Kariaia te Aonaaba ni Butimwaea Ana Uea
2022 Ana Botaki n Taromauri ni Ka Kiritimati te Moan Beretitentii
Tabati, Ritembwa 4, 2022
Kaukii Nanora n Butimwaai
Raun ao abueen te anene ae kaunganano a kaoni tamneira.
Tekeraoi n te Kiritimati!
Bon inanon Ritembwa n 1943, ao e rootaki te aonaaba n korakoran te Kauoua.ni Buaka. Ni kabane a tabeaianga ibukiia ake a tangiriia ake a mena i mataniwiin aaba aika a raroa nako, ao te tabeianga n te mweenga n aki taun te mwane ao te amwarake. Ma aron tikonakin raoi kaubwain te utu, e bon kamiimi iroun tamau, ae Harold Hillam, ngkanne bon te ataeinimwaane ae ruaiwa ana ririki, bwa e karekea ana bwaintangira ae kamiimi n te Kiritimati, te turein ma bwaina nako. Bon tiaki te turein ae e mane, te turein ae e buti i bon irouna inanon te kawai. E riai n aki kairoroaki butina. E bon taraa ni kangaanga aron kamiimin te bwaintangira anne bwa e koaua. O, e kanga aron Harold ni mateakina te turein anne.
Tabeua te ririki imwina, ngke e a moanna ni kaan te Kiritimati, te aonaaba e tabe n otinako man te buaka. Ma kaubwain te aba n te tabo ae karako i St. Anthony, Idaho, e tuai rikirake, ao ana utu tamau, a riaon te kainnano. E a moanna ni mamaara taman Harold, ao e a kuri n toki maiuna. E na bon ake te bwai n tangira ibukira ni kabane n te Kiritiati anne—n ikotaki ma Harold ao tarina ae uarereke, ae Arnold.
Tabeua te bong imwain te Kiritimati, e a roko taman Harold nakoina ao n titirakinna ma te bwanaa ae beebete, “Harold, ko na kukurei n angan Arnold am turein bwa e aonga n reke ana bwai n tangira n te ririki aei?”
E bon eti ongona iroun tamana? Ana turein ae mateakinna? Aio ai bon katokin bubutii ni kabane.
E a roko moaningabongin te Kiritimai, ao Arnold e a bon rangi n tokarake nanona ngke e a reke irouna te turein aekakin raoi arei iroun Harold.
E waekoa n nooria Arnold ae e aki tatakakaro ma ana turein Harold. N tokin te tai, e a moanna n ataia Arnold ae ana bwaintangira are e kakawakina arei tiaki aekakin ana turein Harold—bon ana turein Harold! Ngke e a oota raoi Arnold n te anganano are e karekea, te turein arei akea kabootauan kakawakina.
Ngai irou, rongorongon te utu aei ibon irouna bon te bwaintangira—o tiaki tii ibukina ngke e kauringai taekan tamau ao tarina aika I tangiriia. Ae kakawaki riki, e kauringai te anganano—te anga karea ao ana tangira Natin te Atua ae tangiria–Temanna are ti bukamarua bungiakina.
Iesu Kristo bon ngaia ara moan ao ara bwaintangira ibukin te Kiritimati ae akea tokina. I kaota au koaua ibukin aei, E bungiaki, E maiu ao E mate ibukira, ao E bon maiu―ni karokoa ngkai!
Ti kakabwaiaaki n riki bwa taan butimwaea te bwaintangira ae kakukurei aei. N aron mwanewen te kuna ni Kiritimati ae I tatangiria: “Kimwareirei nakon te Aonaaba, e a roko te Uea, Kariaia te aonaaba ni butimwaea ana Uea!”1
E reirei Unimwaane Neal A. Maxwell, “N nooran are e a tia n angniira te Atua, ti kainanoia bwa tina rangi ni bwaati n butimwaai, ma ti bon aki. Ngaira ake ti taku iroura bwa ti bon tei iaon waera ao n aki kainanoa te buoka ti na kona n kunea bwa karekean bwaai aika aki angaraoi, ao n kangaanga. …
“[E ngae n anne] ana bwaintangira te Atua, n aron bwaintangiran te tai ae onoti n te ririki, e aki toki ao n aki kona ni mauna, e kariaiakaki n reitinako bwa te Kiritimati are e aki kona n toki!”2
Ngaia are tina kanga n karekea te bwaintangira ae moan te tamaroa? Ti na kanga n te bong ae koraki n rinea ana bwaintangira te Tia Kamaiu, Ana tangira, ao Ana Mwakuri n Kamaiu ni katoabong?
Ti a kataia n noora ao n ataa raoi nanon te Kiritimati ao n reiakiniira man aia beku n nanorinano taan moan butimwaea te teei ae te Tia Kamaiu.
Karekea Mimitongina
Ngke e a uakaan bungiakin te Tia Kamaiu, a korakai Maria ao Ioteba n kakaea kawaia rinanon mangaongaon Betereem, ma a bane ni kebo auti n iruwa. Bon akea ae mwaawa ana ruu ibukiia? Bon akea temanna ae na kamotirawaia? Maria e ataa te bwaintangira are e uouotia, ma akea ae e tauraoi ana ruu ni butimwaaia, ni Butimwaaia.
Tiaki kona raoi n ataa aia namakin Maria ao Iotebwa n te tai aio, ma I namakinna n taainako bwa a waaki nako ma te korakora ae raba ao te onimaki. Karekean ana kakao te anera bwa a na “aki maaku”3 ao ngkai n kakatauraoi imwain bungiakin Iesu, a kukurei n aki beberinoa nneia ao n kukurei n maeka n te tabo ae rau, nneia maan n amwarake ae mangori. Ma te namakin n taraakin te tabo ae akea te mweeraoi iai e aki tiku n arona. Te Uea e na bon kaona te tabo ae mangori anne ma te mimitong.
N aron ae kona n warekaki n Ruka 2:7 , “Ao e bungia ana karimoa te mane, ao e niria n te kunnikai ae te ninira, ao e kawenea ni nen te man n amarake; ba akea neia n te auti n iruwa.”
Ara tia Kamaiu—te bwaintangira ae mimitong ibukin te maiu, te kantaninga, ao te berita—e roko iaon te aba.
Ti kona ni katauraoa nnena i nanora bwa tina butimwaaia ao n kariaia Mimitongina bwa e na kaona ara tabo aika mangori? N aron Nei Maria ao Ioteba, tina kona n karekea te ninikoria n onimakina Iesu e ngae ngkana e korakora tabeiaiangara? Te kairiiri—n aron taian kakai—ake a kaoti inanon maiura a aki reke n taabo aika a kakukurei man beroro, ke iaon tabo ni kamataku ke n te stadium, ma n taabo aika a rau are ti maeka ao ni mwakuri iai―ike ti kawaria ibukin buokara. Ngkana a kaoti kainnanora aika a mangori, ti kona ao ni karekei kaekaan ara tataro aika a maraara.
Butimwaea Ana Kakao ni Karaoa te Mwakuri
Ti aki n ae e rangi n tamaroa ae tabeman mai buakoia taan moan butimwaea te Tibutetei bon taan kawakin tiibu?
E rabuna te roo te aonaaba ngke e a bon mimi taan kawakin tiibu n ikotaki iaan te oota ae moan te tamaroa ngke karawa ao aonaaba a butimwaea bungian te Tia Kamaiu.
“Tai maaku, bwa noria, … I tuangkami te rongorongo ae raoiroi ae kakimwareirei. …
“Ba e bungiaki n ana kaawa Tawita n te bong aei te Tia Kamaiu, are bon Kristo te Uea.”4
Ti tangiria kai taan kawakin tiibu aika a kakaonimaki aikai aki taona aia butimwaai ma a kawaekoaiia n kaitibo ma aia Uea. Mairouia, ti reiakinna ae butimwaai ke karekea bon te taeka ae kaota te mwakuri. E tuangiira Ruka bwa taan kawakin tiibu a “kawaetataia n nako, ao a nora … te merimeri ba e wene ni nen te man n amarake.”5
N angiin te tai, ara namakin aika a maraara n rau, mairoun te Uea aki butimwaeaki ibukina bwa aki bootau ni karinaki inanon ara karenta, ara baire, ke ara tai. Karakinan te Kiritimati e kauringiira bwa ti na riki n aroia taan kawakin tiibu aika a babane nanoia ake aki waeremwe ni karaoi baika a riai ni karaoaki ni butimwaean aia Uea.
Tao, ko ataia ae Inanon te karaki n Kiritimati ao Ruka e karina te bwai ae kimwareirei ae ngkana ti butimwaea Iesu ti bon tibwa Rongorongona, ngke e kamataata, “Ao ngke a tia n noora [Iesu], ao a kaota taekan te tei are a tuangaki”?6 Taan kawakin tiibu aikai a karekea te rongorongo mai karawa, a nako n aki waeremwe, ao n te tai ae waekoa ao imwiina a riki bwa taan uarongorongo mai i karawa, n tataekina te “kimwareirei nakon te aonaaba,” ao ni kaoiia aomata ni kabaneia ni “butimwaea [aia] Uea!”7
Butimwaaia ma te Onimaki ae e aki Toki
Ti a rairaki ngkai nakoia Mwaane ake taan Rabakau. A rianako taraakiia ibuakoia taan ukorukora Iesu Kristo. A botumwaaka ni kabanea maiua n taratara te kaotioti mai karawa, ao ngkana e roko. a kitani mweengaia aika a kamweengarao, aia mwakuri, aia utu, ao raoraoia bwa a iriira te itoi ao a kunea aia Uea.
Tiaki n ai aroia taan kawakin kiibu, mwanangaia ae e aki toki—teuana ae e anaa te tai. A riai n ukeuke, n titiraki, n tataninga, ni mwananga, ao ni manga kaokia naba, ni karokoa te tai are a noora te merimeri ma Maria, tinana. A anga aia bwaintangira ake moan te kakawai ao a bwaka nako aontano ao n taromauria.8
N taainako I iangoia inanou: Ni butimwaean Kristo, ti bon ukeukeria mwaaka ao n kariaia bwa Ngaia ae e na kaira mwanangara nakon taabo ao aomata aika aaki kinaaki ke n ataaki? Ti na kanga ni kaota ara kakaitau rinanon ara bwaintangira ao n aron taromauriana are ti Anganna?
A Kabwaia Taan Butimwaaia
Ngaia are, bon ane ikanne—karanakin te Kiritimati ae kakannato.
Raoraou aika a tangiraki, a kabwaia taan butimwaaia. N aron tangiran ana bwaintangira tamau ae te turein ao ibukin bwaintangira n te tai ao kaubwai ake a karaoia au utu n taabo nako, a kaotaa te kabootau ni butimwaean koauan te bwaintangira n te Kirimati—are bon Iesu Kristo.
“Bwa tera kabwaian te aomata ngkana e kaaki i aona te bwai n tituaraoi ao e aki butimwaea te bwai n tituaraoi?”9
Iangoa te kibu ni koroboki aika tabu aei ni kaineti ma te koaua aei: “Ba E tangiriia aomata te Atua n te aro are E anga Natina ae te riki temanna iai, ba e aonga n aki mate ane onimakinna, ma e na reke irouna te maiu are aki toki.”10
I tangira te berita bwa ane e butimwaea raoi ana bwaintangira Kristo are e anga n te tairiki ae moan te tabu anne e na reke iroun te maiu are akea tokina!
Ngaia are ti nooria bwa rinanon ara mwakuri n te bong ae koraki ni butimwaea Kristo n te nano ae bwanin, ti na riki n aron ara e taku te burabeti, Beretitenti Russell M. Nelson, are e kaoiia: “aomata ake a kona, a tauraoi ao n tau ni butimwaea te Uea ngkana E a manga roko, aomata ake a kaman rinea Iesu Kristo.”11
O, ai mimitongira iangoan te bong anne ngke ni kabane ti na manga taekinna riki, “Kimwareirei nakon te Aonaaba, e a roko te Uea; kariaia te aonaaba [ngaira n tatabemaniira nako] butimwaea ana Uea!”12 N aran Iesu Kristo, amen.