Wol Ia I luk King bl’hem!
2022 Fas Presidensi Krismes Divosen
Sandei, 4 Disemba, 2022
Openem Ol Hat blong Yumi blong Welkamem
Pis mo kamfot blong insperesen miusik ia i fulumap sol blong yumi.
!Meri Krismes!
Hem i long Disemba long 1943, mo Wol Wo 2 i kavremap wol ia. Evriwan i wari from ol famli we oli stap longwe, mo ol wari blong hom i from mane mo kakae we i no inaf. Long taem we famli oli stap lukaotem gud olsem wanem oli yusum ol famli risos ia, hem i bin wan sapraes long papa blong mi Harol Hillam, we long taem ia i wan boe blong naen yia, blong kasem wan sapraes presen blong Krismes―wan set blong tren. Tren ia i no wan eni kaen olfala nomo; tren ia i save ron hemwan long rod blong hem. I no nid blong pusum blong mekem i muv. Hem i no posibol nomo blong wan naesfala presen olsem i kam tru. O, Harold i laekem tumas tren ia.
Sam yia i pas, taem Krismes i stap kam, wo i stap finis long wol ia. Be ol kondisen long smol St. Anthony, Aedaho, i no bin kam gud, mo famli long saed blong papa blong mi, oli faenem i had moa. Papa blong Harold i bin sik bigwan, kolosap hem i lusum laef. Bae i nogat plante presen blong eniwan long Krismes ia—blong Harol mo smol brata blong hem tu, Arnold.
Sam dei bifo Krismes, papa blong Harold i kam long hem mo askem kwaet long hem se, ?“Harold, yu yu glad blong givim tren blong yu long Arnold blong mekem se hem i save gat wan presen blong Krismes long yia ia?
?Hem i harem stret papa blong hem ia? ?Tren blong hem we i laekem tumas? Rikwes ia i had bitim evri nara rikwes.
Hem i Krismes moning, mo Arnold i singaot wetem glad taem hem i kasem wan tren semmak nomo olsem blong Harold.
I no longtaem Arnold i kam blong luksave se Harold i nomo pleiplei wetem tren blong hem bakegen. Taem i pas mo Arnold i luksave se naesfala presen blong hem we hem i laekem tumas i no olsem tren blong Harold nomo—hem i bin tren blong Harold! Taem Arnold i andastanem hamas presen ia i impoten, tren ia i kam wan presen we i mane i no save pem.
Long mi, famli stori ia hem wan i wan presen—mo i no from se hem i rimaenem mi long papa blong mi we mi we mi lavem mo brata blong hem we hem i respektem. Iven moa impoten, hem i mekem mi tingbaot sakrifaes—sakrifaes ia mo lav blong Pikinini blong God we Hem i Lavem tumas—hem we betdei blong hem yumi selebretem.
Jisas Kraes i bin mo hem i fas presen mo bae i oltaem presen blong Krismes. Mi testifae blong trutok ia: !Hem i bin bon, Hem i bin laef mo Hem i ded from yumi, mo Hem i stap laef―i no jenis!
Hem i wan blesing long yumi blong stap olsem ol man blong welkamem presen ia we i kam wetem glad. Long ol toktok blong wan naesfala Krismes singsing: “Glad i go long wo, King i kam; Wol ia i luk King bl’hem!”1
Elda Neal A. Maxwell i bin tijim: “Taem yumi lukluk evri samting we God i bin givim long yumi, yumi nao yumi gud blong stap welkamem, be yumi no mekem. Yumi we yumi talem se yumi gat inaf mo dipen long yumiwan, plante taem yumi faenem i had blong stap welkamem , samtaem i had blong mekem. …
“[Yet] ol presen blong God, i no olsem ol presen we yumi kasem long ol sisen, oli no gat en mo oli no save nogud, oli wan sisen blong Krismes we i no gat en!”2
?Olsem wanem nao yumi akseptem wan naesfala presen olsem ia? ?OIsem wanem nao yumi jusum evri dei presen ia we i Sevya, lav blong Hem, mo Atonmen blong Hem we i nogat en?
Yumi kamaot long ol tingting blong sno long windo mo loli we oli pentem, mo letem yumi lanem wok blong olgeta we tingting i stap daon, olgeta we oli werem sandel nomo olsem, ol fas man blong welkamem Kraes.
Welkamem Tabu Fasin blong Hem
Taem dei we Sevya bae bon i kam long wol, i stap kam kolosap, Meri mo Josef tufala i traehad tru long noes mo bisi rod long taon blong Betlehem, be ol rum oli fulap. ?I no bin gat wan we i gat rum blong tufala? ?Bae i no gat wan i givim spel long olgeta? Meri i save presen we hem i stap karem, be i nogat wan i gat rum blong kasem presen ia, blong welkamem Hem.
Yumi no save stret filing blong Meri mo Josef long taem ia, be oltaem mi stap pikjarem olgeta i stap muv fored wetem strong paoa mo tras we man i no save. Taem tufala i kasem invitesen long enjel blong “no fraet”3 mo stap rere long taem ia we Jisas bae bon, tufala i lego tingting ia blong faenem wan gudfala haos blong slip mo go blong stap long kwaet ples blong ol animol. Filing ia se ples ia i wan ples we i no gat kamfot i no bin stap longtaem. Lod bae fulumap emti spes ia wetem tabu fasin i no longtaem.
Long Luk 2:7 i talem se, “Meri i bonem fasbon pikinini blong hem we hem i boe, Hem i kavremap gud pikinini ya long kaliko, mo i putum hem i stap slip long wan bokis we oltaem ol man oli stap putum gras long hem, blong ol animol oli kakae.”
Sevya blong yumi—presen blong laef we i fulap long glori, hop, mo promes—i bin kam long wol ia.
?Yumi save rere rum long ol hat blong yumi blong risivim Kraes mo letem tabu fasin blong hem i fulumap ol emti spes long yumi ? Olsem Meri mo Josef, yumi save trastem Hem iven long medel blong ol taem we oli had tumas blong go tru. Gaed ia—iven ol merikel—we bae i kam long laef blong yumi, maet bae oli kam long bisi taem ia, o long ol stej o insaed long ol stadiom, be long ol kwaet ples we yumi stap laef mo wok long hem―ples we yumi go long hem blong kasem help. Eni taem ol nid blong yumi i kam, yumi save mo bae yumi kasem ol ansa long ol kwaet prea blong yumi.
Welkamem Invitesen blong Hem blong Tekem Aksen
?I no wan naesfala samting se sam long olgeta fas man blong welkamem Sipsip ia oli ol man blong lukaot sipsip??
Naet i kavremap wol ia taem ol man blong lukaot sipsip oli sapraes blong stanap andanit long wan bigfala laet mo heven mo wol ia i joen long naesfala taem ia we Sevya i bon i kam long wol.
“Mo enjel i talem long olgeta se, … mi gat wan gud nius blong talem long yufala, we i save mekem olgeta man oli harem gud tumas. …
“Long naet ya nomo, long vilej ya blong King Deved bifo, i gat wan pikinini i jes bon, we hem bae sevem yufala. Hem i Mesaea* ya we i Masta* blong yumi.”4
Yumi lavem ol man blong lukaot long sipsip we oli no wet longtaem be oli hariap blong mitim King blong olgeta. Yumi lanem long olgeta se blong stap welkamem hem i wan aksen toktok. Luk i talem long yumi se ol man blong lukaot long sipsip “oli hariap oli go …oli luk pikinini ya we i stap slip long bokis ya we ol man oli stap putum kakae blong ol animol long hem.”5
Plante taem, ol kwaet, smol filing blong spirit we i kam long Lod, maet yumi no welkamem from oli no folem stret ol kalenda blong yumi, ol plan blong yumi, o taem blong yumi. Stori blong Krismes i rimaenem yumi blong stap olsem ol man blong lukaot long sipsip we oli no bin wet longtaem, blong mekem wanem we i nidim blong mekem blong welkamem King blong olgeta.
?Yu bin luksave se Luk i putum insaed long Krismes stori wan toktok blong glad se blong stap welkamem Hem i blong stap serem Hem, mo i eksplenem, “Nao olgeta oli luk pikinini ya, oli talemaot nius blong pikinini ya we enjel i talemaot long olgeta.”?6 Ol man blong lukaot sipsip oli bin kasem wan mesej long heven, oli hariap i go, mo afta long taem ia oli kam ol mesenja blong heven, blong stap serem “Glad i go long wol, King i kam: Wol Ia i luk King bl’hem!”7
Welkamem wetem Fet We I Stap Strong Kasem En
Naoia yumi lukluk i go long Ol Waes Man ia. Ol Waes Man ia oli stanap antap aot long ol bigbigfala man we oli lukaot Jisas Kraes. Long ful laef blong olgeta oli stap wajem gud evri dei wan saen long heven, mo taem i kam, olgeta oli livim biaen ol ples we oli save gud long ol, ol wok, ol famli mo ol fren blong folem sta ia mo faenem king blong olgeta.
I no olsem ol man blong lukaot long sipsip’, from long olgeta hem wan rod we i gogohed mo i tekem taem. Olgeta oli bin lukaotem, askem, wet, mo go, mo afta mekem semmak olsem nomo kasem oli luk yangfala pikinini ia wetem Meri, mama blong Hem. Oli givim ol presen we i naes tumas mo nil daon mo wosipim Hem.8
Plante taem mi stap tingting olsem se: ?Taem yumi stap welkamem Kraes, yumi stap lukaotem Hem wetem strong tingting mo letem Hem i lidim rod blong yumi i go long ol ples mo pipol we yumi no save? ?Yumi soem tangkyu blong yumi tru long ol presen mo wosip we yumi givim?
Blesem Olgeta we Oli Welkamem
Hem ia nao—bigfala stori blong Krismes.
Ol dia fren blong mi, blesem olgeta we oli stap welkamem Hem. Olsem tren presen blong papa blong mi we hem i laekem tumas, mo ol presen blong taem mo samting we oli impoten long ol famli evri ples, ol presen ia oli no semmak nating taem yu welkamem tru presen blong Krismes—we i Jisas Kraes.
“?From wanem nao i gud long wan man, sapos oli givim wan presen long hem, mo hem i no akseptem presen ia?”9
Tingting long skripja ia mo laet blong trutok ia we i no save finis: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”10
Mi lavem promes ia se eni wan we bae welkamem presen blong Kraes we i kam long tabu naet ia bae kasem laef we i no save finis!
Yumi luk se tru long ol efot blong yumi evri dei blong welkamem Kraes moa fulwan, bae yumi kam ol man we profet blong yumi, Presiden Russell M. Nelson, i invaetem olsem : “ol pipol we oli save mekem samting, oli rere, mo klin inaf blong welkamem Lod taem hem i kam bakegen; wan pipol we oli jusum Jisas Kraes finis.”11
I naes tumas blong pikjarem dei ia, we bae yumi save talemaot bakegen tugeta: “ Glad long wol, King i kam; Wol ia [mo wanwan man mo evri wan long yumi] luk King blong hem!”12 Long nem blong Jisas Kraes, amen.