![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fcc%2F18%2Fcc180256ebd4d3e0ef04781e7b19a1bdf4ef9d14%2Fcc180256ebd4d3e0ef04781e7b19a1bdf4ef9d14.jpeg/full/!250,/0/default)
Cristo onase oporosalva hag̃ua
Primera Presidencia Navidagua Devocional 2023-pe
Domingo, Diciembre 3, 2023
Ahayhu pe Navida! Umi escritura-pegua ñemombe’u, pe purahéi ha umi py’aporã ha pojera remiandu omyanyhẽvaicha hetave ko yvy ári ko ára marangatúpe.
Ary ohasáva pukukue, che rembireko ha che roĩva’ekue heta tetãme ko époka Navideña aja. Ore roryete rohechávo umi heta jepokuaa iñambuéva ha oguerovy’alája hikuái pe Navida. Apensávo umi experiencia-re chepytyvõ ahechakuaa hag̃ua Navida ha’eha enterovetépe g̃uarã. Ha’e mitãme g̃uarã, tuvakuéra, taita, jarýi, tia, tio ha primo-kuérape g̃uarã. Ha’e umi tapicha hekove oiko porãvape g̃uarã ha avei umi oikóva mba’asy, mboriahu ha py’ara’ã rehevépe g̃uarã. Ha’e umi ñorairõguasu rupi oiko’asývape g̃uarã ha umi oikóva py’aguapy ha jeikoporãme g̃uarã. Ha’e umi oñeha’ãva hína osegi pe Salvador-pe, umi araka’eve ohenduva’ekue Héra, ha jepe umi Chupe ombotovévape g̃uarã. Avei ha’e umi oikova’ekue Ha’e onase mboyvépe g̃uarã. Navida opavavépe g̃uarã!
Navida ningo opavavépe g̃uarã Tupã ombou haguére Ita’ýrape opavave ha peteĩteĩ ñanderehe.1 “Peteĩ mitãra’y niko oñemoheñói ñandéve”.2
Pe Salvador onase rupi, oiko angaipa’ỹre, oexpia ñanderehe, ha oikovejey haguére, peteĩteĩ ñande jahupyty pe omanóva apytégui jeikovejey jopói tuichaitéva. Ni peteĩ ánga oikoveva’ekue ko yvy ári opytáta upe don hechapyrãitéva ỹre. Upe don ári avei, “tesa ndohecháiva, ha apysa nohendúiva … ha’e Tupã ombosako’íva umi chupe ohayhúvape g̃uarã”.3
Taha’eha’éva ára térã circunstancia, pe Salvador ñenase ha’e akoiete mba’ére javy’a hag̃ua. Ha’e ou oikuave’ẽ hag̃ua opavave Túva Yvagapegua ta’yrakuérape “py’aguapy ko múndope, ha tekove opave’ỹva pe múndo oúvape”.4
Adán ha Eva époka guive, umi tapicha hekojojáva oha’arõ’asy peteĩ Salvador nacimiento, oútava yvy ári ojapo hag̃uáicha posible toñekumpli pe Túva plan Yta’yrakuérape g̃uarã.5 Isaías ha Nefi oprofetisákuri Inasimiéntogui Imisiõ contexto-pe.6 Inasimiento ndaikatúi ojeipe’a pe mba’érepa Ha’e oúkuri yvy árigui.
Pepensami Ana ha Simeón rehe, ohechava’ekue mitãmi Jesús-pe ha ohechakuaa upe mitãmi ha’eha “peteĩ tesape ohesapétava”7 opa yvóra ha rredensiõ ñeha’arõkuaa.8 Nañane’sorprendeiva’erã pe ánhel odesignahague pe mensáhe “mba’eporã pyahu vy’apavẽ rehegua, opavavépe g̃uarã.”9 Javy’a peteĩ mitã onase vove, ha katu ko ñenase ha ko mitãmi iñambue.
Jesucristo, pe yvóra tesape ha tekove añetete, onase mitãmícha peteĩ establo humilde-pe, ha katu peteĩ mbyja pyahu omarka inasimiento. Mormón Kuatiañe’ẽ omombe’u peteĩ tembiasa dramático-gui, peteĩ ko’ẽ, peteĩ pyhare ha peteĩ ko’ẽ jey pytũ’ỹre, omarkáva Ijeju. Ko’ã techaukaha imilagrósova oñeme’ẽ oñeanunsia hag̃ua pe Múndo Resape,10 ñanemosãsótava angaipa ha ñemano pytũmbýgui. Ñande ñaipytyvõkuaa ñakomparti hag̃ua Hesape ko múndo ndive.
Navidápe, umi mitã michĩva jepe oñandukuaa ñande Salvador mborayhu influencia ha efecto. Ojapo heta ary ore rajy, Sonja, ohai peteĩ ñemongetágui orekova’ekue imemby orekóvandi 5 áño.
Ha’e ohai: “Andrés he’i chéve upe pyhare amoñenóvo hína chupe: ‘Áño oúvape nañesentramo’ãvéima umi regalo-re, ha katu ame’ẽva hína Jesús-pe’. Aporandu chupe moõgui ou chupe upe idea ha he’i chéve imbo’eháragui Primaria-gua. Hurra Primaria-re!”11
Héẽ. Hurra primaria-pe g̃uarã. Ko’ág̃a, 14 áño rire, Andrés oservi hína peteĩ misiõ ha odedika ko époka navideña oguerahávo Jesucristo mensáhe ambuekuérape. Ramoite ohai: “Jesús ome’ẽmbaite ñandéve … [ha] ojagarra opa ñane angaipakuéra. Upévare aĩ ko’ápe peteĩ misiõme.”12
Pe Navida époka niko momento especial ñapensa hag̃ua umi imba’eguasuvéva ñame’ẽ hag̃uáre. Ikatu ñaipytyvõ ambuekuérape oñandu hag̃ua pe “esperanza py’akyrỹi”13 oúva jaikuaávo Salvador-pe ha ñaikuave’ẽ Chupe ñane korasõ.
Ore rajy Alisa omano’akue cancer-gui ojapo heta ary, ha ahayhu mba’éichapa ha’e ohecha pe Navida, ombohovakérõ jepe peteĩ mba’asy pronóstioco vai. Peteĩ ary ha’e ohai:
“Arekókuri peteĩ sorpresa Navidáre. Peteĩ tuicháva voi. … Arresivi peteĩ correo electrónico Navida mboyvete che oncólogo oficina-pegua enfermera-gui. Ha’e he’i, ‘Feliz Navida—nde tumor ome’ẽ positivo [peteĩ mutación genética específico]-pe.’ … ¿Mba’épa he’ise upéva chéve g̃uarã? Ha’ekuéra oaprova … peteĩ medicación … ointerferíva umi célula cancerosa señalización rape reheve [umi orekóva upe mutación-pe g̃uarã]. Ndaha’éi peteĩ ñemonguera, ha katu peteĩ droga milagroso ikatúva omomichĩ … umi tumor pya’eterei. … Ñembysyrã, ára ohasávo, pe tete ojuhu tape ombojere hag̃ua, ha pe cáncer ou jey. … Ha katu añandu peteĩ máva ombohasaha hína chéve meses extra tekove rehegua. Ha mba’e ikatu upéva? … Peteĩ verano extra? Ambue Navida époka che membykuéra ndive? Heta che rasẽ a’abrívo upe correo electrónico ha a’aguijeme’ẽ Tupãme upe sorpresa porãve arresiviva’ekue araka’evére.”14
Alisa orekovékuri ára porãite ifamilia ndive. Ha’e okomparti peteĩ experiencia ifamilia oreko’akue ome’ẽ aja peteĩ Navidagua jopói anónimo peteĩ vesínope. Ohechauka káda detalle ñande jopói me’ẽme noĩporãmbaiha tapiaite. Ha’e ohai:
“Roheja peteĩ jopói ñemimby … ange pyhare. Mitãnguéra oplanea imovimiento ha ñemiha porãve.
“‘Ha katu ñanderechárõ hikuái …,’ Sam he’i añete, ha umi ambue mokõi oapoja nervio pópe. ‘Iporãve jarekórõ umi pelota de nieve ñande pópe’.
“James ontende. ‘Néi, oĩ porã. Ñambopu hag̃ua pe okẽ ha ñamboty jey?’
“‘Nahániri,’ [he’i Sam], ‘ñamombo hag̃ua hováre.’”15
Alisa okomparti peteĩ intercambio kyrỹive imemby michĩvévandi, Lucas, orekóva 6 áñonte upéramo. Ha’e ohai:
“Ko pyharépe, roñeno aja hupápe oreresapévo upe cadena de colores resape oĩva iventana ári, aporandu chupe … , ‘Néi, mba’épa rejerurese?’
“‘Guéno, apensakuaa peteĩ mba’ére’.
“‘O?’
“‘Ikatu ojeiporu opa épokape’.
“‘O?’
“Oiko peteĩ pausa dramática. ‘Peteĩ mami añua ha ñehetũ’.
“Upéva omerese 100 ñehetũ’i ha tuicha oso ñañua upepete. ‘Lucas, nde niko reguerekokuaa upéva oimeraẽ épokape!’
“Ha katu asẽvo pe okẽ rupi, che korasõ ojejopy’imi. Ikatu upéva na’añetepamo’ãi. Che aguijeterei ko arýpe ha’e ikatu haguére ohupyty upéva ha avei umi jopói.”16
Opoko che py’áre particularmente pe Alisa opensáva esperanza-gui ombojeréva pe Navida. Ha’e ohai:
“Amomba’eguasuete pe esperanza ko épokape. Apensávo Cristo milagro-re ha umi heta Tupã don rehe, añandu esperanza opa mba’e ha opavavépe. Ndaha’éi jepe pe esperanza opa mba’e ohoporãtaha, ha katu opa mba’e oĩporãtaha, ha ára ohasávo py’aporã ipu’akapáta. Opa ñande rekovépe. Ndaroviái aretereimaha milagro-kuéra, ñemoambue ha py’aguapýpe g̃uarã. Aguerovia añete upéva pypuku ha oparupi. Ha’eva’erã ojoguaha hasy’ỹveha añandu upe esperanza ambuekuérape g̃uarã, ha katu hasyve a’aplika chejupe g̃uarã. Ha katu a’aprende hína. ‘Peguerovia opa mba’e, peha’arõ opa mba’e, peñeha’ãmbaite opa mba’épe’. Isensíllo. Iporã.”
Oñe’ẽvo imembýre, ha’e he’ive: “James Nochebuena-pe ombopúvo peteĩ purahéi chéve g̃uarã [peteĩ navidagua purahéi ha che] ahayhu upe purahéi ñe’ẽnguéra:
Yvyporakuéra cristiano iguénova, pevy’a
Korasõ, ha ánga ha ñe’ẽpu reheve;
Ko’ág̃a ani pekyhyje ñeñotỹhágui:
Py’aguapy! Py’aguapy!
Jesucristo onase oporosalva hag̃ua!
Nerenói peteĩme, ha penerói opavavépe,
Pehupyty hag̃ua Isalón ijapyra’ỹva:
Cristo onase oporosalva hag̃ua!
Cristo onase oporosalva hag̃ua!”17
Ha’e onase oporosalva hag̃ua. Ndesalva hag̃ua ndéve ha chesalva hag̃ua chéve. Mba’e don hechapyrãitéva Ha’e añónte ome’ẽkuaáva. Taha’e ha’éva ñane circunstancia-kuéra, ajerure’asy tañañandu porãve Idonkuéra ñande rekovépe ko Navida épokape.
Jesucristo rérape, amén.