Cristo, ñande Salvador, onase
Primera Presidencia Navidagua Devocional 2023-pe
Domingo, Diciembre 3, 2023
Hermano ha hermana-kuéra pohayhuetéva, Feliz Navida!
Ñande aguije ñañembyaty haguére ñande Primera Presidencia jahayhuetéva ndive ko Navidagua Devocional-pe Peime peimehápe ko Navida épokape, tapeñandu Tupã mborayhu jaguerovy’ávo Jesucristo-pe Navida korasõramo.
Navida ningo purahéi, tyakuã ha hekue, ñeha’arõ ha pojera époka. Peteĩ ñembyaty ára, taha’e jaiko ag̃ui térã mombyry.
Py’ỹi Navidágui oiko Navida kirirĩháme jaguerúvo Navida vy’apavẽ ambuekuérape. Heta familia osustitui Santa-pe. Heta tapicha ohesape ko múndo Jesucristo resape reheve.
Peteĩ Navidagua momandu’a oñemandu’ávare ha’e peteĩ momandu’a oñembopyahúva. Ára ohasávo, umi Navidagua momandu’águi oiko umi tradisiõ, ombopypukukuaáva ñane mborayhu Jesucristo-re—pe Tupã Cordero, pe Túva Ijapyra’ỹva Ra’y, pe Yvóra Salvador.1
Peguerekórõ Navidagua momandu’a, tapeguerovy’a vy’apavẽ reheve ko épokape. Pejapóramo gueteri hína umi pene Navidagua tradisiõ, umíva tombokakuaa pene mborayhu Jesucristo-re ha tapenderovasa káda ary.
Ikatúpa akompartimi penendive mbohapy familia Gong navidagua tradisiõ oregustavéva?
Peteĩha, káda ary, Hermana Gong ha che rohayhu rohecha jey umi Navidagua adorno omombe’úva ore familia historia.
Mitãrusu ha mitãkuña romenda ramóvaramo, hermana Gong ha che rohókuri peteĩ posgrado universida Inglaterra-pe. Roiko peteĩ apartamento’ípe peteĩ estudiante presupuesto jopy reheve. Roipapa ore centavo-kuéra rojogua mboyve peteĩ árbol de Navida michĩmíva, jepe Charlie Brown oreporiahuverekóneva rehe.
Akóinte ikatupyrývo, hermana Gong oiporu jepi umi pinsa ojapo hag̃ua umi adorno’imi soldado Británico rehegua ore árbol de Navidápe g̃uarã. Ome’ẽ peteĩteĩme peteĩ sombrero hũ lana-guigua ha peteĩ pukavy.
43 áño aja, ko’ã ao jopyharegua soldado Británico opytáva firme ore árbol de Navidápe. Oremomandu’a ore Navida peteĩha romenda ramóvaicha—mombyry ógagui—ha peteĩteĩ Navida uperiregua.
Ore familia ra’y ojapo ko’ã ao jopyharegua “ta’anga’i”. Umíva omoha’anga misionero-kuéra opa mundo-gua. Pehechápa ipukavykuéra? Ao internacional? Tarhéta héra reheve? Oje’e chéve peteĩva ojejapohague chéve chejogua hag̃ua.
Ore adorno navideño ombopyahu angirũnguéra ndivegua momandu’a rory ha mba’e rohasava’ekue heta tendápe. Pe desfile de recuerdo Navideño opa arygua hory ha hetaichaguáva, orembopuka.
Proféta Alma otestifika pe yvy ñemomỹijoja meme ohechaukaha oĩha peteĩ Tupã. Navida omarka peteĩ punto familiar pe yvy 365 ¼ árape ojerévo kuarahy jerére káda ary. Ko rotación anual ñande guerahávo peteĩ Navidagua époka hechapyrãvape káda ary, apensa upe ohaiva’ekuére pe autor E. B. White pe “Anillo del tiempo” rehe.”2
Ha’e osuheri experiencia reheve mante ñantendeha “pe ára añetehápe nomỹi peteĩ círculo-pe completamente”. Pe ára anillo ikatu ojogua “oĩporãmbaha, oñemoambue’ỹva, ojepredesikuaáva, ñepyrũmby ha paha’ỹre”. Ha katu ñanemitãrõ mante ñaimo’ãkuaa ikatuha jajapo peteĩ círculo completo ha ñambopaha nañandetujavéivo ñañepyrũ haguéichagui.
Chéve g̃uarã, che ñeg̃uahẽ káda Navidápe oimeháicha el mismonte ha avei oimeháicha ogueru suherencia iñambuéva mba’éichapa pe ára (ha espacio) ikatu ha’e joja mokõivéva lineal ha circular. Mba’éicha peteĩ “tape po’i ha ipyrusu’ỹva”3 ha “peteĩ jere ijapyra’ỹva”4 ha’ekuaa descripción complementaria peteĩ konvénio añeteguágui oñesentráva peteĩ mitãmi Jesús-pe onaseva’ekue Belén-pe.
Kóicha, chéve g̃uarã, pe Navida magia pehẽ niko taha’e peteĩ mitã ha peteĩ kakuaáicha al mismo tiempo. Javy’a adulto-ramo umi mba’épe ombovy’áva pe mitãme ha’eva’ekue ñande peteĩ árape. Ha javy’a peteĩ mitã ndive jajapóvo ha ñambopyahúvo oñondive umi momandu’a ha tradisiõ.
Mokõiha Navidagua tradisiõ familia Gong-pe ogustaitéva ha’e rohechauka umi ore pesebre familiar térã nativida—omoha’angáva pe mitã marangatu Cristo nacimiento.
Ndapehayhúipa mba’éicha umi nativida oñesentra Jesucristo-pe, ñaneinvitávo péicha jajapo hag̃ua? He’i haguéicha ramoite peteĩ exmisionero: “Che misiõ mboyve Jesucristo ha’ékuri parte che rekovépe. Ko’ág̃a Ha’e che rekove”.
Umi ore pesebre familiar ou opáichagua tuichakue ha forma ikatúva oñeimahina, ojejapo káda material-gui ikatúva oñeimahina ha ou káda tendágui ikatúva oñeimahina. Káda pesebre otestifika Jesucristo ha Hovasapýgui opa tetã, avaretã, ñe’ẽ ha tavayguápe.
Oregustaiterei Tupã ta’yrakuéra oparupigua tomoha’anga mitãmi Jesús-pe, María, José, umi Reyes Magos, pastores ha mymbamimi umi jerére, umi característica ha detalle ha’ekuéra ojepokuaa ha oikuaalája reheve. Ko’ã pesebre avei ñanemomandu’a Tupã ohayhuha opavave Ita’yrakuérape; jahechakuaa Tupã mborayhu umi ñande pesebre ha nativida característica-pe tou ouhágui.
Mbohapyha Gong tradisiõ familiar favorito ha’e romoñe’ẽ oñondive umi ñande Salvador nasimiento ñemombe’u escritura-pegua, avei romoñe’ẽ hatã familia-icha Charles Dickens Peteĩ Navidagua Villancico.
Amoĩrõ chejehe peteĩ bufanda ha peteĩ sombrero, ikatúpa cheimahinami sapy’a Ebenezer Scrooge-ramo Peteĩ Navidagua Villancico-pe?
Oĩ jepi ary, ore familia omoñe’ẽ Peteĩ Navidagua Villancico iñepyrũgui ipaha peve. Rombojere ore chocolate aku caramelo bastón-pe ha ropuka umi referencia “manzana re’ẽ” ha “obispo opitáva” rehe. Roryrýi Jacob Marley espíritu ombopúrõ ikadenakuéra. Opoko ore korasõre mba’éichapa umi espíritu Navidagua Ohasava’ekue, Ko’ág̃agua ha Oútava oipytyvõ Ebenezer Scrooge-pe oiko hag̃ua chugui peteĩ kuimba’e pyahu.
Ambue ary, ore familia omoñe’ẽ Peteĩ Navidagua Villancico versiõ mbykýva, ore ra’y ha ore nuera omombykyva’ekue umi ore familia imitãvévape g̃uarã, hasyvéva oñatende are hag̃ua.
Ha ambue ary katu, pukavy ha tetiaépe, ore familia omoñe’ẽ Peteĩ Navidagua Villancico etikétante. Orekóva mokõi línea: “Mba, japu péva“ ha “Tupã tapenderovasa opavavépe“.
Charles Dickens oñepyrũ ohai Peteĩ Navidagua Villancico octubre-pe ha ombopaha diciembre ñepyrũme 1843-pe, peteĩ 6 semana periodo-pente. Umi 6.000 ejemplares tirada peteĩha ojepublika Londres-pe diciembre 19, 1843-pe. Nochebuena og̃uahẽvo oñevendepaitéma.
Umi odocumentáva Peteĩ Navidagua villancico contexto omohesakã Charles Dickens ohaihague hína peteĩ époka pe Inglaterra victoriana orrekonsiderahápe mba’épa pe Navida he’ise. Mba’e funsiõpa ikatu oreko térã orekova’erã sociedápe peteĩ Navidagua époka, umi árbol de Navidad, Navidagua momaitei, Navidagua familia ñembyaty, Navidagua tarhéta ha jepe umi Navidagua villancico?
Peteĩ momento heta oñeñanduha ojepy’apy, imombyry ha ha’eño, Dickens Peteĩ Navidagua Villancico oñe’ẽ peteĩ anhelo de amistad ipypukúvare, mborayhu ha umi valores cristianos imbaretéva rehe, Ebenezer Scrooge ojuhu haguéicha ohóvo py’aguapy ha ñemonguera ipasádo, presente ha futuro-pe.
Upérãmo, ko’ág̃aicha, pe Navida signifikádo añete ñanemo’ag̃uive Jesucristo-re, onaseva’ekue mitãmícha peteĩ pesebre-pe. Jesucristo oikuaa, to’ópe, mba’éichapa ñanepytyvõta henyhẽvo ipy’a poriahuverekógui. Upérõ, ko’ág̃aicha, Navida oguerovy’a pe konveniogua pertenencia, pe comunión ha comunida Jesucristo ndive ha oñondive.
Pehejami taporandu peteĩ mba’e iñambuéva Peteĩ Navidagua villancico-gui. ¿Mba’ére ñapensárõ Scrooge-gui, ñapensa raẽvete peteĩ karai tuja ijarhélvare, oñembohorýva Navidáre peteĩ ogro-ramo?
Mba’ére ndajahechakuaái pe karai Scrooge pyahúpe? Pe Scrooge pyahu, omondóva pojerápe pe pavo jopóiramo peteĩ Navidagua sorpresarã? Pe Scrooge pyahu, oĩkoporãjeýva Freddie, isobrino horyetéva ndive? Pe Scrooge pyahu, omopu’ãva Bob Cratchit sueldo ha oñangarekóva Tiny Tim rehe?
Peheja umi oguerovia’ỹva toñembohory. Pe Scrooge pyahu “ojapopaite, ha hetaverasánte avei”. Oiko chugui peteĩ kuimba’e iguénova ha peteĩ angirũ porã oikuaaháicha pe yvóra ypy porã.
Upéicharõ mba’ére nañanemandu’ái upe karaire. Scrooge-re? Oĩpa tapicha ñande jerére, ikatu ñandete voi, ikatukuaáva iñambue nañamoĩvéivo rótulo hesekuéra ha ja’esterotipa ha’eháichakuri hikuái yma?
Ni peteĩ tapicha ni familia oĩporãmba. Opavave ñande jareko ñane kangykue ha ñande falta, umi mba’e ñamehorasévape. Ko Navidápe, ikatu jarresivi—ha ñame’ẽ—umi Jesucristo don hechapyrãitéva ñemoambue ha arrepentimiento rehegua, ñeperdona ha teresarái, ñame’ẽvo umi jopói ambuekuérape ha ñandejupe.
Jajapo las pases pe áño ohasáva ndive. Pemboyke pe ñembyasy ha ayvu emocional, umi ñorairõ ha ñeko’õi ijatýva ñande rekovépe. Ajerure’asy tañame’ẽ ojupe oportunida pyahu ñamaña rangue umi ñane limitasiõ ymaguarére. Ñame’ẽna pe Scrooge pyahúpe oĩva peteĩteĩ ñandepype pe oportunida oñemoambue hag̃ua.
Ñande Salvador oúkuri Navidápe omosãso hag̃ua umi oñeñapytĩvape—ha ndaha’éi umi oĩva ka’irãime añóntepe. Ha’e ñanemosãsokuaa umi ñande pasado-gua fantasma-gui, ñanemosãso umi ñane angaipa ha ambuekuéra angaipa mba’embyasýgui. Ha’e ñanerredimikuaa pe ñande yo egocéntrico-gui, pe ñandentese oĩva ñande pype, ñanase jey rupi Ipype.
“Ko árape onaségui peẽme David távape, peteĩ Salvador, ha’éva Cristo pe Ñandejára.”5
Upévare feliz Navida!
Pende Navidagua tradisiõ ha momandu’a tairory ha tojajái.
Tajavy’a Jesucristo-pe, Navida ha opa árape.
Vy’apópe atestifika Chugui Héra sagrádo ha marangatúpe, Jesucristo, amén.