Kraes I Bin Bon I Kam long Wol blong Sevem Yumi
2023 Fas Presidensi Krismes Divosen
Sandei 3 Disemba 2023
!Mi lavem Krismes! Skripja stori ia, miusik ia, mo ol filing blong mekem gud samting mo fasin blong givim plante samting i stap fulumap ful wol long tabu taem ia.
Long ol yia we i pas, mi mo waef blong mi i bin go long sam kantri long Krismes sisen. Mitufala i laekem blong luk ol defren kastom mo ol defren wei we oli selebretem Krismes. Blong stap tingting long olgeta eksperiens ia, i bin helpem mi blong luksave se Krismes i blong evriwan. Hem i blong ol pikinini, ol papa mo mama, ol apu man mo woman, ol anti, ol anggel mo ol kasen. Hem i blong ol pipol we laef blong olgeta i stap gohed gud mo blong olgeta we oli gat sik, oli pua, mo oli stap fesem ol hadtaem. Hem i blong olgeta we oli stap fesem rabis taem blong wo mo olgeta we oli stap laef long pis mo gudtaem. Hem i blong olgeta we oli traem blong folem Sevya, hem i blong olgeta we oli neva harem nem blong Hem, mo iven blong olgeta we oli sakemaot Hem. Mo tu, hem i blong olgeta we oli bin stap laef bifo Hem i bon i kam long wol. !Krismes i blong evriwan!
Krismes hem i blong evriwan from se God i sendem Pikinini blong Hem blong yumi evriwan mo blong wanwan long yumi.1 “Long yumi, wan pikinini i bon i kam long wol ia.”2
From se Sevya i bon i kam long wol, i stap laef long wan laef we i nogat sin, i pem praes blong sin blong yumi, mo i laef bakegen long ded, blong wanwan long yumi i kasem bigfala presen ia blong laef bakegen long ded. I nogat wan we i laef long wol ia we bae oli no pat long naesfala presen ia. Antap long presen ia, “Ol man oli no luk ol samting ya long ae blong olgeta, oli no harem tok blong olgeta long sora blong olgeta, mo oli no tingbaot olgeta long tingting blong olgeta, be olgeta oli rere i stap.”2
I nomata wanem taem o wanem situesen, taem Sevya i bon i kam long wol, oltaem hem i wan risen blong yumi stap glad. Hem i kam blong givim long wanwan pikinini blong Papa long Heven “pis long wol ia, mo laef we i no save finis long wol we bae i kam.”4
Long taem blong Adam mo Iv, ol man we oli stret moa gud oli stap lukluk i go fored blong Sevya i bon i kam long wol, we bae Hem i kam blong mekem i posibol plan ia blong Papa blong ol pikinini blong Hem i hapen.4 Aesea mo Nifae tufala i profesae long taem we bae Hem i bon i kam long wol mo long misin blong Hem.5 Risen blong Hem i kam long wol bae oli no save seraotem long from wanem Hem i bon i kam long wol.
Tingbaot Ana mo Saemon, we tufala i luk bebi Jisas mo luksave se bebi ia i “wan laet blong givim laet”7 long ful wol mo hop from fasin blong pemaot man.8 Tru nomo se enjel nao oli jusum hem blong karem mesej blong “gud nius blong talem long yufala, we i save mekem olgeta man i harem gud tumas.”9 Yumi glad taem we wan bebi i bon i kam long wol, be taem bebi ia i bon o kam long wol hemia i defren.
Jisas Kraes, i laet mo laef blong wol ia, Hem i wan smol bebi we i bon long ples blong animol, be yet wan niu sta i stap olsem wan saen blong taem we Hem i bon i kam long wol. Buk blong Momon i stap talem wan stori we i hapen—wan dei, wan naet, mo wan dei we i nogat tudak—i wan saen se Hem i stap kam. Ol naesfala merikel saen ia oli givim wan saen se Laet blong Wol i stap kam,10 bae Hem i sevem yumi long tudak blong sin mo ded. Yumi save help blong serem Laet blong Hem wetem wol.
Long taem blong Krismes, iven ol smol pikinini oli save filim paoa blong lav blong Sevya blong yumi. Plante yia i pas, wan long ol gel blong mitufala, Sonja, i raet abaot wan storian blong hem wetem smol boe blong hem we i gat faef yia.
Hem i raetem, “Andrew i talem long mi wan naet taem mi stap mekem hem i silip, ‘Nekis yia, bae mi no lukluk nomo long ol presen, be bae mi lukluk nomo long wanem bae mi givim long Jisas.’ Mi askem hem se i karem naesfala tingting ia wea, mo hem i talem long mi long Praemeri tija blong hem. !Hurei long Praemeri!”11
Yes. Hurei long Praemeri. Naoia, 14 yia i pas, Andrew i stap givim seves long wan misin mo i spendem Krismes sisen ia blong stap serem mesej blong Jisas Kraes long ol narawan. Hem i bin raetem, i no longtaem i pas, “Jisas i givim long yumi evri samting; … [mo] bae i tekemaot ol sin blong yumi. Hemia from wanem mi givim seves long wan misin.12
Krismes sisen ia i wan spesel taem blong tingbaot wanem i moa impoten blong givim. Maet bae yumi save helpem ol narawan blong filim “naesfala filing blong hop”13 we i kam tru long taem blong stap kam blong save Sevya mo givim hat blong yumi long Hem.
Plante yia i pas, gel blong mitufala i ded from kansa, mo mi lavem hem from tingting blong hem abaot Krismes, iven taem hem i fesem rabis taem long helt blong hem. Wan yia hem i raet:
“Mi bin kasem wan sapraes blong Krismes. Wan bigfala wan. … Mi bin kasem wan imel bifo Krismes we i kam long nes long ofis blong mi blong onkologist [dokta blong kansa]. Hem i talem, ‘Meri Krismes—yu yu gat kansa [we i kam tru long blad laen blong yu] we bae i stap mekem ol jenis long bodi blong yu.’ … ?Hemia i minim wanem long mi? Oli apruvum … blong givim meresin …we bae i stopem ol rod blong kansa [blong sam we i gat jenis long bodi]. Hem i no wan meresin we bae i mekem wan i kam gud, be hem i wan meresin we ba i save mekem se kansa i no … gro hariap. … Sore nomo, bae long en, kansa i save faenem wan wei blong i kambak bakegen. … Be mi filim olsem se wan i givim long mi ekstra laef blong stap laef blong ol manis. ?Mo hemia i save minim wanem? … ?Sam moa taem blong sama? ?Spendem wan narafala holidei sisen wetem ol pikinini blong mi? Mi krae taem mi openem imel mo talem tangkyu long God from bes sapraes we mi eva bin gat.”
Alisa i bin gat moa gudgudfala taem wetem famli blong hem. Hem i serem wan eksperiens blong famli blong hem taem oli stap givimaot sam presen long wan neba we oli no save nem blong hem. Hemia i soemaot gud se evri smosmol infomesen long presen we yumi stap givim, oltaem bae oli no stret gud evriwan. Hem i bin raetem:
“Mifala i givim wan sikret … presen long naet ia. Ol boe oli mekem plan long ol gudgudfala wei blong oli muv mo ples we bae oli haed long hem.
“‘Be sapos oli luk yumi …,’ Sam i talem wetem wan series fes, mo tufala narafalawan tufala i lelei long tufala wetem fraet. ‘Yumi mas holem sam snobol long han blong yumi finis.’
“James i andastanem. ‘Okei, i stret. ?Bae yumi stonem doa blong mekem oli sarem?
“‘No,’ [Sam i talem], ‘yumi stonem fes blong olgeta.’”12
Alisa i serem wanem we las bon boe blong hem i talem bakegen long hem, Luke we hem i gat sikis yia nomo long tetaem ia. Hem i bin raetem:
“So, tedei long naet taem mitufala stap ledaon long bed blong hem we ol laet antap long windo blong hem i mekem bed blong hem i laet, mi askem hem … , ‘?afta yu wantem askem … wanem?’
“‘Okei, mi save tingting long wan samting.’
“‘?O?’
“‘Oli save yusum long evri sisen.’
“‘?O?’
“Hem i stop blong tingting smoltaem. ‘Wan hag mo kis we i kam long mama.’
“Hemia i nidim 100 smol kis mo ol bigfala bea hag long semmak taem ia. ‘!Tingting ia i fani, yu save gat hemia eni taem!’
“Be taem mi stap aot long rum blong hem hat blong mi i foldaon smol. Mi stap tingting se hemia i no tru oltaem. Mi glad we long yia ia hem i save gat hemia mo ol presen tu”13
Ol tingting blong Alisa abaot hop we i raonem taem blong Krismes, i tajem hat blong mi. Hem i bin raetem:
“Mi bin intres wetem hop long sisen ia. Taem mi stap tingbaot merikel blong Kraes mo ol plante presen blong God, mi filim hop blong evri samting mo blong evriwan. Hem i no kaen hop ia we bae evri samting bae i kam stret evriwan, be we bae evri samting bae i oraet, mo long en, fasin blong mekem gud bae i win. Long ol laef blong yumi. Mi ting se hem i neva let blong kasem ol merikel, blong gat jenis, blong gat pis. Mi biliv se dip insaed mo raon long evri ples. Bae mi mas talemaot se, i moa isi blong filim hop long ol narawan, be i moa had blong yusum long miwan. Be mi stap lanem samting. ‘Biliv long evri samting, hop long evri samting, winim plante samting.’ Simpol. Naes tumas.”
Hem i gohed blong tokbaot pikinini boe blong hem, “Long Naet Bifo Krismes, James i stap plei [wan Krismes song mo mi] laekem ol toktok blong singsing ia:
Ol gudfala Kristin man, stap glad.
Wetem hat, mo sol, mo voes;
Naoia, yufala no nid blong fraet blong ded.
!Pis! !Pis!
!Jisas Kraes i bin bon i kam long wol ia blong sevem yumi!
I singaot long yu, mo i singaot long yumi evriwan,
Blong yumi kasem ples blong Hem.
!Kraes i bin bon i kam long wol blong sevem yumi!
!Kraes i bin bon i kam long wol blong sevem yumi!”14
Hem i bin bon i kam long wol ia blong sevem yumi. Blong i sevem yu mo blong sevem mi. Hem i wan presen we i moa gud we Hem nomo i save givim. Nomata wanem situesen yumi stap fesem naoia, bae yumi kam blong luksave moa ol presen blong Hem long laef blong yumi long Krismes sisen ia.
Long nem blong Jisas Kraes, amen.