![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F9e%2F5e%2F9e5efb38bdb33bf412e3adf017eea67ed3c76a14%2F9e5efb38bdb33bf412e3adf017eea67ed3c76a14.jpeg/full/!250,/0/default)
“Peju, ja’adora Chupe”
Primera Presidencia Navidagua Devocional 2023-pe
Domingo, Diciembre 3, 2023
Che hermano ha hermana-kuéra pohayhuetéva, javy’aite ñamoñepyrũ hag̃ua ambue Navida temporada, ñaromandu’ahápe ñande Salvador ha Redentor, Ñandejára Jesucristo nacimiento.
Ha’e evénto sagrádo opaite ára heñói jave peteĩ mitã. Pema’ẽmi mba’éichapa oñeñandu peteĩ ore bisnieto ojapyhy ypývo iñermáno michĩvape.
[video]
Nañamomba’éi upe pyhare marangatuetépe hetave 2.000 ary, Belén tava’i ypýpe, umi yvagagua teko’aty opuraheihague vy’águi! Peteĩ ánhel ombo’ékuri ko hechapyrãva añetegua umi ovecha rerekuápe:
“Péina ápe, agueru peẽme mba’eporã pyahu vy’apavẽ rehegua, ha’étava opa tavayguápe g̃uarã.
“Ko árape heñóigui peẽme David távape, peteĩ Salvador, ha’éva Cristo pe Ñandejára.”1
Ha ko’ág̃a che hermano ha hermana-kuéra pohayhuetéva, “Peju, ja’adora Chupe”.2
Heta peẽmeicha, Navida iñambuékuri chéve g̃uarã ára ohasávo. Che mitãmegua mandu’a opytákuri pe Gran Depesión 1930-gua épokape. Pokãkuri pirapire. Umi jopói hepyetékuri.
Che tuvakuéra ombohechapyrãva’ekue Navida chéve ha che hermano-kuérape g̃uarã. Káda ary oiko orehegui peteĩ familia “Santa-pe omyengoviáva” ambue familiape g̃uarã. Rombosako’i umi jopói oĩporãva ha rome’ẽ umíva Navida pyharépe. Roñemomombyrývo hogakuéragui, umi ipo jepyso ha hova resay ogueru oréve vy’a añete ñeme’ẽ oguerúgua.
Ahayhuetéva Navida purahéi upe aragua—ha ahayhúgueteri. Opa ary, Hemana Nelson ha che rohayhuete rohendu ha ropurahéivo pe Handel-gua Mesías ndive. Ahayhu ñe’ẽ hallelujah he’iséva hebreo-pe. Añetehápe he’ise “emomorã Jehová, Tupã Ñandejárape”.3 Ñe’ẽ ojepurahéiva ko ñe’ẽpotýpe ndahaéi ojeaplikáva Ñandejára nasimiéntope añónte ha katu Irreinádo milenario-pe:
Heñóigui ñandéve peteĩ mitãra’y,
Oñeme’ẽ ñandéve peteĩ Ta’ýra:
Ha Ijatiʼy ári oĩta pe ñeisãmbyhy:
Ha oñembohérata Hechapyrãitéva, Ñemoñe’ẽhára,
Pe Tupã Ipu’akapáva,
Pe Túva Ijapyra’ỹva,
Pe Príncipe de Paz.4
Ha’ékuri che huventu árape añepyrũhague ahupyty peteĩ testimónio Tupã pe Túvagui ha Ita’ýra Ohayhuetéva, Jesucristo-gui. Aikuaa chejehegui Jesucristo heñoihague virgen María-gui, ha’évakuri “peteĩ mba’yru iporãitereíva ha ijeiporavopyréva”.5 Aikuaákuri Ha’e añetehápe ha’eha Tupã Ra’y6 ha tekove imba’eguasuvéva opa yvypóra rembiasakuépe.
Ñapensamínte upe mba’e tuichaite Jesucristo ojapova’ekue rehe—opa mba’e Itúva rembipotápe oĩháicha! Jesús ha’émakuri peteĩ Tupã He’ívoguare outaha yvy ári ojapopa hag̃ua mba’eguasu tekotevẽva peteĩteĩ ñandekuérape g̃uarã. Peteĩ mba’eguasu osalva añete ha omoambuéva tekove. Peteĩ mba’eguasu mavave ikatu’ỹva jajapo ñandejehegui.
Pe Salvador “oiko’asý[kuri] ha ojeipy’ara’ã opáicha”7 Ha’e oikuaa hag̃ua “pe tete rupive mba’éichapa [ñane]pytyvõva’erã mba’asy [ja]guerekoháicha”.8
Mbovy mése ohasávape, aikuaavékuri mba’e’asy rehegua ha iñinfluénsia rrefinadóragui. Che korasõ oñemo’ag̃uive Salvador-re añeha’ãvo aimo’ã Ijehasa’asy tuichakue. Che akã yvypóraramo, ndaikatúinte ontende mba’éicha Ha’e omoĩ Ijehe opa mba’erasy, opa angaipa, opa jepy’apy, ha opa jeiko’asy orekóva opavave peteĩ ára oikoveva’ekue!
Tuichavéva poriahuvereko rechaukápe, odesafiáva yvypóra ñentende térã ñemombe’u, pe Salvador oñemoĩ Ijupe peteĩ ijojaha’ỹva tete ha espíritu jehasa’asýpe.
Ñamomba’eguasu ningo Mitãra’y Belén-guápe Ha’e oikuave’ẽgui uperire pe oñeikũmbykuaa’ỹva ha ijapyra’ỹva jehasa’asy Getsemaní-pe ha Calvario kurusúpe. Ko ñeikuave’ẽ ñanerredimi peteĩteĩme jaiporavóramo ñañearrepenti ha jasegi Chupe. Upéi, yvy arigua hembiapo paháramo, Ha’e opu’ãjey omanóva oñemoĩhágui mbohapyha árape, ome’ẽvo peteĩteĩ ñandekuérape jehovasapy upemboyve ojeikuaa’ỹva, jeikovejey ha ñemano riregua tekove.
Ko épokape, py’ỹi japurahéi térã ja’e vy’ápe, “Tapehasa porãite ko Navida”. Che hermano ha hermana-kuéra pohayhuetéva, che korasõ oipotávape peteĩteĩ peẽme g̃uarã ko pyharépe oike heta mba’e. Añete katu, ndaha’éi che aipotáva peẽme g̃uarã; ha’e che ñembo’e peẽme g̃uarã ko Navida ára marangatúpe.
Peteĩha, añembo’e tapeñandu Salvador mborayhu pypuku ha opa’ỹva peteĩteĩ penderehe. Jesucristo pendekuaa rréino yvy ári mboyvegua guive. Pendekuaa ha penderecha ko’ág̃a. Ohecha pende vy’a ha pende vy’a’ỹ. Ha’e ohasákuri opaite umíva.
Oikuaa porãmbaite pene ñeha’ã mbarete ha ovy’a opa ára peñemotende jave tekojojápe, ára porã ha ára vaípe.
Añembo’e tapehupyty pende testimónio personal Jesucristo ha’eha Tupã Ra’y, Henyhẽha pokatu divínogui, ha Ijehasa’asy expiatório guasuete rupi, natekotevẽiha araka’eve peñandu pembohovakeva’erãha pene’año umi tekovegua desafío hasýva. Pejerure, peheka, ha pehenói añetéramo,9 pehupyty meméta Ipokatu penepytyvõ, penemombarete ha penemonguera hag̃ua.10
Añembo’e tapeaprovecha paiteve Salvador Expiasiõ, ára ha ára peñearrepentívo, pemopotĩvévo pende rekove ha pehekávo yvagagua ñeisãmbyhy opa mba’e pejapóvape. Ambue ñe’ẽme, añembo’e penderehe peñandu hag̃ua vy’a akói pepensáramo celestial-vape.
Añembo’e avei peiporu hag̃ua ko navida ára pemoñepyrũ hag̃ua peteĩ adorasiõ personal ára tuichavéva jepe. Peñepyrũ pestudia jey Jesucristo mbo’epykuéra ha Iñexpiasiõ. Avave ko yvy ári napenderayhúi Ha’éicha. Avave ko’ápe ontende porãve térã oikuaa porãve umi pende vy’a’ỹ ha rekokangy. Avave ko yvy ári ndorekói pokatu Jesucristo oguerekóva. Ndaipóri avave ko’ápe oipotavéva toiko pendehegui opa mba’e peẽ ikatúva ha’e. Ndaipóri avave Túvape ojeruréva penderehehápe Ha’e ojapoháicha.
Ñandejára Jesucristo ha’e ñande Salvador ha ñane Redentor. Ha’e niko pe Tupã Ra’y, pe Israel-gua Imarangatúva. Ha’e pe Oñeunhipyréva.11 Túva ñeisãmbyhy guýpe, Ha’e pe opa mba’e ojejapova’ekue Apohare.12 Jesucristo ha’ékuri pe Gran Jehová, Antiguo Testamento-pegua Tupã.13 Ha’e pe Emanuel oñepromeva’ekue.14 Ha’e pe Tembiecharã guasu 15 ha ñande Avogádo Túva ndive.16 Iñevanhélio rrestaurádo rupi, opa Isacerdocio rehegua jehovasapy oĩ mayma yvyporakuérape g̃uarã, oúramo hikuái Chupe ha oñemoporãmba Ipype.
Hermano ha hermana-kuéra, tajaiko “aleluya” espíritupe, akói ñamomorãvo Jehová Tupã Ñandejárape. Ko temporada Navideña gloriósope, peju, ja’adora Chupe, Cristo Ñandejárape!
Che aikuaa Tupã oikoveha! Jesús ha’e pe Cristo! kóva ha’e Itupao. Ha’e omboguata Iñevanhélio Restauración oho meméva. Upévagui atestifika Jesucristo réra sagrado-pe. Amén.