E bungiaki Kristo bwa e na Kamaiuira
Ana Botaki n Taromauri ni Kakiritimati te Moan Beretitentii 2023
Tabati, Ritembwa 3, 2023
I tatangira te Kiritimati! Rongorongo man booki aika tabu, anene, ao namakinan te raoiroi ao te tituaraoi n angaanga e bon rabuna nako te aonaaba inanon te tai ae tabu aei.
Inanon ririki aika a bati, ngai ma kainabau ti a tia ni mena n aba aika a mwaiti inanon tain te Kiritimati. Ti rangi ni kukurei n noori katei aika a kakaokoro ni bukamaruan te Kiritimati. Ururingan taneiai aikai e bon buokai n ataia raoi bwa ngaia te Kiritimati bon ibukiia aomata ni kabane. Bon ibukiia ataei, kaaro, tiibu, ai tinara, ai tamara, ao ai bon naan nako tarira ma mwanera. Bon ibukiia aomata ake a maiu inanon te nakoraoi ao naake a maiu inanon te aoraki, te kainano, ao te kataaki. Bon ibukiia naake a taonaki ni kakamakun te buaka ao naake a maeka inanon te rau, ao naake a maiuraoi. Bon ibukiia naake a kekeiaki n iriira te Tia Kamaiu, ibukiia ake a tuai man ongoongo arana, ao bon naake taan rawa n ongo Irouna. Bon ibukiia naba naake a maeka imwain ae E bungiaki. Te Kiritimati bon ibukira ni kabane!
Te Kiritimati bon ibukira ni kabane ibukina bwa te Atua e kanakoa Natina te Mwaane ibukira n tatabemaniira.1 “Bwa e bungiaki te tei i bukira.”2
Ibukina bwa e a tia ni bungiaki te Tia Kamaiu, ni maiuna te itiaki, ni mate ibukira, ao ni manga uti, ngaira n tatabemaniira nako ti bane n kona ni karekea ana bwaintangira ae te mangauti man te mate. Tiaki tii temanna ae maeka i aon te aba ae e na reke irouna te bwaintangira ae onoti aei. Raon te bwaintangira aei, “Baike e tuai n nori te mata, ao e tuai n ongo te taninga, … boni baika E katauraoi te Atua i bukia ake a tangiria.”3
E ngae ngkana ti rinanon te kangaanga, bukin raoi reken te kimwareirei bon man bungiakin te Tia Kamaiu. E roko bwa e anganiia natin Tamara are i karawa “te rau n te aonaaba aei, ao te maiu akea tokina n te aonaaba are e na roko.”4
N aia tai Atam ao Ewa, a ingainga aomata aika a raoiroi ni bungiakin te Tia Kamaiu, are e na kakoroa nanon ana babaire te Tama ibukiia natina.5 A taetae ni burabeti Itaia ao Nibwaai i aon taekan bungiakina ma ana Mition.6 E bon aki kaokoro bukin Bungiakina ma bukin rokona n te aonaaba.
Iangoa Ana ao Timeon, ngke a noora Iesu te teei ao n ataia raoi bwa te teei aei bon “te ota ae e kaota”7 te aonaaba ao te kaantaninga ibukin te kamaiuaki.8 Tao anne bukina ae te anera e kabotoa te rongorongo “ae raoiroi ae kakimwareirei, ae aia bwai aomata ni kabaneia.”9 Ti kimwareirei ngkana iai te teei ae bungiaki, ma te bungiaki aei ao te teei aei e kaokoro.
Iesu Kristo, te ota ao kamaiuan te aonaaba, e bungiaki ngke te teei ngaia n aia tabo man, ao e kaoti te itoi ae boou bwa kanikinaean bungiakina. E taekinaki n Ana Boki Moomon rongorongon te bwai ae e riki—te ngaina, te bong, ao te bong n akea te rootongitong—are bon kanikinaea Rokona. Taian kanikina aikai a bon anganaki taan uarongorongo n Ootan te Aonaaba,10 bon ngaia are na kainaomataira man te bure ao te mate. Ti na kangaa n ibuobuoki n tibwaa Ootana ma te aonaaba.
N tain te Kiritimati, ataei aika a uarereke a kona naba n namakina korakoran ana tangira ara Tia Kamaiu. Ririki aika nako, temanna mai ibuakoia natira aine ae, Sonja, e korea mwiin ana marooro ma natina-te mwaane-ae nimaua ana ririki.
E koreia, “E taekina aio nakoiu Andrew ngke I a kawenea i aon ana kainiwene, ‘N te ririki ae na roko, N nang aki kabanea au iango i aon bwaintangira, ma N nang kaineta au iango i aon te bwai ae N na anga nakon Iesu.’ I tuangnga bwa e reke iaa ana iango aei, ao e tuangai bwa mai irouia ana taan reirei n te Moanrinan. Hooray ibukin te Moanrinan!”11
Eng. Hooray ibukin te Moanrinan. Ao ngkai, 14 te ririki i mwiina, e a karaoa ana mwakuri ni mitinare Andrew ao ni kabanea ana tai n te Kiritimati n tibwaua ana rongorongo Iesu Kristo nakoia temwaangina. E aki maan n nako e korea, “E anganiira bwaai ni kabane Iesu … [ao] e na anai ara bure ni kabane. Anne bukina ae I mena ikai n te mition.“12
Te Kiritimati bon te tai ae onoti ni iangoi bwaai aika a kakawaki bwa ko na tibwaia. Ti kona ni buokiia aomata n namakina “te kamaiuaki man ana tangira”13 are e na reke man ataakin te Tia Kamaiu ao n anga ngaira Nakoina.
E motirawa natira te aine ae Alisa tabeua te ririki n nako man aorakina ae te kaentia, ao i rangi ni kukurei n ana iango ibukin te Kiritimati, e ngae ngke e kaaitara ma te aoraki ae kakamaaku. N te ririki teuana ao e koreia:
“E reke au bwaintangira ae kakukurei n te Kiritimati aei. E bon rangi ni bubura irou. … I karekea au meeri i mwain te Kiritimati mai iroun au neeti ngke i mena n ana aobiti te taokita ibukin te kaentia. E taku, “ Tekeraoi n te Kiritimati—i mwiin te kamatebwai ao e nooraki bwa [e a konaa n reke] buokam.’ … Tera nanon anne? A kariaia … te bwainaoraki … are e na kona n buoka te kaentia [ibukia naake a reke irouia]. Bon tiaki bwain katokana, ma bon te bwatin ibukin kauarerekean … te tibu n te tai ae tawe. … E ngae n anne, ao e bon karaoa ana mwakuri inanon te rabwata, ao n kona n manga oki kaua te kaentia. … Ma I namakinna bwa iai temanna ae anganai riki namwakaina n raka inanon maiu. Ao tera nanon anne? … Rakan riki au bong ni maiu? Reken riki au tai ni motirawa ma natiu? I bon tang ngke I kauka au meeri ao ni karabwa te Atua ibukin ana bwaintangira ae akea n ai arona are e anganai.”14
E karekea riki Alisa ana tai ma ana utu. E tibwaua te namakin are e karekea ma ana utu n aia tai ngke a nikiri aia bwaintangira ni ka Kiritimati nakoia kaain rarikiia. E kabwarabwaraa bwa ara bwaintangira ake ti anganako tao a na bon aki rangi n nakoraoi. E koreia:
“Ti karabaira n nikiri ara … bwaintangira n te tairiki are mai i mwaina. Natiu mwaane a bairea arora ao ara tabo ni karabai.
“‘Ma ngkana tao a kuba naba n noorira …’ e taetae ma nanona raoi Sam, ao naake uoman a manga nakonnano. ‘E raoiroi ae ti kamenai taian tinoo booro inanon baira.’
“E reke iroun James. ‘Eng, e reke. N na orea te mataroa bwa e aonga n roka?’
“‘Tiaki ngaia anne,’ [e kaeka Sam], ‘ti na karea ubuia.’”15
E marooro Alisa ma natina te mwaane ae uarereke, Luke, are ai bon tibwa onoua ana ririki ni maiu n te tai anne. E koreia:
“N te tairiki teuana ngke ti wenewene n ana kainiwene n otabwaniniaki n te oota ma ietan ana winto, I titirakinna… , ‘Ngaia, tera ae ko kan titiraki … ibukina?’”
“‘Eng, I kona n iangoa te bwai teuana.’
“‘O?’
“‘Ti kona n kakaraoia n taainako.’
“‘O?’
“A aki kakarongoa. ‘Te inga ao te mbwa mai iroun tinau.’
“I kona naba ngkai n mbwa ma ngkoe 100 te tai ao n inga ma ngkoe. ‘Luke, e a tia ni karaoaki anne nakoim ngkekei!’
“E taonaki n te rawawata nanou ngke I a taonnako man te mataroa. I kataia n aki kan kakoaua te bwai ae riki. I namakina te kakaitau bwa n te ririki aei e kona n reke irouna ma raon ana bwaintangira.”16
I bon rangi n rootaki n ana namakin Alisa ma te kaantaninga ae karekea n tain te Kiritimati. E koreia:
“I a tia n rangi ni kukurei ma te kaantaninga n te tai aio. Ngkana I iangoi ana kakai Kristo ao ana bwaintangira te Atua aika a mwaiti, I namakina te kaantaninga ibukin bwaai ni kabane ao aomata ni kabane. Bon tiaki reken te kaantaninga bwa a nang bane n nakoraoi bwaai ni kabane, ma bon karekean te nakoraoi ni bwaai ni kabane, ao ni karimoa karaon ae raoiroi. Ni kabane bongin maiura. E aki oimwi karekean taian kakai, te bitaki, ke te rau. I rangi n kakoaua raoi anne mai inanou ni kabane. I kakoaua bwa e bon taraa n bebete aron namakinan te kaantaninga aei ibukiia aomata, ma e rangi ni kangaanga maiuakinana irou. Ma I reiakinaki. ‘Teimatoa n onimaki, ni kaantaninga, ao n teimatoa nakon bwaai ni kabane.’ E bebete. Babanto.”
E reitinako, n taetae i aon natina te mwaane, “N tain te bootaki ni Kakiritimati ao e anenea nakoiu James [kunan te Kiritimati ao I] rangi n bwakananoi mwanewen te kuna te aio:
A kimwareirei, Kiritian aika a raoiroi
Ma n te nano, te tamnei, ao te bwanaa;
Kam riai n aki maaka te ruanimate:
Raoi! Raoi!
E bungiaki Iesu Kristo bwa e na kamaiuira!
E weteiko, ao ni wetei ngkami ni bane,
Ni karekea te maiu are akea tokina:
E bungiaki Kristo bwa e na kamaiuira!
E bungiaki Kristo bwa e na kamaiuira!”17
E bungiaki bwa e kamaiuira. Bwa e na kamaiuko ao ni kamaiuai. Bon te bwaintangira ae akea kabotauana are bon ti ngaia ae kona n anganiira. E ngae ngkana ti teimatoa inanon te rawawata, tera ngke arona bwa ti a karekea namakinan Ana bwaintangira inanon maiura n te Kiritimati aei.
N aran Iesu Kristo, amen.