Bwaintangira Ake A Karako Nooraia
2021 Ana Botaki n Taromauri n te Kiritimati te Moan Beretitentii
Tabati, Ritembwa 5, 2021
Kabwarabwaraana
Ngke I bon uarereke, kauringaban te Kiritimati bon rokon tibuu te Unaine ao tibuu te Unimwaane Lundgren. Ni katoa ririki a na bon buti n aia kaa ae mane ni kawaia ae abwaabaki ni kawariira. Ti rang tangiriia, ao ti tangira naba ana Swedish bankeeke tibura te unaine—e karaoaki ma te kuriim ae mangiingi are e uotia man te tabo ni man ni mweengaia. E tei irarikin te titobu ibukin aoa aika bati, ni karaoi bankeeke ni karokoa ae ti aaki kona ni manga tenaa teuana ni kanna. Ngkai ai uoua te reita n roro n ataei aika a tia n ikawairake ni bukamaru iaon Swedish ni banikeeke akanne. Ao ni katoa tai ngkana ti karaoia, ti uringa tibura te unaine Lundgren ao ana tangira n ana bwaintangira.
Tabeua man bwaintangira aika a tamaroa bon bwaintituaraoi man ara tai ao taarena. I kakoaua n aron bwaintangira bon bwaintituaraoi aika mimitong.
Bwaintangira
Aio bon tain kantaningaan bwaintangira aika boou. Ma n te tairiki aei, ti na toki moa n iangoi bwaintangira ake ko a kaman anganaki—ao antai ake anganaki bwaintangira aikai ao bukin tera.
Te Atua e a tia n anganiira n tatabemaniira nako bwaaintituaraoi. Ko na bon aki namakina karekean taarena ke atatai, ma ko a tia ni karekei bwaintituaraoi n tamnei mairoun te Atua n te aro are ko na kona ni kakabwaiaiia tabeman ao ni kaniia riki nakoIna.1
Tera te bwaintangira ae e anganiko te Atua?
Ni koaua raoi, I tuai n noorai bwa te aomata ae iai te bwaintituaraoi irou. I aki taarena bwa te tia anene, ke te tia maie, ke te tia takakaro, ke te tia korobanna, ke te tia numera, ke … ke … ke … I rang n tiku … n arou.
Angiin te tai I a tia n noori korakoran bwaintituaraoi irouia tabeman ao n aki kakawaki. Ma I reiakinna bwa aki kakawaki ao a kariki kabuanibwai n aron te kakabotau. Ae kakawaki riki, I a tia n roko n ata mwaakan te Atua ae tabu “bwaintituaraoi ake a karako noraia” ao ni kukurei n aikai n aron kakoauaan Ana tangira ao koauana raoi.
Unimwaane Marvin J. Ashton e reirei bwa ana bwaintituaraoi n tamnei te Atua ni ikotaki ma “ake a karako noraia,” n ikotaki ma “te bwaintituaraoi ni bubuti; te bwaintituaraoi n te kakauongo; te bwaintituaraoi n te ongora ni kamanenaan te bwanaa ae rau, ae uarereke; te bwaintituaraoi ni kona n tang; te bwaintituaraoi ni kararoa te kauntaeka; te bwaintituaraoi n nanoraoi; … te bwaintituaraoi ni kakaean te raoiroi; te bwaintituaraoi n aki motikitaeka; te bwaintituaraoi n taraakin te Atua ibukin ana kairi; te bwaintituaraoi n riki bwa ana reirei; te bwaintituaraoi ibukin tabeakinaia tabeman; te bwaintituaraoi ibukin te iangoraoi; te bwaintituaraoi ibukin karaoan te tataro.”2
E ibuobuoki te rinan aei n iangoa taekan am bwaintangira teuana n te kawai ae kaokoro? E buokai.
Bwaintangira ake a karako noraia aikai a karaoa ae mwaiti n tabekiarake natin te Atua ngkai tabeman ake ti kinaiia ao ni kamoamoaia riki n tainako3—bwaintangira aika rau are e buokiira ni katiai oin katabeara ni maiura aika moan kakawaki. Ma, te kananokawaki, bwa ngaira n tabetai ti taua ao ni kabwaka ni butimwaea ke n tibwaua ara bwaintituaraoi, ni maaku ngkai e tuai kaitiakaki, kororaoi, ke n tikiraoi n aron are ti tangiria.
Ngkana ti kabwaka ni butimwaei bwaintangira ake a karako noraia, ti kanakoa te tai n tabekiia rake Natina—ao ti bon kanakoi ara tai n namakina ana tangira te Atua.4
Katanga Kunan Am Bwaitangira
Anganai bwa N na kaota teuana riki te bwaintangira—te bwaintangira mairoun tibuu te unimwaane Lundgren. Tibu te unimwaane n taainako e tangiria ni katanga te biaano. E ngae n anne, te waeoriin aio e tiku n aki kabonganaaki ao n rara iaon ana tiaebu, ao ngkanne e a manga tiku irou, inanon ririki aika a mwaiti—te katangtang inanon karaina aikai a tiku ni mabu.
Kabotaua aio nakon ana waeorin natiu te aine, Scarlett ae onoua ana ririki. Iai irouna te bwaintangira are e na tibwaia ma ngaira n te tairiki aei.
[Scarlett e katanga te waeorin]
Ko rabwa, Scarlett. E rang tamaroa anne. I tangiriko.
Ara bwaintangira mairoun Tamara are i Karawa e nanonaki bwa ti na tibwauaia. Ana waeorin Scarlett e aki bobuaka, ti kona ni kunea kabwakana n te bwai ni katangtang ke n aron katangana, ma ibukina e kabanea nanona nako iai, e anganaki te bwaintangira are uota te kimwareirei (riki nakoiu).
Tai kanakoi ana bwaintituaraoi te Atua, riki Ana bwai ake a karako noraia, a tiku n aki bongana ke n aki manena. Anai bwaaintangira ake E tia n anganiko mai iaon te tiaebu. Ngkana ko a tia ni kawakini ibukin te maamaa ke te nanououa, taebubuia ao kataia. Angan te Atua ao Natina. Bwaintangira ake ti karekei mairoun Tamara are i Karawa a bon nanonaki bwa ana kabonganaaki ao n tibwauaaki. Bwaintangira nako mairoun te Atua, e ngae ngke aki kororaoi, ma a uota te kimwareirei ao ana bon, ngkana e Anganaki, te anene n nebo.
Anaa am bwaintangira ni kakauongo ma te tangira ao kawara temanna raoraom ae tiku ni maroa. Iai iroum te bwaintangira n totokoa te kakauntaeka ao n nananoraoi? Bwaintangira akanne aki rang kainanoaki. Anga nakoia am utu, raoraom, ao kaain rarikim. Tuangiia aika nanotiotio ae ko tangiriia ao kaoiia nakon am taibora n amwarake. Anga te reirei ae kaunganano. Korei taeka n akoi. Kabonganai am bwaintangira ni kawariia ao katea Tion ao buokiia aomata ake irarikira n riki n tamaroa. Te Atua e kainanoia n aekaia nako. E anga bwaaintangira ni kabane ibukin tabekakirakeaia Natina. Tai kanakoa te katangitang mairoum n aki katangaki, te irabwati are e tuai nako, te ikabwarabure are e tuai karaoaki.
Karekean Ana Bwaintituaraoi
Inanon tain te Kiritimati n 1832, aia ikakorakora aomata aika Itiaki ni kaaitarai aia kamangao botanaomata ma te tautaeka. Te Burabeti Iotebwa Timiti e a tia n taetae ni burabetiia te buaka irouia te botanaomata.5 Ngkai anne e bon aki rang kakukurei.
Ma n Ritembwa 27, Iotebwa e karekea teuana te kaotioti—te “rongorongo n raoi ”mairoun te Uea.6 Inanon taai ni kangaanga akanne, te Uea e kauringa Iotebwa bwaaintituaraoi are E anganiia Ana aomata aika Itiaki—ae moan kakawaki, te bwaintangira iroun te Tia Kamaiu Iesu Kristo ao te kantaninga n te maiu ae akea tokina.
Te kawai ni kukurei are tain te Kiritimati bon norakin ao karekean ana bwaintituaraoi te Atua; te moan ao ae te moan rietaata are bon te “bwaintituaraoi ae akea kabotauana”7 iroun te Tia Kamaiu. Koauana ti te arona n tain te Kiritimati aei.
Inanon te kaotioti are e karekea Iotebwa, te Uea e anganna titiraki aikai:
“Bwa tera kabwaian te aomata ae e anganaki te bwaintangira, ao e aki butimwaea te bwaintangira? Nooria, e aki kukurei n te bwai anne are e anganaki, ke ni kukurei iroun are e anganna te bwaintangira.”8
Kabaneana
Au kantaninga bwa ti na kona n tatabemaniira n nooria ao ni karekea te bwaintangira are e anganiira te Atua—riki I kantaningaia bwa ti na kona n tatabemaniira ni kukurei iroun te Atua, te tia angaanga bwaaitangira aikai.
I kakaitau ibukin te bwaintangira ae akea kabotauana are Natina—te Nati temwaane are e roko nako aon te aba ngke te merimeri, niniraki iroun tinana ae kairake ao ni kaweneaki ni neia maan. Te merimeri are e na reirei teutana imwin teutana ao n ikawairake n akoi ibukin te akoi ni karokoa E na anga maiuna ibukin au bure. Ibukin am bure. Ibukin aia bure ni kabane ake a tia ni maeka ke naake a na maeka iaon te aba.
Ti na anene n te kuna n taromauri ae rangin tatangiraki:
“Joy to the world, the Lord is come; Let earth receive her King!9
Te bwaintangira iroun Iesu Kristo e a tia n anga ao boona ae korakora! Te titraki bon, ngaira ti na buti Mwaia? Ti na Kariaia bwa e na kairii maiura ao n Anganna tauan taekara? Ni kanga?
I kakoaua bwa butiimwaean ara Uea ao Ana bwaintangira e na uotii koauan kimwareirei—kimwareirei nakon te aonaaba ao kimwareirei inanon te aonaaba.
“Te kaitau nakon te Atua ibukin [te] bwaintangira are e aki konaki n taekinaki arona”10 are Natina n arana ae tabu ae Iesu Kristo, amen.