Umi don ojehecha pokãvéva
Primera Presidencia Navidagua Devocional 2021-pe
Domingo, Diciembre 5, 2021
Ñepyrũmby
Che mitãrõguare, imba’eguasuvéva Navidápe ha’e che taita ha jarýi Lundgren ñeĝuahẽ. Káda áño ojapo pe viahe puku peteĩ coche tujápe ore visita haĝua. Rohayhueterei chupekuéra ha rohayhu avei umi panqueque sueco che jarýi ojapóva crema agria pyahu reheve ha’e oguerúva peteĩ granjero ivalleguágui. Ha’e oĩ kosináme heta aravo aja, ojapóvo panquequeita ikatuve’ỹ meve ro’uve. Ko’áĝa, mokõive generación umi mitãgui oguerovy’a umi panqueque sueco hetereíva. Ha káda rojapo umi panqueque rogueromandu’a jarýi Lundgren-pe ha imborayhu don.
Umi don porãvéva ha’e ñane tiempo ha katupyry don. Aguerovia umi don ha’e don marangatu.
Don-kuéra
Kóva ha’e époka oñeha’arõháme umi regalo pyahu. Ha katu ko pyharépe jajapomi peteĩ pausa ha jahechakuaa umi regalo oñeme’ẽ mava’ekue peẽme, mávapa ome’ẽ ha mba’érepa.
Tupã ome’ẽ umi don peteĩteĩ ñandéve. Ikatu napeñandúi pendekatupyryha, ha katu peguereko umi Tupã don espiritual pehovasakuaa haĝua ambuekuérape ha peñemo’aĝuive haĝua Hese. 1
¿Mba’e don-pa Tupã ome’ẽ ndéve?
Chesinséra porãvo, araka’eve ajehecha chejupe peteĩ persona talentosa ramo. Ndaha’éi cantante, bailarín, atleta, artista, matemática térã kova ni amoã….che normal-etente.
Sapy’ánte ahecha umi don tuicha ambuekuérape ha añeñandu’i. Ha katu añemoarandu hína vyroreiha ha jepe ñanerundikuaaha umi komparasiõ. Imba’eguasuvéva katu, ahechakuaa pu’aka sagrado orekóva umi Tupã “don ojehecha’ỹvéva” ha cherory umívape Imborayhu ha jerovia evidencia ramo.
Elder Marvin J. Ashton ombo’e umi Tupã don apytépe oĩha avei umi “ojehecha’ỹvéva”, oikehápe “jejerure don; ñehendukuaa don; ñehendu ha jeipuru ñe’ẽ mbegue ha ikyrỹiva; ñerasẽkuaa don; ñorairõ ñembotove don; tory don; je’e jey jey’ỹ don; … tekojoja jeheka don; jehusga’ỹ don; Tupãme jeheka guía-rã; discipulado don; tapichakuérare ñeñangareko don; jepy’amongetakuaa don; ñembo’ekuaa don.” 2
¿Nepytyvõpa ko lista emaña haĝua ne don-kuérare tesape pyahúpe? Chepytyvõ chéve.
Ko’ã don kirirĩ ojapo heta omopu’ã haĝua Tupã raykuérape ambuekuéraicha py’ỹi jahechakuaa ha ñamomorãva 3 —umi don kirirĩ ñanepytyvõva jahupyty haĝua umi ñande propósito imba’eguasuvéva ko tekovépe. Ha katu, ñembyasyrã, sapy’ánte jajoko ha nañamomba’éi ni nañakompartíri umi ñane don, jakyhyjévo ndaha’emo’ãiha refinado, perfecto térã porã ñandegustaháicha.
Nañamomba’éirõ umi don ojehecha’ỹvéva, japerde oportunidad ñamopu’ãvo Ita’yrakuérape—ha oportunidad ñañandu haĝua Tupã mborayhu. 4
Embopu ne don-kuéra purahéi.
Pehejami chéve tahechauka peẽme ambue regalo: peteĩ che taita Lundgren regalo. Taita akóinte oaprendesékuri ombopu violín. Upevére, ko violín oguapy upépe ojepuru’ỹre ha omono’õ yvytimbo ijestántepe ha upéi che estántepe, heta ary aja, ko’ã cuerda música okirirĩ.
Oñekomparávo che nieta, Scarlett, orekóva seis áño, violín rehe. Ha’e oreko peteĩ regalo okomparti haĝua ñanendive ko pyharépe.
[Scarlett ombopúvo violín]
Aguyje, Scarlett. Upéva Iporãiterei. Rohayhu.
Ñande don-kuéra ñande Ru Yvagaguágui ha’e oñekomparti haĝua. Scarlett violín ndahepýi, ha jajuhukuaa defecto upe instrumento térã pe técnica-pe, ha katu omoĩhaguére ikorasõ ipype, ome’ẽ peteĩ regalo ha ñanembovy’a.
Ani eheja umi Tupã don ndeve oñeme’ẽva, ni umi “ojehecha’ỹvéva”, topyta ojepuru’ỹre ni oñemomba’e’ỹre. Eipe’a pe estántegui umi don Ha’e ome’ẽva ndéve. Reñongaturõra’e kogua py’amirĩgui, eipe’a pe yvytimbo ha eñeha’ã. Eikuave’ẽ Tupã ha Ita’yrakuérape. Umi don ñande Ru Yvagagua ome’ẽva ñandéve ha’e ojepuru ha oñekomparti haĝua Opaite Tupã don, ndaiperfectoirõ jepe, ogueru vy’apavẽ ha, oñeikuave’ẽrõ Chupe, ha’e peteĩ tupãitũ purahéi.
Ejagarra ne don ñehendukuaa mborayhu reheve, ha evisita peteĩ ne angirũ ha’eñóvape. ¿Eguerekópa pe ñorairõ ñembotove don ha tory don? Umi don oñeikotevẽve araka’evégui. Eme’ẽ umíva ne familia, angirũ ha vesinokuérape. Ere peteĩ ohasávape rehayhuha chupe ha einvita ne mesápe. Embo’e peteĩ mbo’epy inspirado. Ehai peteĩ nóta rory. Eipuru ne don-kuéra eipyso haĝua nde po, emopu’ã haĝua Sión ha umi tapicha oĩva nde jerérepe. Tupã oikotevẽ opaichaguáva. Ha’e ome’ẽ opa umi don omopu’ã Ita’yrakuérape. Ani peheja purahéi oĩva pende pype opyta ojepurahei’ỹre, añua oñeme’ẽ’ỹre, perdón oñeikuave’ẽ’ỹre.
Pemoĝuahẽvo Idon
Navida épokape 1832-pe, umi Santo pyahu ohasavaíva ombohovake disturbio civil ha político. Proféta José Smith oprofetisa ramoitékuri peteĩ guerra civil. 5 Upéva ndairoryetéi.
Ha katu diciembre 27-pe, José ohupyty ambue revelasiõ —Pete͂i “py’aguapy mensáhe” Ñandejáragui. 6 Umi ára hasývape, Ñandejára omomandu’a José-pe Ha’e ome’ẽ hague Isantokuérape umi don, imba’eguasuvéva, pe Salvador Jesucristo don, ha tekove opave’ỹva esperanza.
Roguerovy’akuaaháicha upeépoka navideña ha’ékuri rohechakuaávo ha romoĝuahẽvo umi Tupã don; peteĩha ha imba’eguasuvéva ha’e peteĩ Salvador “don ijojaha’ỹva” 7 Upeichaite avei ko Navida épokape.
Revelasio orresivivape Ñandejára oporandu Josépe kóva:
“Ha mba’épa ohupytýne pe kuimba’e oñeme’ẽvape peteĩ don, nomog̃uahẽiramo upe don? Péina ápe, ndovy’ái upe oñeme’ẽvare chupe, ni ndovy’ái upe don ome’ẽvare chupe.” 8
Ñembopaha
Aha’arõ opavave ñande tajahechakuaa ha ñamoĝuahẽ umi don Tupã ome’ẽva’ekue ñandéve, ha especialmente aha’arõ opavave tañanderory Tupãme, umi don me’ẽhare.
Cheaguyjeterei Ita’ýra don ijojaha’ỹvare, peteĩ Ta’ýra ouva’ekue yvy ári mitãmi ramo, oñemokunu’ũva peteĩ sy imitãvare ha oñemoĩ peteĩ pesebre-pe. Peteĩ mitãmi oñemoarandúva línea por línea ha okakuaa grásia por grásia ome’ẽ peve Hekove ofrenda ramo che angaipakuérare. Pene angaipakuérare. Opavave yvypóra oiko’akue ha oikótava ko yvy ári angaipakuérare.
Japurahéi peteĩ himno jahauhuetéva ñe’ẽ:
“Vy’apavẽ ko múndope, Ñandejára oúma; Tomoĝuahẽ ko yvy Irréipe!” 9
Oñeme’ẽ’akue pe Jesucristo don ¡ha mba’e repykuépepa! Pe porandu ha’e: ¿Ña moĝuahẽtapa Chupe? ¿Jahejátapa oike ha taipu’akapa? ¿Mba’éicha?
Atestifika ñamoĝuahẽvo ñande Rey ha Idonkuérape oguerúta vy’apavẽ añetéva: vy’apavẽ múndope ĝuarã ha vy’apavẽ ko múndope.
“Aguyje toñeme’ẽ Tupãme Ita’ýra don ijojaha’ỹvare 10 Jesucristo réra marangatúpe. Amén.