សម្រាប់ពួកសុចរិតបុណ្យគ្រីស្ទម៉ាស់មានន័យថា អ្វីៗនឹងស្រួលទាំងអស់
ការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយឆ្នាំ ២០២២
ថ្ងៃទី ៤ ខែ ធ្នូ ឆ្នាំ ២០២២
ខ្ញុំសូមអរគុណដល់ ប្រធាន ណិលសុន និង គណៈប្រធានទីមួយសម្រាប់ឯកសិទ្ធិក្នុងការនិយាយនាយប់នេះ ។ គ្រួសាររបស់យើងបានសាទរប្រពៃណីនៃពិធីបុណ្យគ្រីស្ទម៉ាស់ នៅក្នុងប្រទេសរបស់យើងផ្ទាល់ និងនៅប្រទេសបារាំង អាល្លឺម៉ង់ និង ប្រេស៊ីល ។ មិនថាយើងរស់នៅទីណានោះទេ សម្រាប់យើងទាំងអស់គ្នាដែលជឿ និងដើរតាមព្រះយេស៊ូវគ្រីស្ទ នោះសេចក្ដីពិតដ៏ស្រស់ស្អាតមួយគឺនៅតែដដែល ៖ យើងរីករាយថាទ្រង់ដែលត្រូវបានហៅតាំងពីដើមមក ជាទ្រង់ដែលត្រូវបានរំពឹងទុកអស់ជាច្រើនសតវត្សរ៍មកហើយ ទ្រង់ដែលជាបុត្រាបង្កើតតែមួយរបស់ព្រះវរបិតា ទ្រង់បានយាងមក—ក្នុងកាលដ៏ខ្ពង់ខ្ពស់បំផុត ក្នុងលក្ខខណ្ឌដ៏រាបទាបបំផុត—ទ្រង់បានយាងមក ។ ហើយដោយសារទ្រង់បានយាងមក នោះមនុស្សរាប់លាននាក់ដែលបានរស់នៅលើផែនដីនេះនឹងរស់នៅជាថ្មី ហើយប្រសិនបើពួកគេជ្រើសរើស ពួកគេទទួលបានជីវិតដ៏អស់កល្បជានិច្ច ជាអំណោយទានដ៏ប្រសើរបំផុតពីអស់ទាំងអំណោយទាននៃព្រះ ។
ក្នុងដំណើររឿងដ៏អស្ចារ្យនៃការប្រសូតរបស់ទ្រង់នៅពេលបុណ្យគ្រីស្ទម៉ាស់ មានមេរៀនជាច្រើនដែលយើងអាចរៀនបាន ។
នេះជាមេរៀនដែលខ្ញុំនឹងចែកចាយជាមួយបងប្អូននាយប់នេះ ៖ ដោយមាននូវគ្រប់ការព្រួយបារម្ភ និងភាពមិនប្រាកដប្រជា ការលំបាក និងបញ្ហាដែលដើរតាមយើងនៅក្នុងជីវិតរមែងស្លាប់នេះ សម្រាប់ពួកសុចរិត—ពោលគឺអ្នកមានសេចក្តីជំនឿ និងទុកចិត្តលើព្រះអម្ចាស់—នៅទីបំផុត អ្វីៗនឹងស្រួលទាំងអស់ ។
សូមគិតអំពីគំរូដ៏អស្ចារ្យទាំងនេះ ។
ស្ត្រីដ៏សុចរិតម្នាក់ឈ្មោះ អេលីសាបិត និងស្វាមីរបស់គាត់ឈ្មោះ សាការី ដែលកាលនោះមានវ័យចំណាស់ទៅហើយកើតទុក្ខដោយពុំបានពរឲ្យមានកូន ។ ប៉ុន្តែពួកគាត់មានចិត្តស្មោះត្រង់ ហើយទុកចិត្តលើព្រះអម្ចាស់ ។
ទោះបីជាព្រះគម្ពីរមិនបានកត់ត្រាអំពីអារម្មណ៍ និងអ្វីដែល សាការី និង អេលីសាបិត បាននិយាយគ្នាក្តី ក៏ល្ខោនបែបតន្ត្រីក្រោមចំណងជើងថា ព្រះអង្គសង្រ្គោះនៃពិភពលោក ជួយយើងឲ្យឆ្លុះបញ្ចាំងពីអ្វីដែលអាចមាននៅក្នុងដួងចិត្តរបស់ពួកគាត់ ។ សាការីប្រកាសប្រាប់អេលីសាបិត ៖ « យើងមិនត្រូវបានជ្រើសរើសឲ្យមានកូនទេ ។ ប៉ុន្តែយើងនៅតែទុកចិត្តលើព្រះអម្ចាស់ » ។ បន្ទាប់មកពួកគាត់ច្រៀង ៖ « ខ្ញុំនឹងថ្វាយចំពោះព្រះជារៀងរហូត ប៉ុន្តែមិនធ្វើតាមឆន្ទៈរបស់ខ្ញុំទេ ។… បើមិនដូច្នោះទេ នោះការថ្វាយដល់ទ្រង់ជារៀងរហូតមានន័យថា ខ្ញុំនឹងរង់ចាំ ហើយមើល និងឈ្វេងយល់ ។… ខ្ញុំនឹង … បន្តទុកឲ្យទ្រង់ដឹកនាំខ្ញុំ … រហូតដល់ម៉ោងរបស់ខ្ញុំ រហូតដល់ថ្ងៃរបស់ខ្ញុំ រហូតដល់ឆ្នាំរបស់ខ្ញុំបានបញ្ចប់ » ។១
បន្ទាប់មក អព្ភូតហេតុមួយបានកើតឡើង ។ ព្រះគម្ពីរបានកត់ត្រាថា នៅក្នុងព្រះវិហារបរិសុទ្ធទេវតាកាព្រីយ៉ែល បានបង្ហាញព្រះកាយដល់សាការី ។ ទេវតាបានប្រកាសថា ៖ « អេលីសាបិតនឹងបង្កើតកូនប្រុសមួយឲ្យលោក ត្រូវឲ្យវាមានឈ្មោះថាយ៉ូហាន ។… ហើយកូននោះនឹង … រៀបចំមនុស្ស១ពួកទុកជាស្រេច សម្រាប់ជារាស្ត្ររបស់ព្រះអម្ចាស់ ។២
សាការីតបថា « ខ្ញុំសោតក៏ចាស់ហើយ ប្រពន្ធខ្ញុំក៏ចាស់ណាស់ដែរ » ។៣
កាព្រីយ៉ែលបានតបថា « មើលលោកនឹងត្រូវគ និយាយមិនបាន ដរាបដល់ថ្ងៃដែលការទាំងនេះកើតមក ពីព្រោះលោកមិនបានជឿពាក្យខ្ញុំ ដែលនឹង … សម្រេច » ។៤
សូមគិតអំពីអារម្មណ៍ដែលនឹងកើតឡើងចំពោះអេលីសាបិត និង សាការី ។ អស់ពេលជាច្រើនឆ្នាំមកហើយដែលពួកគាត់បានអធិស្ឋានទូលសុំកូន ប៉ុន្តែពួកគាត់ពុំបានទទួលចម្លើយទេ ។ ពួកគាត់បានបន្តកាន់តាមព្រះបញ្ញត្តិ និងទុកចិត្តលើព្រះអម្ចាស់ ។ បន្ទាប់មក ទេវតាមួយអង្គបានបង្ហាញព្រះកាយដល់សាការី ប៉ុន្តែក្រោយពីការជួបនោះមក គាត់មិនអាចនិយាយបាន ។ គាត់អាចសង្ស័យអំពីជំហររបស់គាត់ចំពោះព្រះអម្ចាស់ ។ ប៉ុន្តែតាមកាលកំណត់ ទារកនោះបានកើតមក ។ សាការីអាចនិយាយបានវិញ ។ ហើយទារកនោះបានក្លាយជាព្យាការីយ៉ូហាន ដែលបានរៀបចំផ្លូវថ្វាយព្រះសង្រ្គោះ ។ ជាមួយនឹងភាពមិនប្រាកដប្រជា និងការលំបាកទាំងអស់ នៅទីបំផុតសម្រាប់ពួកសុចរិត អ្វីៗស្រួលទាំងអស់ ។
បន្ទាប់មក នៅក្នុងដំណើររឿងបុណ្យគ្រីស្ទម៉ាស់ យើងបានជួបម៉ារាដ៏ជាទីស្រឡាញ់ ដែលត្រូវបានជ្រើសរើសឲ្យធ្វើជាមាតារបស់ព្រះរាជបុត្រានៃព្រះ ។ ប៉ុន្តែនៅតែមានការព្រួយបារម្ភ និងភាពមិនប្រាកដប្រជាក្នុងជីវិតរបស់នាង ។ កាព្រីយ៉ែលបានបង្ហាញព្រះកាយដល់ម៉ារា ដោយប្រាប់នាងពីការហៅដ៏រុងរឿងរបស់នាង ។ ម៉ារាបានសួរថា « ខ្ញុំមិនស្គាល់ប្រុសណាផង ដូច្នេះតើធ្វើដូចម្តេចនឹងឲ្យការនេះសម្រេចបាន ? »៥ កាព្រីយ៉ែលបានពន្យល់ថា ព្រះចេស្តានៃព្រះវិញ្ញាណបរិសុទ្ធនឹងយាងមកសណ្ឋិតលើនាង ហើយព្រះចេស្តានៃព្រះដ៏ខ្ពស់បំផុត នឹងមកគ្របបាំងនាងដោយស្រមោល ហើយនាងនឹងមានគភ៌គឺព្រះរាជបុត្ររបស់ព្រះ ហើយព្រះនាមរបស់ទ្រង់គឺព្រះយេស៊ូវ ។
សូមគិតអំពីអំណរ និងសុភមង្គលដែលនាងបានទទួលអារម្មណ៍ ដែលទេវតានៃព្រះបានយាងមកជួបនាង ។ ឱវាជាការរាបសាអ្វីម៉្លេះ នៅពេលនាងបានសញ្ជឹងគិតក្នុងការធ្វើជាមាតារបស់ព្រះមែស៊ី ដែលបានទន្ទឹងរង់ចាំមកជាយូរ ។ ហើយនៅពេលប្រាប់យ៉ូសែប អ្វីៗទាំងអស់មិនទាន់បានសម្រេចនៅឡើយទេ ។ យ៉ូសែបគឺជាមនុស្សសុចរិតម្នាក់ ហើយមិនចង់ឲ្យម៉ារាមានភាពអាម៉ាស់ ប៉ុន្តែគាត់មិនដឹងច្បាស់ពីផ្លូវត្រឹមត្រូវដើម្បីដើរតាមទេ ។ អំឡុងពេលគាត់មានកង្វល់ និងភាពមិនប្រាកដប្រជា នោះទេវតាម្នាក់បានយាងមករកគាត់ក្នុងសុបិនមួយថា ៖ « យ៉ូសែប … កុំឲ្យខ្លាចនឹងយកនាងម៉ារា ជាប្រពន្ធអ្នកឡើយ ដ្បិតបុត្រដែលមកចាប់ទំផ្ទៃនាង នោះកើតពីព្រះវិញ្ញាណបរិសុទ្ធទេ ។ នាងនឹងប្រសូតបុត្រា១ ហើយអ្នកត្រូវថ្វាយព្រះនាមថា « យេស៊ូវ » ព្រោះបុត្រនោះនឹងជួយសង្គ្រោះរាស្ត្រទ្រង់ឲ្យរួចពីបាប » ។៦
ប្រាកដណាស់ យើងអាចយល់ថា ម៉ារាមានកង្វល់ និងមិនប្រាកដប្រជា ដោយឆ្ងល់ពីរបៀបដែលពរជ័យដ៏អស្ចារ្យបំផុតនេះនឹងកើតឡើងយ៉ាងដូចម្តេច ។ យ៉ូសែបក៏មានការព្រួយបារម្ភ និងមិនស្ងប់ចិត្តផងដែរ ។ ប៉ុន្តែឥឡូវនេះ វាច្បាស់ណាស់ថា ពួកគាត់នឹងដើរលើផ្លូវនេះជាមួយគ្នា ។ ម៉ារាច្បាស់ជាសប្បាយចិត្តខ្លាំងណាស់ដែលដឹងថា ទេវតានោះបានបង្ហាញព្រះកាយដល់យ៉ូសែប ។ យ៉ូសែបច្បាស់ជាសប្បាយចិត្តខ្លាំងណាស់ដែលបានដឹងថា នេះគឺជាព្រះហឫទ័យរបស់ព្រះ ។ ជាមួយនឹងភាពមិនប្រាកដប្រជា និងការលំបាក នៅទីបំផុតសម្រាប់ពួកសុចរិត អ្វីៗស្រួលទាំងអស់ ។
ប៉ុន្តែដូចយើងដឹងហើយថា ការលំបាកនៅតែមាននៅពេលខាងមុខ វានឹងមានជានិច្ច ។ នៅពេលម៉ារាជិតសម្រាល ពួកសាសន៍រ៉ូមតម្រូវឲ្យយ៉ូសែបត្រឡប់ទៅកាន់ទីក្រុងបេថ្លេហិមវិញ ។ ម៉ារា និង យ៉ូសែប បានប្តេជ្ញាចិត្តថា ពួកគាត់នឹងទៅជាមួយគ្នា ។ យើងទាំងអស់គ្នាចូលចិត្តរឿងបុណ្យគ្រីស្ទម៉ាស់ដ៏អស្ចារ្យនេះណាស់ ។ ពេលទៅដល់បេថ្លេហិម ផ្ទះសំណាក់គ្មានសល់បន្ទប់នោះទេ ។ ឱយ៉ូសែបច្បាស់ជាមានការបារម្ភខ្លាំងណាស់ ។ តើវាអាចកើតឡើងបែបនេះយ៉ាងណាទៅ ? ហេតុអ្វីម៉ារាត្រូវបានជ្រើសរើសលើស្ត្រីទាំងអស់ ដើម្បីបង្កើតព្រះរាជបុត្រានៃព្រះដ៏ខ្ពស់បំផុតនៅក្នុងក្រោលសត្វដ៏សាមញខ្លាំងបែបនេះ ? តើការប្រសូតនេះនឹងគ្មានបញ្ហា ឬភាពស្មុគស្មាញទេឬ ?
វាហាក់ដូចជាគួរឲ្យភ្ញាក់ផ្អើលណាស់ និងអយុត្តិធម៌ ។ តែបុត្រតូចនោះបានប្រសូតមក ហើយព្រះបុត្រាមានសុខភាពល្អ ។ ដូចជាការរៀបរាប់នៅក្នុងចម្រៀងបុណ្យគ្រីស្ទម៉ាស់ដ៏អស្ចារ្យនេះថា « ផ្ទុំនៅក្នុងស្នូកទីឆ្ងាយឥតមានគ្រែផ្ទុំឡើយ ព្រះយេស៊ូវទារកតូចផ្ទុំនៅឥតមានខ្នើយ » ។៧
មុនពេលយប់នោះបានកន្លងផុតទៅ ទេវតាមួយអង្គបានបង្ហាញព្រះកាយដល់ពួកអ្នកគង្វាលនៅទីវាលដោយនាំដំណឹងល្អពីសេចក្តីអំណរយ៉ាងអស្ចារ្យ ។ ហើយពួកទេវតាបានច្រៀងថា « សួស្តីដល់ព្រះនៅស្ថានដ៏ខ្ពស់បំផុត ហើយសេចក្តីសុខសាន្តនៅផែនដីនៅកណ្តាលមនុស្ស ដែលជាទីគាប់ព្រះហឫទ័យដល់ទ្រង់ » ។៨
ពួកអ្នកគង្វាលបានទៅឯភូមិបេថ្លេហិម ដើម្បីស្វែងរកព្រះឱរសយេស៊ូវ ។ ហើយនៅពេលពួកគេបានរកឃើញព្រះឱរសព្រះគ្រីស្ទ នោះ យ៉ូសែប និង ម៉ារាច្បាស់ជាបានទទួលអារម្មណ៍លួងលោម និងការបញ្ជាក់យ៉ាងណាទៅ នៅពេលពួកគាត់បានដឹងថា មានគោលបំណងក្នុងការលំបាកដែលបានហ៊ុមព័ទ្ធពួកគាត់ ។ ពួកទេវតាបានប្រកាសអំពីការយាងមក និងបេសកកម្មដ៏ខ្ពង់ខ្ពស់របស់ទ្រង់ ។ បន្ទាប់ពីការលំបាក និងភាពមិនប្រាកដប្រជា នៅទីបំផុតសម្រាប់ពួកសុចរិត អ្វីៗស្រួលទាំងអស់ ។
នៅទ្វីបអាមេរិកឯណោះវិញ បញ្ហា ភាពមិនប្រាកដប្រជា និងកង្វល់នានាក៏កើតមានដល់ពួកសុចរិតផងដែរ ។ ព្យាការីសាំយូអែលបានបញ្ជាក់ថា ការប្រសូតរបស់ព្រះអង្គសង្គ្រោះនឹងកើតឡើងក្នុងរយៈពេលប្រាំឆ្នាំខាងមុខ ហើយថានឹងមានទីសម្គាល់មួយ ដែលពេញមួយយប់នោះពុំងងឹតឡើយ ។ នៅថ្ងៃនោះជិតមកដល់ ស្រាប់តែមានរឿងនឹកស្មានមិនដល់បានកើតឡើង ។ « មានមួយថ្ងៃ [ ដែលបាន ] កំណត់ទុកដោយពួកអ្នកដែលពុំជឿ [ ជាអ្នកដែលប្រកាសថាពេលនោះបានកន្លងផុតទៅហើយ ] ថា អស់អ្នកណាដែលជឿ [ ថាព្រះអង្គសង្គ្រោះនឹងយាងមក ] នឹងត្រូវប្រហារជីវិតចោល លើកលែងតែមានទីសម្គាល់កើតឡើង » ។៩ អ្នកមិនជឿបានចំអកដល់អ្នកជឿថា « សេចក្ដីអំណរ និងសេចក្ដីជំនឿរបស់អ្នកអំពីរឿងនេះបែរជាឥតប្រយោជន៍ទៅវិញ » ។១០ សូមស្រមៃគិតអំពីការថប់បារម្ភ និងកង្វល់របស់ពួកសុចរិត ។ ព្រះគម្ពីរចែងថា នីហ្វៃ « បានក្រាបទៅលើដី ហើយបានអំពាវនាវយ៉ាងខ្លាំងដល់ព្រះរបស់លោក ជំនួសប្រជាជនរបស់លោក » ។១១ ហើយនៅពេលនីហ្វៃកំពុងអធិស្ឋាន « សំឡេងនៃព្រះអម្ចាស់បានបន្លឺមកកាន់លោកថា ៖ ចូរងើបឡើង ហើយមានសេចក្ដីសង្ឃឹមចុះ ដ្បិតមើលចុះ ពេលនោះជិតមកដល់ហើយ ហើយនៅក្នុងយប់នេះ ទីសម្គាល់នឹងលេចមក ហើយថ្ងៃស្អែកឡើង យើងនឹងចុះមកឯលោកិយ » ។១២
ព្រះគម្ពីរប្រកាសថា « ពាក្យដែលបានបន្លឺដល់នីហ្វៃ ត្រូវបានបំពេញមែន … ដ្បិតមើលចុះ នៅវេលាថ្ងៃលិច ក៏ពុំងងឹតសោះ ។ … [ ហើយ ] ប្រជាជនទាំងអស់ … មានសេចក្ដីអស្ចារ្យយ៉ាងខ្លាំង រហូតដល់គេដួលទៅលើដី ។ … [ ហើយ ] ពេញមួយយប់នោះ គ្មានភាពងងឹតអ្វីសោះ ប៉ុន្តែភ្លឺដូចពេលកណ្ដាលថ្ងៃត្រង់ ។ … ហើយពួកគេបានដឹងថា នេះគឺជាថ្ងៃដែលព្រះអម្ចាស់ទ្រង់ត្រូវប្រសូត » ។១៣
ជាមួយនឹងការលំបាក និងភាពមិនប្រាកដប្រជាទាំងអស់ នៅទីបំផុតសម្រាប់ពួកសុចរិត—សម្រាប់អស់អ្នកដែលទុកចិត្តលើព្រះ—ទោះបីនោះក្នុងជីវិតនេះ ឬនៅពេលយើងលុតជង្គង់នៅព្រះបាទារបស់ទ្រង់ក្តី អ្វីៗស្រួលទាំងអស់ ។១៤
ដោយគិតពីគ្រាដ៏ពិសិដ្ឋអំពីការប្រសូតរបស់ព្រះអង្គសង្គ្រោះ ហេតុអ្វីព្រះអម្ចាស់ទន្ទឹងរង់ចាំរហូតដល់យប់ចុងក្រោយទើបមានបន្ទូលប្រាប់នីហ្វៃថា ទ្រង់នឹងប្រសូតនៅថ្ងៃស្អែក ? ទ្រង់គួរតែមានបន្ទូលប្រាប់លោកច្រើនសប្តាហ៍ ឬច្រើនខែជាមុន ។ ហេតុអ្វីទ្រង់ទុកឲ្យអេលីសាបិត និង សាការី នៅរហូតដល់ចាស់ដោយគ្មានកូន ពីមុនបញ្ជាក់ថា ព្យាការីយ៉ូហាននឹងកើតមកពីពួកគាត់ ? ហើយហេតុអ្វីម៉ារាត្រូវឆ្ងល់អំពីកិច្ចការដែលនាងត្រូវធ្វើ ហើយយ៉ូសែបឆ្ងល់ពីតួនាទីរបស់គាត់នៅក្នុងរឿងនេះ ដែលជារឿងសំខាន់បំផុតនៃរឿងណាៗទាំងអស់ ? ហេតុអ្វីបានជាគ្មាននរណាដឹងអំពីតួនាទីរបស់ស្នូក និងពួកអ្នកគង្វាល ព្រមទាំងពួកទេវតា រហូតដល់ព្រឹត្តិការណ៍ទាំងនោះបានកើតឡើង ?
នៅក្នុងជីវិតមុនជីវិតនេះ ព្រះអម្ចាស់បានប្រកាស« យើងនឹងសាកល្បងពួកគេមើល បើសិនជាពួកគេ នឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ពួកគេ នឹងបញ្ជាដល់ពួកគេ » ។១៥ ហើយចេញពី សុភាសិត ៖ « ចូរ ទី ពឹង ដល់ ព្រះយេហូវ៉ា ឲ្យ អស់ អំពី ចិត្ត កុំ ឲ្យ ពឹង ផ្អែក លើ យោបល់ របស់ ខ្លួន ឡើយ ។ ត្រូវឲ្យទទួលស្គាល់ទ្រង់នៅគ្រប់ទាំងផ្លូវឯងចុះ នោះទ្រង់នឹងតម្រង់អស់ទាំងផ្លូវច្រករបស់ឯង » ។១៦
នៅក្នុងគ្រានៃភាពមិនប្រាកដប្រជារបស់យើងផ្ទាល់ នៅក្នុងគ្រានៃបញ្ហា និងការលំបាក នៅក្នុងការពុះពារនានារបស់យើង ចូរយើងមានភាពស្មោះត្រង់ ។ ព្រះយេស៊ូវបានមកដល់នៅយប់ដ៏បរិសុទ្ធនោះ ។ ទ្រង់ជាព្រះអង្គសង្រ្គោះនៃពិភពលោក ជាម្ចាស់នៃមេត្រីភាព ជាស្តេចនៃអស់ទាំងស្តេច ។ ទ្រង់មានព្រះជន្មរស់ ហើយ « ក្តីសង្ឃឹម និងភាពភ័យខ្លាចជាយូរមកត្រូវបាន [ ទ្រង់ ] បំពេញ » ។១៧ ខ្ញុំសូមថ្លែងទីបន្ទាល់ថា កាលយើងមានភាពសុចរិត នោះទឹកភ្នែកសោកសៅ ការលំបាក និងភាពមិនប្រាកដប្រជាទាំងអស់របស់យើង នឹងត្រូវបានបំពេញ ហើយធ្វើឲ្យធូរស្បើយនៅក្នុងទ្រង់ ដែលជាព្រះរាជបុត្រាដ៏ស្ងួនភ្ងារបស់ព្រះ ។ « អំណរដល់លោក ព្រះបុត្រកើតហើយ » ។១៨ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕