Uringnga, Uringnga

Ana Botaki n Taromauri ni Kakiritimati te Moan Beretitentii 2023

Tracy Y. Browning

Kauoman ni Kauntira n te Beretitentii ni Kabuta n te Moanrinan

Tabati, Ritembwa 3, 2023

Te tabo are I maeka iai, ni moan Nobembwa, a taraa n aki maiureirei aroka ma bwaai ni katobibiai. Tangin baan aroka aika a kiirin, ake a ukukaki ngkoa n te ang ae bebete ao man tangiraoi nakoiu n te tiburing ao n tain te tiamwa, a riki bwa nnen aroka aika a aki karikiuaa ao tangin mwautakatakan baan aroka i aan waeu. Ai akea tangiia ni kukurei mannikiba, ao man bua boiararan aroka ake a bwebwerake ao n raure ueeia. Bwaai ake I taneiai iai i nanon maiu a toki moa ngkai, ao n te mabu ni kabanea ao tabo ae akea te maiureirei iai—e nang toki te ririki ao n te tai are I a moanna n aki kukurei—e a roko te Kiritimati.

Ao n au tabo ni maeka mairoun te Atua, I uringnga. I uringnga n tarai mawaawan aroka, ake a kakiaa boin kaai, rengarenga, ao boin te tano. I uringnga n ukorii uee ao beeri ake a turu urauraia ao mainainaia ao n ongora n anene ake a riing naano ao mweenga ao auti n nebo, ni katanoataa “te kimwareirei nakon te aonaaba,” ngke I ukorii kanikinaean te Kiritimati are I anene iai ma “karawa ao karikibwai” ao ni kaoai bwa N na uringnga.

Teuana kamiimin te tai aei bwa taraan te aonaaba ae bwanin ibukiia Kiritian, ao aika a mwaiti i tinanikura , a kabanea te tai aei n ukoukora kaonan maiuia ma kanikinaean kauringaan te Kiritimati.

Te Kiritimati bon te buriiti are ti mwananga i aona nakon te ririki ae boou. Ao ngke ti a toua te buriiti, ti kaoaki bwa ti na iangoi ana kakai “te Atua ae akea tokina, te Uea, te tia Karika tokin te aonaaba”¹ are e bungiaki n te aro ni mangori n ana kaawa Tawita ao “n niraki n te kunnikai ae te ninira, ae wene ni nen te man n amwarake.”² Ngkai ti karaoa katein te Kakiritimati, tao ti kona ni bon nooriira bwa kaanga mwaane ao aine aika a wanawana n boong aikai, n tarai itoi i etan aroka aika a mangurooro ao te oota ae takiakia ni katobibira, “a bati ni kimwareirei”³ ni kanikinaa ake a kateaki i matara ni kairiira ao ni bweena mwanangara ni kaineta Iesu Kristo, n Nakoina ngkai “otan te aba.”⁴ Ngkana ti aroka boin renganan te kuuka ae kianako n te eea n te tai aei, tao e kauringiira n uoti bwaintangira n angan “Natin te Atua ae Maiu”⁵—tiaki “te kora, ao te ribano, ao te mura”⁶ ma te anga karea n nebo ibukin “te nano ae uruaki ao te tamnei ae raraoma.”⁷ Ao nakoia ake ibuakora ake a tangiriia ao n tararuaia ataei, tao ti te arona ngaira ma aika taan kawakin tiibu ni boong aikai “ kawakiniia [ara] tiibu,”⁸ kakauongo nakoia anera i aon te aba ake a kamwanangaaki mairoun te Uea ma te kakao “n aki maku,” ibukina bwa a roko n anga kaetieti ni kaota te tabo are e kona ni kuneaki iai ara Tia Kamaiu.⁹ Ti aki uringnga bwa ti na wirikirikini taeka aikai “te rongorongo ae raoiroi ae kakimwareirei” i nanon taningaia ara ataei bwa te kakoaua? Ngaia are ngaiia, n aron mimin te ataei, karan te Kiritimati ae uraura ao kiriin, koora ao ae mainaina, a uringa ana anga karea ni kamaiu ae kororaoi ma ni itiaki aia Tia Kamaiu, are e anganiia te bwaintangira ni kamaiu ao te maiu ae boou ao ae akea tokina.

E karekea nakoira te Kiritimati bwa karaoan mwanangara n tamnei nako Betereem ni karekei ara kakoaua ibukin ara Tia Kamaiu, ao i mwiina ni waaki nako ni uota te kakoaua anne ma newera aika a kabwaraaki ao waera ma baira aika a tauraoi ni kaotia “bwa e na ataaki”¹⁰ ao ni kakoauaa rongorongon bwaai ake ti bane n atai ni kaineti ma Ngaia. Ti kona ni karaoa te mwananga anne nakon te Tia Kamaiu man ururingnga.

E anganiira te bwaintangira n ururing te Atua bwa ti aonga n aki mwaninga taekan te Tia Angaanga, bwa ti aonga n roko ao n namakina ana tangira ae akea tiana ibukira ao n reiakinna n tangiria bwa boon mwiina. E reireiniira te burabeti are ngkoa ae Moronaai bwa ti na uringnga bwa “bwai n tituaraoi ni kabane aika a raraoi a bane n roko mai iroun Kristo.”¹¹ E anganiira bwaintituaraoi ara tia Kamaiu tiaki n aron are e anga te aonaaba—ae aki teimaan, aki bwanin, ao ae kai rai ao ni mka n tokin te tai. E anga bwaintituaraoi Iesu Kristo aika akea tokiia, aika a kakawaki, n ikota ma:

Bwaintituaraoi n Tamnei, n aron te ataibwai, wanawana, kakoaua ao te onimaki.¹²
Te bwaintituaraoi ae te Tamnei ae Raoiroi.
Te bwaintituaraoi are te maiu ae akea tokina.

Ao ngkai ti iangoa abwakin te maiu ni buburan ke uarereken “bwaintangira aika a raraoi” ake a roko i nanon maiura, ti kona n noora bain te Uea ni kamaiuiira, ni kamatoaira, ao ni katauraoi kainnanora ma te rauaki raoi?

N taai tabetai a kona ni biriaitua ara iango ao nanora ao ni makeenako Mairouna, Teimatoana e kamatoaa nakoira bwa e aki mwanuokiniira te Uea—n tain te Kiritimati ke n taai riki tabeua. E a tia ni katanoata te Uea bwa a tia ni koreaki arara i nanon baina.¹³ E kawakin Ana berita n taainako. E uringi berita aika tabu ake E karaoi ma ngaira ao ma ara bakatibu. E ongo ao n uring ara tataro nakon Tamara are i Karawa, ngke ti katorobubua ke ni bubuti man ara ruu ni bwai ke ni kawakini ara bubuti i nanora. E uringnga, n aron are e taku Beretitenti Russell M. Nelson, ni “buokia aomata ake a kakoaua.”¹⁴ E uringnga ni kabwarai ara bure ni mwaitin ara tai n rairinanora. E uringnga n taetae nakoira rinanon booki aika tabu ao a buokiira n taainako burabeti ni kunea kawaira n okiri mwengara—e ngae ngke ti raroa man mwaninganako ao maanra. Ao E uringnga ni kanakoa Tamneina bwa e memena irarikira ngkana ti kekeiaki ni kawakin ara berita aika tabu “n aki toki n ururingnga.”¹⁵

E reirei Beretitenti Spencer W. Kimball: “Ngkana iai te taeka ae rangi ni kakawaki ae ko kakaea nanona i nanon te rikitionari, … te [taeka] ae uringaki. Ibukina bwa kam a bane n tia ni karaoi berita aika tabu[,] … kainnanora ae moan te korakora bwa ti na ururingnga.” E reitia, “Anne bukina ngkai aomata ni kabane a kaea bootakin te toa ni katoa Tabati—ni butimwaea te toa ao [n] ongora n aia tataro ibonga bwa a ‘na ururingnga n taainako ao ni kawakin ana tua are e a tia n angania.’ … Uringnga bon te taeka. Uringnga bon te burokuraem.”¹⁶

Uringngan te Atua e kaungai nanora bwa ti na kammwakura mwaakan ara mwakuri aika a raraoi ao ni kaoira bwa ti na karaoia n ana kawai te Atua. Iangoi angareirei aikai are e kaoira Beretitenti Nelson bwa ti na uringnga:

“Kariaia te Atua bwa e na tautaekana maium” ao “anganna am tai ae tau.”
“Ukori ao kantaningai kakai.”
“Katoka te itaberaraa i nanon … maium”¹⁷ ao n riki bwa te tia raoi.¹⁸

Te Kiritimati bon te tai ni mwakuri i aon kakao aikai ao ni kainetii nanora ma ara kantaninga n ururinga riki Iesu Kristo, n tatauraoi n iangoii kakai ibukin bungiakina, ao namakinan ao mwakurian ao karaoan te aro n iraorao ae moan te korakora ibukiia natin te Atua. Taian kanikinaa n kauring ake katei ibukin tain te Kiritimati a kinaaki n taainako ngkai ti:

Uringnga n anga ara kamauri n te Kiritimati nakoia raoraora, utu, ao ianena.
Uringnga n anga bwaintangira bwa kaotan te tangira.
Uringnga ni bwaina te tituaraoi nakoia naake a rootaki n te kainnano ao ni kakairuwa nakoia ake a roko ni mweengara.
Uringnga ni katuruturua kakawakin te ikoikotaki n te utu ao katei ake a karika kaokoron ma rianakon tamaroan te Kiritimati.

Irouia aika a mwaiti n te tai aei n te ririki, ara tangira ae korakora ni katauraoan amwarake aika ti te arona, manga karakinan karaki ni utu aika a teimatoa, ao katamaroaan kai ni ka Kiritimati ni bwaai ni katamaroa ake ti katokai ni katoa ririki bon waaki are a kamanoi baike e tangiria nanora n uringi taneiai ake a kakawaki riki nakoira. Amwarake aika a onoti, karaki aika a koaua, ao n tain te motirawa are a riki bwa kauringaakin taai aika a kakawaki i nanon maiura. Ao nanora ae moan te korakora bwa ti na bwaina te nano n tituaraoi n te tai aei n te ririki e kona ni kaungai nanora bwa ti na uringnga ni bwabwaina riki te kakaitau. Te tangira ae onoti anne are e aairi ma kaotin te Kiritimati bon te tai are ti anganaki bwa ti na kaineta ara kantaninga ao ara mwakuri i aon Iesu Kristo: “Uringnga, uringnga bwa bon i aon te bwaa are ara Tia Kabomwi, are Kristo, natin te Atua, are kam na riai ni katea iai ami.”¹⁹ Uringnga bwa ngkai ti a roko ni kainan te ririki ao ti karaoa mwanangara i aon te buriiti nakon te maiu ae boou—n aroia taan rabakau aika mwaane ao aine, taan kawakin tiibu n tantanii—bwa man korakoran bain te Uea²⁰ are ti karaoia iai.

Ma, ngaia are n te tabo are ko maeka iai n te aonaaba, uringnga kaineta nanom nakon aekan kanikinaa are a kaoko bwa ko na taraa Kristo. I nanon are ti anga te kamataata iai n te tai aei i nanon te ririki, ma ara kamauri are ti anga, ibukiia aomata nako ake ti riai n uringiia, ti na tai mwaninga n uringnga te tia Angaanga ni koaua—Ngaia are e aki kona ni mwanuokiniira ao n anganiira te korakora n Uringnga rinanon Tamneina, n tain te Kiritimati ao n taainako. E uota “te kimwareirei nakon te aonaaba” ao ni kaoi nanora “ni katauraoa nnena”²¹ ni butimwaea ara Uea. Boni Ngaia aan ara kateitei ni koaua are ti mwananga mai iai. Boni Ngaia Ootan te Aonaaba ao Natin te Atua ae maiu. I kakoaua n Arana ae tabu, ae Iesu Kristo, amen.