14:6

Hane’ Yá’át’éehii T’áá Íiyisí Ił Hóshóonii

Alą́ąjį’ Naat’áanii Danilínígíí Késhmish Deidósin 2022 Yihahgo

Elder Dallin H. Oaks Áyiilaa

Áłtsé Naat’áaniijí Átsé Akéé’ Dasidá

Damoó, Níłch’itsoh Dį́į́góó yoołkáałgo, 2022 Yihahgo

Késhmish Baa Hózhǫ́! “Hane’ ya’at’éehii t’áá íiyisí ił hóshóonii” bee ahił dahołne’ dóó sin bee dahóhtaał dóó bee ahaadajohba’ éí baa ahééh ílį́ Késhmish nahalzhiishgo.

Késhmishjį’ anáhálzhishgo Jesus Christ bi’dizhchináa neeznádiindi dimííl bá dahodísin. Nihookáá’ t’áá nahwiis’áá ńt’ę́ę́’ ákót’ée le’. Bí ákódzaa dóó ts’ídá aláahdi ayóó át’éégo hiiná.

I.

Azhą́ ni’ bikáá’ k’ehgo, Nazarethdę́ę́’ Jesus bi’iina’ yee ayóó át’áo nahasdzáán yidesnáá’ dóó doo ła’ hináanii t’áá shiidą́ą́dii ákónééh da. Diyin God yá dahalne’ii dóó saad nideechąąhii binda’nitin nilį́įgo dimííl nidááhai. Ayóó át’éego nida’ach’ąąh dóó sin Jesus Christ bi’dizhchiį́ dóó bi’iina’ dóó bina’nitin bee dadólzin. Nitsídaakeesii dóó oodlą’ nideełkaahii Bi nanitin yaa da’ółta’go bił dahwéelzhiizh. Éí na’nitin ajéí deidiisnáago ajooba’ dahazlį́į́’ Christ Bi’ayóí ó’ó’ní t’áá áníit’é binahjį’ baa ákodaniizíí’.

Diyin Bóhólníihii Jesus Christ Bi’iina’ bee bééhániih lą’í dóó bi’na’nitin doo nááná ła’ ákót’ée da. Díí, aoo’, sodizin bikin deiyíl’á, Europe dóó America kédaayahgóó, t’óó adahayóí t’áá baa da’ íínííshgo nídahahááh. Ániid, Jesus Christ Bisodizin At’ah Danilínígíí dííjį́įdi Diyin God bighan neeznádiin dóó tsosts’idiin dóó bi’aan t’ááłá’í bá sodahodoozin dóó bii’ da’íníísh dóó neeznádiin dóó naadiin dóó bi’aan náhást’éí hasht’éídaalnééh’, ańdaalnééh, nidaachąąh, doodaii’ ániid President Nelson ła’ yee hanáánáádzíí’ Ghąąjį’ nitsaago áłah azlį́į́’yę́ędą́ą́. Díí Diyin God bighan t’áá ałtso keyahgóó dóó tsosts’idiin dóó bi’aan dį́į́ éí dah deiyíkááhgo naaznil. Éí biyi’ góne’ Jesus Christ bik’éé’ joogááł dooleełgo baa ázhdít’ááh.

Dimííltsoh yaa ádadeest’ą́—dóó, t’áá ákónéehii, ła’ dimííltsoh éí bi’iina’ yikék’ehgóó dahdadiikai—Israel bi Bóhólníihii Diyin yikéé’, Jehovah, Jesus Christ, nihi Yisdá’iiníiłii. President Gordon B. Hinckley doo yilááhgóó yaa haadzíí’ da kódííniid, “T’áadoo beełt’éhígóó éí k’ehgo é’éł’į́ [íídą́ą́’] ts’ídá alááh adziil yá’át’ééhii dóó nahasdzáán t’áá si’ą́ą́ ńt’ę́ę́’ bee hodeezyéél.”¹

II.

Nihił bééhózin t’áá’ ákónééhii biniyéi dóó diyin k’ehgo bee ha’oodzíí’ éí Diyin God BiYe’ T’áá Éí T’éiyá Bá Yizhchíinii bididoo’chííłgo. Diyin bizaad sání New Testament bikáá’ éí Christ awéé’ bididoochíiłgo táá’ ał’ąą át’éego dah ooldah bił dahóóne’ nahasdzáán ha’a’aah biyaají, bee béédaho’dílzinígíí ał’ąą’ ádaat’éego. Yá’ąąshdéé’ hane’ adoochííłgo bił dahóóne’ígíí éí ayóó jooba’ danízinii, ayóó dahodísinii, dóó táá íiyisíí dahóyánígíí danilį́.

Áłtsé bił hoone’ígíí éí nida’niłkaadii Bethlehem bíighah dahdaskidi. Diyin God yá naal’a’ii dóó yá’ąąshdę́ę́’ dahataałii kódadííniid “hane’ ya’at’éehii t’áá íiyisí ił hóshóonii … áko éí diné t’áá ałtso bá dooleeł … Yisdá’iiníiłii … éí Christ Diyin Bóhólníihii nilį́.”² Nida’niłkaadi shį́į́ bik’ihodinii’ díí hane’ ayóó baa hózhóonii deididoots’į́į́łgo háálá t’áá ádabi’di’nínígíí ádaat’é dóó jooba’ bii’ dahólǫ́. Áko, kódaat’éego, yá’ąąshdę́ę́’ hane’ deediizts’ą́ą́’, háálá awéé’ yizhchį́įgo yeiíkai. Áádóó, Diyin Bizaad bikáá’, éí “díí awéé’ bee hoł dahóóne’ígíí baa nináádahodzisne’.”³ Na’niłkaadi dajilį́įgo hondaanish dóó dibé yázhí baa’ádahojilyą́ągo éí t’áá áłah é’él’į́ Yisdá’iiníiłii bina’nitin bił aheełt’é. Ałdó’, na’nitingo hahoozhiizhgo Jesus John the Baptist yaaniyá, éí Diyin God yá yáłti’í ádííniid, “Jó’akon, Diyin God biDibé Yázhí jílíinii dahonół’į́, éí nihokáá’ dine’é bibąąhági át’éii yóó’iidii’aahii jílį́!”⁴

Naakigóne’ éí Messiah bidi’doochííłgo baahane’ígíí éí Jerusalemdi Diyin God bighan góne’ naaki diyin k’ehgo naalnishí éí Diyingo Ii’sizíinii bił iishjání í’doolííłgo bá bóhónéidzą́. Mary dóó Joseph awéé’ Jesus Diyin bighan góne’ yah ayííłtį́ áłtsé yiichíhígíí nááiiniih bá álnééhgo, Simeon dóó Anna t’áá áłah bił bééhoozin Messiah át’įįgo. Diyin bizaad dabikáá’ éí Simeon awéé’ neediiłtį́ dóó Diyin God yich’į’ ahééhniizį́į́’ yik’i’diit’ą́ągo kódííniid “nibee yisdá’iildéehii,” éí “doo Jew dine’é danilíinii éí adinídínígíí bá bee ééhózinii át’é, áádóó t’áá éí yee nidine’é Israel ayóó át’éii dadooleeł.” Dóó Anna, “asdzání léi’ Diyin yá halne’ii nilį́įgo,” “íídą́ą́’ ákwe’é jiníyáago Bóhólníihii bich’į’ ahéésniizį́į́’, áádóó Jerúsalemgi kéédahat’ínígíí yisdádoo’niłgo nidayólíhígíí t’áá ałtso bich’į’ awéé’ baa nahodzisne’.”⁵

Táá’ góne’ haaz’ą éí díí ayóó át’éego azhchínígíí yik’i da’diitá. Diyin bizaad, Joseph Smith t’įįhdígo łahgo áyiilaa, éí bikáá’ “ha’a’aahdę́ę́’ Jerúsalemjį’ hastóí dahóyáanii yíkaigo kódaaní, Háadiyee’ Jew dine’é biMessiah yizhchį́? Jó, ha’a’aahdi bisǫ’ deiiltsą́, áko bich’į’ nidahodiidlaał biniyé niikai.”⁶

Na’ádíkid yee hadahaasdzi’ígíí bee bééhózin Diyin God biní’eezh Binahata’ dolzinii ła’yilłeeh biniyé. Diyin bizaad Bible na’nitin éí “Diyin God bits’ą́ą́dóó’ígíí doo ła’da hoł bééhózin da, nidi t’áá hazhó’ó Diyin God Bi’Ii’sizíinii bee hólǫ́ǫgo t’éiyá.”⁷ Díí hastóí dahóyáanii nááná ła’ keyahdę́ę́’ ádaat’į́ dóó łahgo át’áo áda’ał’į́, áko éí binahji’ dayoodlą́ Messiah t’áá ałtso dine’é bá yizhchį́go. Náánáłahgo, nááhást’ą́ągo daats’í ałdó’ biniyé. Hast’óí dahóyáanii naalyéhé da’ílíinii Mary dóó Joseph yaa deezhjááhígíí éí Egyptgóó awéé’ yił anííchą́ą́’go choidooł’įįł biniyé háálá aláahdi naat’áanii Herod awéé’ Christ atídoołííłgo yee hoł’ą́’.⁸

Christ álílee bee bidi’doochííłgo dóó ayóó át’éego áhoonííłgo éí ajooba’ bee dahólónii, dahodísinii, dóó bił éédahózinii t’éiyá bił ííshjání ádaalyaa? Elder James E. Talmage yee na’neezt’ą́ą́’ naaltsoos Jesus the Christbiyi’ kóní, “T’áá aaníí Diyin God bá da’ooíinii dadooleełgo hasht’eiyiilaa áko t’áá ałtso diné bił ádahoot’éhígíí dóó dahdeiyíkááhígíí yá—diyin yá ndaal’a’í t’áá aaníinii bił béédahózinígíí té’é’į́ danilínígíí dóó a’ohgo ádaantsédaakeesígíí bá; hastóí dahóyáanii t’áá aaníinii bida’oodlą’ éí aláahdi naat’áanii ádaadzódlíhígíí dóó Judeadę́ę́’ priests aláahdi áda’dólzinígíí yá.”⁹

Simeon dóó Anna benééłniihgo nihididołnááł áko be’da’iil’į dooleeł dóó diyingo azhchínę́ę́ t’áá aníí dadii’ńíi doo dóó binahjį’ Késhmish ná’ádleeh.

III.

Nihí, éí doo łahgo nihił ániidí da díí Christ bi’dizhchínígíí béédeilniihgo. Díí hane’ doo ninít’i’ da dóó bee béneełniih. Adam bee nabidi’neestą́ą́’. Israel ba’áłchíní bee ndabidi’neestą́ą́’. Azhé’é Lehi ba’áłchíní bił ííshjání ályaa. Náá’áłdó’, Diyin God yá yá’daałti’í t’áá aaníi át’eii na’nitin dóó Jesus Christ nihá tihooznii’ígíí yaa hadahaasdzíí’. Náą́’áłdó, Na’neezt’ą́ą́’ígíí dóó Bibeehaz’áanii éí Diyin God ba’áłchíní Diyin God ayóó ádeiyóníidoo dóó Diyin God yiká’anájah dooleeł dóó t’áá haishį́į́’ ałdó’. T’áá níléídę́ę́’ ákóháníigo ahoolzhiizh, díí bee hada’iisdzí’ígíí hool’áágóó ílį́į doo. Christ yikéé’ deiyíkáhígíí, díí bee ha’oodzíí’ígíí doo łahgo ándoolniił da. Éí aniidí ánáálnííł doo t’áá ła’í niidzinígo nihe’iina’ bídadéét’i’.

Késhmish binahjį’ t’áá áłahjį’ énéélniihdoo ayóí ííní’ní bee dóó hózhǫ́ jiiniiba’ dooleeł. Yá’ąąshdę́ę́’ bee ha’oodzí’ígíí “nahasdzáán bikáá’ hodeezyéél, t’áá ałtso diné baajijooba’”¹⁰ t’áá íídą́ą́’ ayóí ádeiyíníí’nínígíí dóó nihił danilíinii doo éí t’éiyá da. Béédahoniilzinígíí baa jiiniiba’ doo, doo bééhoniilzinígíí dóó nihe’ana’í baa jiiniiba’ doo. Késhmishgodó’ háída asihígíí baanízhdí’ááh, ałk’idą́ą́’ adazdeeznihígíí bini’dii nídaadziih dóó ahidiníłnáo k’é daachxǫ’ígíí hasht’éídaalne’.

Késhmishgo ádaahodlí dóó saad hółǫ́ nahgo kójiił’įįh, t’áadoo aníjít’íní, ił hodeezyéél bee jiináa dooleeł, dóó t’áadoo háída łahgo-át’éego baa ńtsíjíkeesí. Háíshį́į́ t’áá ałtso t’áá aaníí ájíníigo k’é bijiníi doo, t’áá háíshį́į́ sodizinjí yah anádáhígíí dóó doo yah anídaakahígíí ałdó’, Diyin God beehaz’áanii diyin yá yáłti’í Moses ba’áłchíní yee yá hooł’a’ée beda’iil’į́į doo:

“Nihikéyahgi dé’éyóní ła’ t’óó átsééd nihił kééhat’į́įgo t’áadoo bich’į’ nahwiyołnání.

Nidi dé’éyóní nihitahgi kééhat’ínígíí t’áá nihitahgi bi’dizhchį́įgo baa nitsóhkeesgo éí ayóó’ádeínóh’níi doo.”¹¹

Késhmishgo beneelniih Yá’ąąshdę́ę́’ Azhé’é t’áá áníít’é ba’áłchíní danidłí BiYé T’áá Éí T’éiyá Bá Yizhchinígíí niheediní’ą́ anoonééłdéé’ náánihiisnii’ dóó yisdá’iildééh yee nihik’ijidlí dóó hool’áágóó hiiniináa doo t’áá éí binahjį’.

Christ bikéé’ nisidzį́įgo, t’áá íiyisíí jiniiba’ doo dóó diné t’áá ałtsogóó nihił nilį́į doo. Niha áłchíní ałdó’ diné t’áá ałtso yaa jooba’ doo dóó bił nílį́į doogo bee ndadíníit’įįł. Nihe’oodlą’ dóó hodíníilzin yidínóołtł’ahígíí nahjį’ kwiil’į́į doo, doo yá’áshóonii yaa naakai’ígíí dóó baa nda’aldeehígíí. Ákondi łahgo át’áo dahinánígíí hazhó’ó ahił kéédahwiit’į́ dooleeł—da’oodlą́nígíí dóó doo da’oodlą́nígíí.

Ałk’idą́ą́’, President Monson díí saad yee haadzíí’:

“Ałk’idą́ą́’ nda’niłkaadii díí Jesus awéé’ hádeidééz’į́į́’. Ndi éí Jesus Christ hadaniitá, nihíNaaí, Azhé’é nihá náyookąąh, niháNiná’ídlá, yisdá’iiníiłii Haidiilai; hodeeyáadéé’ Azhé’é yił hólónii; nahasdzáán bikáá’ bąąhági’ át’eii yik’ehdeesdlį́į́’ dóó hool’áágóó hinii’náa doogo bits’íís ninéidiní’ą́. Díí Jesus éí biká’ádeit’į́.”¹²

Dííjį́įdi sodizin atah danilínígíí Jesus Christ yisdá’iinííłgo baa hane’ t’áá deidíníílzingo nináháhááh. Diyin Ii’sizíinii nihaadahaasyá, éí Azhé’é dóó aYe’ yaa halne’.¹³ Yá’ąąshdéé’ Nihizhé’é ba’áłchíní niidlį́įgo kónihidííniid, “Díí shinaanish dóó shi’ayóó át’éii—anoonééł bii’déé’ ha’iildééhgo ííshłaa ní dóó hool’áágóó diné hináa dooleeł.”¹⁴ Dóó nihi Yisdá’íinííłii Jesus Christ bá dahalne’ii, éí Israel bi Bóhólníihii Diyin God, Bi na’nitin yaa hadazdzį́’:

“Nahasdzáán yikáá’jį’ níyá, éí Jesus, nahasdzáán yá tsin ałnáosdzoh yikáajį’ yá niná’nídlá, dóó nahasdzáán bibąąhági’ át’éii yá tihooznii’, bąąhági’ átéii nahjį’ kóyiilaa, dóó nahasdzáán yidíísįįd;

“Azhé’é ábiilaa dóó adziil bee nílá éí binahjį’ t’áá ałtso yisdádookah;

“Éí biZhé’é ayóó át’éego yá’át’į́, dóó t’áá ałtso bíla’ yee ayiilaa’ígíí yaasizid.”¹⁵

Ákot’éego, Bisodizin ninéínídlahígíí biyi’déé’ ádadii’ní “Christ Bąąhági Át’eii yik’é Niná’ílyáhígíí binahjį’, diné t’áá ałtso Diyin Bina’nitin bibee haz’áanii dóó ó’ool’įįł bik’eh hół’į́įgo yisdádookah.”¹⁶ Shí Jesus Christ bízhi’ baa hasti’íi binahjį’ adishní, amen.