Rau cov Neeg Ncaj Ncees, Christmas Txhais tias Txhua Yam Yuav Zoo
2022 Thawj Pawg Thawj Tswj Hwm Kev Sib Ntsib Hawm Vajtswv hauv lub Caij Christmas
Hnub Sunday, lub Kaum Ob Hlis Ntuj hnub tim 4, xyoo 2022
Kuv ua Thawj Tswj Hwm Nelson thiab Thawj Pawg Thawj Tswj Hwm tsaug vim kuv muaj sij hawm hais lus hmo no. Peb tsev neeg tau ua koob tsheej txog Christmas nyob hauv peb lub teb chaws thiab nyob hauv Fabkis Teb, Yelemes Tes, thiab Brazil. Txawm peb nyob qhov twg los, peb txhua tus uas ntseeg thiab coj raws li Yexus Khetos, yeej ntseeg ib yam tseeb: peb zoo siab vim tus uas Vajtswv hu txij thaum chiv keeb los, tus uas tib neeg tos ntsoov tau ntev, tus uas yog Leej Txiv Tib Leeg Tub, Nws yog tus uas tau los—hauv lub caij nyoog nruab nrab, rau ib qho chaw tsis tseem ceeb—Nws twb tau los. Thiab vim Nws tau los, cov neeg coob uas tau nyob rau hauv lub ntiaj teb no yuav sawv rov los thiab, yog lawv xav tau, txais txoj sia nyob mus ib txhis ua lawv tug, qhov uas yog Vajtswv lub txiaj ntsim zoo tshaj plaws uas Nws xav pub rau peb.
Nyob hauv zaj dab neeg txog Nws txoj kev yug los hauv lub caij Christmas, muaj ntau yam uas peb kawm tau.
Nov yog zaj lus uas kuv xav qhia rau nej hmo no: rau cov neeg ncaj ncees—Txawm muaj kev nyuaj siab txhawj xeeb ntau, muaj tej teeb meem thiab kev kub ntxhov nyob hauv peb lub neej no los, cov uas ntseeg thiab tso siab rau tus Tswv—thaum kawg, txhua yam yuav zoo.
Cia li xav txog tej yam ntxwv no.
Ib tug poj niam ncaj ncees hu ua Elixanpes, thiab nws tus txiv Xakhaliyas, thaum nkawd laus lawm, nkawd tu siab vim nkawd tsis tau muaj ib tug me nyuam. Tiam sis nkawd rau siab ntseeg thiab tso siab rau tus Tswv.
Txawm yog cov vaj lug kub tsis qhia tias Xakhaliyas thiab Elixanpes xav li cas thiab sib tham txog dab tsi, kev ua yeeb yam hu ua Savior of the World pab peb xav tias tej zaum nkawd xav li cas hauv nkawd lub siab. Xakhaliyas hais rau Elixanpes: “Vajtswv tsis tau xaiv wb kom muaj me nyuam. Tiam sis wb tseem yuav tso siab rau tus Tswv.” Ces nkawd hu nkauj: “Kuv yuav ntseeg Vajtswv mus ib txhis, tiam sis tsis yog kom ua raws li kuv lub siab nyiam. … Qhov uas kuv ntseeg Nws mus ib txhis txhais tias kuv yuav tos ntsoov tas mus li. … Kuv … yuav cia Nws coj kuv kev … mus txog thaum tas kuv ib sim neej.”1
Ces muaj ib qho txuj ci tseem ceeb. Cov vaj lug kub qhia tias nyob hauv lub tuam tsev, tus tim tswv Khali-ees tau tshwm sim rau Xakhaliyas. Tus tim tswv hais tias: “Koj tus poj niam yuav yug ib tug me tub rau koj. Koj yuav tis nws lub npe hu ua Yauhas.” … Nws yuav … npaj ib cov neeg rau tus Tswv.”2
Xakhaliyas teb hais tias: “Kuv twb laus heev, thiab kuv tus poj niam los twb laus laus lawm thiab.”3
Khali-ees teb hais tias, “Vim koj tsis ntseeg kuv tej lus, koj yuav hais tsis tau lus mus txog hnub uas muaj raws li tej uas kuv twb hais rau koj lawm.”4
Cia li xav tias Elixanpes thiab Xakhaliyas xav li cas. Tau ntev lawm nkawd tau thov Vajtswv kom muaj me nyuam, tiam sis tsis tau muaj hlo li. Nkawd yeej meem tau ua raws li cov lus txib thiab tso siab rau tus Tswv. Ces ib tug tim tswv tshwm sim rau Xakhaliyas, tiam sis tom qab ntawd, nws hais tsis taus lus. Tej zaum ua rau Nws pib xav paub tus Tswv xav li cas txog nws lawm. Txog sij hawm ces tus me nyuam mos liab yug los. Xakhaliyas rov qab hais taus lus. Ces tus me nyuam mos liab tau loj hlob los ua Yauhas tus yaj saub, tus uas tau npaj kev rau tus Cawm Seej. Txawm muaj kev nyuaj siab txhawj xeeb los, thaum kawg cov ncaj ncees yuav tau zoo.
Tom qab zaj no nyob hauv zaj dab neeg Christmas, muaj Maivliag, tus uas Vajtswv xaiv los ua Nws Leej Tub niam. Tiam sis muaj kev txhawj xeeb nyob hauv nws lub neej. Khali-ees tshwm sim rau Maivliag, qhia nws txog qhov uas Vajtswv tau hu nws ua. Maivliag nug hais tias, “Kuv yog ib tug nkauj xwb, yuav ua li cas muaj tau li ntawd?”5 Khali-ees piav tias tus Vaj Ntsuj Plig Dawb Huv yuav los rau nws, ces Vajtswv lub hwj chim yuav roos nws thiab sawv daws thiaj yuav hu tus me tub uas yuav yug los ntawd hais tias, nws yog Vajtswv tus Tub.
Cia li xav txog qhov uas Maivliag muaj kev xyiv fab thiab kev zoo siab npaum li cas vim Vajtswv ib tug tim tswv tau tuaj xyuas nws. Nws txo hwj chi thaum nws xav txog qhov uas nws yuav ua tus Mexiyas niam. Tiam sis, thaum nws qhia Yauxej, ces kuj muaj kev nyuaj siab thiab. Yauxej yog ib tug txiv neej ncaj uas tsis xav ua kom Maivliag txaj muag, tiam sis nws tsis paub tias txoj kev twg yog txoj kev yog. Thaum nws nyuaj siab txhawj xeeb, Yauxej ua npau suav pom ib tug tim tswv uas hais tias: “Yauxej, … koj tsis txhob nyuaj siab. Koj cia li mus yuav Maivliag los ua koj poj niam. Rau qhov twb yog Vaj Ntsuj Plig tus Dawb Huv ua rau Maivliag xeeb tub.” Maivliag yuav yug ib tug me tub, koj yuav tsum tis tus me tub ntawd npe hu ua Yexus, rau qhov nws yog tus uas yuav los cawm nws haiv neeg kom lawv dim lawv lub txim.”6
Nyaj peb to taub Maivliag txoj kev nyuaj siab txhawj xeeb, vim nws xav seb yuav ua li cas thiaj muaj txoj koob hmoov zoo kawg no. Yauxej kuj nyuaj siab txhawj xeeb. Tiam sis nws paub meej tias nkawd yuav tsum taug txoj kev no ua ke. Nyaj Maivliag zoo siab kawg thaum nws paub tias ib tug tim tswv tau tshwm sim los rau Yauxej. Nyaj Yauxej zoo siab kawg thaum nws paub tias nov yog Vajtswv lub siab nyiam. Txawm muaj kev nyuaj siab txhawj xeeb los, thaum kawg cov ncaj ncees yuav tau zoo.
Tiam sis peb txhua tus paub tias muaj tej teeb meem thaum yav tom ntej; yeej muaj li ntawd. Thaum txog lub sij hawm uas Maivliag yuav yug me nyuam, cov Neeg Loos yuam Yauxej rov qab mus rau lub nroog Npelehees. Maivliag thiab Yauxej txiav txim siab tias nkawd yuav mus ua ke. Peb txhua tus nyiam zaj dab neeg txog Christmas no. Thaum nkawd los txog Npelehees, tsis muaj chaw hauv lub tsev so. Nyaj Yauxej txhawj heev. Ua li cas ho muaj tau li no? Vim li cas Maivliag, tus uas Vajtswv xaiv, yuav yug tus Siab Tshaj Plaws tus Tub nyob hauv ib lub nkuaj? Puas muaj teeb meem thaum nws tus tub yug los?
Ntshe yog ib yam tsis ncaj. Tiam sis tus me nyuam mos liab tau yug los; Nws nyob zoo. Ib yam li zaj nkauj Christmas hais tias, “Nyob hauv ib lub dab nyuj, tsis muaj lub txaj pw, Tus me ab Tswv Yexus nws tsaug zog ntxim hlub.”7
Ua ntej hnub tuaj, ces ib tug tim tswv tshwm sim rau cov neeg yug yaj thiab tshaj tawm txoj moo zoo uas yog kev xyiv fab kawg nkaus. Thiab cov tim tswv hu nkauj, “Thov kom Vajtswv tus uas nyob saum ntuj ceeb tsheej tau koob meej, thiab thov kom cov neeg uas nyob hauv ntiaj teb txhua tus uas ua haum Vajtswv siab tau zoo nyob kaj siab lug.”8
Cov neeg yug yaj tau mus rau Npelehees nrhiav tus me nyuam mos liab Yexus. Thaum lawv nrhiav tau tus me nyuam Khetos, nyaj Yauxej thiab Maivliag txais kev nplij siab thaum nkawd paub tias qhov uas nyuaj nrhiav lawv yeej muaj nqis heev. Cov tim tswv tau tshaj tawm txog Nws txoj kev los thiab Nws ntiag tug hauj lwm. Txawm muaj kev nyuaj siab txhawj xeeb los, thaum kawg cov ncaj ncees yuav tau zoo.
Nyob hauv lub ntuj tshiab, cov ncaj ncees twb muaj kev nyuaj siab txhawj xeeb thiab teeb meem ib yam thiab. Tus yaj saub Xamuyees tau qhia tias thaum tus Cawm Seej yug los nyob rau tsib xyoos tom ntej ces yuav muaj ib lub cim txog qhov ntawd uas yog ib hmo uas tsis tsaus ntuj li. Thaum txog hnub ntawd, ces muaj ib qho phem uas cov neeg npaj ua. “Cov uas tsis ntseeg tau teem tseg ib hnub, yog tias lub cim ntawd, uas tus yaj saub Xamuyees hais tseg, tsis muaj los, ces lawv yuav muab tag nrho cov uas ntseeg tej kab lis kev cai ntawd tua.”9 Cov uas tsis ntseeg thuam cov ntseeg tias, “Nej txoj kev xyiv fab thiab nej txoj kev ntseeg ntsig txog qhov no twb tsis muaj nuj nqis.”10 Cia li xav seb cov ncaj ncees nyuaj siab txhawj xeeb npaum li cas. Cov vaj lug kub hais tias Nifais tau “khoov rau hauv pem teb, thiab sib zog thov nws tus Vajtswv pab nws cov neeg.”11 Thiab thaum Nifais thov Vajtswv, “tus Tswv lub suab los hais rau nws, hais tias: Cia li tsa koj lub taub hau thiab cia li zoo siab; vim saib seb, twb yuav txog lub sij hawm lawm, thiab nyob rau hmo no yuav muab lub cim ua tshwm sim, thiab nyob rau tag kis kuv yuav los rau hauv lub ntiaj teb.”12
Cov vaj lug kub hais tias, “Tau muaj raws li tej lus uas tau los rau Nifais, … vim saib seb, thaum lub hnub poob twb tsis muaj kev tsaus ntuj. … [Thiab] tag nrho cov neeg … lawv xav tsis thoob heev ua rau lawv cia li vau rau hauv av. … [Thiab] tag nrho hmo ntawd twb tsis muaj kev tsaus ntuj li, tiam sis kaj cuag li yog thaum tav su. … Thiab lawv paub tias yog hnub uas tus Tswv yuav los yug.”13
Txawm muaj kev nyuaj siab txhawj xeeb los, thaum kawg, cov ncaj ncees—cov uas tso siab rau Vajtswv—tsis hais nyob hauv lub neej no los thaum peb txhos caug ntawm Nws ko taw los, txhua yam yuav zoo.14
Thaum xav txog lub sij hawm uas tus Cawm Seej tau yug los, vim li cas tus Tswv yuav tos txog hnub kawg kom qhia Nifais tias Nws yuav yug los thaum tag kis sawv ntxov? Vim li cas Nws tsis qhia Nifais ob peb lim tiam los sis ob peb lub hlis ua ntej. Vim li cas Nws cia Elixanpes thiab Xakhaliyas ua neeg laus uas tsis muaj me nyuam ua ntej nws qhia nkawd tias tus yaj saub Yahaus yuav ua nkawd tus tub. Thiab vim li cas Maivliag yuav tsum xav txog nws txoj kev thiab Yauxej yuav tsum xav seb nws muaj txoj hauj lwm twg hauv zaj dab neeg no? Vim li cas tsis paub tias cov neeg yug yaj thiab cov tim tswv yuav ua li cas mus txog thaum lub sij hawm ntawd?
Nyob hauv lub neej ua ntej lub neej no, tus Tswv tshaj tawm tias: “Thiab peb yuav sim lawv lub siab los ntawm qhov no, seb lawv puas yuav ua txhua tsav txhua yam uas tus Tswv lawv tus Vajtswv yuav txib lawv.”15 Thiab los ntawm phau Paj Lug: “Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txoj kev uas yog txoj tseeb.”16
Thaum peb txhawj xeeb, thaum twg peb raug teeb meem, thiab thaum peb raug kev txom nyem, thov kom peb rau siab ntseeg. Yexus tau los thaum hmo dawb huv ntawd. Nws yog tus Cawm Seej rau lub ntiaj teb no, tus Tub Vaj Ntxwv ntawm Kev Thaj Yeeb, tus Vaj Ntxwv ntawm cov vaj ntxwv. Nws muaj txoj sia nyob, thiab Nws ua kom “muaj raws li neeg cia siab rau, [thiab] kom kev ntshai ploj hlo li.”17 Kuv ua tim khawv tias thaum peb ua ncaj ncees, ces Nws, tus uas yog Vajtswv Leej Tub, yuav pab tag nrho peb txoj kev tu siab, kev nyuaj siab, thiab kev txhawj xeeb. “Ntiaj teb zoo siab, tus Tswv tau los.”18 Los ntawm Yexus Khetos lub npe, amees.