Ol Presen we Yumi No Luk Klia Tumas
2021 Fas Presidensi Krismes Divosen
Sandei 5 Disemba 2021
Fas Toktok
Taem mi yangfala, haelaet blong Krismes i taem Bubuwoman mo Bubuman Lundgren oli kam. Evri yia, bae tufala i draev longwe i kam, long wan olfala trak, blong visit. Mifala i lavem tufala, mo laekem tumas Swidis pankek blong Bubuwoman—we oli mekem wetem konkon krim we hem i tekem wetem hem i kam, we i pem long lokol fama long homtaon blong hem. Hem i stanap long stov plante aoa, i mekem pankek kasem we mifala i nomo save kakae. Nao, i gat tu nara jeneresen blong ol pikinini we oli groap mo kakae ol Swidis pankek ia. Mo evri taem mifala i mekem, mifala i tingbaot Bubuwoman Lundgren mo presen blong hem, we i lav.
Sam long ol bes presen, oli ol presen we i taem mo talen blong mifala. Mi biliv se ol kaen presen ia, oli ol tabu presen.
Ol Presen
Hemia i wan taem blong wet from ol niufala presen. Be tedei naet, yumi stop smol, mo tingting long ol presen we yufala i gat finis, we oli givim —mo huia i givim mo from wanem.
God i bin givim ol presen long wanwan long yumi. Maet yu filim se yu no gat presen, be yu gat ol presen blong spirit we i kam long God blong yu save blesem ol narawan mo kam kolosap moa long Hem.1
?Wanem presen nao God i givim long yu?
Blong ones, mi neva luk se miwan mi gat ol presen. Mi mi no wan singga, wan woman blong danis, o resis, o dro, o gud long matematik, o, o, o, mi jes wan nomol woman.
Sam taem, mi stap lukluk ol bigfala presen blong ol narawan, mo mi filim smol. Be mi stap lanem se i no gat poen blong komperem man olsem, mo i save prapa spolem man. Moa impoten, mi kam blong luk tabu paoa blong “ol presen we yumi no klia tumas” we God i givim, mo stap glad long olgeta tru long lav mo tras blong Hem.
Elda Marvin J. Ashton i tijim se ol presen blong spirit we God i givim, i gat olgeta ia we “yumi no luk klia tumas,” olsem “presen blong askem samting, blong stap lisin, blong stap harem mo yusum wan kwaet smol voes; presen blong save krae; blong save stap longwe long raorao; blong gat gud fasin; … blong lukaotem wanem i stret mo gud; blong no jajem man; blong luk long God i soem rod; blong stap wan disaepol; blong stap kea long ol narawan; blong save tingting hevi; presen blong stap talem prea.”2
?Lis ia i helpem yu blong luk ol presen blong yu long wan niu laet? I stap helpem mi.
Ol kwaet presen ia oli gat paoa blong leftemap ol pikinini blong God semmak olsem ol nara presen we yumi luksave mo selebretem plante moa taem3—ol kwaet presen we oli helpem yumi blong mekem ol stamba tingting we oli impoten moa long laef. Be, sore tumas, samtaem yumi holembak yumi mo mestem blong glad o blong serem ol presen ia blong yumi, from yumi fraet se yumi no smutum gud yet, oli no stret gud yet, o naes yet olsem yumi wantem.
Taem yumi mestem blong glad long ol presen ia we yumi no luk klia tumas, yumi mestem janis blong leftemap ol pikinini blong Hem,—mo yumi mestem janis blong filim lav ia we i kam long God.4
Plei Singsing blong Ol Presen blong Yu
Bae mi soem wan nara presen long yufala—wan presen we i kam long Bubuman Lundgren. Oltaem Bubuman i bin wantem lanem plei vaeolin. Be, vaeolin ia i sidaon i stap, oli no yusum, i stap pulum das long sef blong hem, afta long sef blong mi, blong plante yia—miusik we i stap long ol string ia, man i no harem.
Komperem hemia long vaeolin blong sikis yia apugel blong mi, Skalet. Hem i gat wan presen blong serem wetem yumi tunaet.
[Scarlett i plei vaeolin]
Tangkyu Skalet. Hemia i bin naes tumas. Mi lavem yu.
Ol presen blong yumi oli kam long Papa long Heven, mo oli blong yumi serem. Vaeolin blong Skalet i no sas, mo i no gat samting i rong long tul ia o fasin blong plei, be from se hem i putum hat blong hem long hem, hem i kasem wan presen mo i givim glad.
No letem ol presen we God i givim long yu, iven olgeta we man i no luk klia tumas, oli stap nating, o yufala i no yusum. Tekem ol presen we Hem i givim long yu, mo karemaot long sef. Sapos yu putum olgeta presen ia i stap from yu gat tu tingting long yuwan, go klinim das long hem mo traem. Givim olgeta long God mo ol pikinini blong Hem. Ol presen ia we yumi gat, oli kam long Papa long Heven, oli blong yumi yusum, mo serem. Evri presen blong yu we i kam long God, nating oli no stret gud, oli givim glad, mo, taem yumi givim long Hem, i wan singsing blong presem Hem.
Tekem presen blong yu blong save lisin wetem lav mo visitim wan fren we i stap hemwan. ?yu yu gat wan presen blong stap longwe long raorao mo gat gud fasin? Ol presen ia oli nidim plante tedei. Givim presen ia long famli, fren, mo neba blong yu. Talem wan man olbaot we yu lavem hem, mo invaetem olgeta long kijin tebol blong yu. Tijim wan lesen wetem insperesen. Raetem wan not wetem kaen toktok. Yusum presen ia blong helpem narawan mo bildimap Saeon mo bildimap ol pipol raon long yu. God i nidim evri kaen presen. Hem i givim evri presen ia blong leftemap ol pikinini blong Hem. No letem miusik insaed long yu i go kwaet, blong no givim hag, o blong no fogivim man.
Kasem Presen Ia blong Hem
Long Krismes taem long 1832, Ol fas Sent we oli fesem hadtaem wetem ami mo politik. Profet Josef i jes talem profesi se bae i gat wan faet.5 Nao, hemia i no naes tumas.
Be long 27 Disemba, Josef i kasem wan nara revelesen—wan mesej blong pis we i kam long Lod.6 Long ol hadtaem ia, Lod i mekem Josef i tingbaot ol presen we Hem i bin givim long Ol Sent blong Hem—moa impoten, presen ia we i Sevya Jisas Kraes, mo hop ia blong gat laef we i no save finis.
Wei blong stap glad long Krismes taem ia i blong luk mo kasem ol presen blong God; faswan mo moa impoten i, “presen ia we i no gat wan i semmak,”7 we i wan Sevya. Hemia i semmak long Krismes taem tedei.
Long revelesen ia we Josef i bin kasem, Lod i bin askem Josef long kwestin ia:
“From, ?wanem nao i gud long wan man, sapos oli givim wan presen long hem, mo hem i no tekem presen ia? Luk, hem i no stap glad long wanem we oli givim long hem, mo hem i no glad tu long man ia we i givim presen ia.”8
Las Toktok
Mi hop se wanwan long yumi i save luk mo kasem ol presen we God i bin givim yumi—be speseli, mi hop se wanwan i save glad long God, Man we i givim ol presen ia.
Mi talem tangkyu from bigfala presen ia we i Pikinini blong Hem—wan Pikinini we i kam long wol ia olsem wan bebi, we wan yang mama i kavremap hem long klos, i putum Hem i slip. Wan bebi we bae i lanem samting, tijing folem tijing, mo wan glad folem nara gladhat kasem taem Hem i givim laef blong Hem olsem praes from sin blong mi. From ol sin blong yu. From ol sin blong evriwan we i bin laef mo bae i laef long wol ia.
Yumi singsing long wan hym we yumi laekem tumas:
“!Glad i go long wol, King i kam: Wol Ia i luk King bl’hem!”9
!Presen we i Jisas Kraes, God i givim mo traem tingbaot praes blong hem! Kwestin i stap: ?Bae yumi akseptem Hem? ?Bae yumi letem Hem i kam mo letem Hem i win? ?Hao?
Mi testifae se taem yumi akseptem King blong yumi mo ol presen blong Hem, bae yumi glad tumas—wan glad i go long wol mo glad insaed long wol.
“Tangkyu i go long God from presen ia we yumi no save tokbaot,10 we i Pikinini blong Hem, long tabu nem blong Jisas Kraes, amen.