Tej Moo Zoo Siab ntawm txoj Kev Xyiv Fab Heev
2022 Thawj Pawg Thawj Tswj Hwm Kev Sib Ntsib Hawm Vajtswv hauv lub Caij Christmas
Hnub Sunday, lub Kaum Ob Hlis Ntuj hnub tim 4, xyoo 2022
Nyob zoo Christmas! Ua tsaug rau txhua tus uas lawv txoj kev hu nkauj thiab txoj kev pab tau “coj txoj moo zoo uas yog txoj kev zoo siab kawg nkaus” hauv lub caij Christmas no.
Neeg coob kawg nkaus ua koob tsheej txog Yexus Khetos txoj kev yug los hauv lub caij Christmas. Tsim nyog uas tag nrho lub ntiaj teb yuav ua li no. Nws yeej yog tus uas zoo tshaj txhua tus uas ua neej hauv lub ntiaj teb no.
I.
Yexus uas los ntawm Naxales yeej tau hloov lub ntiaj teb thiab zaj keeb kwm ntau tshaj lwm tus. Txij thaum chiv keeb los Nws yog tus uas cov yaj saub thiab cov neeg sau paj lug tau hais txog. Cov duab thiab cov nkauj ntawm lub ntuj sab hnub poob twb tau hwm Yexus Khetos txoj kev yug los thiab lub neej thiab Nws ntiag tug hauj lwm. Cov tub laj lim tswv yim thiab cov kws kawm txuj ci txog kev teev ntuj tau siv tag nrho lawv lub neej kom kawm txog Nws tej lus qhia. Tej lus qhia ntawd twb tau tshoov neeg coob lub siab kom lawv ua siab dawb pub rau lwm tus, yeej yog los ntawm Khetos txoj kev hlub dawb paug.
Twb tau tsa tej qhov chaw nco txog tus Tswv Yexus Khetos lub neej thiab tej lus qhia ntau tshaj lwm tus. Kuj suav tej tsev teev ntuj loj uas nyob thoob plaws Yulauv thiab Amelikas, feem ntau los twb siv ib puas xyoos tawm kom ua tej tsev ntawd. Tsis ntev tas los lawm, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj 171 lub tuam tsev uas tau muab fij tseg thiab 129 lub uas tseem muab txum tim, tab tom ua, tseem npaj ua, los sis tau tshaj tawm raws li Thawj Tswj Hwm Russell M. Nelson tau hais hauv lub tuam rooj sab laj tas los. Tus Tswv cov tsev no nyob hauv txhua txhooj av thiab 74 lub teb chaws hauv lub ntiaj teb no. Nyob hauv lub tuam tsev peb muab peb lub neej fij rau Yexus Khetos.
Neeg coob tau txo lawv txoj sia—thiab, qhov tseem ceeb tshaj plaws, neeg coob tau ua neej coj raws li Ixayees tus Tswv Vajtswv, Yehauvas, Yexus Khetos, peb tus Cawm Seej. Thawj Tswj Hwm Gordon B. Hinckley yeej hais qhov yog thaum nws hais tias, “Nws tus yam ntxwv [yeej yog] lub hwj chim loj tshaj plaws rau kev ua zoo thiab kev thaj yeeb nyab xeeb hauv lub ntiaj teb.”1
II.
Peb pom tau ib lub hom phiaj thiab ib lub cim tseem ceeb thaum cov tim tswv tau tshaj tawm txog qhov uas Vajtswv Tib Leeg Tub yuav yug los. Los ntawm Phau Tshiab peb kawm tias tau tshaj tawm txog Yexus Khetos txoj kev yus log rau peb pawg neeg uas nyob hauv lub ntuj sab hnub tuaj, txhua pawg yeej tsis zoo ib yam. Cov uas tau txais kev tshaj tawm txog Nws txoj kev yug los yog cov uas txo hwj chim heev, cov uas dawb huv heev, thiab cov uas txawj ntse heev.
Kev tshaj tawm thib ib yog hais rau cov neeg yug yaj nyob ze Npelehees. Ib tug tim tswv thiab ib pawg hu nkauj uas los saum ntuj los tau txog “txoj moo zoo uas yog txoj kev zoo siab kawg nkaus rau txhua haiv neeg … tus Cawm Seej, … nws yog Khetos uas yog tus Tswv.”2 Nyaj Vajtswv tau xaiv cov neeg yug yaj kom txais txoj moo zoo no vim lawv muaj siab mos siab muag thiab lawv txo hwj chim. Yog li ntawd, lawv txaus siab txais zaj lus uas los saum ntuj los no; lawv qhia li no thaum lawv mus xyuas tus me nyuam mos liab. Ces, raws li cov vaj lug kub hais, lawv tau “qhia zaj uas tus tim tswv ceeb tsheej qhia rau lawv hais txog tus me nyuam ntawd.”3 Lawv tej hauj lwm ua cov neeg yug yaj thiab cov yaj uas lawv saib xyuas ob qho no yog piv txwv txog tus Cawm Seej raws li Nws qhia. Thiab thaum Yexus los rau Yauhas tus uas Muab Neeg Ua Kev Cai Raus Dej, tus yaj saub ntawd hais tias, “Tus no yog Vajtswv tus me nyuam yaj uas yuav ris neeg ntiaj teb lub txim.”4
Kev tshaj tawm txog tus Mexiyas txoj kev yug los rau pawg thib ob yog nyob hauv lub tuam tsev Yeluxalees rau ob tug neeg uas dawb huv txaus nkawd thiaj tau txais tus Vaj Ntsuj Plig Dawb Huv txoj kev ua tim khawv. Thaum Maivliag thiab Yauxej coj tus me nyuam Yexus los rau lub tuam tsev ua kev txi muab tus tub hlob fij rau Vajtswv, Xime-oos thiab Anas nkawd ob leeg ua tim khawv tias Nws yog tus Mexiyas. Phau vaj lug kub qhia tias Xime-oos muab tus me nyuam puag thiab ua Vajtswv tsaug vim Vajtswv pub nws pom “koj txoj kev cawm dim,” “Nws yog lub teeb uas yuav ci mus rau lwm haiv neeg pom kev.” Thiab Anas uas yog “ib tug yaj saub poj niam,” nws “txawm tuaj txog, thiab nws ua Vajtswv tsaug thiab hais txog tus me tub ntawd rau txhua tus uas tab tom tos Vajtswv los cawm cov neeg uas nyob hauv lub nroog Yeluxalees kom dim mloog.”5
Pawg thib peb kuj tau kawm txog Yexus txoj kev yug los. Raws li Joseph Smith hloov me ntsis, Phau Npaivnpaum qhia tias “Tom qab ntawd tsis ntev muaj cov neeg uas txawj saib hnub qub ob peb leeg tuaj sab hnub tuaj tuaj txog hauv lub nroog Yeluxalees. Lawv nug hais tias, Tus me tub uas yuav ua cov Yudais tus Mexiyas, nws yug rau qhov twg? Peb pom nws lub hnub qub uas qhia hais tias, nws yug los lawm tawm tim sab hnub tuaj tuaj, peb thiaj tuaj pe hawm nws.”6
Los ntawm lawv tej lus nug peb thiaj paub tias tus Tswv tau coj lawv kev rau Nws tej lub hom phiaj dawb huv. Phau Vaj Lug Kub Npaivnpaum qhia tias “tsuas yog Vajtswv tus Ntsuj Plig thiaj paub Vajtswv lub siab xwb.”7 Cov neeg txawj ntse no tau los ntawm ib thaj av thiab kab lig kev cai txawv los, yog li ntawd ua rau lawv paub tias tus Mexiyas tau yug los pab txhua tus neeg. Tsis tas li ntawd xwb, nyaj muaj ib lub hom phiaj ntxiv. Tej zaum qhov uas cov neeg txawj ntse tau muab kub thiab lwm yam khoom plig uas muaj nqis heev tau pab Maivliag thiab Yauxej khiav mus rau Iyiv teb thiab nyob ntawd kom cawm tus me nyuam Yexus thaum tus Vaj Ntxwv Helauj xav muab Nws tua.8
Nej puas xav paub yog vim li cas tsuas qhia txog qhov txuj ci tseem ceeb uas yog Yexus Khetos txoj kev yug los rau cov uas txo hwj chim heev, cov dawb huv heev, thiab cov txawj ntse heev? Ib yam li Txwj Laug James E. Talmage qhia nyob hauv phau Yexus tus Khetos, “Vajtswv tau tsa cov neeg tim khawv los ntawm txhua hom neeg—cov tim tswv ua tim khawv rau cov neeg pluag thiab neeg txo hwj chim; cov neeg txawj ntse tau ua tim khawv rau tus vaj ntxwv thiab cov pov thawj uas muab hlob nyob hauv Yudais.”9
Thaum peb nco txog Xime-oos thiab Anas ces peb xav ua neeg zoo li nkawd thiab koom nrog nkawd ua tim khawv txog txoj kev yug los dawb ceev no thiab vim li cas muaj lub caij Christmas no.
III.
Rau peb mas, tsis muaj dab tsi tshiab thaum peb ua koob tsheej txog Khetos txoj kev yug los. Zaj no los puav leej paub lawm. Twb tau qhia zaj no rau Adas. Twb tau qhia zaj no rau cov neeg Ixayees. Twb tau qhia zaj no rau Lihais cov xeeb ntxwv. Cov yaj saub tau qhia tej lus tseeb ntawm Yexus Khetos tej lus qhia thiab Nws txoj Kev Theej Txhoj. Lawv tau tshaj tawm txog Nws ntiag tug hauj lwm thiab qhia txog Nws cov lus txib kom Vajtswv cov me nyuam sib hlub thiab ua hauj lwm rau Vajtswv thiab pab lwm tus neeg. Vim tau ua li no hauv txhua lub caij nyoog, tej lus tshaj tawm yeej yog zaj lus tseem ceeb tshaj plaws nyob mus ib txhis li. Rau cov uas coj raws li Yexus Khetos, peb yuav tsum tsis txhob muab tej lus no hloov. Yuav tsum rov qab cog lus tias peb yuav ua raws li tej lus no hauv peb lub neej.
Christmas ua rau peb xav hlub thiab ua phooj ywg nrog lwm tus. Qhov uas cov tim tswv saum ntuj tshaj tawm tias “thov kom cov neeg uas nyob hauv ntiaj teb txhua tus uas ua haum Vajtswv siab tau zoo nyob kaj siab lug”10 los tsis tau hais rau cov uas peb ib txwm hlub xwb. Cov lus no yog hais rau cov phooj ywg, cov qhua, thiab cov yeeb ncuab ib yam. Christmas yog ib lub caij rau peb zam txim pub rau lwm tus, ib lub sij hawm rau peb kho kev tu siab thiab rov qab sib raug zoo.
Christmas yog ib lub sij hawm rau peb tshem kev muab hlob tawm, tsis txhob sib cav sib ceg, ua siab ntev, thiab tsis txhob xav txog qhov uas ib leeg txawv ib leeg. Peb yuav tsum xav ua phooj ywg nrog txhua tus neeg, cov uas ntseeg li peb thiab cov uas tsis ntseeg, thiab ua raws li cov lus txib uas Vajtswv tau hais kom tus yaj saub Mauxes hais rau cov neeg Ixayees:
“Tsis txhob saib tsis taus cov neeg txawv teb chaws uas nrog nej nyob hauv nej lub teb chaws.
“Nej yuav suav tias lwm haiv neeg uas nrog nej nyob kuj zoo ib yam li yog nej haiv neeg, thiab nej yuav hlub lawv ib yam li nej hlub nej tus kheej.”11
Christmas yog ib lub caij rau peb nco qab tias peb txhua tus yog cov me nyuam ntawm ib Leej Txiv Saum Ntuj Ceeb Tsheej uas tau txib Nws Tib Leeg Tub kom txhiv peb dim kev tuag thiab tau muab cov koob hmoov ntawm kev cawm seej thiab kev tsa nto rau tib neeg txhua leej txhua tus.
Vim peb coj raws li Khetos, tsim nyog uas peb yog cov zoo siab thiab cov uas muaj lub siab dawb siab zoo tshaj sawv daws. Peb yuav tsum qhia peb cov me nyuam kom lawv ua siab zoo rau txhua tus. Peb yeej yuav tsum tsis txhob koom nrog leej twg los sis ua tej yam uas ua rau peb tso peb txoj kev ntseeg tseg los yog ua rau peb tsis rau siab teev ntuj. Tiam sis peb yuav tsum koom ua ke ua tej yam uas neeg coob puav leej xav ua ib ke—cov ntseeg thiab cov tsis ntseeg.
Nees nkaum xyoo tawm tas los, Thawj Tswj Hwm Thomas S. Monson tau hais li no:
“Cov neeg yug yaj dhau los tau nrhiav tus me nyuam Yexus. Tiam sis peb nrhiav Yexus uas yog tus Khetos, peb tus Tij Laug, tus Neeg Nruab Nrab uas thov Leej Txiv, peb tus Txhiv Dim, tus Cawm Seej; nws yog tus uas nyob nrog Leej Txiv ua ntej ntuj tsim teb raug; nws tau ris tib neeg tej kev txhaum thiab txaus siab txo Nws txoj sia kom peb yuav nyob tas mus li. Tus no yog tus Yexus uas peb nrhiav.”12
Tsim nyog uas Tsoom Haiv Neeg Ntseeg hauv Hnub Nyoog Kawg yuav ua koob tsheej txog Yexus Khetos txoj moo zoo txhua lub sij hawm tas ib xyoo. Peb muaj lub txiaj ntsim Vaj Ntsuj Plig Dawb Huv, tus uas ua tim khawv txog Leej Txiv thiab Leej Tub.13 Peb yog cov me nyuam ntawm ib Leej Txiv Saum Ntuj Ceeb Tsheej uas hais tias, “Qhov no yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab tau txoj sia nyob mus ib txhis.”14 Thiab cov yaj saub ntawm peb tus Cawm Seej, Yexus Khetos, tus uas yog Ixayees tus Tswv uas yog Vajtswv, lawv tau tshaj tawm txog Nws txoj moo zoo.
“Nws los rau hauv lub ntiaj teb, tus uas yog Yexus, los mus raug muab ntsia rau saum ntoo khaub lig theej neeg ntiaj teb, thiab los ris neeg ntiaj teb tej kev txhaum, thiab los ua rau neeg ntiaj teb hloov ua neeg dawb huv, thiab los ntxuav lawv tawm ntawm tag nrho tej kev ua tsis ncaj ncees;
“Hais tias los ntawm nws tag nrho sawv daws cov uas Leej Txiv tau muab tso rau nws lub hwj chim kav thiab cov uas nws tau tsim yuav dim txim;
“Tus uas muab yeeb koob rau Leej Txiv, thiab txhiv tag nrho tej yam nws ob txhais tes tau ua.”15
Yog li ntawd nyob hauv Nws lub Koom Txoos uas tau muab txum tim rov qab los peb tshaj tawm tias “los ntawm Khetos txoj Kev Theej Txhoj, tag nrho tib neeg txhua tus txais tau kev cawm dim, los ntawm kev ua raws li tej kev cai thiab kab ke ntawm txoj Moo Zoo.”16 Kuv ua tim khawv li no los ntawm Yexus Khetos lub npe dawb ceev, amees.