9:23

ຂອງຂວັນຄຣິດສະມາດທີ່ຍິ່ງໃຫຍ່ທີ່ສຸດ

ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2022

ແອວເດີ ໂຮເຊ ເອ ເທເຊຣາ

ຈາກຝ່າຍປະທານສາວົກເຈັດສິບ

ວັນອາທິດ, ວັນທີ 4 ເດືອນທັນວາ, 2022

“ເມື່ອ [ບັນດາທູດ] ເຫລົ່ານັ້ນ ຈາກພວກເຂົາຂຶ້ນສູ່ສະຫວັນແລ້ວ ພວກຜູ້ລ້ຽງແກະໄດ້ເວົ້າກັນວ່າ, ໃຫ້ພວກເຮົາພາກັນໄປເມືອງເບັດເລເຮັມເທາະ ໄປເບິ່ງເຫດການທີ່ໄດ້ເກີດຂຶ້ນ ຕາມທີ່ອົງພຣະຜູ້ເປັນເຈົ້າໄດ້ບອກໃຫ້ພວກເຮົາຮູ້ນັ້ນ.

“ພວກເຂົາຈຶ່ງຮີບໄປ ແລະ ພົບມາຣີກັບໂຢເຊັບ ແລະ ເຫັນພຣະກຸມມານນອນຢູ່ໃນຮາງຫຍ້າ.”¹

ຂໍ້ພຣະຄຳພີທີ່ລຽບງ່າຍເຫລົ່ານີ້ໃນພຣະຄຳພີໃໝ່ທີ່ຂຽນໂດຍລູກາ ເຮັດໃຫ້ເກີດພາບເຫດການແຫ່ງສະຫວັນຂອງການກຳເນີດຂອງພຣະເຢຊູຄຣິດໃນຈິດໃຈຂອງເຮົາ ຊຶ່ງໃນທຸກມື້ນີ້ ມີການສະເຫລີມສະຫລອງໄປທັງທົ່ວໂລກ.

ໃນປະເທດປອກຕຸຍການ ຊຶ່ງເປັນບ້ານເກີດຂອງພວກເຮົາ, ປະເພນີການສ້າງເຫດການໃນພຣະຄຳພີຂຶ້ນໃໝ່ ໂດຍການຈັດສາກເລື່ອງລາວການກຳເນີດນັ້ນ ເປັນປະເພນີອັນເປັນທີ່ຮັກ. ທ່ານຈະພົບເລື່ອງລາວການກຳເນີດຢູ່ທົ່ວປະເທດ ໃນສະຖານທີ່ຫລາຍໆແຫ່ງໃນຊ່ວງເທດສະການຄຣິດສະມາດ—ຊຶ່ງເປັນປະເພນີທີ່ມີສະແດງໃນຫລາຍໆບ້ານເຊັ່ນກັນ. ການຈັດສາກເລື່ອງລາວການກຳເນີດ ມັກຈະກ່ຽວຂ້ອງກັບຄວາມພະຍາຍາມໃນການເກັບໄຄສົດ, ເຟືອງ, ກ້ອນຫີນ, ແລະ ວັດຖຸດິບທຳມະຊາດອື່ນໆມາ ເພື່ອສ້າງສາກຫລັງທີ່ສະເໝືອນຈິງສຳລັບເລື່ອງລາວການກຳເນີດ.

ປະເພນີຄຣິດສະມາດໃນການຈັດສາກເລື່ອງລາວການກຳເນີດນີ້ ເປັນກິດຈະກຳທີ່ໜ້າທະນຸຖະໜອມໃນໄວເດັກ ແລະ ໄວໜຸ່ມຂອງພວກເຮົາ ແລະ ແລ້ວກັບພໍ່ແມ່ຂອງພວກເຮົາ ແລະ ຕໍ່ມາ ກັບລູກໆຂອງພວກເຮົາ. ການຈັດສາກເລື່ອງລາວການກຳເນີດ ເປັນໜຶ່ງໃນກິດຈະກຳໂປດປານຂອງຂ້າພະເຈົ້າ ໃນຊ່ວງເວລານີ້ຂອງປີ.

ພວກເຮົາເກັບຮູບປັ້ນນ້ອຍໆທັງໝົດທີ່ພວກເຮົາເຄີຍໃຊ້ເພື່ອສ້າງສາກເລື່ອງລາວການກຳເນີດ ແລະ ສິ່ງອ້ອມຂ້າງ ໄວ້ໃນກ່ອງໄມ້ກ່ອງໜຶ່ງ. ສ່ວນຫລາຍ, ກໍມີການສະແດງແບບຈຳລອງນ້ອຍຂອງໝູ່ບ້ານຂອງພວກເຮົາເຊັ່ນກັນ. ທຸກໆປີ, ທຸກໆຄຣິດສະມາດ, ຮູບປັ້ນ ຫລື ອົງປະກອບໃໝ່ໆສອງສາມອັນ ໄດ້ຖືກຕື່ມເຂົ້າໃນຄໍເລັກຊັນ. ມີຮູບປັ້ນຂອງຊາວບ້ານ, ເຮືອນຊານ, ຊາວນາ ແລະ ສັດຕ່າງໆ, ກົງຫັນລົມ ແລະ ໂຮງສີນໍ້າ, ແລະ ອົງປະກອບທຳມະຊາດອື່ນໆ ເພື່ອລຽນແບບເນີນພູ ແລະ ຮ່ອມພູ, ຕົ້ນໄມ້, ແລະ ທົ່ງຫຍ້າຕ່າງໆ. ຊິ້ນສ່ວນຂອງແວ່ນສະທ້ອນແສງ ໄດ້ຖືກໃຊ້ເພື່ອລຽນແບບແມ່ນໍ້າ ແລະ ລຳທານ. ບາງຄັ້ງ, ແມ່ນແຕ່ຂົວກໍມີສະແດງ. ແລະ, ແນ່ນອນ, ໃນຈຸດສູນກາງຂອງທຸກຢ່າງ ມີຮູບປັ້ນທີ່ສຳຄັນທີ່ສຸດ, ຄືຮູບປັ້ນທີ່ມີບັນຍາຍໄວ້ໃນພຣະຄຳພີສັກສິດ: ຝູງແກະ ແລະ “ຄົນລ້ຽງແກະທີ່ຢູ່ຕາມທົ່ງ, ນອນເຝົ້າຝູງແກະຂອງພວກເຂົາ”² ທູດສະຫວັນທີ່ກ່າວແກ່ຄົນລ້ຽງແກະວ່າບໍ່ຕ້ອງຢ້ານ ແລະ ຜູ້ທີ່ປະກາດການກຳເນີດຂອງພຣະຜູ້ຊ່ວຍໃຫ້ລອດ, ຜູ້ທີ່ນຳເອົາ “ຂ່າວດີ … ທີ່ນຳຄວາມຊົມຊື່ນຍິນດີອັນໃຫຍ່ ມາສູ່ປະຊາຊົນທັງໝົດ”³ ຮູບປັ້ນຂອງນາງມາຣີ ແລະ ໂຢເຊັບ ໄດ້ຖືກວາງໄວ້ຢ່າງໂດດເດັ່ນຢູ່ອ້ອມຮາງຫຍ້າ.⁴ ແລ້ວກໍມີດາວດວງໜຶ່ງ, ຊຶ່ງພຣະຄຳພີໄດ້ກ່າວວ່າ ດາວດວງນັ້ນນຳຄວາມຊົມຊື່ນຍິນດີອັນໃຫຍ່ມາສູ່ພວກໂຫລາຈານ ແລະ ໄດ້ນຳພາພວກເຂົາໃນການເດີນທາງຂອງພວກເຂົາ ເພື່ອມາຫາພຣະເຢຊູ.⁵

ມັນຂຶ້ນຢູ່ກັບສະມາຊິກໃນຄອບຄົວທຸກຄົນ ທີ່ຈະຈັດສາກເລື່ອງເລົ່າການກຳເນີດ. ໃນຊ່ວງເວລາຫລາຍມື້ ຫລື ແມ່ນແຕ່ຫລາຍອາທິດ, ເທື່ອລະເລັກເທື່ອລະໜ້ອຍ, ສາກໄດ້ຖືກສ້າງ ແລະ ປະກອບຂຶ້ນດ້ວຍຊິ້ນສ່ວນທັງໝົດ ໃນຕຳແໜ່ງທີ່ເໝາະສົມ.

ຕະຫລອດທົ່ວເທດສະການນີ້, ພວກເຮົາໄດ້ຊື່ນຊົມສາກເລື່ອງລາວການກຳເນີດ ແລະ ໄດ້ຈົດຈຳເຫດການຕ່າງໆທີ່ໄດ້ຖືກບັນຍາຍໄວ້ໃນບັນທຶກຂອງມັດທາຍ ແລະ ລູກາ ທີ່ເຮັດໃຫ້ການສະເຫລີມສະຫລອງນີ້ ມີຄວາມໝາຍຢ່າງຍິ່ງ. ເລື່ອງລາວໄດ້ຖືກເລົ່າກ່ຽວກັບສັດທາຂອງນາງມາຣີ ແລະ ຂອງໂຢເຊັບ; ກ່ຽວກັບການເດີນທາງຂອງເຂົາເຈົ້າ ທີ່ໄດ້ “ຂຶ້ນໄປຈາກຄາລີເລ, ອອກຈາກເມືອງນາຊາເຣັດ, ເຂົ້າໄປໃນຢູດາ, ໄປສູ່ເມືອງຂອງດາວິດ, ຊຶ່ງ [ເຄີຍ] ຖືກເອີ້ນວ່າ ເບັດເລເຮັມ⁶; ແລະ ກ່ຽວກັບຄວາມຍາກລຳບາກຂອງພວກເຂົາໃນການຫາບ່ອນພັກຢູ່ທີ່ນັ້ນ.

ແຕ່ໃນທີ່ສຸດ, ວັນຄຣິດສະມາດກໍມາເຖິງ, ແລະ ຮູບປັ້ນກຸມມານນ້ອຍເຢຊູໄດ້ຖືກວາງໄວ້ໃນຮາງຫຍ້າ, ແລະ ການສົນທະນາ ແລ້ວຫັນໄປຫາຄວາມສຳຄັນຂອງພຣະເຢຊູຄຣິດໃນຊີວິດຂອງພວກເຮົາ ແລະ ສິ່ງທີ່ພຣະອົງໄດ້ກະທຳເພື່ອພວກເຮົາ⁷ ແລະ ກ່ຽວກັບວ່າ ພຣະອົງເປັນ ຂອງຂວັນທີ່ຍິ່ງໃຫຍ່ທີ່ສຸດ ໃນບັນດາຂອງຂວັນທັງໝົດ.

ເພງຄຣິດສະມາດນີ້ ສະຫລຸບຄວາມຮູ້ສຶກຂອງວິນຍານແຫ່ງການສະເຫລີມສະຫລອງ:

“ໂອ ລູກແຫ່ງຄວາມຫ່ວງໃຍທີ່ອ່ອນໂຍນຂອງມາຣີ!

ໂອ ເດັກນ້ອຍຊ່າງບໍລິສຸດ ແລະ ຍຸດຕິທຳ!

ຖືກອູ້ມຢູ່ໃນຮາງຫຍ້າ

ໃນວັນຄຣິດສະມາດທຳອິດແຫ່ງສະຫວັນນັ້ນ!

ຄວາມຫວັງຂອງທຸກໄວ ແລະ ທຸກເຊື້ອຊາດ

ໄດ້ຮວມຢູ່ໃນໃບໜ້າອັນເປັ່ງປະກາຍຂອງພຣະອົງ!

ໂອ ເດັກຊຶ່ງສະຫງ່າລາສີເຕັມແຜ່ນດິນໂລກ!

ໂອ ລູກຂອງການກຳເນີດທີ່ຕໍ່າຕ້ອຍ!

ຄົນລ້ຽງແກະ ທີ່ຖືກນຳພາຈາກທີ່ຫ່າງໄກ,

ກຳລັງຢືນນະມັດສະການຢູ່ໃຕ້ດວງດາວ,

ແລະ ພວກໂຫລາຈານກໍລົ້ມຄຸເຂົ່າລົງ

ແລະ ຖວາຍບັງຄົມແດ່ພຣະອົງ!

ໂອ ລູກທີ່ທູດສະຫວັນຮ້ອງເພງ!

ໂອ ເດັກນ້ອຍ, ກະສັດທາລົກຂອງເຮົາ!

ຢາບັນເທົາສຳລັບທຸກໆຄວາມໂສກເສົ້າ

ມີຢູ່ໃນດວງຕາອັນເສາະໃສ ແລະ ສ່ອງສະຫວ່າງ!

ໂອ ຂອງຂວັນອັນລໍ້າຄ່າທີ່ຖືກມອບໃຫ້ມະນຸດ

ເພື່ອໃຫ້ເຮົາໄດ້ຮັບມໍລະດົກໃນສະຫວັນ!”⁸

ພຣະຜູ້ຊ່ວຍໃຫ້ລອດພຣະອົງເອງໄດ້ເປັນພະຍານເຖິງຂອງຂວັນທີ່ພຣະອົງປະທານໃຫ້ແກ່ພວກເຮົາ: “ເຮົາບອກເລື່ອງນີ້ແກ່ເຈົ້າທັງຫລາຍ ເພື່ອພວກເຈົ້າຈະມີຄວາມສະຫງົບສຸກໃນເຮົາ. ໃນໂລກນີ້ພວກເຈົ້າຈະມີຄວາມທຸກລຳບາກ: ແຕ່ຈົ່ງຊື່ນໃຈເທາະ ເພາະຝ່າຍເຮົາໄດ້ຊະນະໂລກແລ້ວ.”⁹

“ເພາະວ່າ ພຣະເຈົ້າຮັກໂລກຫລາຍທີ່ສຸດ, ຈົນໄດ້ປະທານພຣະບຸດອົງດຽວຂອງພຣະອົງ, ເພື່ອທຸກຄົນທີ່ວາງໃຈເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດອັນຕະຫລອດໄປເປັນນິດ.”¹⁰

ຊ່າງເປັນຂອງຂວັນທີ່ພິເສດ, ຊ່າງເປັນຂອງຂວັນທີ່ປະເສີດແທ້ໆ!

“ເທດສະການຄຣິດສະມາດ ແມ່ນເວລາສະທ້ອນຄິດ ແລະ ກະທຳຕາມ ພອນ ແລະ ໂອກາດ ທີ່ເຮົາມີ ຍ້ອນການກຳເນີດ, ພຣະຊົນຊີບ, ການຊົດໃຊ້, ແລະ ການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ.”¹¹

ຂ້າພະເຈົ້າຄິດເຖິງພອນຂອງການພົບສັນຕິສຸກ ແລະ ຄວາມຫວັງ ແມ່ນແຕ່ໃນທ່າມກາງການທ້າທາຍ ແລະ ການທົດລອງຕ່າງໆ¹² ພອນຂອງການນຳພາທາງສະຫວັນໃນເວລາແຫ່ງໄຊຊະນະ ແລະ ເວລາແຫ່ງຄວາມສິ້ນຫວັງ¹³ ພອນຂອງມຸມມອງ ແລະ ຈຸດປະສົງທີ່ຍິ່ງໃຫຍ່ກວ່າ, ໂດຍທີ່ຮູ້ ແລະ ເຊື່ອວ່າ ມີສິ່ງອື່ນອີກຫລັງຈາກປະສົບການມະຕະນີ້¹⁴ ພອນຂອງຄວາມກະຕັນຍູ ແມ່ນແຕ່ໃນຍາມທີ່ເຮົາມີໜ້ອຍເພື່ອຄ້ຳຈູນຄວາມຕ້ອງການຂອງເຮົາ; ພອນຂອງການຮັບການປອບໂຍນ ເມື່ອເຮົາຮູ້ສຶກໂດດດ່ຽວ¹⁵ ແລະ ພອນທີ່ເຮັດໃຫ້ເຮົາສາມາດໃຫ້ໄດ້ ແມ່ນແຕ່ໃນຍາມທີ່ເຮົາບໍ່ມີຫລາຍກໍຕາມ.

ພອນເຫລົ່ານີ້ ແລະ ພອນອື່ນໆອີກຫລາຍຢ່າງທີ່ເຮົາມີ ແມ່ນຍ້ອນພຣະເຢຊູຄຣິດ! ແມ່ນແລ້ວ, ຍ້ອນກຸມມານນ້ອຍເຢຊູ ຂ້າພະເຈົ້າຈຶ່ງລໍຄອຍຖ້າຢ່າງໃຈຈົດຈໍ່ ເພື່ອທີ່ຈະວາງພຣະອົງໄວ້ໃນຮາງຫຍ້າໃນວັນຄຣິດສະມາດ ໃນສາກເລື່ອງລາວການກຳເນີດ! ພຣະອົງ, ຜູ້ເປັນຂອງຂວັນທີ່ຍິ່ງໃຫຍ່ທີ່ສຸດຂອງພວກເຮົາ, ໄດ້ປະທານພອນອັນລໍ້າຄ່າເຊັ່ນນັ້ນ ຍ້ອນພຣະຊົນຊີບ, ຕົວຢ່າງ, ຄຳສອນ, ແລະ ການເສຍສະລະຂອງພຣະອົງ.

ແລ້ວຂ້າພະເຈົ້າກໍຖາມວ່າ: ເພື່ອເປັນການຕອບແທນ, ເຮົາບໍ່ຄວນໃຊ້ພອນເຫລົ່ານີ້ ເພື່ອຍົກພາລະຂອງຄົນອື່ນບໍ, ຊ່ວຍ ແລະ ສົ່ງເສີມໃຫ້ພວກເຂົາເຊື່ອມໂຍງກັບວິນຍານຂອງເທດສະການອັນສັກສິດນີ້ ແລະ ສະເຫລີມສະຫລອງຂ່າວດີທີ່ຖືກປະກາດແກ່ຄົນລ້ຽງແກະໃນຄຣິດສະມາດທຳອິດບໍ?

ພຣະຄຣິດສາມາດປ່ຽນແປງຄຣິດສະມາດຂອງເຮົາ ເໜືອໂບແຫ່ງຄວາມກະລຸນາ ແລະ ຄວາມຮັກໄຄ່ ແລະ ຫໍ່ການສະເຫລີມສະຫລອງຂອງເຮົາດ້ວຍຄວາມໃຈບຸນ, ຊຶ່ງກໍຄື “ຄວາມຮັກອັນບໍລິສຸດຂອງພຣະຄຣິດ [ທີ່] ອົດທົນຕະຫລອດການ.”¹⁶ “ເຖິງແມ່ນວ່າ ຄວາມຮູ້ສຶກຂອງເຮົາຈະມາ ແລະ ໄປກໍຕາມ, ແຕ່ຄວາມຮັກຂອງພຣະອົງທີ່ມີຕໍ່ເຮົາບໍ່ເປັນເຊັ່ນນັ້ນ.”¹⁷ ຄວາມຮັກຂອງພຣະອົງສືບຕໍ່ເລື້ອຍໄປຕະຫລອດທັງປີ ແລະ ຕະຫລອດທັງຊີວິດຂອງເຮົາ.

ການວາງຈຸດສຸມຂອງເຮົາຄືນໃໝ່ທີ່ພຣະຄຣິດອີກຄັ້ງ ໃນຊ່ວງຄຣິດສະມາດ ຈະເຮັດໃຫ້ເຮົາມີການວັດແທກທີ່ສຳຄັນຍິ່ງຂຶ້ນ ເຖິງຄວາມຮັກຂອງພຣະອົງໃນຊີວິດຂອງເຮົາ ແລະ ຄວາມສາມາດທີ່ຈະຮັກ ແລະ ຮັບໃຊ້ຄົນອື່ນອ້ອມຮອບເຮົາຫລາຍຍິ່ງຂຶ້ນ.

ເມື່ອເຮົາຮັກສາວິນຍານຂອງຄຣິດສະມາດ, ເຮົາກໍຮັກສາພຣະວິນຍານຂອງພຣະຄຣິດ. ໃນເທດສະການນີ້ ຂໍໃຫ້ເຮົາສຸມໃຈໃສ່ທີ່ພຣະເຢຊູຄຣິດ, ແສງສະຫວ່າງຂອງໂລກ, ແລະ ຂໍໃຫ້ເຮົາໃຫ້ແສງສະຫວ່າງຂອງເຮົາສ່ອງສະຫວ່າງໃນເທດສະການນີ້ ໂດຍການແບ່ງປັນຄວາມຮັກຂອງເຮົາ, ຄວາມເຫັນອົກເຫັນໃຈຂອງເຮົາ, ແລະ ການຮັບໃຊ້ຂອງເຮົາກັບຄົນອື່ນ.

ເພາະພຣະອົງສະເດັດມາ, ການດຳລົງຢູ່ຂອງເຮົາຈຶ່ງມີຄວາມໝາຍ. ເພາະພຣະອົງສະເດັດມາ, ຈຶ່ງມີຄວາມຫວັງ. ພຣະອົງເປັນພຣະຜູ້ຊ່ວຍໃຫ້ລອດຂອງໂລກ, ແລະ ພຣະອົງເປັນຂອງຂວັນທີ່ຍິ່ງໃຫຍ່ທີ່ສຸດ; ຂ້າພະເຈົ້າຂໍມອບປະຈັກພະຍານຂອງຂ້າພະເຈົ້າກ່ຽວກັບເລື່ອງນີ້. ໃນພຣະນາມຂອງພຣະເຢຊູຄຣິດ, ອາແມນ.