’áá sizį́į́ ńt’éé’, azhą́ yéigo bich’į’ nahwiisnáá’ ndi, shizhé’é éí biTaa’ ayóó ábónínígíí yaa ákoniizį́į́’. Azhą́ adawiis’áágóó iłhalą́, dóó ayi’diniih dóó ach’į’ nahwii’ná hólǫ́ǫ ndi hoozyéél dóó t’áá íiyisíí ił hózhǫ́ bik’i’jidoogááł. Da’ahijighą́ą́dę́ę́’ nádzáádóó bik’ijį’, íiyisíí iiná ílį́įnii hooghandi néínídlą́.
Shígo shį́į́’ éíyá doo bíneesh’ą́ą da dooleeł ńt’éé’ díí shizhé’é t’áá’go Késhmish ná’ásdlį́į́go ti’hooznii’go yii’ tádííyáhígíi, ákondi ak’idiit’į́į́h bits’ą́ą́dóó t’áá áníídlah bik’i’diit’ánígíí éí Késhmishgo íiyisíí biniyé hodílzinígíí, éí nihiZhé’é Yá’ąąshdi Hólónii biYe’ Jesus Christ nihi Yisdá’iiníiłii nilį́įgo nihéínílá. Díí Késhmish yihahígíí biyi’, díí nahasdzáán t’áá nahwiis’ą́ą́déé ádahooníłígíí biniinaa, ła’ nihighangóó bił kéédahoniit’ínígíí doo bił honiidlǫ́ǫ da azhą́ nihinaagóó kéédahat’į́į ndi. Ła’ shį́į́’ shizhé’é yii’ tádííyáhę́ęgi’ át’áó ntsídaahkees. Łahdi shį́į́’ ádeiniidzin łeh t’áadoo shich’į’ é’élyaa da doodaii’ t’áadoo shaaníyáhí da. Akondi de’go díníít’į́įgo dóó Diyin God bich’į’ díníít’į́įgo náásgóó nááhinii’náá doo Jesus Christ t’áá íiyisíí yiniyé niyáhígíí bik’ídiidááł. Éí bik’íídahígíí ąą’ííl’įįhgo índa nihe’iiná áhodeezyéél dóó ts’ídá nizhónígíí bee nihik’ihojidoodliił.
Diyin God bizaad biyi’ Mark wolta’ dį́į́gi, Yisdá’íníłíí yił nda’nitinígíí baa hóyé’ígíí ła’ yii’ tádookai. Yisdá’ínííł bił tsinaa’eełí Gálilii be’ek’id bikáá’ bił oo’ołgo doo chxǫǫhoo’į́į́go aho’niiłt’ą́. Yił nda’nitinígíí nídáásdzííd, dóó naa’eełii, áádóó Yisdá’iiníílii haadzíí’go kódííniid, ”Ha’át’íí biniyé ńdasołdzííd? ”Háájíshą’ nihi’oodłą’?”2 Bóhónííhgo haadzíí’, Yisda’iiníilii níyoltsoh dóó tó ńdiidzáhígíí ni’ kóyilaa’. Áko hódahooł’aahii hóyéé’go bił hoo’a’ígíí yínda’ídééłkid éí díí Késhmish góne’ baa ntsídaahkees doołeeł: ’’Ákoshą’ díí lá háí át’į́įgo, níyol áádóó tó nidi bik’eh dahół’į́?’’3 Díí na’ídíkidígíí baa náháshne’. Jesus Christ éí “Ayóó’át’éego Kót’é Níinii, Diyin God Ayóó’ábóodziilii, Hool’áágóó aTaa’ Nilíinii, Hózhǫ́ǫ́jí Yinant’áii” nilį́.4 “Bí nahjį’, dóó biníkáá’ góne’, dóó t’áá bí bee, nahasdzáán ádaat’éí haidiilaa.”5 Nihi Yisda’iiníilii dóó Nihá Nina’nídléí nilį́; nihiTaa’ biYe’ Áłtsé Bi’dizhchínígíí.
Isaiah kót’áó Yisda’iiníiłii yaa hoolne’: “Da’ doósh nił bééhózin da? Da’ doósh dinits’a’ da, Hool’áágóó Diyin God nilíinii, Bóhólníihii wolyéii, nahasdzáá t’áá át’é áyiilaii éí doo ch’ééh digháah da, índa doo nidi nídínídáah da? … Diyin God yiba’ ádaat’éii éí biinéí nídaadleełgo dabidziil doo; atsá nahalingo wót’ááh nídahodidleeh doo; ahaa yikahgo, doo ch’ééh dadikáah da doo, índa deíjeehgo, dóó doo ch’ééh dadikáah da doo.”6
Díí binahjį’ Yisdá’iiníiłii hóshdę́ę́’ nihiłní díí Késhmish bééhaniihígíí binahjį’ dóó t’áá áłahjį’, “Dziil nihigháanii áádóó nihiyéél dandaazii t’áá ánółtso hágo, shaa hohkááh, áko háádaałyį́įhgo ánihideeshłííł. … Háálá a’ohgo ádíí’níszin áádóó ádaa hojiinishbá’í, áko éí bee nihii’ naazíinii yee háádaalyį́įh doo. Háálá shi’azéédéetání doo nantł’agóó bee na’anish, áádóó shiyéél éí ászólí.”7 “Hágo” nihiłní.
Díí Késhmish bii’ hoolzhishígíí azhą́ nihinaagóó ádahooníłígíí bii’ yiikah ndi hada’íínółní, háadi shį́į́ honiidlǫ́ǫ ndi, nihił dabighanígíí doodaii’ nihik’is doo kǫ́ǫ́ ndaakai da ndi, díí béédeilniih doo, nihiYisda’iiníilii Jesus Christ, íiyisíí ílíinii nihich’i’ kólyeii; Beidááhgo, díí ndaazgo baa ntsííkees yę́ę nihitah áhoozólígo ánéidoodlííł, áádóó bił ałhéndahodiilzįįł, shizhé’é da’ahijighą́ bíníigi yę́ęgi’ át’éego. Yisdá’iiníiłii ání, “Nihich’į’ hózhǫ́ǫ le’, shibee ił hózhǫ́ nihaa dinish’aah; doo nihokáá’ dine’é aa deidiyii’aahígi át’éego nihaa dinish’aah da. T’áadoo nihijéí bii’ nihíni’ daałání, dóó t’áadoo éí nídaałdzidí.”8 Ázhą́ shį́į́ nihinaagóó t’óó báhádzidgo ádahoonííł ndi Diyin ba’ííníídlíí doo, nihitah ahodiizyéél dóó nihił hózhǫ́ǫ doo.
T’áá ánółtso Yá’át’ééhgo Késhmish da’doołeeł dóó adahwiis’áágóó ach’į’ ndahwii’náa ndi nihá sodizin doo, Diyin God ayóó ánihó’níinii nihik’ijidlíi doo t’áá éí t’éí biYe’ béízhchíinii nihá ti’hooznii’ii nihaidiní’ą́. NihiTaa’ Yá’ąąshdi Hólóonii dóó biYe’ haałt’éí, Hózhǫ́ǫjí Yinanit’a’í nilíinii t’áá aníigo baa hashne’. Jesus Christ bízhi’ bináhjį’, áamen.