Olgeta we Oli Man Blong Mekem Pis Oli Save Harem Gud
2021 Fas Presidensi Krismes Divosen
Sandei 5 Disemba 2021
Bakegen, Fas Presidensi we yumi lavem i invaetem yumi blong kam tugeta taem yumi statem selebresen blong Krismes. Taem we ol tradisen mo kastom raon long ol nesen i defdefren, yumi talem tangkyu mo gat blesing blong stap wan—we yumi wan blong wosipim Sevya Jisas Kraes, mo stap selebretem taem we Hem i bon i kam, tu taosen ia i pas.
Wan fevret tradisen blong Bassett hom, mo long plante hom blong yufala, i blong aktem bakegen stori blong taem Kraes i bon. Long mifala, mifala i ridim ol histri blong Aesea, Matiu, Nifae, mo Momon, wetem sam hym blong Krismes, mo wan laef drama blong Meri, Josef mo bebi Jisas- i gat insperesen—be i no oltaem.
Eksampol: Wan dei bifo Krismes, grup blong ol smolsmol pikinini we oli sipsip oli singaot long wan kores blong ol bebi we oli krae. Kraekrae blong olgeta i go kasem ol man blong lukaot long sipsip mo ol enjel, mo iven i go long smol bebi ia tu. Nekis yia afta, i nomo gat grup blong animol. I no gat wan i wantem plei rol blong sipsip from oli fraet se, bae ol sipsip oli fraet mo bae oli krae bigwan bakegen. Long wan defren yia, ol stik blong ol man blong lukaot long sipsip oli kam ol naet blong faet, mo wan nara yia, i no gat wan i wantem mekem Waes Man o wan enjel, mo oli talem se oli mas werem klos blong daenaso, mo dolfen. Maet wan gud taem we mifala i tingbaot, i taem we niubon bebi i kapsaet long hae bed we i no sidaon gud, nao i planem hed long graon wetem smol ston, mo oli kasem hem stret bifo i kasem floa. Mi nao mi kasem hem, be mi tu, mi stamba we hem i foldaon.
?Naet ia i kwaet? ?Naet ia tabu? Ating i moa gud mifala i singaotem drama blong mifala “Trabol long Haos blong Animol.” Mi mas talem se, taem Krismes i stap go, plante taem ?mi askem miwan sapos mifala i mas traem wan Krismes tradisen we i stap invaetem pis i kam?
Pis—swit taem ia we i gat hop we yumi evriwan i wantem, i no long Krismes nomo, be oltaem. Truaot long wol tedei, i luk se i had tumas blong kasem pis. Taem we mi stap stadi long Doktrin mo Ol Kavenan long yia ia, mi tingbaot wan revelesen we i tokbaot tedei.
“Mo long dei ia … ful wol bae i muvmuv olbaot, mo hat blong ol man i nomo strong.”1
Tedei, ples i muvmuv olbaot, mo ?wea nao bae yumi faenem bigfala pis ia we ful wol i wantem?
Presiden Russell M. Nelson i talem:
“Gospel blong Jisas Kraes i stret samting we i nid blong stap long wol ia we i konfius, i stap raorao, mo i taed finis.
“Wanwan pikinini blong God i gat raet blong gat janis ia blong harem mo akseptem mesej ia blong Jisas Kraes we i stap hilim mo pemaot man. I no gat nara mesej moa we i impoten moa long hapines blong yumi—naoia mo blong oltaem.”2
Mesej ia blong Restoresen, hem i mesej blong Krismes. Laet blong sta ia we i lidim ol smol sipsip i go long bebi long haos blong animol, i semmak long longfala laet we i bin kamdaon i stap long Josef—we i kam fastaem long gudfala nius we i talemaot se Kraes i kam long wol.
Mesej blong Aesea i go long trabol wol blong yumi, i gohed semmak: “Mo long yumi wan pikinini i bon; long yumi wan boe oli givim; mo gavman bae i stap long solda blong hem; mo nem blong hem bae oli singaotem, Gudfalawan, Kaonsela, Hae God, Papa we I No Gat En, Prins blong Pis.”3
Elda Quentin L. Cook i tijim: “Wan long ol taetol blong Lod mo Sevya blong yumi, Jisas Kraes we yumi laekem tumas, hem i ‘Prins blong Pis’ [Aesea 9:6]. … Long en, bae kingdom blong Hem i stanap, bae i gat pis mo lav.”4
Taem yumi stap ridim ol toktok we oli stap long Luk, long yia ia, mi hop se bae yu tingting long ol toktok ia “bigfala grup blong man blong heven oli stap presem God,” taem oli talem “Glori long God we i hae tumas, pis long wol, gud wok long man.”5 Mi bin tingting hevi long ol toktok ia mo mi ting se bae i stret blong yumi tingting se hemia i wan ofisol toktok blong “pis long wol.” “!Pis i kam finis!” oli talem. From se, i stret we, long naet ia, long smol haos ia, “Prins blong Pis” i bin kam long wol ia.
Long fas Krismes dei ia, ol grup blong ol enjel oli bin talem se pis i bin kam. Bifo oli kam, Jekob i bin talem finis: “Mifala i bin save long Kraes, mo mifala i bin gat wan hop blong glori blong hem plante handred yia bifo hem i kam; mo i no mifala nomo i gat wan hop blong glori blong hem, be tu, ol tabu profet we oli bin stap bifo long mifala.”6
Bakegen, Aesea i talem profesi ia, abaot taem blong yumi taem hem i raetem: “O i naes tumas long ol bigfala hil, ol leg ia blong hem we i karem ol gud nius oli kam long olgeta, we i talemaot pis.”7
So, ?huia ol naes pipol ia we bae oli talemaot pis? Sevya, i talem long ol disaepol blong Hem long tugeta ples ia, Galili mo Plante se “olgeta evriwan we oli mekem pis bae oli kasem blesing from bae oli singaotem olgeta ol pikinini blong God.”8
Antap long hemia, King Benjamin i tijim: “Mo nao, from kavenan ia we yufala i bin mekem, bae oli singaotem yufala ol pikinini blong Kraes, ol boe blong hem, mo ol gel blong hem; from luk, long dei ia, hem i bin bonem yufala i kam long saed blong spirit; from yufala i talem se hat blong yufala i bin jenis tru long fet we yufala i gat long nem blong hem; from hemia, yufala i bon long hem mo bin kam ol boe blong hem mo ol gel blong hem.”9
Yu mo mi i ol kavenan pikinini blong Jisas Kraes, we wanwan, yumi ol pikinini blong Hem. Tingbaot, Hem i talemaot se olgeta evriwan we oli mekem pis, bae oli singaotem olgeta, ol pikinini blong God. From hemia, yumi—ol pikinini blong God—yumi ol man blong mekem pis. Hemia i kavenan diuti blong yumi. Yu mo mi i mekem wan samting i defren long trabol wol blong tedei taem yumi traehad blong stap olsem ol man blong mekem pis—insaed long hom blong yumi, insaed long ol kongregesen blong yumi, insaed long ol komuniti blong yumi, iven raon long wol, tru long fasin blong yumi we i kaen, tru long ol gudfala wok blong yumi, mo ol toktok blong yumi—fes tu fes, mo onlaen. Bae yumi stap fetful blong “talemaot pis” taem yumi stap testifae abaot Hem, tru long toktok mo tru long ol wok.
Bakegen, long Buk blong Luk, yumi ridim:
“Nao ol enjel ya oli aot long ol man ya blong lukaot long sipsip, oli gobak long heven. Nao ol man ya oli stap taltalem long olgeta se, “Ei, i gud yumi go long Betlehem blong luk samting ya we i jes hapen, we Hae God i talemaot long yumi.”
“Nao olgeta oli hariap oli go, nao oli faenem Meri mo Josef, mo oli luk pikinini ya we i stap slip long bokis ya we ol man oli stap putum kakae blong ol animol long hem.
“Nao olgeta oli luk pikinini ya, oli talemaot nius blong pikinini ya we enjel i talemaot long olgeta.”10
Semmak, “bae yumi go naoia” mo “talemaot nius” blong mesej blong pis “long saed blong pikinini ia.” Hemia i mesej we ol misinari blong yumi oli stap tijim long olgeta we yumi lavem, mo long ol fren blong yumi; hemia i laef mesej we ol seves misinari oli serem taem oli stap givim seves olsem we Sevya bae i mekem. Hemia i mesej we yumi talemaot long olgeta taem yumi stap lavem, serem, mo invaetem olgeta we oli stap raon long yumi, blong oli tekpat long hop mo pis we yumi faenem insaed long gud nius blong Jisas Kraes.
So kambak long drama blong famli Bassett, we mifala i traem mo mestem evri Krismes—?From wanem mifala i gohed long tradisen ia, mo stap leftemap tingting blong ol pikinini mo ol apu pikinini blong traem mekem bakegen naes naet we i moa naes long evri naet, taem ol enjel oli kam blong talemaot ol gud nius blong wan bigfala glad?
Ansa i simpol nomo mo i wan glad: “Mo mifala i tokbaot Kraes, mifala i glad long Kraes, mifala i prij long saed blong Kraes, mifala i profesae long saed blong Kraes, mo mifala i raetem folem ol profesi blong mifala blong mekem se ol pikinini blong mifala oli save gat save long wanem ples oli save lukluk long hem blong kam klin aot long ol sin blong olgeta.”11
Yes, yumi luk se ful wol bae i muvmuv olbaot mo hat blong ol man i nomo strong. Be, nomata ol jalenj ia, long fes blong agens, mo long medel blong ples i muvmuv, yumi mas gohed blong talemaot pis, long taem ia mo oltaem, taem yumi stap mekem, yumi, mo evriwan raon long yumi, i rere long bigfala kambak blong Prins blong Pis, we i Lod, mo Ridima, Jisas Kraes. Blong ripitim toktok blong Presiden Nelson: “Wanwan pikinini blong God i gat raet blong gat janis ia blong harem mo akseptem mesej ia blong Jisas Kraes we i stap hilim mo pemaot man.”
Bae yumi stap ol man blong talemaot pis taem yumi stap selebretem taem we Sevya blong yumi, i bon, mo laef mo misin blong Hem long Krismes taem ia mo oltaem long prea blong mi, long nem blong Jisas Kraes, amen.