“Ao Ko Kona n Ataia Naba Ngkoe”
Ana Botaki n Taromauri ni Ka Kiritimati te Moan Beretitentii
Tabati, Ritembwa 5, 2021
Tariu ao mwaaneu aika kam tangiraki, te Kiritimati inanon au tai n ataei ni mweengau e bon kaairaki ma katein abau irouiia au karo. Tinau e roko ni maeka n te United States mai Sweden ao tamau mai Finland.1 N te katauraoi ibukin te Kiritimati, ti katamaroa ara kai ni Kiritimati ma bwaai ni katamaroa aika a bon karaoaki, ao tinau e a taian kabuki aika mwaiti. Bwa n aron ae I ataia, iai rekerekena ma Tibun Titita Craig te unaine ae Lundgren. Ara bukamaru n Tain te Kiritimati e kakukurei ni moanaki man bwaai aika mwaiti aekakiia n aron te katei ni karaon amwarake are tinau e a tia ni katauraoi—booro n iriko; te buting n raiti; ao kariki aika mwaiti. keeke, ao kuuki. Te bong ni kakukurei n Tain te Kiritimati e kainaki ma rokon Jultomten—Santa Claus—are e uotii bwaintangira ibukiia ni kabane ataei. Ma imwain Jultomten n rokon, tinau e aki toki n ikotiia tariu, mwaaneu, ao ngai n ongora ngke tamau e wareka karakin te Kiritimati man te Nu Tetemanti.
Tamau bon te mwaane ae aki kakarongoa, te mwaane ae karako ana taetae n oin ana taetae tinana ao te Ingiriti are e reiakinna n ikawaina. E bon rang kokoaua riki ngkana e taraa ni kaun ao e aki bati n anga taeka ni kamoamoa. E bon aki kona ni kakatamaroa, ao e bon bebete ana taetae n aki bwarantiko ke n reeianako. N Tain te Kiritimati e wareware man Ruka 2. E wareka taekan mwanangaia Iotebwa ao Maria nako Betereem, kaotiia anera nakoia taan kawakin tiibu, bungiakin Iesu, ao Maria n iangoi raoi bwaai ni kabane ake a riki inanona. Ma tamau e aki toki ikanne n te kibu 19; e reitinako ma rongorongon Maria ao Iotebwa ni uota Iesu te teei nakon te tembora i Ierutarem ni karaoa te anga karea ni kaineti ma ana Tua Mote.
Tamau e wareware:
Ao nooria temanna te aomata i Ierutarem, are arana bon Timeon …
“Ao e tuangaki iroun te Tamnei ae Raoiroi, ba e na aki mate, imwain ae e na noora Kristo te Uea.
“Ao e roko mairoun te Tamnei nakon te tembora: ao ngke [Maria ao Iotebwa] a uota Iesu te teei, …
“Ngkanne [Timeon e anaa Iesu] ni babakoia inanon baina, ao ni katutuaraoa te Atua, ao n taku,
“Te Uea, Ko kanakoa am toro ma te rau ngkai, n ai aron am taeka:
“Ba a tia matau n nora am kamaiu,
“Are ko a tia ni katauraoia imataia aomata ni kabaneia.”2
N te tai anne, tamau n tainako e toki moa. Ngkanne e anga ana koaua. N tainako n te kawai ae kimototo ae ti te arona, e taekinna ma ana ee n Imatang , “N na bon aki kona n taua Iesu te teei inanon baiu, ma I ataia n ai aron Timeon ae e ataia, bwa te teei bon Natin te Atua, au Tia Kamaiu ao te Tia Kabooira. Boni Ngaia te Tia Kabooa maiura, ao E maiu.” Imwiin te katanoata aei, e taraira temanna ma temanna ma matana ake a buru ni kakang ao n taku ma katouan atuuna ae matoa, “Ao ko kona n ataia naba ngkoe.”
Tamau ma tinau ataia bwa antai te teei anne i Betereem ao tera Ngaia ngkana e ikawai rake bwa e na katiaa. Te atatai aei e bitiia. A aki tangiria bwa ngaira ataei ti na kakoaua iaon aia taeka3 ma ti na bon ataia i bon iroura n te aro are ti na kona ni bitaki naba. Ni kairaki man aia kakoaua au karo, I tiku iaon kawain te berita ae tabu ma tangiran te “kan ataia naba.”
Ngke te 11 au ririki, au utu a maeka i Göteborg, Sweden. Te mition beretitenti e kaoiia ni kabane te roronrikirake ni wareka Ana Boki Moomon. I bon tuai roro n warekaki n te kakao, ma tariu bon te rikan n te tai anne, ao e butimwaea te kakaewenako. N tainako I tangiria ni kan riki n ai aron tariu ao ni karaoa te bwai ae karaoia, ao I wareka Ana Boki Moomon. Au karo a tia n anganiia tariu ma mwaneu ao ngai ara mwakoro man koroboki aika tabu, ao I moana au wareware ni katoa tairiki.
Tabeua namwakaina imwina, Beretitenti Gosta Malm, te kauntira n te mition beretitentii,4 e kaungaiia te roronrikirake ake a wareka Ana Boki Moomon ni bubutia te Atua taekan koauana. I baireia bwa N na karaoa anne. Te tairiki anne I tataninga ni karokoa e matu tariu. I ruo man au kainiwene, I katorobubua iaon te burooa ae mwaitoro, ao I moana au tataro. I waekoa n namakinna ae ai aron I tuangaki, “I a tia ni kaman tuangkami ni kabane bwa a bane ni koaua.” Ao man anne, te rau ae akea kabwaraana e roko iaou. I a ataia i bon irou man mwaakan te Tamnei ae Raoiroi bwa e koaua ana Boki Moomon.5
N aron te berita ma te Kabwarabwara nakon Ana Boki MoomonI “[ataia] naba man [mwaakan te Tamnei ae Raoiroi] bwa Iesu Kristo bon te Tia Kamaiua te aonaba, bwa Iotebwa Timiti bon Ana …burabeti ni boong aika kaitira, ao Ana Ekaretia Iesu Kristo ibukiia Aika Itiaki ni Boong aika Kaitira bon abanuean te Uea are e a tia ni manga kateaki iaon te aonaba, ibukin te katauraoi i mwaain Kauaokin te Mesia.”6 Te atatai aei, n reitaki ma taan kakoaua ake imwina, e bitai, n aron are e a tia ni bitiia au karo.
Te atatai aei—bwa Iesu Kristo bon Natin te Atua ao E tauraki ibukin buren te aonaba—bon te bwaintangira n tamnei.7 Te bwaintangira aei e aki kabaeaki n onoti n ana mwakuri te nakoanibonga ke nakon temwane ke te aine, nakon are e bon tauraoi nakoia ni kabane ake a tau nako iai. Ti aki tuangaki ni uoti ana bwaintangira te Tia Kamaiu koora, kaai aika boiarara, ao myrrh n tau ibukin tamaroan bwaintangira n tamnei. Ti tuangaki bwa ti na bon anga ngaira.8 Te burabeti n Ana Boki Moomon ae Amureki e bubutia aomata, n taku, “Ao ngkai … I tangiria bwa kam na nakon Kristo, ae Atuan Iteraera ae Tabu, ao kam na karekea ana kamaiu, ma mwaakan ana kabomwi. Eng, kam na nakoina, ao kam na anganna tamneimi bwa ami karea nakoina …; ao ngkai e koaua bwa e maiu te Uea, ao kam na kamaiuaki.”9
Ngke I a ikawai, I nooriia au karo ni buokiia tabeman. I nooriia ni kawakin berita aika tabu are a tia ni karaoia ma te Atua. I nooriia ni mwakuri korakora ni karaoi kakawari nakon mweenga ao n reirei, kekeiaki ni ibuobuoki nakoia tabeman ake a beku ibukiia. I nooriia n ibuobuoki n taian otenanti n te tembora ao ni butimwaai wewete man te Ekaretia. Ao ni katoa ririki, n Tain te Kiritimati, tamau e kaota ana koaua imwiin warekan ana kakoaua Timeon n Ruka 2 iroun Tia Kamaiu Iesu Kristo. Inanon ririki, tamau e karababa ana kakao nakon “ataia naba” nakoia kautabona ao tibuna.
Bwii n ririki imwina n au bong n ataeinimwaane ma taneiaiu ma Ana Boki Moomon, I weteaki bwa te Mataniwi ni Kabuta n te Itingaun ao n anganaki n taetae n te maungatabu ni kabuta. Mwaneu e taraia raoi bwa tamau ae ai 92 ana ririki e na kona ni mataku n te maungatabu—ao riki nakon au taetae. Imwiin te maungatabu ni kabuta I kawaria ni mweengana. I titirakinna, “Dad, ko mataku n te maungatabu?” E kaeka, “Ja” Eng I titiraki, “Ko ongo bwanaau ngke I taetae?” E kaeka, “Ja” Eng Ma tabeua kakireeana, I kaotinakoa au taeka, “Ngaia, Dad, tera am iango iai?” E kaeka, “Oh, a bon bane n nakoraoi. I bon kuri ni kamoaa.”
Imwin te tai ae maan e taku, “Dale, iai te bwai ae N na tuangko.” I ataia ngkanne bwa ngke I kantaninga ana taeka ni kamaraunano, e katabeaki ana iango tamau n te bae e kakawaki riki nakon anganakiu te kamoamoaaki. E reitia, “Iai miiu ngke bong. I mii bwa I a mate, ao I noora te Tia Kamaiu. E anaai ni Baina ao e tuangai bwa a kabwaraaki au bure. Ao e bon rangi n tamaroa namakinana.” Bon anne are e taekinna tamau n takaruaia. Ma taraakin moana; iai kinaakin Iesu Kristo irouna. E ataia bwa te teei are i Betereem, are e a tia “n riki rake n rabakau ma n ikawai, ma n akoaki iroun te Atua ma aomata,”10 bon kamaiuana, bwa Natin te Atua e ikawai rake ao E anga maiuna ibukin ana bure. Ao tamau e a kaman ataia imwain te mii aei. Te mii bon kaotan te nanoanga ae tamaroa—te bwaintangira—mairoun Tamara are i Karawa ae tatangira nakon te unimwaane, are e a tia ni motirawa uoua te namakaina imwiina. Man bwaaintangira ni kabane n te Kiritimati ake I a tia ni karekei, I kawakina riki te bwaintangira ni kakoaua ao te onimaki man kaotan te katooto mairoun tamau ma tinau.
N te Kiritimati aei, bubutia Tamam are i Karawa ibukin te bwaintangira n tamnei n ataakin koauan maiun te Tia Kamaiua te aonaaba. Tain te Kiritimati bon arona ao te tai ae tamaroa ni kamatebwaia Aron Maiuna ao ni keiaki ni katotonga Aron anuana ao katein arona. Ngkana ko karaoia, ko kona n ataia bwa Iesu bon te Kristo, Natin te Atua, ao bwa E anga maiuna ibukin am bure. Te rabakau aei e nakoraoi ao e teimaan nakon bwaintangira riki tabeua bwa Jultomten e kona n anganaiko, ibukina e kona ni bitiko. Ko na ataia bwa e tangiria te Tia Kamaiu ni kaoki ake ko aki kona ni kaoki, ni kamaoi ikoaki ake ko aki kona ni kamaoi, ni karaoi baike a uruaki, ni kabooimwiin baike a katanginako ake ko rinanona, ao n reitinako ni kamaoi uruaki n nano.
N aron tamau iaon te aba, I ataia bwa N na aki kona n taua te teei are Iesu inanon baiu, ma I ataia, n aron naba Timeon e ataia, bwa te teei anne bon Natin te Atua, au Tia Kamaiu ao am Tia Kamaiu, au Tia Kabooai ao am Tia Kabooko. Boni Ngaia te Tia Kabooa maiura, ao E maiu. Ao Ko Kona n Ataia Naba Ngkoe. N aran Iesu Kristo, amen.