ຜູ້ໃດສ້າງຄວາມສະຫງົບສຸກກໍເປັນສຸກ

ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2021

ແອວເດີ ດັບເບິນຢູ ມາກ ແບເຊັດ

ແຫ່ງສາວົກເຈັດສິບ

ວັນອາທິດ, ວັນທີ 5 ເດືອນທັນວາ, 2021

ອີກເທື່ອໜຶ່ງ, ຝ່າຍປະທານສູງສຸດຜູ້ເປັນທີ່ຮັກຂອງພວກເຮົາ ໄດ້ເຊື້ອເຊີນພວກເຮົາໃຫ້ມາຮ່ວມກັນເພື່ອເລີ່ມຕົ້ນການສະເຫລີມສະຫລອງຄຣິດສະມາດ. ໃນຂະນະທີ່ປະເພນີ ແລະ ຮີດຄອງຂອງເຮົາຕະຫລອດທົ່ວໂລກມີຫລາກຫລາຍ, ເຮົາທຸກຄົນກໍກະຕັນຍູ ແລະ ໄດ້ຮັບພອນຫລາຍທີ່ໄດ້ເປັນນ້ຳໜຶ່ງໃຈດຽວກັນ—ໃນການນະມັດສະການພຣະຜູ້ຊ່ວຍໃຫ້ລອດ ພຣະເຢຊູຄຣິດຂອງເຮົາຢ່າງເປັນໜຶ່ງດຽວ ແລະ ສະເຫລີມສະຫລອງການກຳເນີດຂອງພຣະອົງເມື່ອຫລາຍກວ່າສອງພັນປີກ່ອນ.

ປະເພນີຢ່າງໜຶ່ງທີ່ຄອບຄົວແບເຊັດມັກທີ່ສຸດ, ເຊັ່ນດຽວກັບພວກທ່ານຫລາຍຄົນ, ແມ່ນການສະແດງເລື່ອງລາວການກຳເນີດ. ສຳລັບພວກເຮົາແລ້ວ, ການອ່ານບັນທຶກຂອງເອຊາຢາ, ລູກາ, ມັດທາຍ, ນີໄຟ, ແລະ ມໍມອນ, ພ້ອມດ້ວຍເພງສວດຄຣິດສະມາດ ແລະ ການສະແດງສົດທີ່ພັນລະນາເຖິງນາງມາຣີ, ໂຢເຊັບ, ແລະ ພຣະກຸມມານເຢຊູ, ໄດ້ສ້າງແຮງບັນດານໃຈ ແລະ ເຕັມໄປດ້ວຍວິນຍານ—ແຕ່ກໍບໍ່ສະເໝີໄປ.

ຍົກຕົວຢ່າງ, ຄ່ຳຄືນກ່ອນວັນຄຣິດສະມາດ, ລູກຜູ້ນ້ອຍຂອງພວກເຮົາທີ່ສະແດງເປັນຝູງແກະໄດ້ພາກັນຮ້ອງໄຫ້ຂຶ້ນ ໃນທັນທີທັນໃດ. ສຽງຮ້ອງໄຫ້ໂວຍວາຍໄດ້ແຜ່ກະຈາຍໄປຢ່າງໄວ ທັງຄົນລ້ຽງແກະ ແລະ ທູດສະຫວັນ ແລະ ແມ່ນແຕ່ແອນ້ອຍໃນຜ້າອ້ອມກໍຮ້ອງໄຫ້ນຳກັນ. ປີຕໍ່ມາ, ພວກເຮົາບໍ່ມີຝູງແກະ. ບໍ່ມີໃຜກ້າສະແດງເປັນແກະ ເພາະຢ້ານວ່າ, ດ້ວຍເຫດໃດໜຶ່ງ, ໂຕແກະເຄີຍເປັນຕົ້ນເຫດຂອງສຽງຄ່ຳຄວນທີ່ເປັນຕາຢ້ານ ແລະ ສ້າງຄວາມເສຍຫາຍນັ້ນ. ໃນປີໜຶ່ງອີກ, ພວກຜູ້ລ້ຽງແກະໄດ້ໃຊ້ໄມ້ຄ້ອນເທົ້າສູ້ກັນ, ແລະ ອີກປີໜຶ່ງ ບໍ່ມີໃຜຢາກເປັນໂຫລາຈານ ຫລື ທູດສະຫວັນ, ໂດຍບໍ່ຍອມໃສ່ຊຸດອື່ນນອກຈາກຊຸດໄດໂນເສົາ ແລະ ຊຸດປາໂລມາຈາກບຸນຮາໂລວີນເທົ່ານັ້ນ. ແຕ່ບາງທີການສະແດງທີ່ໜ້າຈົດຈຳທີ່ສຸດຂອງພວກເຮົາ ແມ່ນຕອນທີ່ແອນ້ອຍຕົກລົງຈາກຮາງຫຍ້າທີ່ສູງເກີນໄປ ແລະ ບໍ່ໝັ້ນຄົງຂອງລາວ, ໂດຍດິ່ງລົງສູ່ພື້ນຫີນຢູ່ໜ້າເຕົາໄຟຝີງ, ແຕ່ຖືກຮັບໄວ້ເໜືອພື້ນພຽງບໍ່ທໍ່ໃດນິ້ວເທົ່ານັ້ນ. ຂ້າພະເຈົ້າຕ້ອງຍົກຄວາມດີງາມໃຫ້ໂຕເອງກັບການໂດດລົງໄປຮັບນັ້ນ, ເຖິງແມ່ນວ່າ ການຕົກນັ້ນກໍເປັນຄວາມຜິດຂອງຂ້າພະເຈົ້າເອງທັງໝົດເຊັ່ນກັນ.

ຄືນສະຫງັດ? ແສນສະຫງົບ? ການສະແດງການກຳເນີດຂອງພວກເຮົາ ໜ້າຈະຖືກເອີ້ນວ່າ “ຄວາມໂກລາຫົນໃນຮາງຫຍ້າ” ຫລາຍກວ່າ. ຂ້າພະເຈົ້າຕ້ອງຍອມຮັບວ່າ ເມື່ອວັນຄຣິດສະມາດມາເຖິງ, ຂ້າພະເຈົ້າມັກຈະສົງໄສວ່າ ບາງທີພວກເຮົາຄວນລອງປະເພນີຄຣິດສະມາດຢ່າງອື່ນທີ່ ເຊື້ອເຊີນ ຄວາມສະຫງົບສຸກທີ່ແທ້ຈິງ.

ຄວາມສະຫງົບສຸກ—ສະພາບທີ່ອ່ອນຫວານ ແລະ ມີຄວາມຫວັງທີ່ພວກເຮົາທຸກຄົນປາດຖະໜາ, ບໍ່ແມ່ນພຽງແຕ່ໃນວັນຄຣິດສະມາດເທົ່ານັ້ນ ແຕ່ຕະຫລອດເວລາ. ເຖິງຢ່າງໃດກໍຕາມ, ຕະຫລອດທົ່ວໂລກໃນທຸກມື້ນີ້, ເບິ່ງຄືວ່າຄວາມສະຫງົບສຸກກາຍເປັນສິ່ງທີ່ຫາຍາກຂຶ້ນ. ໃນຂະນະທີ່ກຳລັງສຶກສາຄຳສອນ ແລະ ພັນທະສັນຍາປີນີ້, ຂ້າພະເຈົ້າໄດ້ຖືກເຕືອນເຖິງການເປີດເຜີຍທີ່ພັນລະນາກ່ຽວກັບຍຸກສະໄໝຂອງເຮົາ ທີ່ວ່າ:

“ແລະ ໃນວັນນັ້ນ … ທັງແຜ່ນດິນໂລກຈະສັບສົນວຸ້ນວາຍ, ແລະ ໃຈຂອງມະນຸດຈະທໍ້ແທ້.”¹

ໃນສະພາບຂອງຄວາມສັບສົນວຸ້ນວາຍທາງໂລກ, ຄວາມສະຫງົບສຸກທີ່ຍິ່ງໃຫຍ່ກວ່າ ທີ່ທັງທົ່ວໂລກປາດຖະໜາ ສາມາດພົບເຫັນໄດ້ຢູ່ໃສ?

ປະທານຣະໂຊ ເອັມ ແນວສັນ ໄດ້ປະກາດວ່າ:

“ພຣະກິດຕິຄຸນຂອງພຣະເຢຊູຄຣິດຄືສິ່ງທີ່ຕ້ອງການຫລາຍທີ່ສຸດໃນໂລກທີ່ສັບສົນ, ມີການຂັດແຍ້ງ, ແລະ ເຊື່ອມໂຊມນີ້.

“ລູກໆຂອງພຣະເຈົ້າແຕ່ລະຄົນສົມຄວນທີ່ຈະໄດ້ຮັບໂອກາດໃນການໄດ້ຍິນ ແລະ ຮັບເອົາການປິ່ນປົວ, ຂ່າວສານແຫ່ງການໄຖ່ຂອງພຣະເຢຊູຄຣິດ. ບໍ່ມີຂ່າວສານອື່ນໃດທີ່ສຳຄັນຫລາຍກວ່າຄວາມສຸກຂອງເຮົາ—ໃນເວລານີ້ ແລະ ຕະຫລອດໄປ.”²

ຂ່າວສານແຫ່ງການຟື້ນຟູ ແມ່ນ ຂ່າວສານແຫ່ງຄຣິດສະມາດ. ແສງສະຫວ່າງຂອງດາວທີ່ໄດ້ນຳທາງພວກຜູ້ລ້ຽງແກະໄປຫາແອນ້ອຍໃນຮາງຫຍ້າ ແມ່ນຄືກັນກັບເລົາແສງທີ່ເລື່ອນລົງມາເຖິງຕົວຂອງໂຈເຊັບ—ທັງສອງຢ່າງໄດ້ນຳຂ່າວດີທີ່ຊົມຊື່ນຍິນດີອັນໃຫຍ່ຫລວງມາໃຫ້ ໂດຍປະກາດເຖິງພຣະຄຣິດໃຫ້ໂລກຮູ້.

ຂ່າວສານຂອງເອຊາຢາຕໍ່ໂລກທີ່ວຸ້ນວາຍຂອງເຮົາ ໄດ້ກ່າວໄວ້ວ່າ, “ມີເດັກນ້ອຍຜູ້ໜຶ່ງໄດ້ເກີດມາໃຫ້ພວກເຮົາ: ມີລູກຊາຍຜູ້ໜຶ່ງຖືກມອບໝາຍໃຫ້ພວກເຮົາແລ້ວ: ພຣະອົງຈະຊົງນາມວ່າ [ຜູ້ອັດສະຈັນ], ທີ່ປຶກສາ, ພຣະເຈົ້າຊົງລິດ, ພຣະບິດາສືບໄປ, ອົງສັນຕິລາດ.”³

ແອວເດີ ຄວິນຕິນ ແອວ ຄຸກ ໄດ້ສິດສອນວ່າ, “ພຣະນາມໜຶ່ງທີ່ທະນຸຖະໜອມທີ່ສຸດຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ແມ່ນ ‘ອົງສັນຕິລາດ’ [ເອຊາຢາ 9:6]. … ອານາຈັກຂອງພຣະອົງຈະຖືກສະຖາປະນາຂຶ້ນ ລວມທັງສັນຕິສຸກ ແລະ ຄວາມຮັກ.”⁴

ໃນຂະນະທີ່ເຮົາອ່ານຖ້ອຍຄຳຢູ່ໃນລູກາປີນີ້, ຂ້າພະເຈົ້າຫວັງວ່າ ທ່ານຈະພິຈາລະນາຖ້ອຍຄຳຂອງ “ກອງທັບ [ເຫລົ່າທູດ] ແຫ່ງສະຫວັນໝູ່ໃຫຍ່ [ທີ່] ຮ່ວມກັນຮ້ອງສັນລະເສີນພຣະເຈົ້າ,” ເມື່ອພວກເພິ່ນກ່າວວ່າ, “ພຣະລັດສະໝີ ຈົ່ງມີແດ່ພຣະເຈົ້າໃນສະຫວັນທີ່ສູງສຸດ ແລະ ທີ່ແຜ່ນດິນໂລກຈົ່ງມີສັນຕິສຸກແກ່ມະນຸດທັງປວງທີ່ພຣະອົງຊົງພໍພຣະໄທນັ້ນ.”⁵ ຂ້າພະເຈົ້າໄດ້ໄຕ່ຕອງຖ້ອຍຄຳເຫລົ່ານີ້ ແລະ ຄິດວ່າມັນອາດເປັນການສົມຄວນສຳລັບເຮົາທີ່ຈະຖືວ່ານີ້ແມ່ນການປະກາດວ່າ “ບັດນີ້, ແຜ່ນດິນໂລກນີ້ມີສັນຕິສຸກແລ້ວ.” ພວກເພິ່ນອາດອຸທານວ່າ “ສັນຕິສຸກໄດ້ມາເຖິງແລ້ວ!” ດ້ວຍວ່າ, ໃນຕອນຄ່ຳມື້ນັ້ນໃນຄອກທີ່ຕ່ຳຕ້ອຍນັ້ນ “ອົງສັນຕິລາດ” ໄດ້ມາສູ່ແຜ່ນດິນໂລກຢ່າງແທ້ຈິງ.

ໃນວັນຄຣິດສະມາດທຳອິດນັ້ນ ທູດສະຫວັນຜູ້ແຈ້ງຂ່າວໄດ້ປະກາດວ່າ ສັນຕິສຸກໄດ້ມາເຖິງແລ້ວ. ກ່ອນໜ້າພວກເພິ່ນ ຢາໂຄບໄດ້ປະກາດວ່າ, “ພວກເຮົາຮູ້ຈັກພຣະຄຣິດມາກ່ອນ; ແລະ ພວກເຮົາມີຄວາມຫວັງໃນລັດສະໝີພາບຂອງພຣະອົງມາໄດ້ຫລາຍຮ້ອຍປີແລ້ວ ກ່ອນທີ່ພຣະອົງຈະສະເດັດມາ ແລະ ບໍ່ມີແຕ່ພວກເຮົາເທົ່ານັ້ນທີ່ມີຄວາມຫວັງໃນລັດສະໝີພາບຂອງພຣະອົງ, ແຕ່ສາດສະດາຜູ້ສັກສິດທັງຫລາຍຊຶ່ງຢູ່ມາກ່ອນພວກເຮົາກໍມີຄວາມຫວັງເຊັ່ນດຽວກັນ.”⁶

ອີກເທື່ອໜຶ່ງ, ເອຊາຢາໄດ້ທຳນາຍກ່ຽວກັບຍຸກສະໄໝ ຂອງເຮົາ ນີ້, ດັ່ງທີ່ເພິ່ນໄດ້ຂຽນໄວ້ວ່າ, “ເປັນຕາຮັກແທ້ທີ່ເຫັນຜູ້ສົ່ງຂ່າວຂ້າມພູເຂົາມາ ໂດຍນຳຂ່າວດີຄືຂ່າວແຫ່ງສັນຕິສຸກມາໃຫ້.”⁷

ແລ້ວ, ຜູ້ສົ່ງຂ່າວທີ່ເປັນຕາຮັກເຫລົ່ານີ້ທີ່ນຳສັນຕິສຸກມາໃຫ້ແມ່ນໃຜ? ພຣະຜູ້ຊ່ວຍໃຫ້ລອດໄດ້ປະກາດແກ່ບັນດາສາວົກຂອງພຣະອົງທັງໃນຄາລີເລ ແລະ ແຜ່ນດິນອຸດົມສົມບູນວ່າ “ຄົນທັງປວງທີ່ສ້າງຄວາມສະຫງົບຍ່ອມເປັນສຸກ, ເພາະວ່າເຂົາຈະຖືກເອີ້ນວ່າ ລູກຂອງພຣະເຈົ້າ.”⁸

ນອກຈາກນີ້, ກະສັດເບັນຢາມິນໄດ້ສິດສອນວ່າ, “ແລະ ບັດນີ້ເພາະພັນທະສັນຍາທີ່ພວກທ່ານເຮັດໄວ້ ພວກທ່ານຈະຖືກເອີ້ນວ່າ ລູກຂອງພຣະຄຣິດ, ບຸດຂອງພຣະອົງ, ແລະ ທິດາຂອງພຣະອົງ; ເພາະຈົ່ງເບິ່ງ, ມື້ນີ້ພຣະອົງໄດ້ໃຫ້ກຳເນີດພວກທ່ານທາງວິນຍານ; ເພາະພວກທ່ານເວົ້າວ່າ ໃຈຂອງພວກທ່ານປ່ຽນແປງແລ້ວ ໂດຍມີສັດທາໃນພຣະນາມຂອງພຣະອົງ; ສະນັ້ນ, ພວກທ່ານຈຶ່ງຖືກກຳເນີດຈາກພຣະອົງ ແລະ ມາເປັນບຸດ ແລະ ທິດາຂອງພຣະອົງ.”⁹

ທ່ານ ແລະ ຂ້າພະເຈົ້າເປັນລູກແຫ່ງພັນທະສັນຍາຂອງພຣະເຢຊູຄຣິດ, ແຕ່ລະຄົນເປັນລູກຂອງພຣະອົງ. ຂໍໃຫ້ຈື່ຈຳໄວ້ວ່າ, ພຣະອົງໄດ້ປະກາດວ່າ ຜູ້ທີ່ສ້າງຄວາມສະຫງົບຈະຖືກເອີ້ນວ່າ ລູກຂອງພຣະເຈົ້າ. ເຫດສະນັ້ນ, ເຮົາ—ລູກໆຂອງພຣະເຈົ້າ—ຈະຕ້ອງເປັນ ຜູ້ສ້າງຄວາມສະຫງົບ. ນີ້ແມ່ນໜ້າທີ່ແຫ່ງພັນທະສັນຍາຂອງເຮົາ. ທ່ານ ແລະ ຂ້າພະເຈົ້າສ້າງຄວາມແຕກຕ່າງໃນໂລກທີ່ວຸ້ນວາຍໃນສະໄໝນີ້ ເມື່ອເຮົາພະຍາຍາມທີ່ຈະເປັນຜູ້ສ້າງຄວາມສະຫງົບ—ໃນບ້ານຂອງເຮົາ, ກອງປະຊຸມຂອງເຮົາ, ຊຸມຊົນຂອງເຮົາ, ແມ່ນແຕ່ໃນທັງທົ່ວໂລກ, ໂດຍຄວາມດີຂອງເຮົາ, ໂດຍວຽກງານທີ່ດີຂອງເຮົາ, ແລະ ໂດຍຄຳເວົ້າຂອງເຮົາ—ທັງໜ້າຕໍ່ໜ້າ ແລະ ທາງອອນລາຍເຊັ່ນກັນ. ຂໍໃຫ້ເຮົາ “ເຜີຍແຜ່ສັນຕິສຸກ” ຢ່າງຊື່ສັດ ໃນຂະນະທີ່ເຮົາເປັນພະຍານເຖິງພຣະອົງ, ທັງໃນຄຳເວົ້າ ແລະ ການກະທຳ.

ອີກເທື່ອໜຶ່ງ ເຮົາອ່ານຈາກລູກາວ່າ:

“ເມື່ອ [ບັນດາທູດ] ເຫລົ່ານັ້ນ ຈາກພວກເຂົາຂຶ້ນສູ່ສະຫວັນແລ້ວ ພວກຜູ້ລ້ຽງແກະໄດ້ເວົ້າກັນວ່າ, ໃຫ້ພວກເຮົາພາກັນໄປເມືອງເບັດເລເຮັມເທາະ ໄປເບິ່ງເຫດການທີ່ໄດ້ເກີດຂຶ້ນ ຕາມທີ່ພຣະຜູ້ເປັນເຈົ້າໄດ້ບອກໃຫ້ພວກເຮົາຮູ້ນັ້ນ.

“ພວກເຂົາຈຶ່ງຮີບໄປ ແລະ ພົບມາຣີກັບໂຢເຊັບ ແລະ ເຫັນພຣະກຸມມານນອນຢູ່ໃນຮາງຫຍ້າ.

“ເມື່ອພວກຜູ້ລ້ຽງແກະພົບພຣະກຸມມານແລ້ວ, ພວກເຂົາກໍເລົ່າເລື່ອງ ຕາມທີ່ເຂົາໄດ້ຍິນເຖິງພຣະກຸມມານນັ້ນ.”¹⁰

ເຊັ່ນດຽວກັນ, “ບັດນີ້, ຂໍໃຫ້ ເຮົາ ໄປ” ແລະ “ເລົ່າ ເລື່ອງ” ຂ່າວສານແຫ່ງສັນຕິສຸກ “ເຖິງພຣະກຸມມານນັ້ນ.” ນີ້ແມ່ນ ຂ່າວສານທີ່ຜູ້ສອນສາດສະໜາຂອງເຮົາສິດສອນຜູ້ທີ່ເຮົາຮັກ ແລະ ໝູ່ເພື່ອນຂອງເຮົາ; ນີ້ແມ່ນຂ່າວສານທີ່ມີຊີວິດ ທີ່ຜູ້ສອນສາດສະໜາຮັບໃຊ້ບໍລິການ ແບ່ງປັນໃນຂະນະທີ່ເຂົາເຈົ້າກຳລັງຮັບໃຊ້ ດັ່ງທີ່ພຣະຜູ້ຊ່ວຍໃຫ້ລອດໄດ້ກະທຳ. ນີ້ແມ່ນຂ່າວສານທີ່ເຮົາປະກາດ ໃນຂະນະທີ່ເຮົາຮັກ, ແບ່ງປັນ, ແລະ ເຊື້ອເຊີນຄົນທີ່ຢູ່ອ້ອມຕົວເຮົາ ໃຫ້ຮັບເອົາຄວາມຫວັງ ແລະ ສັນຕິສຸກ ທີ່ພົບເຫັນໃນຂ່າວດີເຖິງພຣະເຢຊູຄຣິດ.

ບັດນີ້ ກັບມາທີ່ການສະແດງການກຳເນີດຂອງຄອບຄົວແບເຊັດທີ່ພວກເຮົາພະຍາຍາມດ້ວຍຄວາມວຸ້ນວາຍທຸກໆຄຣິດສະມາດ—ເປັນຫຍັງພວກເຮົາຈຶ່ງຕັ້ງໃຈທີ່ຈະຮັກສາປະເພນີນີ້, ໂດຍຊຸກຍູ້ໃຫ້ລູກຫລານຂອງພວກເຮົາສ້າງຄ່ຳຄືນທີ່ງົດງາມກວ່າຄືນອື່ນໆນັ້ນ, ເມື່ອເຫລົ່າທູດສະຫວັນມາພ້ອມກັບຂ່າວດີແຫ່ງຄວາມຊົມຊື່ນຍິນດີທີ່ຍິ່ງໃຫຍ່?

ຄຳຕອບແມ່ນລຽບງ່າຍ ແລະ ເປັນທີ່ເບີກບານໃຈ: “ແລະ ພວກເຮົາ ເວົ້າເຖິງພຣະຄຣິດ, ພວກເຮົາປິຕິຍິນດີໃນພຣະຄຣິດ, ພວກເຮົາສັ່ງສອນເລື່ອງພຣະຄຣິດ, ພວກເຮົາທຳນາຍເຖິງພຣະຄຣິດ, ແລະ ພວກເຮົາບັນທຶກຕາມຄຳທຳນາຍຂອງພວກເຮົາ ເພື່ອລູກຫລານຂອງພວກເຮົາຈະໄດ້ຮູ້ວ່າ ພວກເຂົາຈະຫລຽວຫາແຫລ່ງໃດເພື່ອການປົດບາບຂອງພວກເຂົາ.”¹¹

ແມ່ນແລ້ວ, ພວກເຮົາເຫັນວ່າແຜ່ນດິນໂລກທັງໝົດຕົກຢູ່ໃນຄວາມວຸ້ນວາຍ ແລະ ໃຈຂອງມະນຸດຈະທໍ້ແທ້. ເຖິງຢ່າງໃດກໍຕາມ, ເຖິງແມ່ນວ່າ ຈະມີການທ້າທາຍຕ່າງໆ, ໂດຍປະເຊີນກັບການຕໍ່ຕ້ານ, ແລະ ທ່າມກາງຄວາມວຸ້ນວາຍ, ຂໍໃຫ້ເຮົາບາກບັ່ນໃນການເຜີຍແຜ່ສັນຕິສຸກ, ໃນເທດສະການນີ້ ແລະ ຕະຫລອດເວລາ, ໃນຂະນະທີ່ເຮົາກຽມຕົວເອງ ແລະ ທຸກຄົນຢູ່ອ້ອມຕົວເຮົາ ສຳລັບການກັບມາອັນຍິ່ງໃຫຍ່ຂອງອົງສັນຕິລາດ, ແມ່ນແຕ່ພຣະຜູ້ເປັນເຈົ້າ, ພຣະຜູ້ຊ່ວຍໃຫ້ລອດ, ແລະ ພຣະຜູ້ໄຖ່, ພຣະເຢຊູຄຣິດ. ໂດຍລຶ້ມຄືນຄຳເວົ້າຂອງປະທານແນວສັນ, “ລູກໆຂອງພຣະເຈົ້າແຕ່ລະຄົນສົມຄວນທີ່ຈະໄດ້ຮັບໂອກາດໃນການໄດ້ຍິນ ແລະ ຮັບເອົາການປິ່ນປົວ, ຂ່າວສານແຫ່ງການໄຖ່ຂອງພຣະເຢຊູຄຣິດ.”

ຂໍໃຫ້ເຮົາເປັນຜູ້ເຜີຍແຜ່ສັນຕິສຸກ ໃນຂະນະທີ່ເຮົາສະເຫລີມສະຫລອງການກຳເນີດ, ພຣະຊົນຊີບ, ແລະ ພາລະກິດຂອງພຣະຜູ້ຊ່ວຍໃຫ້ລອດຂອງເຮົາ ໃນເທດສະການຄຣິດສະມາດນີ້ ແລະ ຕະຫລອດເວລາ ນີ້ຄືຄຳອະທິຖານຂອງຂ້າພະເຈົ້າໃນພຣະນາມຂອງພຣະເຢຊູຄຣິດ, ອາແມນ.