Christmas lub Txiaj Ntsim Zoo Tshaj Plaws
2022 Thawj Pawg Thawj Tswj Hwm Kev Sib Ntsib Hawm Vajtswv hauv lub Caij Christmas
Hnub Sunday, lub Kaum Ob Hlis Ntuj hnub tim 4, xyoo 2022
“Thaum cov tim tswv ncaim lawv rov qab mus rau saum ntuj ceeb tsheej lawm, cov yug yaj txawm sib tham hais tias, Peb cia li mus rau hauv lub nroog Npelehees thiab mus saib tej uas tus Tswv qhia rau peb lawm.
“Lawv ceev nrooj mus rau hauv lub nroog, lawv pom Maivliag thiab Yauxej, thiab pom tus me nyuam pw hauv ib lub dab zaub.”1
Ob nqe vaj lug kub no nyob hauv Phau Tshiab uas Lukas sau ua rau peb nco txog qhov uas Yexus Khetos tau yug los, qhov uas neeg thoob plaws lub ntiaj teb ua koob tsheej txog.
Nyob hauv kuv lub teb chaws Portugal, peb ua raws li kab lig kev cai txhua xyoo tso tej me nyuam neeg saum lub rooj kom nco txog Yexus Khetos txoj kev yug los; peb hu qhov no ua Nativity. Nej yuav pom cov nativity nyob hauv ntau lub teb chaws thaum lub caij Christmas—yog ib txoj kab lig kev cai nyob hauv ntau lub tsev. Ib feem ntawm kev tsa ib qho Nativity, yus yuav tsum khaws cov nyom, quav nyab, cov pob zeb, thiab lwm yam khoom kom npaj chaw tso tej me nyuam neeg.
Thaum peb yog cov me nyuam thiab cov tub hluas ntxhais hluas peb nyiam ua raws li txoj kab lig kev cai no tsa qhov Nativity no es tom qab ntawd peb nyiam ua nrog peb cov me nyuam thiab. Kev tsa qhov Nativity yeej yog ib qho kuv nyiam ua heev hauv lub caij Christmas no.
Peb tau tso tag nrho tej me nyuam neeg thiab tej khoom uas siv kom ua li no tso hauv ib lub phij xab ntoo. Feem ntau twb muaj tej me nyuam lub tsev ua ib lub zos zoo li peb lub ib yam thiab. Txhua xyoo, txhua lub caij Christmas, muaj ob peb me nyuam neeg los sis tej khoom tshiab ntxiv rau qhov ua yeeb yam ntawd. Muaj tej me nyuam neeg uas yog cov neeg hauv zos, muaj tej me nyuam tsev, tej neeg ua liaj ua teb thiab cov tsiaj, chaw zom qoob loo uas siv cua thiab dej, thiab lwm yam khoom uas siv rau tej toj thiab hav, tej tsob ntoo, thiab tej liaj ua teb. Twb siv tej daim los ntawm ib daim iav kom ua zoo li cov dej. Twb muaj tej tus choj thiab. Thiab qhov tseem ceeb tshaj plaws yog tej me nyuam neeg tseem ceeb tshaj plaws, cov neeg uas cov vaj lug kub piav txog: ib pawg yaj thiab “cov neeg yug yaj [uas] pw zov lawv cov yaj tom teb”;2 tus tim tswv uas hais rau cov neeg yug yaj kom lawv tsis txhob ntshai thiab tshaj tawm txog tus Cawm Seej txoj kev yug los, tus uas “coj txoj moo zoo uas yog txoj kev zoo siab kawg nkaus rau txhua haiv neeg”;3 tej me nyuam neeg uas yog Maivliag thiab Yauxej los twb tso rau ntawm lub dab zaub.4 Ces muaj ib lub hnub qub, uas cov vaj lug kub qhia tias ua rau cov neeg txawj ntse muaj kev xyiv fab thiab coj lawv los cuag Yexus.5
Txhua tus hauv kuv tsev neeg tau pab tsa qhov Nativity saum lub rooj. Twb siv ob peb hnub los sis ob peb lub lim tiam, tso ib tug mus ib tug, thiaj li tsa tau txhua tus me nyuam neeg thiab lub tsev nyias nyob rau ntawm nyias chaw yog lawm.
Hauv lub caij no, peb nyiam saib qhov Nativity thiab nco txog tej zaj nyob hauv phau Mathais thiab Lukas uas qhia lub ntsiab txog kev ua koob tsheej no. Twb tau hais dab neeg txog Maivliag thiab Yauxej txoj kev ntseeg; txog nkawd txoj kev tawm hauv “lub nroog Naxales uas nyob pem Kalilais mus rau hauv lub nroog Npelehees uas nyob nram lub xeev Yudas uas thaum ub yug Vaj Ntxwv Daviv6; thiab txog qhov uas nyuaj rau nkawd nrhiav chaw pw nyob ntawd.
Tiam sis, thaum txog hnub Christmas, ces tau muab tus me nyuam mos liab Yexus tso hauv lub dab zaub, thiab peb tau sib tham txog qhov uas Yexus Khetos tau ua li cas rau peb thiab vim li cas Nws tseem ceeb rau peb lub neej7 thiab txog qhov uas Nws yog lub txiaj ntsim uas zoo tshaj plaws.
Zaj nkauj no qhia lub ntsiab ntawm kev ua koob tsheej no:
“Me Tub uas Maivliag saib xyuas tu!
Me Nyuam mos liab Koj yeej dawb huv!
Nyob hauv lub dab zaub pw ntsiag to
Yog tus uas tau los saum ntuj los!
Txhua leej txhua tus muaj kev cia siab
Rau Koj thaum saib Koj ci ntsa iab!
Me Tub uas muaj yeeb koob tag nrho!
Me Nyuam mos liab uas twb yug los!
Cov neeg yug yaj, lawv tuaj deb tuaj,
Raws lub hnub qub kom thiaj los qhuas,
Cov neeg txawj ntse taug txhua txoj kev
Kom los hawm Koj thiab txhos caug pe!
Cov uas qhuas Koj yog cov tim tswv!
Me Nyuam mos liab, peb tus Vaj Ntxwv!
Muaj tshuaj rau txhua txoj kev tu siab
Nyob rau hauv Koj qhov muag uas ntsia!
Koj pub txiaj ntsim rau txhua tus neeg
Kom muaj chaw nyob saum ntuj ceeb tsheej!”8
Tus Cawm Seej tau ua tim khawv txog lub txiaj ntsim uas Nws pub rau peb: “Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiaj teb yuav tsim txom nej. Tiam sis nej [cia li zoo siab], rau qhov kuv twb kov yeej lub ntiaj teb no lawm.”9
“Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis.”10
Yeej yog ib lub txiaj ntsim zoo kawg nkaus!
“Lub caij Christmas no yog ib lub caij rau peb xav txog thiab ua raws li cov koob hmoov thiab tej lub cib fim uas peb muaj vim peb tus Cawm Seej, Yexus Khetos, tau yug los, ua neej, theej peb lub txhoj, thiab sawv rov los.”11
Kuv xav txog cov koob hmoov xws li kev kaj siab lug thiab kev cia siab, tsis hais thaum peb raug tej teeb meem thiab tej kev sim siab;12 Vajtswv txoj kev coj peb txoj hau kev txhua lub sij hawm tsis hais thaum peb kov yeej thiab poob siab los yog;13 kev txawj paub peb lub hom phiaj, paub thiab ntseeg tias yuav muaj lub neej tom qab lub neej no;14 kev ris txiaj tsis hais thaum peb tsis muaj txaus kom txhawb nqa peb tus kheej; kev txais kev nplij siab thaum peb xav tias tsis muaj leej twg nrog peb;15 thiab kev muaj peev xwm pab lwm tus tsis hais thaum peb tsis muaj ntau pes tsawg los yog.
Peb muaj cov koob hmoov no thiab lwm yam vim peb muaj Yexus Khetos! Yog mas, yog los ntawm tus me nyuam mos liab Yexus, tus uas kuv tos ntsoov txog hnub Christmas thaum kuv yuav tso Nws pw hauv lub dab zaub! Tus uas yog peb lub txiaj ntsim zoo tshaj plaws, Nws twb muab cov koob hmoov uas muaj nqi heev vim Nws tau ua neej, coj yam ntxwv zoo, qhia peb, thiab theej peb lub txhoj.
Yog li ntawd kuv nug nej seb: Puas tsim nyog uas peb yuav siv cov koob hmoov no kom ris lwm tus lub nra, pab thiab txhawb nqa lawv kom thiaj li muaj lub hwj huam ntawm lub caij dawb huv no nyob hauv lawv lub siab thiab ua koob tsheej txog txoj moo zoo uas cov tim tswv tau tshaj tawm rau cov neeg yug yaj thawj hnub Christmas ntawd?
Yexus Khetos yuav muab peb lub siab dawb siab zoo hloov ua zoo dua kom muaj lub siab hlub, uas yog “Khetos txoj kev hlub dawb huv [uas] nyob mus ib txhis.”16 “Txawm peb txoj kev xav mus ploj mus los, Nws txoj kev hlub yeej kav ib txhis.”17 Nws txoj kev hlub kav ntev tas txhua xyoo thiab tas peb lub neej.
Thaum peb rov qab tsom ntsoov rau Yexus Khetos hauv lub caij Christmas ces ua rau peb muaj Nws txoj kev hlub ntau ntxiv nyob hauv peb lub neej thiab ua rau peb muaj peev xwm ntxiv kom hlub thiab pab lwm tus.
Thaum peb muaj Christmas hauv peb lub siab, peb ua raws li Yexus Khetos tus Ntsuj Plig qhia. Thov kom peb yuav tsom ntsoov rau Yexus Khetos hauv lub caij no, tus uas yog lub Ntiaj Teb txoj Kev Kaj, thiab thov kom peb yuav cia peb lub teeb ci ntsa iab thaum peb hlub thiab peb pab lwm tus.
Vim Nws los, peb lub neej thiaj muaj lub ntsiab. Vim Nws los, muaj kev cia siab. Nws yog tus Cawm Seej rau lub ntiaj teb, thiab Nws yog lub txiaj ntsim zoo kawg nkaus; kuv ua tim khawv txog qhov no. Los ntawm Yexus Khetos lub npe, amees.