Ol Gudnius blong Bigfala Glad
2022 Fas Presidensi Krismes Divosen
Sandei 4 Disemba, 2022
!Meri Krismes! Tangkyu long evriwan we ol mesej mo miusik mo seves blong olgeta i bin talemaot “gud nius blong mekem man i harem gud tumas” long Krismes taem ia.
Handred blong milian blong man i selebretem taem we Jisas Kraes i bon i kam long wol long Krismes taem ia. Ful wol i sud mekem hemia. Hem i bin mo i bigfala laef we i bin laef.
I.
Iven we long ol samting blong wol, laef blong Jisas blong Nasaret long wol ia i gat wan bigfala paoa long wol ia mo long histri blong hem bitim eni laef we i laef. Hem i bin stamba topik blong ol profet mo ol man blong raetem poem blong taosen yia. Bigfala art mo miusik blong wol long wes oli putum taem blong selebretem taem we Jisas i bon i kam long wol mo laef blong Hem mo misin blong Jisas Kraes. Ol man wetem ol bigbigfala tingting mo ol man blong stadi relijin oli spendem ful laef blong olgeta blong stadi ol tijing ol tijing blong Hem. Ol tijing ia i bin givim insperesen blong ol wok blong jareti we oli no save kaontem olgeta, mo i soemaot paoa blong klin lav blong Kraes.
I nogat wan we oli mekem plante memori long laef mo ol tijing blong Hem bitim Lod Jisas Kraes. Hemia i tekem tu, ol bigfala Katolik jos bilding we i fulap long Yurop mo Olgeta long Amerika, plante long olgeta i tekem moa long 100 yia blong bildim olgeta. I no long taem i pas, Jos Ia blong Jisas Kraes blong Ol Lata Dei Sent, i gat 171 tempol we oli dediketem mo we i open i stap mo i gat 129 moa blong oli mekem bak, oli stap wok long hem, droem, o oli jes anaonsem tru long Presiden Russell M. Nelson long las Oktoba Jeneral Konfrens. Ol haos ia blong Lod, i stap long evri graon long 74 kantri raon long wol. Long ples ia yumi givim ful laef blong yumi blong folem Jisas Kraes.
Plante oli givim laef blong olgeta—mo, moa impoten i we plante i stretem laef blong olgeta blong folem Lod God blong Isrel, Jehova, Jisas Kraes, Sevya blong yumi. Presiden Gordon B. Hinckley i no talem ova poen ia taem hem i talemaot, “Eksampol blong hem we i stret evriwan i wan bigfala paoa blong mekem gud mo gat pis long ful wol.”1
II.
Yumi save luk wan impoten stamba tingting mo saen long tabu anaonsmen ia se pikinini Boe ia blong God we Hem i lavem i bon i kam long wol. Yumi lanem long ol stori blong Niu Testeman se ol anaonsmen blong taem pikinini ia we i Kraes i bon i kam long wol, long is saed blong wol oli mekem olgeta long tri defren grup, wanwan long olgeta wetem defren fasin. Olgeta we oli kasem anaonsmen we i kam long heven se Jisas i bon i kam long wol, oli bin ol man we oli putum tingting i stap daon, oli tabu mo oli waes.
Oli mekem fas anaonsmen long ol man blong lukaotem sipsip long ol hil blong Betlehem. Wan enjel mo kwaea blong heven oli talemaot “Mi mi gat wan gud nius blong talem long yufala, we i save mekem olgeta man i harem gud tumas… Hem i Mesaea ya we i Masta blong yumi.”2 Ating oli bin jusum ol man blong lukaotem sipsip blong kasem gud nius ia from oli gat tingting we i stap daon. Mekem se, oli akseptem mesej blong heven, oli go jekem sapos bebi ia i bon taem oli go visitim Hem. Afta, ol skripja ia i talemaot, “Nao olgeta oli luk pikinini ya, oli talemaot nius blong pikinini ya we enjel i talemaot long olgeta.”3 Wok blong olgeta olsem man blong lukaotem sipsip mo ol smol sipsip we oli lukaotem, tugeta i ol eksampol we Sevya i yusum long ol tijing blong Hem. Taem we Jisas i kam luk Jon Baptaes long stat blong Ministri blong Hem, profet ia i talemaot: “Luk, man ia i Smol Sipsip blong God we bambae i tekemaot sin blong wol”4
Nambatu anaonsmen blong talemaot taem we Mesaea i bon, i long tempol long Jerusalem long tu tabu wokman we laef blong olgeta i olsem god we mekem tufala i kwalifae blong kasem tabu witnes ia blong Tabu Spirit. Taem we Meri mo Josef i karem bebi Jisas i kam long tempol blong mekem sakrifaes blong ol fasbon, olsem Saemon mo Ana tugeta i witnes se Hem i Mesaea. Ol skripja oli raet se Saemon i tekem pikinini ia long han blong hem mo i blesem God from i letem hem i luk “rod ya blong sevem man,” “wan laet blong givim laet long ol hiten man, mo hem bambae i leftemap nem blong mifala ol laen blong Isrel.” Taem Ana, “wan woman profet,” “ i pas long ples ya, stret long taem we Saemon i stap tokbaot pikinini ya. Nao woman ia i talem tangkiu long God, mo i stap tokbaot pikinini ya long olgeta we oli stap wet blong Mesaea i mekem Jerusalem i fri bakegen.”5
Wan nambatri grup oli bin lanem abaot naesfala taem ia we Jisas i bin bon kam long wol. Baebol, olsem we Josef Smit i mekem i kam moa gud, i talem se: “samtaem afta, ol Waes Man i bin travel long Is i go long Jerusalem, oli askem se, Pikinini ya we i jes bon, we hem i king blong ol laen blong Isrel, ?hem i stap wea? Mifala i luk sta blong hem we i kamaot long is, nao mifala i kam blong wosipim hem.”6
Yumi no save gat tu tingting taem yumi harem kwestin blong olgeta se, Lod i bin lidim olgeta from ol tabu stamba tingting blong Hem. Baebol i tijim se “ol samting blong God nogat man i save, be hem nomo we i gat Spirit blong God.”7 Ol waes man ia oli kam oli kam long wan narafala ples mo kalja, mekem se wan witnes long olgeta, i wan rimaenda long yumi se Mesaea i bon i kam long wol blong yumi evriwan. Antap long hemia, i gat wan narafala stamba tingting biaen long hem. Valiu blong gol mo ol nara presen we ol waes man i bin givim i bin helpem Meri wetem Josef blong oli hariap blong go long Ijip mo stap long we blong sevem Kraes pikinini taem laef blong i stap long denja tru long rabis oda blong King Herod.8
?Hem i no intresting we merikel taem ia, we Kraes i bon i kam long wol, mo wan samting we i impoten long taem ia, oli mekem olgeta nomo we oli gat tingting i stap daon, oli tabu, mo oli waes i save? Olsem we Elda James E. Talmage i tijim long Jesus the ChristGod i bin resemap ol witnes blong Hemwan blong i kasem evri grup mo situesen blong ol defren kaen man—ol testemoni blong ol enjel blong olgeta we oli pua mo tingting i stap daon; wan testemoni blong olgeta waes man blong king we i rabis mo ol pris blong Juda we oli gat hae tingting.”9
Blong stap tingbaot Saemon mo Ana, i save givim insperesen long yumi blong kam olsem olgeta, mo ademap witnes blong yumiwan abaot tabu taem ia we Hem i bon i kam long wol mo stamba tingting blong Krismes taem ia.
III.
Blong yumi, i nogat wan samting i niu blong selebretem taem we Kraes i bon i kam long wol. Mesej ia i stap blong evri taem mo i semmak. Oli tijim long Adam. Oli prijim long ol pikinini blong Isrel. Oli i soemaot long ol pikinini blong Papa Lihae. Bakegen mo bakegen, ol profet oli talemaot ol trutok blong ol tijing mo Atonmen blong Jisas Kraes. Bakegen mo bakegen, oli talemaot misin blong Hem mo tijim ol samting we Hem i givim oda se ol pikinini blong God bae oli lavem mo givim seves long God mo long ol narawan. Oli ripitim longtaem i kam, ol samting ia we oli talemaot oli ol mesej we i moa impoten blong wan taem we i no save finis. Blong olgeta we oli folem Kraes, oli samting ia we oli talemaot ia i no blong oli lukluk baklong hem. Be oli blong oli riniu long hem long laef blong yumi evri dei.
Krismes i wekemap wan strong tingting insaed long yumi blong go moa bitim wanem yumi stap mekem long lav mo ol frensip. Toktok ia we i kam long heven “mo long wol ya, pis i stap wetem ol man we God i glad long olgeta”10 i no blong olgeta nomo we oli gat ol filing blong lav mo sore finis. Hem i blong ol gudfala fren, ol strenja, mo ol enemi tu. Krismes hem i taem tu blong fogivim, wan taem blong hilim ol olfala soa mo blong putumbak ol rilesensip we i longwe.
Krismes hem i taem blong karemaot ol krangke tingting, talem nogud wan man, praktisim fasin blong save wet long taem, mo putum long saed ol defren kaen fasin blong ol man. Oli leftemap tingting blong yumi blong felosip wetem evri man, olgeta we oli gat semmak bilif wetem yumi mo olgeta we i no semmak, blong folem oda we God i givim long profet Moses long ol pikinini blong Isrel:
“Mo sapos yufala i no mas spolem ol narafala man we oli kam long kantri blong yufala.”
“Yufala i mas tingbaot taem ia we yufala i stap long Ijip, we yufala i strenja nomo long ples ia. Nao from samting ia, yufala i mas lavem ol narafala man olsem we yufala i stap lavem yufala.”11
Krismes hem i taem blong tingbaot se yumi evriwan i pikinini blong Papa long Heven we i givim wan Pikinini Boe blong Hem we i lavem tumas blong i sevem ful wol long ded mo i givim ol blesing blong sevem man mo kam olsem wan god long evri man long ol semmak kondisen ia.
Olsem ol man blong folem Kraes, yumi mas kam ol gudfala fren mo mas tingting long ol pipol evri ples. Yumi mas tijim ol pikinini blong yumi blong oli stap kaen mo tingbaot evriwan. Yumi sud, stap longwe long ol samting mo ol aktiviti we bae i mekem yumi stap longwe long relijin mo fet blong yumi. Be hemia i no mas stopem yumi blong putum tugeta ol hadwok blong yumi wetem ol pipol blong evri bilif—olgeta we oli biliv mo no biliv.
Plante yia i pas, Presiden Monson i talem ol toktok ia:
“Ol man blong lukaotem sipsip oli lukaotem pikinini ia Jisas. Be yumi lukaotem Jisas Kraes, Bigfala Brata blong yumi, Man blong Tingting blong yumi wetem Papa, Ridima blong yumi, Man we i Sevem yumi, Hem we i stap long stat wetem Papa, Hem we i tekem long Hemwan ol sin blong wol, mekem se Hem i wantem ded blong yumi save laef blong wan taem we i no save finis. Hem i Jisas ia we yumi stap lukaotem”.12
Ol Lata‑dei Sent oli kwalifae blong selebretem mesej ia blong sevem man blong Jisas Kraes truaot long yia. Yumi gat presen ia blong Tabu Spirit, we misin blong hem i blong testifae abaot Papa mo Pikinini.13 Yumi ol pikinini blong Papa long Heven we Hem i talem: “Hemia wok mo glori blong mi—blong mekem man i nomo save ded mo i kasem laef we i no save finis.”14 Mo ol profet blong Sevya blong yumi, Jisas Kraes, we i Lod God blong Isrel, oli bin talemaot gospel blong Hem:
“Hem i bin kam long wol, hem we i Jisas, blong oli nilim hem long kros from wol ia, mo blong hem i tekem ol sin blong wol, mo blong hem i mekem wol ia i kam tabu, mo blong hem i klinim wol ia long evri fasin we i no stret mo i no gud;
“Blong mekem se, tru long hemwan, bae hem i sevem evriwan, evriwan ia we Papa i bin putum anda long paoa blong hem mo hem i bin mekem;
“Hem i givim glori long Papa, mo hem we i sevem evri wok blong han blong hem.”15
Long Jos blong Hem we i kambak yumi talemaot: “se tru long Atonmen blong Kraes, bae Kraes i sevem evri man taem oli stap obei long ol loa mo olgeta odinens blong Gospel.”16 Mi testifae olsem long tabu nem blong Jisas Kraes, amen.