Long Olgeta we Oli Stap Stret mo Gud, Krismes i Minim, Evri Samting Bae I Oraet
2022 Fas Presidensi Krismes Divosen
Sandei, 4 Disemba, 2022
Mi talem tangkyu long Presiden Nelson mo Fas Presidensi long spesel janis blong toktok long naet ia. Famli blong mifala i bin selebretem ol bilif blong Krismes long kantri blong mifala wanwan long Franis, Jemeni, mo Brasil. Weaples we mifala i stap long hem, blong yumi evriwan we i biliv long mo folem Jisas Kraes, wan naesfala trutok we i stap semmak: yumi glad long hem we oli singaotem stat long stat, Hem we oli bin stap tokbaot blong plante handred yia we i pas, Hem we Hem i wan Pikinini ia Nomo blong Papa—long medel blong taem, we ol hat i stap daon—Hem i bin kam. Mo from se hem i bin kam, bilian long ol pipol we oli bin laef long wol ia, bae oli laef bakegen, sapos oli jusum, kasem laef we i no save finis, presen blong God we i moa bigwan long ol ol narafala presen blong God.
Long taem blong naesfala stori blong taem we Hem i bin bon i kam long wol ia long Krismes, i gat plante lesen we yumi save lanem.
Hemia i ol lesen we mi wantem serem wetem yufala long naet ia: ol hadtaem mo ol trabol we oli folem yumi i kam long laef blong wol ia, long olgeta we oli stap stret mo gud—we oli gat fet mo trastem Lod—long en, evri samting bae i oraet.
Tingting long ol naesfala eksampol ia.
Wan woman we i stap stret mo gud we nem blong hem Elisabet mo hasban blong hem, Sekaraea, naoia long olfala taem blong tufala, oli bin harem nogud from se tufala i no bin kasem blesing blong gat pikinini. Be, tufala i bin stap fetful mo trastem Lod.
Nomata se ol skripja oli no rekodem wanem we Sekaraea mo Elisabet tufala i bin filim mo talem long wanwan long tufala, drama we i gat miusik ia Sevya blong Wol i helpem yumi blong luklukbak long wanem i save stap long hat blong tufala. Sekaraea i talemaot long Elisabet: “Oli no bin jusum mitufala blong gat pikinini. Be mitufala i trastem Lod yet.” Afta, tufala i singsing: “Bae mi givim long Lod oltaem, be i no blong mekem tingting blong mi. … Sapos i no blong stap olsem, blong stap givim long hem oltaem, i minim, bae mi wet mo wajem mo luk. … Bae mi … letem Hem i lidim mi i go … kasem taem we ol aoa, dei mo ol yia blong mi, oli go.”1
Afta, wan merikel i hapen. Ol skripja oli rekodem se insaed long tempol, enjel Gabriel i kamkamaot long Sekaraea. Enjel i talem: “Bambae woman blong yu Elisabet, i karem wan pikinini boe blong yu, mo yu mas putum nem blong hem, Jon. [Mo] hem bambae … i mekem we ol man oli rere blong Hae God i kam long olgeta.”2
Sekaraea i ansa, “Mi mo woman blong mi, mitufala i olfala finis.”3
Be enjel Gabriel i talem, “Be from we yu yu no bilif long tok ya blong mi,” “bambae tang blong yu i fas, yu no save toktok, gogo kasem dei ya we promes ya bambae … i kamtru .”4
Tingting long ol filing we i bin kam long Elisabet mo Sakaraeas long tetaem ia. Blong plante yia we tufala i bin prea blong gat pikinini, be i nogat wan i kam. Tufala i gohed blong obei ol komanmen mo gat tras long Lod. Be afta nomo we wan enjel i kamkamaot long Sakaraeas, hem i nomo save toktok. Hem bae i save stap tingting abaot taem we bae hem i stanap long fored blong Lod. Be long stret taem ia, bebi i bon. Sakaraeas i save toktok bakegen. Mo bebi hem i Jon Baptaes we i profet, we i mekem rere rod blong Sevya. Wetem evri samting we i mekem ol tingting i fasfas mo ol hadtaem, long olgeta we oli stap stret mo gud, long en, evri samting bae i oraet.
Nekis samting, insaed long Krismes stori, yumi mitim Meri we God i lavem hem, mo i bin jusum hem blong stap olsem mama blong Pikinini blong God. Be yet, i ol gat wari mo tu tingting, long laef blong hem. Enjel Gabriel i kamkamaot long Meri mo talem long hem abaot hae koling blong hem ia. Meri i askem, “?Bambae samting ya i save kamtru olsem wanem? Mi mi no save man yet”5 Gabriel i eksplenem se Tabu Spirit bambae i kam long hem, mo paoa blong God ia we i hae, bae i kavremap hem olsem wan sado, nao from samting bae hem i gat bel long Pikinini blong God, mo bae oli singaotem Hem Jisas.
Tingting long hamas glad mo hapines we hem i save filim long tetaem ia we wan enjel blong God i bin visitim hem. Hamas bae hem wetem hat we i stap daon mo tingting hevi long hem olsem mama blong Mesaea ia we oli bin stap wet from. Be yet, blong talem long Josef, i no bin isi. Josef i wan stret man, hem i no wantem mekem Meri i sem, be hem i no save long wanem rod blong folem. Taem hem i stap trabolem maen mo gat ol tu tingting, wan enjel i kam long hem long wan drim: “Josef, … Yu no fraet blong tekem meri, blong i woman blong yu from we Tabu Spirit nomo i mekem we hem i gat bel. Bambae hem i bonem wan boe, mo yu mas putum nem blong hem se Jisas, we i min se Sevya, from we hem bambae i sevem ol man blong hem, i tekemaot ol sin blong olgeta.”6
I tru, bae yumi save andastanem we Meri i bin gat wari mo tu tingting, long olsem wanem bigfala blesing we i bitim ol narafala, bae save hapen. Josef, hem tu, i wari mo tingting i fasfas. Be, naoia, hem i klia se bae tufala i folem rod ia tugeta. Hamas glad nao Meri bae i mas gat long tetaem ia blong save se wan enjel i bin kamkamaot long Josef. Hamas glad nao Josef bae i mas gat long tetaem ia blong save se hemia i tingting blong God. Wetem ol tingting i fasfas mo ol hadtaem, long olgeta we oli stap stret mo gud, long en, evri samting bae i oraet.
Be olsem we yumi save, i gat ol hadtaem yet we i stap long fored; oltaem bae i gat. Taem we taem blong Meri blong bonem bebi i kam kolosap, Ol Man Rom ol askem blong Josef i gobak long siti blong Betlehem. Meri mo Josef tufala i tingting se bae tufala i mas go tugeta. Yumi evriwan i laekem tumas naesfala stori blong Krismes. Taem oli kasem Betlehem, i no bin gat rum long hotel. Wanem nao wari we Josef i mas gat long tetaem ia. ?Be from wanem i olsem? ?From wanem nao Meri, oli jusum hem aot long evri woman, blong bonem Pikinini Ia we i Hae Tumas insaed long ples olsem fas ples we oli jusum? Long taem blong bonem,?Bae i gat trabol mo ol hadtaem?
Hem i save stap olsem wan bigfala sapraes tumas, mo i no stret tumas. Be, bebi i bon i kam; Hem i helti. Olsem we naesfala Krismes karol i talem bakegen, “Longwe long wan ples blong ol animol, i no gat bed blong hed blong Hem, Smol bebi ia, Lod, Jisas i ledaon long hem.”7
Bifo naet i finis, wan enjel i kamkamaot long ol man blong lukaot long sipsip we i tekem gudfala nius we bae i givim bigfala glad. Mo ol enjel oli singsing, “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.”8
Ol man blong lukaot long sipsip oli go Betlehem blong faenem bebi Jisas. Taem oli faenem pikinini ia we hem i Kraes, hamas kamfot mo hop, Josef mo meri i bin filim taem tufala i luksave se i gat wan stamba tingting biaen long ol hadtaem we raonem olgeta. Ol enjel oli bin talemaot we Hem bae i kam mo bigfala misin blong Hem. Afta long ol hadwok mo ol tingting i fasfas, long olgeta we oli stap stret mo gud, long en, evri samting bae i oraet.
Long niufala wol [Amerika], ol trabol, ol tu tingting, ol wari, oli stap tu wetem ol man we oli stap stret mo gud. Profet Samuel i bin profesae se Sevya bae i bon i kam long wol ia, faef yia long fiuja mo we bae i gat wan saen we i blong wan ful naet we bae i nogat tudak. Taem we dei i stap kam kolosap, ol samting we man i ting se i no posibol, i bin hapen olsem we i stap long plan. “Wan dei [we oli bin] putum i stap, blong olgeta we oli no biliv, [we oli talem se taem ia i bin pas finis,] blong olgeta we oli biliv, [se Sevya bae i kam, mo bae i kam,] oli mas kilimded olgeta, be sapos nomo saen ia i hapen.”9 Olgeta we oli no biliv, oli jikim olgeta we oli biliv se, “Glad blong yufala mo fet blong yufala long saed blong samting ia i blong nating.”10 Pikjarem long maen blong yufala, trabol hat mo wari blong olgeta we oli stap stret mo gud. Ol skripja oli talem se Nifae, “hem i bodaon hemwan long graon, mo i prea strong long God blong hem from ol pipol blong hem.”11 Mo taem we Nifae i stap prea, “voes blong Lod i kam long hem, i talem: Leftemap hed blong yu mo stap glad; from luk, taem i kam kolosap, mo long naet ia bae saen i kamaot, mo long tumoro mi kam long wol.”12
Ol skripja oli talemaot se, “ol toktok we i bin kam long Nifae i hapen, … from luk, long taem we san i go daon i no gat tudak. [Mo] evri pipol … oli sapraes tumas mekem se oli foldaon long graon. [Mo] i no gat tudak nating long ful naet ia, be i gat laet olsem se hem i medel dei. Mo oli save se hem i dei we Lod bae i bon i kam long wol.”13
Wetem ol tingting i fasfas mo ol hadtaem, long olgeta we oli stap stret mo gud—long olgeta we oli trastem God—long en, nomata se long laef ia o long taem we yumi nildaon long lek blong Hem, evri samting bae i oraet.14
Tingbaot tabu taem ia we Sevya i bon long hem, ?From wanem Lod i wet kasem lasfala naet blong talem long Nifae se Hem bae i bon long tumoro? Hem i save talem finis, long ol wik mo manis we i pas bifo taem ia. ?From wanem Hem i letem Elisabet mo Sekaraea blong kam olfala mo nogat pikinini bifo oli talem long tufala blong gat pikinini we i profet Jon? Mo ?from wanem Meri i nidim blong tingting long wanem bae i hapen long hem bifo mo Josef i gat kwestin long ples blong hem insaed long evri stori blong Krismes? ?From wanem pat ia blong wan ples blong ol animol mo ol man blong lukaot long sipsip mo ol enjel, oli no bin save bifo i hapen?
Long laef bifo wol ia, Lod i talemaot: “Bae yumi testem olgeta long wei ia, blong luk sapos bae oli mekem evri samting we Lod, God blong olgeta bae i givim oda long olgeta.”15 Mo long Proveb: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, hem bambae i soemaot stret rod long yu, blong yu yu folem.”16
Long ol taem blong yumi we tingting i fasfas, long ol dei blong trabol blong yumi mo ol hadtaem, long ol traehad blong yumi, letem yumi stap fetful. Jisas i bin kam long tabu naet ia. Hem, hem i Sevya blong Wol, Prins blong Pis, King blong ol king. Hem i laef “ol hop mo fraet blong evri yia, [Hem] i givhan long olgeta long naet ia.”17 Mi talem witnes ia se, taem yumi stap stret mo gud, evri wota blong ae blong harem nogud, blong ol hadtaem, mo ol tingting we oli fasfas bae oli givhan mo mekem i kam oraet tru long Hem, we i Pikinini ia blong God we i lavem. “Glad i go long wol, Lod i kam.”18 Long nem blong Jisas Kraes, amen.