“Mai, Ti a Tangiria man Karinea”
Ana Bootaki n Taromauri ni Kakiritimati te Moan Beretitentii 2023
Tabati, Ritembwa 3, 2023
Tariu ao mwaneu aika tangiraki irou, ai kakukureira rokora inanon te Kiritimati aei ike ti a kona iai ni bukamarua bungiakin te Tia Kamaiu ao te Tia Kabooira, te Uea Iesu Kristo.
Te bwai ae tabu are ni katoaa bungiakin te ataei. Noora te bwai ae riki nakon tibutorura te mwaane temanna ngke e mwanea karimwina te moan tai.
[witeo]
Ao anne bukina ngke 2,000 te ririki n nako n te tairiki ae moan te tabu anne n te kaawa ae uarereke are Betereem, a anene ma te kimwareirei kaaini karawa! E katerea te koaua ae kakannato te anera:
“Bwa noria, I tuangngkami te rongorongo ae raoiroi ae kakimwareirei, ae aia bwai aomata ni kabaneia.
“Ba e bungiaki n ana kaawa Tawita n te bong aei te Tia Kamaiu, are bon Kristo te Uea.”1
Ao ngkai, tariu ao mwaneu, Mai Ti na tangiria man karinea, “Mai, Ti a tangiria man Karinea.”2
N aiaromi, e bitaki au Kiritimati inanon te ririki teuana ma teuana. Uringan arou ngke te ataei ngai aiaron ae I tei i nukan Bwakan Kaubwain te Aonaaba n 1930 tabun. E karako te tianti. A taraaki bwaintangira bwa moan te kakannato.
Ara karo a kakukureia kanoan ara kakiritimati ngai ma tariu ao mwaneu. Ni katoa ririki ti riki bwa “onean mwin Santa” ibukiia tabeua utu. Ti karekei ara bwaintangira ao ti nako n nikiri irouia n te tairiki are imwain Bongin te Kiritimati. Ngke ti butinako man aia auti, a kaboo nakoira man ranran mataia ike e a uota nakoira te kimwareirei ni koaua are reke man te angabwai.
I tatangira kunan te Kiritimati—ao e teimatoa arou anne. Ni katoa ririki, Ngai ma Titita Nelson ti kakatanga man anene n irira te kuna are Handel Messiah. E teke nanou n nanon te taeka n Ebera ae hallelujah. Nanona bon “neboa te Uea te Atua are Iehova.”3 Taeka ake a mwaneweaki n te kuna aio, e aki tii taekina bungiakin te Uea ma e taekina naba ana tautaeka n te Merenium:
Bwa e bungiaki te tei i bukira,
Ti anganaki te nati te mwane:
Ao e na mwiokoaki bwa e na tautaeka:
Ao e na aranaki bwa te Tia Reirei, ae Kamimi,
Te Atua ae mwaaka,
Te Tama ae akea tokina,
Te Uea n Raoi.4
Ngke te ataeinimwaane ngai ao I moana karekean au koaua ae nene iroun te Atua te Tama ao Natina ae Bati n Tangiraki, Iesu Kristo. I ataia i bon irou bwa e bungiaki Iesu Kristo iroun Maria te kibono, are bon te bwai ni mwakuri ae kakawaki man rineaki”5 I ataia bwa Ngaia bon Natin te Atua6 ao boton bwaai ni kabane n rongorongon te aomata.
Bon iangoa buburakaein te mwakuri ae akea kabotauana are e a tia ni karaoia Iesu Kristo—ni kaineti ma nanon Tamana! Iesu bon te Atua ngke E ruo nakon te aonaaba ni kakoroa nanon te mwakuri are e na kamaiura ni kabane. Te mwakuri ae anga te maiu man bita aron te maiu. Te mwakuri ae akea mairoura ae kona ni karaoia bon ibukira.
Te Tia Kamaiu “e rinanon te kainnano ni [maraki] ma te karawawataaki ao te kaririaki n aekaia nako”7 bwa e aonga n ataia “ni kaineti ma te maiu n rabwata bwa e na kanga ni [buokiira] ni kaineti ma [mamaarara].”8
Inanon namwakaina aika nako, I a tia ni karekea te reirei ae bati iaon te maraki ao korakorana ni kaitiaki. E reitaki nanou ma te Tia Kamaiu ngke I kataia n iangoa aron Marakina. E aki kona au iango n rabwata ni iangoa arona ngke E uota Iaona ni kabane marakiia, ni kabane bureia, ni kabane korakaia, ao ni kabane karawawataia aomata nako ake a tia ni maiu n te aonaaba!
Man Ana mwakuri n tangira ae moan te rietaata are riaon ana kona n iango te aomata ke te kabwarabwara, te Tia Kamaiu, E anga Ngaia nakon te maraki n tamnei ao n rabwata ae akea kabotauana.
Ti karinea Iesu Kristo ibukina bwa E anga te karea ae akea tiana ae akea kabotauana n te Ne n Aroka are Ketetemane ao iaon te kaibangaki n te Tabwanou. E kabooi ara bure te angakarea aei ngkana ti rairananora man Iriiria. Eang, ao ana mwakuri ae moan te kakannato iaon te aonaaba, E waerake man te ruanimate n te katenibong man anganira te kakabwaia ae akea kabotauana are bon te mangauti ao te maiu imwin te mate.
N tain te Kiritimati aei, ti tabeka te kuna ke n tataekina, “Ko na tekeraoi n te Kiritimati.” Tariu ao mwaneu aika tangiraki irou, nanou ibukimi n te tairiki aei iai tabeua kanoana. Ma n etina raoi, bon tiaki tii nanou ibukimii; ma bon au tataro ibukimii ni bongin te Kiritimati ae tabu aei.
Te moan, I tataro bwa kam na namakina Ana tangira te Tia Kamaiu ae nene ae akea tokina ibukimi. E kinaingkami Iesu Kristo imwain te maiu aei. E kinai ma n noori ngkami ngkai. E noori kukureimi ao rawawatami. E a tia n rinanon waaki akanne ni kabane.
E korakora ana nanoanga ibukin karawawatakimi ao E kukurei ni katoa te tai are kam waaki rake inanon te raoiroi, n taai aika raoiroi ao taai ni kangaanga.
Au tataro bwa kam na karekea oin ami koaua bwa Iesu Kristo bon Natin te Atua, bwa e onrake ni mwaakan te Atua, ao man Ana mwakuri ni kamaiu ae moan te rietaata, kam na bon aki maroa ni kaitarai kangaangan te maiu. Ngkana kam bubuti, ukeuke, man karebwerebwe,9 ma te nano ae koaua, kam na karekea mwaakana are e na buoki ngkami, e na kakorakorai ngkami, man kamarurungngkami.10
Au tataro bwa kam na kabongana raoi Ana Mwakuri ni Kamaiu te Tia Kamaiu rinanon te rairannano ni katoa bong, kaitiakan maiumi teutana imwin teutana, ao ukoukoran te kaetieti mai karawa n ami waaki nako. Nanona teuana, Au tataro bwa kam na karekea te kimwareirei man te maiu ae aanaki n te iango n tiretio.
Au tataro naba bwa kam na kabongana te bong ni motirawa aei ni moana ami nebonobeo ae onoti ae korakora riki. Kaboua nanom ni kamatebwaia Ana reirei ao Ana Mwakuri ni Kamaiu Iesu Kristo. Akea n te aonaaba aei ae tangiriko n aiaron are E tangiriko iai. Akea n te aonaaba aei ae kinako ke e ataa rawawatam ke mamaram n ai arona. Akea n te aonaaba aei ae botau mwaakana ma Iesu Kristo. Akea n te aonaaba aei ae ingainga n aiarona ngkana ko karekea te tamaroa. Akea ae butiia te Tama ibukim n ai Arona.
Te Uea ae Iesu Kristo bon ara Tia Kamaiu ao te Tia Kabooira. Boni Ngaia Natin te Atua, Atuan Iteraera ae Tabu. Boni ngaia are Kabiraki.11 Iaan ana babaire te Tama, Bon ngaia are kariki bwaai ni kabaneia.12 Iesu Kristo bon Iehova are e Kakanato, Atuan te O Tetemanti.13 Boni ngaia Emanuera are e na roko.14 Boni ngaia Bannan te tamaroa15 ao te tia tei ibukira nakon te Tama.16 Man ana euangkerio are kaokaki, a tauraoi kakabwaia man Ana nakoanibonga nakoia aomata nako ngkana a nakoina man kakororaoaki Irouna.
Tariu ao mwaaneu, ti a maeka inanon tamnein te “areruia,” n neboneboa te Atua are Iehova. N te Kiritimati ae kakannato aei, mai, ti a Tangiria man Karinea, Kristo te Uea!
I ataia bwa E maiu te Atua! Iesu bon te Kristo! Aio Ana Ekaretia. E kaira Kaokakin Ana Euangkerio ae reitinako. Aikai au koaua n aran Iesu Kristo ae tabu, amen.