Te Nano ni Kiritimati
Ana Botaki n Taromauri ni Ka Kiritimati te Moan Beretitentii
Tabati, Ritembwa 5, 2021
Tariu ao mwaaneu aika kam tangiraki, I kakaitau ngkai I mena ibuakomi n te taromari ni Ka Kiritimati ni kabuta te aonaaba. Te katangitang ao marooro a tia n anai nanora. A uota te nano raoi ni Kiritimati, te kimwareirei ae e roko n taromaurian ao tangiran te Uea Iesu Kristo. Ti bane ni katiteuanaaki n ara tangira ao ara onimaki Irouna.
Te namakin ibukin neboana e rikirake ni katoa tai ngkana I wareki boki aika tabu are e buokai n ataia bwa antai Ngaia ngkoa ao antai Ngaia ngkai. Man te wareware ao te tataro anne, I ataia bwa Iesu bon Iehova, are, iaan ana kariaia Tamara are i Karawa, bon te Tia Kariki bwaai ni kabane. Bauro e kamataata aio n te kawai aei:
“Te Atua, are taetae ngkoangkoa irouia burabeti nakoia bakatibu ni makoro aika bati ma aro aika bati,
“E taetae naba nako ira ni boong aika kaitira iroun Natina, are E motika bukina ba te tia bwaibwai ni bwaai ni kabane, are E karaoa naba karawa ma aonaba i Rouna;
“Are bon raneaneam mimitongina, are boni katotongan arona ni koaua, are tauu bwaai ni kabane n ana taeka ae mwaka, ngke E a tia ni karaoi kaitiakani bure, ao E tekateka i angaatain te Atua are Mwaka i eta;
“Ngkae E a tia n riki ni kakanato riki nakoia anera, n ai arona naba ngke E a bwaibwai n te Ara ae moan te rine riki nako ia.
“Ba te anera ra ae E kangai te Atua nako ina ngkoa, Bon Natiu Ngkoe, I karikiko n te bong aei? Ao manga aio, Ngai N na riki ba Tamana, ao Ngaia E na riki ba Natiu?
“Ao ngkana E a manga kaira ana rikitemanna nako aon te aba, ao E kangai, Ao a na bane ana anera te Atua n taromauria.”1
N tain bungiakin Iesu i Betereem a anene anera ao, n are e taetae ni burabetiaki, e kaoti te itoi ae boou ni kaotaa karawa, ni karinea rokon Natin te Atua nakon te aonaaba.
E kakannato riki nakoira, ma n aron bungiakina nakon te maiu aei e karika namakinana ae E a kaan nakoira. E rineia bwa e na ruo man Ana kaintokanuea n angatain te Tama ni karekea Irouna te maiu ae mamate. E karaoia ibukin tangiraia natin Tamana aika mwaane ao aine aika a na bungiaki nakon te aonaaba aei. E karaoia ma te tangira ibukim—ao ibukiu.
E kona ni bungiaki nakon arona riki tabeua. Ma e bungiaki Iesu n te aro ae mangori n te kawa ae uarereke. Taan kawakin tiibu a Butimwaia. Tabeman taan Rabakau a kairaki mai ieta bwa a na Taromauriia. Te tia kairiiri n te tautaeka e anga te kaetieti bwa E na tiringaki. E riai ni uotaki nakon te aba teuana ibukin kamauran Maiuna. Ngke e tua te anera nakoia Ana karo iaon te aba bwa E a kona n okira oina abana, a uotia nako Natareta. E kabanea ae kania 30 te ririki ikekei, n rikirake ao ni mwakuri bwa te kabenta, imwain ae E moana Ana mwakuri ma te botanaomata.
Ko na bae ni miimi, n arou, bwa e aera ngkai e riai Natin te Atua ae kororaoi ni kanakoaki ibukin te mwakuri aei. Uringnga aron Ana kabwarabwara n Ana kariaia ibukin Weteana:
“Ba I ruo mai karawa, tiaki i bukin karaoan oin nanou, ma bon i bukin te karaoa nanon Teuare e kanakomaiai.
“Ao aio nanon Teuare kanakomaiai, ba N na aki kabua temanna i buakoia ake E anganai ni kabaneia, ma N na kautia n te bong n toki.
“Bon aio nanon Tamau, ba ane nora te Nati man onimakinna ao e na reke i rouna te maiu are aki toki: ao N na kautia n te bong n toki.”2
Iesu e kaota Ana tangira ao Ana nanorinano. E ngae ngke iai Nnena ae rietaata man rine ma Tamana, Iesu e rineiia Ana reirei iaon te aba mwaane aika a mangori, aika taan akawa, taan rikoi ana mwane te uea, ao ae nano n aba.
E reirei ao N reitaki ma rebera, ake a aoraki, a mwauku, ao ake a ribaaki. E tangiriia ao e butimwaiia naake a mangori ibuakoia, n aki tabe ngkae E ruo rikaaki mai i karawa. E beku ibuakoia, n tangiriia, ao ni boutokaiia.
Ana tangira n akoi ao n taotaonaki n nano e rikirake ni karokoa tokin Ana mwakuri n te aonaaba aei. E kaitarai kakaitara ao kairiribai ae E atai bwa bon mwakoron ana mwakuri are E weteaki nako iai ao n tia ni kariaia. Bwa E na korakai ibukin aia bure ao aki kororaoia aomata ni kabane ake a roko nakon te maiu ae mamate aei.
Ko uring ana taeka Iakoba ngke e reirei iaon Ana Mwakuri ni Kamaiu Iesu Kristo:
“O ai korakorara tabun Atuara! Bwa e atai bwaai ni kabane, ao bon akea te bwai ae e aki ataa taekana.
“Ao e a roko nakon te aonaaba bwa e na kamauia aomata ni bane ake a ongo ni bwanaana; bwa taraia, e a tia ni kammarakaki ibukiia aomata ni kabane, eng, ni marakiia bwaai ni kabane aika maiu, n aroia mwaane, aine, ma ataei, aika kaain ana utu Atam.
“Ao e karaoa aio bwa e aonga ni kona n reke te mangauti nakoia aomata ni kabane, bwa aonga n tei aomata ni kabane i matana n te bong ni motikitaeka ae korakora.”3
Te merimeri ni nneia maan n amwarake i Betereem bon Natin te Atua, ae e kanakoaki iroun te Tama bwa e na riki bwa ara Tia Kamaiu. Ti Ngaia ana Rikitemanna te Tama n te maiu n rabwata. Bon ara Banna ni katooto.
Ni karekea te nano ni Kiritimati, ti riai ni kataia n tatangira n arona ngkai E tatangira. Ana taeka nakoim ao nakoiu bon “Kam na Itangitangiri, n ai arou ngkai I tangirii ngkami.”4
Ko kona n namakina te nano ni Kiritimati, n ai arou, man taeka akanne. I a tia n namakina te ota ao te ungannano man ana kairoro te Tamnei ae Raoiroi ngkana I uringnga ao ni iangoa ana banna ni katooto te Tia Kamaiua te aonaaba.
Tao te ururing ae tamaroa irou, e kangai bwa e tatauraoi n tainako te Uea ni buokiira n te bwai ae riki nakoira. N aron are e reirei Moomon:
“E atai bwaai ni kabane te Atua, ngkai ngaia ma n aki totoki nakon aki totoki, nooria, e kanakoia anera bwa a na buokiia natia aomata, bwa a na kaota rokon Kristo; ao i nanon Kristo ao a na bane n roko bwaai ni kabane aika a raoiroi.
“Ao te Atua e taetae naba nakoia burabeti, n oin wiina bwa e na roko Kristo.
“Ao nooria, bon iai anga aika a mwaiti are e a kaoti iai bwaai aika mwaiti nakoia natia aomata, ake a raoiroi, ao bwaai ni kabane ake a raraoi a roko mai iroun Kristo; ao ngke ngkai a bwaka aomata, ao akea te bwai ae raoiroi ae kona n roko irouia.
“Ngaia are, man aia mwakuri n ibuobuoki anera, ao man taeka ni kabane ake a otinako ma ni wiin te Atua, ao aomata a moana ni kamwakura aia onimaki iroun Kristo; ao man te onimaki ao a bon tauii bwaai ni kabane ake a raoiroi; ao aio arona ni karokoa rokon Kristo.
“Ao mwiin rokona a bon kamaiuaki aomata naba man onimakinan arana; ao man te onimaki are a riki bwa natin te Atua mwaane [ao aine]. Ao ngkai e bon maiu te Kristo e taekin taeka aikai nakoia ara bakatibu ni kangai: Ane e bubutia te Tama n arau, te bwai ae raoiroi, ma te onimaki ma ni kakoaua bwa e na bon reke, nooria e na bon karaoaki nakoina.”5
N te tai aei, a mwaiti mai ibuakomi ae a tataro ibukin te korakora n tokanikai iaon kataaki ake a tuoko bwa tao ko naaki konai. I kakoauaa bwa te Tia Kamaiu ao te Tama a ongo am bubuti ibukin karauam ao ni baike a tamaroa ibukim ao nakoia ake ko tangiriia ao ni buokiia.
E na roko te kaeka n aron are e roko nakon te Burabeti Iotebwa Timiti. Ko na ataa ana tataro Iotebwa ibukin buokana bwa kanga aekan naba am tataro. Ao ko na namakin ana tangira te Uea ibukin Iotebwa ao ibukim n Ana kaeka ni karaunano nakon tangin Iotebwa. E tataro Iotebwa:
“O te Atua, ko mena iaa? Ao e ngaa te umwa ae rabuna te tabo ae ko karabako iai?
“E na maanra baim n tiku, ao matam, eng matam ae itiaki, n nooria mai karawa ae akea tokina bure nakoia am aomata ao am taan mwakuri, ao taningam e na ongo tangiia?”6
Ao te Uea e kaeka n aron ae E na kaeka nakoim ao nakoiu:
“E na mena te rau n tamneim; am kangaanga ao karawawatakim a na riki ma tii n te tai ae uarereke;
“Ao ngkanne, ngkana ko teimatoa n rinanona n te aro ae raoiroi, te Atua e na karietako i eta; ko na tokanikai i aoia ni kabane am kairiribai.
“Raom ake a boutokaiko, ao a na manga butimwaiko ma te tangira ao te iraorao.”7
I bon ataia bwa taian berita a na bon koro bukiia ibukim, ibukiu, ao ibukiia naake ti tangiriia. E a tia te Uea n namakina marakira. E karaoia bwa iai ana tangira ibukira. E ataa aron buokara n namakina te rau n taai n rawawata, ngkai e bon reitinako naba kataakira. E na kanakoa raraom bwa kanga anera n tei irarikim “ma te nano n tangira ao baai aika iraorao.” Ana bitaki nanora nakon ae tamaroa ngkai ti teimatoa ni kaitarai kataaki rinanon ara onimaki Irouna.8 Ao man anne, ti na riki bwa rao ae E kona te Uea ni kanakoa bwa kanga anera nakoia tabeman.
Ngkai Ana tia kakoaua ngai, I kaota koauana bwa te teei are e bungiaki i Betereem bon Iesu Kristo, Natin te Atua ae tangiraki. I berita bwa ngkana ko bubutia Tamara are i Karawa ma te onimaki ao n aran Iesu Kristo, te Tamnei e na uota namakinan te rau nakoim ao nakoia ake ko tangiriia.
I kaota au tangira nakoimii ma au katekeraoi bwa e na reke iroum te kukurei n tain te Kiritimati aei—n te ririki aei ao n ake imwiina. N aran Iesu Kristo ae tabu, amen.