Pe Navida Espíritu
Primera Presidencia Navidagua Devocional.
Domingo, Diciembre 5, 2021
Che hermanno ha hermanakuéra pohayhuetéva, che aguije aime haguére penendive ko Navidagua devocional mundial-pe. Umi purahéi ha ñe’ẽ marangatu opoko ñane korasõre. Ogueru ñandéve pe Navida espíritu añetéva, pe vy’apavẽ ñañandúva ñatupãitũ ha jahayhúvo Ñandejára Jesucristo-pe. Ñanembojoaju ñane mborayhu ha devosiõ Hese.
Upe adorasiõ remiandu okakuaa amoñe’ẽvo umi Escritura versículo chepytyvõva aikuaa haĝua mávapa ha’ékuri ha Ha’e ko’áĝa. Amoñe’ẽ ha añembo’e rupi, aikuaa Jesús-pe Jehová ramo, ha’évakuri , ñande Ru Yvagagua sãmbyhy guýpe, opa mba’e Apohare. Pablo péicha omombe’u:
“Ymaite Tupã oñe’ẽva’ekue ñande ru ypykuérape heta jey ha heta hendáicha, umi maranduhára rupi.
“Ko’ágã katu, ko’ã ipahavevogua árape, oñe’ẽ ñandéve Ta’ýra rupi. Ha’e rupi niko ojapovaekue opa mba’e ha oheja chupe imba’erã;
“Ha’e niko Tupã reko mimbipa, Tupã ha’ehaichaite voi, ha pe omoĩmbáva hendápe opa mba’e iñe’ẽ pu’akapa rupi. Ñanemopotĩ rire ñane rembiapo vaikuetágui, oguapy yvágape Tupã guapyha akatúape;
“Mba’e guasueteve umi Tupã anhelkuéragui, ha’e ohupytýgui Tupãgui téra mba’e guasuvéva pe ha’ekuéra oguerekóvagui.
“Tupã niko nde’íri avave anhelkuérape: “Nde ha’e che Ra’y, che romoñemoña ko árape?. Ha nde’íri avei avave anhelkuérare: “Che itúvata ha ha’e che ra’ýta?
“Ambue hendápe katu, ohechaukávo Ta’ýra peteĩetépe he’i: Opa Tupã ánhel tomomba’e guasu chupe.”1
Jesús onaserõguare Belén-pe, umi ánhel opurahéi ha, ojeprofetisa haguéicha, peteĩ mbyja pyahu oaparese ohesape haĝua yvága, omomorãvo Tupã Ra’y jeike ko tekove yvy ariguápe.
Ha’e oĩ yvateve ñandehegui, ha katu, umi mba’e oiko’akue iñegueronase terrenal jerére ñanemoñanduka Ha’e hi’aĝuiha ñandehegui. Ha’e oiporavo oguejy Itróno Itúva ykéregui ha ojagarra Hi’ári pe mortalida. Ha’e ojapo upéva ohayhúgui peteĩ teĩ Itúva ra’y ha rajykuéra onasétava ko múndope. Ojapókuri mborayhu orekóva rupi penderehe—ha cherehe.
Ha’e onasekuaákuri oimeraẽ situación-pe. Ha katu Jesús onase circunstancia umílde peteĩ tava’ípe. Umi pastor omoĝuahẽporã chupe. Uperire, umi Rey Mago ojegueraha inspiración-re oadora haĝua chupe. Pe líder político ojukauka chupe. Ojeguerahava’erãkuri peteĩ tetã mombyryguápe ojesalva haĝua Hekove. Peteĩ ánhel he’i vove Ituvakuéra yvy ariguápe ikatuha oho jey Hetãme, ogueraha chupe hikuái Nazaret-pe. Ohasa 30 áño rupi upépe, okakuaa ha omba’apóvo karpintéro ramo, oñepyrũ mboyve Iministerio Público.
Ikatu peñeporandu, chéicha, mba’érepa tekotevẽkuri Tupã Ra’y perfecto oñembou peichagua misiõme. Penemandu’ami mba’éichápa Ha’e omombe’u Illamamieto jeasepta:
“Che niko ndajúiva’ekue ko yvy ári ajapo haguã pe che aipotávante. Ajuva’ekue katu ajapo haguã che Ru, che mbouva’ekue, oipotáva.
“Ha che Ru, che mbouva’ekue oipotáva niko kóva: ani oñehundi chehegui avave umi ha’e ome’ẽva chéve, amopu’ã jey haguã katu chupekuéra ára pahápe.
“Che Ru rembipota niko kóva: opa umi Ta’ýrape ohecháva ha hese ojeroviáva oguereko haguã jeikove opa’ỹva. Ha che amopu’ã jeýne chupe kuéra ára pahápe.”2
Jesús ohechauka mborayhu ha umilda. Jepe Ipu’aka ha mahesta renda Itúva ykére, Jesús oiporavo Idiscipulokuérarã ko yvy ári kuimba’ekuéra isensíllova, ijapytepekuéra umi pescador, ombyatýva impuesto ha peteĩ zelote.
Ombo’e ha ojoaju umi leproso, hasýva, mutilado ha ojedespresiávape. Ohayhu ha oasepta umi imboriahuvéva ijapytepekuérape, Ha’e oguejýrõ jepe umi Corte yvateguágui. Oservi, ohayhu ha omopu’ã chupekuéra.
Ipy’aporã oporohayhu ha hechapyrãva ha imoderasiõ okakuaa jepe Imisiõ terrenal paha peve. Ombohovake mbohovái ha jehayhu’ỹ Ha’e oikuaáva ha’eha parte imisiõ oñehenoihaguépe ha oaseptava’ekue. Ha’ékuri osufri haĝua opavave oúva ko yvy ári angaipakuéra ha mba’asykuérare.
Penemandu’ámi Jacob ñe’ẽnguérare ombo’évo Jesucristo expiasiõgui:
“O tuichaite piko pe ñande Tupã marangatu! Haʼe niko oikuaapa opa mbaʼe, ha ndoikói mbaʼeve haʼe oikuaaʼỹre.
“Ha haʼe ou yvórape osalva hag̃ua opa yvyporakuérape koʼãva ohendúramo iñeʼẽ; ha péina ápe, haʼe oñandu opa yvypóra mbaʼeʼasy, heẽ, opa tekove oikovéva mbaʼeʼasy, upéicha kuimbaʼe, kuña, ha mitã, haʼéva Adán rogaygua.
“Ha haʼe ohasaʼasy koʼã mbaʼe ikatu hag̃uáicha pe jeikovejey og̃uahẽ opavave yvypórape, opavave oñemboʼy hag̃ua henondépe pe huísio guasu árape.”3
Pe mitãmi oĩvakuri pesebre Belén-pe ha’e Tupã Ra’y, Túva omboúva ha’e haĝua ñande Salvador. Ha’e ñande Túva Ra’y Unihénito ko tekovépe. Ha’e ñane Rembiecharã.
Jareko haĝua pe Navida espíritu ñañeha’ãva’erã jahayhu Ha’e ohayhuháicha. Iñe’ẽnguéra peẽme ha chéve ĝuarã ha’e, “Pejoayhu che pohayhuháicha”4
Peẽ peñandukuaa avei pe Navida espíritu umi ñe’ẽme, che añanduhaguéicha. Añandu pe tesape ha kyre’ỹ oúva Espiritu Santo influenciagui káda chemandu’a ha ajepy’amongeta pe Salvador del mundo rembiecharãre.
Chéve ĝuarã, ikatu pe gueromandu’a he’ẽvéva ha’e Ñandejára oĩha listo ñanepytyvõ haĝua oimporta’ỹre mba’épa oiko ñandéve . Mormón ombo’e:
“Ha péina ápe, oikuaávo Tupã opa mbaʼe, oikógui apyraʼỹgui apyraʼỹme, péina ápe, haʼe omboúkuri angelkuéra oministra hag̃ua yvypóra raʼykuérape, ohechauka hag̃ua hikuái Cristo jeju rehegua; ha Cristo-pe outaha opa mbaʼe porã.
“Ha Tupã heʼi avei profetakuérape, ijuru rupive, Cristo outaha.
“Ha péina ápe, opáicha ojehechauka mbaʼe iporãva yvypóra raʼykuérape, ha opa mbaʼe iporãva ou Cristo-gui; ndaupéichairamo yvyporakuéra oĩ jeʼápe, ha mbaʼeve iporãva ndaikatumoʼãikuri og̃uahẽ chupekuéra.
“Upévare, angelkuéra ministrasiõ rupi, ha opa ñeʼẽ osẽva Tupã juru rupi, oñepyrũkuri yvyporakuéra omombaʼapo Cristo rehe jerovia; ha upéicha jerovia rupive ojejagarra hikuái opa mbaʼe porãre; ha upéichakuri Cristo jeju peve.
“Ha haʼe ou rire yvyporakuéra ojesalva avei hérare ojerovia rupi; ha jerovia rupi, haʼe hikuái Tupã raʼy ha [rajykuéra]. Ha añetehápe Cristo oikoveháicha haʼe oñeʼẽ koʼã ñeʼẽ ñande rukuérape heʼívo: Oimeraẽ mbaʼe pejeruréva Túvape che rérape, oĩporãva, jerovia reheve pegueroviávo oñemeʼẽtaha peẽme, péina ápe, oñemeʼẽta peẽme.”5
Ko épokape, heta peẽ peñembo’e pejerurévo mbarete pegueropu’aka haĝua umi prueba penera’ãva pe peñandúva pene limite peve. Atestifika pe Salvador ha pe Túva ohendu pende jerure pejerurévo umi mba’e iporãva peẽme ha umi pehayhúva ha peservívape ĝuarã.
Umi ñembohovái oúta ouhaguéicha proféta José Smith-pe. Pehechakuaáta José ñembo’e pytyvõre ha’eha penemba’éichaite avei. Ha peñandúta Ñandejára mborayhu José rehe ha penderehe Iñembohovái oporomoamgapyhýva José jerure’asýpe. José oñembo’e:
“O Tupã, ¿Moõpa reime? “¿Ha moõpa oĩ pabellón ojaho’íva ne renda ñemi?.
“¿Araka’e pevépa rejokóta nde po, ha nde resa, héẽ, nde resa potĩ, oma’ẽta yvága apyra’ỹ guive umi mba’e vai ojejapóva nde tavayguakuéra ha ne rembiguaikuérare, ha oikéta nde apysápe ijerure’asykuéra?”6
Ha Ñandejára ombohovái peẽme ha chéve Ha’e ojapoháicha:
“py’aguapy ne ángape; nde adversidad ha nde aflicción sapy’aite ǧuarãnte;
“Ha upéramo, regueropu’aka porã ramo, Tupã nde’exaltáta yvateve; reñemotendéta opa umi nderayhu’ỹhárakuéragui.
“Ne angirũnguéra opyta ndeykére, ha nemomaitei jeýta korasõ rory ha po jerápe.”7
Che aikuaa chejehegui umi promesa añeteguaha peẽme, chéve ha umi jahayhúvape ĝuarã. Ñandejára oñandu ñane ñembyasykuéra. Upéicha Ha’e oiporavókuri mborayhu orekóva rupi ñanderehe; Ha’e ñanepytyvõkuaa ñañandu haĝua py’aguapy jehasa’asy paũme, jepe pe prueba ndohasáirõ gueteri. Ha’e omboúta angirũnguéra ánhelkuéraicha oĩ haĝua ñande ykére “korasõ kunu’ũ ha po kyrỹi reheve.” Ñane korasõite oñemoambuéta porãrã jagueropu’aka aja umi prueba personal ñamoĩvo ñande jerovia Hese.8 Ha upe ñemoambue reheve oiko ñandehegui Ñandejára angirũ Ha’e ikatúva ombou anhelkuéra ramo ambuekuérape.
Itestigo ramo, atestifika upe mitãmi onase’akue Belén-pe ha’eha Jesucristo, Tupã Ra’y ojehayhuetéva. Apromete peẽme pejerurévo ñande Ru Yvagaguápe jerovia reheve ha Jesucristo rérape, pe Espiritu oguerúta peẽme a umi pehayhúvape py’aguapy remiandu.
Ha’e peẽme pohayhuha, ha adesea peẽme tapeguereko peteĩ époka navideña pevy’apajepévape, ko áño ha tapiaite. Jesucristo réra sagrado-pe. Amén.