2nielson

12NIELSON-0

Deboshonal di Pasku di Promé Presidensia

6 di dezèmber 2020

E Prínsipe di Pas

Pa Elder Brent H. Nielson

Di e Presidensia di e Setenta

Den un otro tempu i un otro lugá, leu, leu for di aki, mi tata, Norman Nielson, tabata un hòmber hopi yòn pasando su di dos di kuater aña luchando den e teater Pasífiko di e Segundo Guera Mundial. Riba e potrèt dilanti di su tènt, e tabata un spesialista ainti aerio bibando den e mondinan di Papua Nueva Guinea. Riba dia di Pasku 1943 ora ku el a skirbi e karta aki na su mama biuda: “Manera lo bo nota pa e fecha, awe ta Pasku. Mi a lanta 7 or di mainta, mi a desayuná, i despues a traha te 3 or di atardi ora mi a bai abou na e riu chikitu pa laba mi pañanan i baña. Awe nochi pa sena nos a haña un porshon masha chikitu di kalakuna, algun batata dushi, maishi, dressing, i tèrt di rasenchi. Lo mi a gusta asina tantu pa ta na kas ku bo i e famia pone mi pianan bou di mesa i kome atrobe tur e kosnan ku nos a kustumbrá di tin tempu nos tabata huntu algun aña pasá. Nos ta desapuntá ku nos paketenan di Pasku no a yega promé ku Pasku. Tin hopi di nos ku no a haña nada pa Pasku. Mi ta kòrda bo kontando mi hopi biaha ku nunka bo no a sinti falta di awa te dia ku e pos a seka.”

E aña aki mi kasá, Marcia, i mi ruman muhé, Susan, a skibi e historia di tata su kuater añanan di servisio durante di dos Guera Mundial. Nan a kompilá tur e kartanan ku el a skibi pa su mama na kas. Mi tin ku bisa ku ora mi a lesa e karta tristu aki di Pasku, mi tabata un tiki inkrédulo. Ounke esaki por mustra trivial pa boso, pasó esaki ta mi tata, kende mi ta stima, di un manera òf otro mi kier a kambia e eventonan di e dia di Pasku ei. Mi a sklama den mi kurason, “Kuantu sufrimentu un hòmber yòn di Idaho por soportá.” El a pèrdè su tat dor di un atake kurason tempu mi tata tabatin solamente 12 aña. El a wòrdu kria pa su mama, el a wòrdu yamá pa den ehérsito, i awor e ta bibando den mondi mei mei di un bataya teribel. E no por a ni sikiera haña un regalo pa Pasku? Miéntras mi tabata meditá riba su situashon, mi a sinti e Spiritu papiando ku mi, “Brent, bo sa kon e hostoria aki ta kaba. Bo tata finalmente a risibí e regalo di mas importante i a sigui pa biba un bida yená ku fe i ku Pasku komo su temporada faborito di aña.”

Miéntras mi a sigui lesa mas leu den e historia di mi tata, mi a yega na un di su delaster kartanan pa su mama na febrüari di 1945. Durante su kuater añanan, bou di liderazgo di General Douglas MacArthur, el a lucha for di Darwin, Oustralia, te na Papua New Guinea, te na Leyte Golfo den Filipina, i por último te na Manila, kaminda el a terminá su servisio militar i a regresá kas. Mayoria di e tempu ku el a pasa sirbiendo durante guera no tabatin reunionnan di E Iglesia di JesuCristu di Santunan di e Delaster Dianan, pero ora el a yega Filipinas, na fin di su servisio e por a haña un reunion di Iglesia. Despues di asistí na e reunion, el a skibi e karta interesante aki pa su mama na kas: “Mi a bai Iglesia ayera, pero mi no a duna masha importansia na e diskurso. Mama, hopi kos ta parse masha trivial pa mi, ku antes tabata parse asina importante. Mi no kier men mi kerensia den Dios, esei ta probablemente mas fuerte ku nunka, pero mi ta mira Dios mas komo un persona ku ta stima i ta komprondé na lugá di un [ku] semper ta para riba bo pa kastigá bo pa kada fayo ku bo hasi.”

Lokual e Spiritu a siña mi ta ku durante di tempunan di prueba ekstremadamente difísil, di a partisipá den un guera teribel kaminda hopi sòldá, enfermeronan, marineronan, pilotonan, i sivilnan inosente na tur dos banda a pèrdè nan bida, mi tata a haña e regalo—el a haña e nifikashon berdadero di Pasku. El a siña ku e tabatin un Tata Selestial amoroso ku tabata komprondé i tabata kuid’é. E lès di bida di mas importante ku el a siña tabata esaki: “Pasobra Dios a stima mundu asina tantu ku El a duna su Yu Unigénito, pa tkrn ku kere den DjE no bai pèrdí, ma tin bida eterno.¹ Den su difikultatnan mas grandi, ora ku e pruebanan a push’é te kaminda ku e tabata por a soportá personalmente, mi tata a haña un Tata Selestial amoroso i kariñoso. Lokual ku mi tata a haña a trese pas i goso i felisidat na dje den un mundu yen di konfushon i doló i sufrimentu. Ora el a laga guera atras, el a trese e regalo kas ku n’e.

Mi no tin sigur ku ami lo por a sobrebibí e difikultatnan ku mi tata a enfrentá durante e tres Paskunan leu for di kas, pero mi sa ku e lès ku el a siña i ku ami a siña ta ku e regalo berdadero na Pasku, duná pa nos Tata na Shelu, ta e Salbador JesuCristu. E Pasku aki, pa motibu di e kondishonnan di mundu, algun di nos ta haña nos mes den situashonnan masha leu for di famia òf ta isolá for di nan asta si nan ta biba serka. Algun di nos por sinti e aña aki meskos ku mi tata a sinti riba dia di Pasku na 1943. Nos por asta puntra nos mes di kon nos no a risibí ningun regalo òf bishita. Pero si nos paga tinu i mira na Dios i biba, nos lo deskubrí ku JesuCristu ta e regalo di mas grandi. Habri e regalo aki ta duna nos e yabi pa un bida maravioso i di pas.

Den Marko kapítulo 4 di e Tèstamènt Nobo, e Salbador su disípulonan tabatin un eksperensia spantoso. Nan tabata riba un barku ku e Salbador riba e laman di Galilea ora un tormenta fuerte a lanta. E disípulonan tabata spantá, i e Salbador a papia ku nan bisando, “Pakiko boso tin miedu asina? Dikon boso no tin fe?”² Ku un stèm di komando, e Salbador a hasi pa e bientunan i e olanan bira ketu. E disípulonan e ora ei a hasi e pregunta konmovedor aki ku ami ta pidi boso pa meditá ariba e Pasku aki: “Ta ken e hòmber aki ta, ku asta e bientu i e laman ta obedesé?”³ Lo mi purba na kontestá e pregunta aki. JesuCristu ta e “[Konsehero Maravioso], e Dios poderoso, E Tata Eterno, E Prínsipe di Pas.”⁴ “Dor di DjE, i pa medio di di DjE, i di DjE, e mundunan ta i a wòrdu kreá.”⁵ E ta nos Salbador i nos Redentor; E ta e Primogénito di e Tata.

Isaías ta deskribí e Salbador [di] e manera aki: “Ta sa boso no sa? Boso no a tende, ku e Dios eterno, e Señor, e Kreador di e mundu di punta pa punta, no ta kansa, ni pèrdè rosea?… [Es]nan ku ta warda riba Señor lo haña forsa nobo; nan lo bula altu manera águila; nan lo kore sin kansa; i nan lo kana, i lo no desmayá.”⁶

Ta ku e informashon di fondo aki e Salbador ta invitá nos tur na e temporada di Pasku aki i semper, “Tur ku ta kansá i kargá, bin serka mi, i ami lo duna boso sosiegu. … Pasobra mi ta mansu i humilde; i boso lo haña sosiegu pa boso alma.” Pasó mi yugo ta suave, i mi karga ta lihé.”⁷ Su invitashon na nos ta “pa bini.”

Mi speransa durante e temporada aki di Pasku ta no ta importá boso sirkunstansia, no ta importá unda boso ta, i no ta importá kon nos por ta separá di famia i amigunan, nos lo kòrda ku E, e Salbador JesuCristu, ta e regalo; ku segun nos bini na Dje, E lo hasi nos karga lihé; i ku nos por deskubrí E, meskos ku mi tata a hasi meimei di un guera teribel. E Salbador a bisa, “Pas mi ta laga pa boso, mi pas mi ta duna boso; no manera e mundu ta duna, mi ta duna boso. No laga boso kurason bira intrankil, tampoko ku miedu.”⁸ Ora nos ta konfia E, nos lo haña pas i felisidat, sin importá nos sirkunstansianan.

Mi ta deseá boso tur un Felis Pasku i mi ta hasi orashon pa, e aña aki, miéntras e mundu kansá ta regosihá, boso lo risibí i rekonosé e regalo ku un Tata amoroso a duna nos ora El a pèrmití e sakrifisio di Su Yu Primogénito. Mi ta duna mi testimonio personal di e Tata Selestial amoroso i Su Yu Perfekto, e Prinsipé di Pas. Den e nòmber di JesuCristu, amèn.