Eb’ li maatan moko jwal neke’k’utun ta chi kutankil
2021 Xch’utam li Xb’eenil Awa’b’ejil re li Ralankil
Domingo, 5 diciembre, 2021
Xtikib’ankil
Naq toj saajin chaq, li k’a’ru jwal nawulak chaq chiwu sa’ li Ralankil, a’an naq nawulak li wixa’an ut lin mama’ Lundgren. Rajlal chihab’ neke’wulak sa’ jun q’eel b’eleb’aal ch’iich’ chi ula’anink. Jwal nawulak chiqu li panqueque sueco naxyiib’ li wixa’an—rik’in li crema li naxloq’ chaq sa’ lix tenamit rik’in jun li kristiaan. K’iila hoor kiwan sa’ li k’uub’leb’aal chixyiib’ankileb’ li panqueque toj reetal naq ink’a’ chik nokoru chixk’uxb’al junaq. Anajwan, wiib’ tasal chik chi kok’al ak xe’xyal xsahil li panqueque sueco a’an. Ut rajlal sut naq naqayiib’, najultiko’ qe li qixa’an Lundgren ut lix maatan re rahok.
Junjunq reheb’ li tz’aqal chaab’il maatan a’aneb’ li qahoonal ut li qaseeb’al. Nink’oxla naq eb’ li maatan a’an, a’aneb’ santil maatan.
Eb’ li maatan
A’an a’in jun kutankil re xk’oxlankileb’ li ak’ maatan. A’b’an sa’ li q’ojyin a’in, qak’ehaq b’ayaq li qahoonal re xk’eeb’aleb’ reetal li maatan li ak xe’k’eeman qe—ut ani xk’ehok reheb’ ut k’a’ut.
Li Dios xk’ehom chaq qamaatan chiqajunjunqal. Maare teereek’a naq maak’a’ eeseeb’al, a’b’an wankeb’ eerik’in lix musiq’ejil maatan li Dios li naru nekerosob’tesiheb’ wi’ lee ras eeriitz’in ut re naq texnach’oq rik’in li Dios.1
K’a’ru li maatan xk’ehom aawe li Dios?
Chi yaal ninye naq maajun wa wilom wib’ chi wan ta raj inseeb’al. Moko ninnaw ta b’ichank, xajok, moko laa’in ta junaq aj b’atz’unel, moko ninnaw ta k’utb’esink, ink’a’ ninnaw li matematica, ut wankeb’ xkomon … yal maak’a’ injalanil.
Wilom xnimal xmaataneb’ li was wiitz’in ut xb’aan a’an naweek’a naq jwal ka’ch’inin. A’b’an yookin chixtzolb’al naq maak’a’ aj-e ut neke’sachok li juntaq’eetank a’an. Li k’a’ru jwal aajel wi’chik ru, a’an naq wilom lix loq’laj wankil li “maatan ink’a’ jwal k’utk’u” ut naq nasaho’ inch’ool rik’in xb’aan naq a’an reetalil lix rahom ut lix chaab’il na’leb’.
Li Elder Marvin J. Ashton kixk’ut naq sa’ xyanq lix musiq’ejil maatan li Dios wankeb’ li maatan “ink’a’ jwal k’utk’u,” a’ “li maatan re patz’ok; li maatan re ab’ink; li maatan re rab’inkil ut roksinkil li ch’ina xyaab’ kuxej li q’un na’aatinak; li maatan re ruhank chi yaab’ak; li maatan re risinkil rib’ rik’in li wech’ok-ib’; li maatan re wank chi chaab’il xch’ool; … li maatan re xsik’b’al li k’a’ru tiik; li maatan re ink’a’ raqok aatin; li maatan re xsik’b’al li b’eresiik xb’aan li Dios; li maatan re wank choq’ tzolom; li maatan re rilb’aleb’ li qas qiitz’in; li maatan re k’oxlank sa’ ch’oolej; li maatan re xyeeb’al li tij.”2
Ma nakatxtenq’a a’in chixk’eeb’aleb’ reetal laa maatan chi saqen chik ru? Nikinixtenq’a.
Eb’ li maatan a’in li ink’a’ jwal k’utk’uukeb’ nim xk’anjeleb’ sa’ xwaklesinkil xch’ooleb’ li ralal xk’ajol li Dios jo’ chanruheb’ ajwi’ li maatan rajlal neke’qak’e reetal3—eb’ li maatan li ink’a’ jwal k’utk’uukeb’ li nokohe’xtenq’a sa’eb’ li ajom jwal aajeleb’ ru sa’ li qayu’am. Wan naq ink’a’ naqawotz chi moko naqab’antioxi li qamaatan, naqaxuwa b’an naq moko chaab’ileb’ ta, moko tz’aqaleb’ ta, malaj moko ch’ina-useb’ ta.
Naq ink’a’ neke’qak’e reetal li maatan a’an li ink’a’ jwal k’utk’uukeb’, nasach chiqu jun hoonal re xwaklesinkileb’ xch’ool li ralal xk’ajol—ut nasach chiqu jun hoonal re reek’ankil lix rahom li Dios.4
Toch’ lix sonil laa maatan
Nawaj xk’utb’al jun chik li maatan—jun xmaatan lin mama’ Lundgren. Lin mama’ kiraj xtzolb’al xtoch’b’al li violin. A’b’anan, li violin a’in kiwan chi k’uulanb’il ut chi poqs ru sa’ li rochoch ut chirix a’an sa’ li wochoch ajwi’ laa’in, chiru k’iila chihab’—moko kirisi ta li son li violin a’an.
Juntaq’eeta a’an rik’in lix violin li wimam aj waqib’ chihab’, xScarlett. Wan jun li maatan naraj xwotzb’al qik’in sa’ li q’ojyin a’in.
[Li xScarlett naxtoch’ li violin]
B’antiox, Scarlett. K’a’jo’ xchaq’al ru. Nakatinra.
Eb’ li maatan xk’ehom qe li qaChoxahil Yuwa’ wankeb’ re naq te’wotzmanq. Lix violin li xScarlett moko terto ta xtz’aq, ut naru naqataw junaq na’leb’ ink’a’ us sa’ li k’anjeleb’aal malaj chan ru naq natoch’man, a’b’an xb’aan naq xk’e xch’ool chixb’aanunkil, xk’e jun qamaatan ut xk’e xsahil qach’ool.
Maakanab’ naq eb’ lix maatan li Dios choq’ aawe, jo’eb’ ajwi’ li ink’a’ jwal k’utk’uukeb’, ink’a’ ta raj te’oksimanq chi moko te’tz’eqe’q. Isiheb’ chi kutankil li maatan xk’ehom chaq a’an choq’ aawe. Wi aak’uulahomeb’ xb’aan xkab’ rix aach’ool, puuxi li poqs chiru ut yal xk’anjelankil. Yeechi’iheb’ re li Dios ut reheb’ li ralal xk’ajol. K’eeb’ileb’ chaq qe li qamaatan xb’aan li qaChoxahil Yuwa’ re naq te’qoksi ut te’qawotz. Chixjunileb’ laa maatan neke’chal rik’in li Dios, us ta ink’a’ tz’aqaleb’ re ru, ut neke’xk’am chaq sahil ch’oolejil ut a’aneb’ li b’ich re loq’onink, naq neke’oksiman.
K’am laa maatan re ab’ink rik’in rahok ut ula’ani junaq laa wamiiw li wan xjunes. Ma wan aamaatan re xramb’al li wech’ink-ib’ ut re li wank chi chaab’il? Eb’ li maatan a’an tz’aqal aajeleb’ ru. Q’axtesiheb’ a’an reheb’ laa junkab’al, laa wamiiw, ut eb’ laa wech kab’al. Ye reheb’ li kristiaan maak’a’eb’ rochoch naq nakaraheb’ ut b’oqeb’ sa’ laa meex chi wotzok. K’ut junaq musiq’anb’il na’leb’. Tz’iib’a junaq li ch’ina hu re rahok. Oksi laa maatan re xye’b’al laa wuq’, xk’ojob’ankil Sion ut xk’ojob’ankileb’ li kristiaan li wankeb’ sa’ laa sutam. Li Dios naraj ru chixjunileb’ li kristiaan. A’an xk’ehom chaq chixjunileb’ li maatan re xwaklesinkileb’ xch’ool li ralal xk’ajol. Maakanab’ xb’ichankil li b’ich wan sa’ laa ch’ool, li q’alunk, li kuyuk maak chi ink’a’ yeechi’inb’il.
Xk’ulb’al lix maatan
Chiru li Ralankil re 1832, eb’ laj santil paab’anel ke’xnumsi li ch’a’ajkilal rik’in li pleetiik ut li taaqiik. Li profeet aj Jose Smith toje’ kixye resil sa’ profeetil aatin jun li pleetik.5 Moko sa ta rab’inkil a’an.
A’b’an sa’ li 27 re diciembre, laj Jose kixk’ul jun chik li k’utb’esinb’il na’leb’—jun “esil re tuqtuukilal” kixk’e li Qaawa’.6 Sa’eb’ li kutankil a’an ch’a’aj, li Qaawa’ kixjultika re laj Jose k’a’ruheb’ li maatan xk’e chaq reheb’ laj santil paab’anel—li jwal aajel ru, a’an lix maatan li Kolonel Jesukristo ut li royb’eninkil li junelik yu’am.
Ke’saho’ xch’ool chiru li Ralankil a’an xb’aan rilb’aleb’ ut xk’ulb’aleb’ lix maatan li Dios; xb’een ut li tz’aqal jwal nim a’an lix “maatan maak’a’ xjuntaq’eetankil,”7 a’ li Kolonel. A’an ajwi’ nak’ulman sa’ li kutankil a’in re Ralankil.
Sa’ lix k’utb’esinb’il matk’ laj Jose, li Qaawa’ kixpatz’ re li na’leb’ a’in:
“Xbʼaan naq kʼaʼru tixra wiʼ junaq winq wi kʼeebʼil jun maatan re, ut moko naxkʼul ta li maatan? Kʼehomaq reetal, moko nasahoʼ ta saʼ xchʼool rikʼin li kʼaʼru kʼeebʼil re, chi moko nasahoʼ saʼ xchʼool rikʼin li ani kikʼehok re li maatan.”8
Xraqik
Nawoyb’eni naq chiqajunjunqal tooruuq chirilb’aleb’ ut chixk’ulb’aleb’ lix maatan li Dios naxk’e chaq qe—a’b’an nawoyb’eni wi’chik naq chiqajunjunqal taasaho’q qach’ool rik’in li Dios, li nak’ehok chaq reheb’ li maatan.
Jwal nim inb’antioxihom xb’aan li maatan maak’a’ xjuntaq’eetankil re li Ralal—jun Alalb’ej li kichal sa’ ruchich’och’ jo’ jun k’uula’al, chi q’alunb’il xb’aan jun saajil na’b’ej ut chi k’eeb’il sa’ jun xwa’leb’aal li xul. Jun k’uula’al li kitzolok chi raqal ut kik’i rik’in li usilal toj reetal naq kixmayeja lix yu’am sa’ xk’ab’a’eb’ lin maak. Sa’ xk’ab’a’eb’ laa maak. Sa’ xk’ab’a’eb’ lix maak chixjunileb’ li ak wanjenaqeb’ ut li toj te’wanq sa’ li ruchich’och’.
Naqab’icha raatinul jun li b’ich jwal raaro:
“Sahaq eechʼool, li Qaawaʼ xchal; Chekʼul tzʼaqal lee Rey!”9
Kik’eeman lix maatan li Jesus li Kristo, ut chi jo’nimal xtz’aq! Li patz’om a’an ma taqak’ulub’a laa’o a’an? Ma taqakanab’ chi ok ut taqak’e chi numtaak? Chan ru?
Ninch’olob’ xyaalal naq xk’ulb’al li qaRey ut eb’ lix maatan tixk’am chaq sahil ch’oolejil choq’ re li ruchich’och’ ut sahil ch’oolejil sa’ li ruchich’och’.
“B’antiox re li Dios k’a’jo’ xnimal lix simaatan,”10 a’ li Ralal, sa’ lix santil k’ab’a’ li Jesukristo. Amen.