ພຣະຄຣິດໄດ້ມາກຳເນີດເພື່ອຊ່ວຍໃຫ້ລອດ
ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2023
ວັນອາທິດ, ວັນທີ 3 ເດືອນທັນວາ, 2023
ຂ້າພະເຈົ້າມັກວັນຄຣິດສະມາດ! ເລື່ອງລາວພຣະຄຳພີ, ດົນຕີ, ແລະ ຄວາມຮູ້ສຶກຂອງຄວາມປາດຖະໜາດີ ແລະ ຄວາມເອື້ອເຟື້ອເພື່ອແຜ່ ເບິ່ງຄືວ່າຖ້ວມທົ້ນສ່ວນຫລາຍຂອງແຜ່ນດິນໂລກໃນຊ່ວງເວລາອັນສັກສິດນີ້.
ຫລາຍປີທີ່ຜ່ານມາ, ຂ້າພະເຈົ້າ ແລະ ພັນລະຍາ ໄດ້ໄປຫລາຍປະເທດໃນຊ່ວງເທດສະການຄຣິດສະມາດ. ພວກເຮົາມັກເບິ່ງທຳນຽມທີ່ຫລາກຫລາຍ ແລະ ວິທີສະຫລອງຄຣິດສະມາດທີ່ແຕກຕ່າງກັນ. ການຄິດກ່ຽວກັບປະສົບການເຫລົ່ານີ້ ໄດ້ຊ່ວຍໃຫ້ຂ້າພະເຈົ້າຮູ້ວ່າ ຄຣິດສະມາດແມ່ນສຳລັບທຸກຄົນ. ມັນແມ່ນສຳລັບເດັກນ້ອຍ, ພໍ່ແມ່, ປູ່ຍ່າຕາຍາຍ, ລຸງປ້ານ້າອາ, ແລະ ພີ່ນ້ອງປ້ອງປາຍ. ມັນແມ່ນສຳລັບຜູ້ທີ່ຊີວິດດຳເນີນໄປຢ່າງລາບລື້ນ ແລະ ສຳລັບຜູ້ທີ່ກຳລັງມີຊີວິດຢູ່ກັບຄວາມເຈັບປ່ວຍ, ຄວາມຍາກຈົນ, ແລະ ການທົດລອງ. ມັນແມ່ນສຳລັບຜູ້ທີ່ເປັນທຸກຈາກຄວາມຫວາດກົວຂອງສົງຄາມ ແລະ ສຳລັບຜູ້ທີ່ມີຊີວິດໃນສະພາບການທີ່ສະຫງົບສຸກ ແລະ ຈະເລີນຮຸ່ງເຮືອງ. ມັນແມ່ນສຳລັບຜູ້ທີ່ກຳລັງພະຍາຍາມຕິດຕາມພຣະຜູ້ຊ່ວຍໃຫ້ລອດ, ສຳລັບຜູ້ທີ່ບໍ່ເຄີຍໄດ້ຍິນພຣະນາມຂອງພຣະອົງ, ແລະ ແມ່ນແຕ່ສຳລັບຜູ້ທີ່ປະຕິເສດພຣະອົງ. ມັນຍັງແມ່ນສຳລັບຜູ້ທີ່ມີຊີວິດກ່ອນທີ່ພຣະອົງຈະມາກຳເນີດ. ຄຣິດສະມາດແມ່ນສຳລັບທຸກຄົນ!
ຄຣິດສະມາດແມ່ນສຳລັບທຸກຄົນ ເພາະພຣະເຈົ້າໄດ້ສົ່ງພຣະບຸດຂອງພຣະອົງມາເພື່ອເຮົາທຸກຄົນ ແລະ ເພື່ອພວກເຮົາແຕ່ລະຄົນ.1 “ມີເດັກນ້ອຍຜູ້ໜຶ່ງໄດ້ເກີດມາໃຫ້ພວກເຮົາ.”2
ເພາະພຣະຜູ້ຊ່ວຍໃຫ້ລອດໄດ້ກຳເນີດ, ໃຊ້ຊີວິດທີ່ປາດສະຈາກບາບ, ຊົດໃຊ້ເພື່ອເຮົາ, ແລະ ໄດ້ຟື້ນຄືນພຣະຊົນ, ເຮົາແຕ່ລະຄົນຈຶ່ງໄດ້ຮັບຂອງຂວັນອັນຍິ່ງໃຫຍ່ແຫ່ງການຟື້ນຄືນຊີວິດຈາກຄວາມຕາຍ. ບໍ່ມີຈິດວິນຍານແມ່ນແຕ່ດວງດຽວເທິງແຜ່ນດິນໂລກ ທີ່ຖືກກີດກັ້ນບໍ່ໃຫ້ຮັບຂອງຂວັນອັນປະເສີດນີ້. ນອກຈາກຂອງຂວັນນີ້ແລ້ວ, “ສິ່ງທີ່ຕາບໍ່ເຫັນ, ຫູບໍ່ໄດ້ຍິນ … ແມ່ນສິ່ງນັ້ນແຫລະ ທີ່ພຣະເຈົ້າໄດ້ຊົງຈັດຕຽມໄວ້ ໃຫ້ແກ່ຄົນທັງຫລາຍທີ່ຮັກພຣະອົງ.”3
ບໍ່ວ່າຈະໄລຍະເວລາໃດ ຫລື ສະພາບການໃດກໍຕາມ, ການກຳເນີດຂອງພຣະຜູ້ຊ່ວຍໃຫ້ລອດ ເປັນເຫດຜົນໃຫ້ປິຕິຍິນດີສະເໝີ. ພຣະອົງໄດ້ສະເດັດມາເພື່ອປະທານ “ສັນຕິສຸກໃນໂລກນີ້, ແລະ ຊີວິດນິລັນດອນໃນໂລກທີ່ຈະມາເຖິງ” ໃຫ້ລູກໆແຕ່ລະຄົນຂອງພຣະບິດາເທິງສະຫວັນ.4
ຕັ້ງແຕ່ສະໄໝຂອງອາດາມ ແລະ ເອວາ, ຜູ້ຄົນທີ່ຊອບທຳໄດ້ມຸ້ງຫວັງການກຳເນີດຂອງພຣະຜູ້ຊ່ວຍໃຫ້ລອດ, ຜູ້ທີ່ຈະເຮັດໃຫ້ແຜນຂອງພຣະບິດາສຳເລັດສຳລັບລູກໆຂອງພຣະອົງ.5 ເອຊາຢາ ແລະ ນີໄຟ ໄດ້ທຳນາຍເຖິງການກຳເນີດຂອງພຣະອົງໃນບໍລິບົດຂອງພາລະກິດຂອງພຣະອົງ.6 ການກຳເນີດຂອງພຣະອົງ ບໍ່ສາມາດແຍກອອກຈາກເຫດຜົນທີ່ພຣະອົງສະເດັດມາສູ່ແຜ່ນດິນໂລກນີ້ໄດ້.
ຂໍໃຫ້ຄິດເຖິງອານາ ແລະ ຊີເມໂອນ, ຜູ້ທີ່ໄດ້ເຫັນກຸມມານນ້ອຍເຢຊູ ແລະ ໄດ້ຮູ້ວ່າ ກຸມມານນ້ອຍຜູ້ນີ້ເປັນ “ແສງສະຫວ່າງສ່ອງແຈ້ງ”7 ທັງທົ່ວໂລກ ແລະ ຄວາມຫວັງສຳລັບການໄຖ່.8 ບໍ່ໜ້າແປກໃຈທີ່ທູດສະຫວັນໄດ້ກຳນົດຂ່າວສານ “ທີ່ນຳຄວາມຊົມຊື່ນຍິນດີອັນໃຫຍ່ ມາສູ່ປະຊາຊົນທັງໝົດ.”9 ເຮົາປິຕິຍິນດີເມື່ອມີທາລົກເກີດມາ, ແຕ່ການກຳເນີດຄັ້ງນີ້ ແລະ ທາລົກຜູ້ນີ້ແມ່ນແຕກຕ່າງ.
ພຣະເຢຊູຄຣິດ, ຄວາມສະຫວ່າງ ແລະ ຊີວິດຂອງໂລກນັ້ນ, ໄດ້ກຳເນີດໃນຄອກສັດນ້ອຍໆອັນຕໍ່າຕ້ອຍ, ແຕ່ດາວດວງໃໝ່ໄດ້ສົ່ງສັນຍານເຖິງການກຳເນີດຂອງພຣະອົງ. ພຣະຄຳພີມໍມອນເລົ່າເຫດການທີ່ໜ້າຕື່ນຕາ—ມື້ໜຶ່ງ, ຄືນໜຶ່ງ, ແລະ ມື້ໜຶ່ງທີ່ບໍ່ມີຄວາມມືດ—ຊຶ່ງສົ່ງສັນຍານການສະເດັດມາຂອງພຣະອົງ. ສັນຍານອັນໜ້າອັດສະຈັນເຫລົ່ານີ້ ໄດ້ຖືກມອບໃຫ້ເພື່ອປະກາດການມາເຖິງຂອງຄວາມສະຫວ່າງຂອງໂລກ,10 ຜູ້ທີ່ຈະຊ່ວຍປົດປ່ອຍເຮົາຈາກຄວາມມືດແຫ່ງຄວາມບາບ ແລະ ຄວາມຕາຍ. ເຮົາສາມາດຊ່ວຍແບ່ງປັນຄວາມສະຫວ່າງຂອງພຣະອົງກັບໂລກໄດ້.
ໃນຊ່ວງເວລາຄຣິດສະມາດ, ແມ່ນແຕ່ເດັກນ້ອຍໆກໍສາມາດຮູ້ສຶກເຖິງອິດທິພົນ ແລະ ຜົນກະທົບຂອງຄວາມຮັກຂອງພຣະຜູ້ຊ່ວຍໃຫ້ລອດ. ເມື່ອຫລາຍປີກ່ອນ, ລູກສາວຄົນໜຶ່ງຂອງພວກເຮົາ, ຊອນຢາ, ໄດ້ຂຽນກ່ຽວກັບການສົນທະນາຂອງນາງກັບລູກຊາຍອາຍຸຫ້າປີຂອງນາງ.
ນາງໄດ້ຂຽນວ່າ, “ແອນດຣູໄດ້ເວົ້າກັບຂ້ອຍມື້ຄືນນີ້ ຕອນທີ່ຂ້ອຍກຳລັງເອົາລາວເຂົ້ານອນວ່າ, ‘ປີໜ້າ, ລູກຈະບໍ່ສຸມໃຈໃສ່ຂອງຂວັນຫລາຍ, ແຕ່ລູກຈະສຸມໃຈໃສ່ສິ່ງທີ່ລູກຈະເອົາໃຫ້ພຣະເຢຊູ.’ ຂ້ອຍໄດ້ຖາມລາວວ່າ ລາວໄປເອົາແນວຄິດນີ້ມາແຕ່ໃສ, ແລະ ລາວໄດ້ບອກຂ້ອຍວ່າ ເອົາມາຈາກຄູສອນຊັ້ນປະຖົມໄວຂອງລາວ. ຊົມເຊີຍຊັ້ນປະຖົມໄວ!”11
ແມ່ນແລ້ວ. ຊົມເຊີຍຊັ້ນປະຖົມໄວ. ບັດນີ້, 14 ປີຕໍ່ມາ, ແອນດຣູກຳລັງຮັບໃຊ້ເຜີຍແຜ່ ແລະ ກຳລັງໃຊ້ເວລາໃນຊ່ວງເທດສະການຄຣິດສະມາດນີ້ໃນການມອບຂ່າວສານຂອງພຣະເຢຊູຄຣິດໃຫ້ກັບຄົນອື່ນ. ເມື່ອບໍ່ດົນມານີ້ ລາວໄດ້ຂຽນວ່າ “ພຣະເຢຊູໄດ້ປະທານທຸກສິ່ງໃຫ້ເຮົາ … [ແລະ] ຈະຮັບເອົາບາບທັງໝົດຂອງເຮົາ. ນັ້ນຄືເຫດຜົນທີ່ຂ້ອຍໄດ້ມາເຜີຍແຜ່ຢູ່ທີ່ນີ້.”12
ເທດສະການຄຣິດສະມາດ ແມ່ນຊ່ວງເວລາທີ່ພິເສດ ທີ່ຈະຄິດເຖິງສິ່ງທີ່ສຳຄັນທີ່ສຸດທີ່ຈະໃຫ້. ເຮົາອາດສາມາດຊ່ວຍໃຫ້ຄົນອື່ນສຳຜັດເຖິງ “ຄວາມຕື່ນເຕັ້ນແຫ່ງຄວາມຫວັງ”13 ອັນເປັນຜົນຈາກການມາຮູ້ຈັກພຣະຜູ້ຊ່ວຍໃຫ້ລອດ ແລະ ຖວາຍໃຈຂອງເຮົາໃຫ້ແກ່ພຣະອົງ.
ລູກສາວຂອງພວກເຮົາ ອາລິສາ ໄດ້ເສຍຊີວິດໄປຍ້ອນມະເລັງ ເມື່ອຫລາຍປີກ່ອນ, ແລະ ຂ້າພະເຈົ້າມັກມຸມມອງຂອງນາງກ່ຽວກັບຄຣິດສະມາດ, ແມ່ນແຕ່ຂະນະທີ່ນາງປະເຊີນກັບລາງສຸຂະພາບທີ່ໂຫດຮ້າຍ. ປີໜຶ່ງ ນາງໄດ້ຂຽນວ່າ:
“ຂ້ອຍໄດ້ຮັບເຊີໄພ້ສຳລັບຄຣິດສະມາດ. ເປັນເຊີໄພ້ທີ່ ໃຫຍ່ ອັນໜຶ່ງ. … ຂ້ອຍໄດ້ຮັບອີເມວກ່ອນຄຣິດສະມາດຈາກພະຍາບານທີ່ຫ້ອງການເນື້ອງອກວິທະຍາ. ເພິ່ນເວົ້າວ່າ, ‘ສຸກສັນວັນຄຣິດສະມາດ—ເນື້ອງອກຂອງເຈົ້າໄດ້ຮັບຜົນກວດເປັນບວກສຳລັບການກາຍພັນ [ທາງພັນທຸກຳທີ່ສະເພາະເຈາະຈົງ].’ … ນັ້ນໝາຍຄວາມວ່າຫຍັງສຳລັບຂ້ອຍ? ເຂົາເຈົ້າໄດ້ອະນຸມັດ … ຢາ … ທີ່ແຊກແຊງເສັ້ນທາງການສົ່ງສັນຍານຂອງຈຸລັງມະເລັງ [ສຳລັບຜູ້ທີ່ມີການກາຍພັນນັ້ນ]. ມັນບໍ່ແມ່ນການຮັກສາ, ແຕ່ແມ່ນຢາອັດສະຈັນທີ່ສາມາດຫົດຕົວ … ເນື້ອງອກ ໄດ້ຢ່າງວ່ອງໄວ. … ໜ້າເສຍດາຍທີ່ໃນທີ່ສຸດ ຮ່າງກາຍກໍພົບທາງກັບຄືນຈົນໄດ້, ແລະ ມະເລັງກໍກັບຄືນມາ. … ແຕ່ຂ້ອຍຮູ້ສຶກຄືກັບວ່າ ມີຄົນຍື່ນຊີວິດໃຫ້ຂ້ອຍຕື່ມຫລາຍເດືອນ. ແລະ ນັ້ນອາດເປັນສິ່ງໃດ? … ລະດູຮ້ອນໜຶ່ງຕື່ມ? ຊ່ວງເທດສະການວັນຢຸດອື່ນອີກກັບລູກໆຂອງຂ້ອຍ? ຂ້ອຍໄດ້ຮ້ອງໄຫ້ເມື່ອຂ້ອຍເປີດອີເມວ ແລະ ໄດ້ຂອບຄຸນພຣະເຈົ້າສຳລັບເຊີໄພ້ທີ່ດີທີ່ສຸດທີ່ຂ້ອຍເຄີຍໄດ້ຮັບ.”14
ອາລິສາໄດ້ຮັບເວລາທີ່ມີຄ່າຕື່ມກັບຄອບຄົວຂອງນາງ. ນາງໄດ້ແບ່ງປັນປະສົບການທີ່ຄອບຄົວຂອງພວກເຂົາໄດ້ມີ ຂະນະທີ່ມອບຂອງຂວັນຄຣິດສະມາດທີ່ບໍ່ປະສົງອອກນາມໃຫ້ກັບເພື່ອນບ້ານຄົນໜຶ່ງ. ມັນສະແດງໃຫ້ເຫັນວ່າ ທຸກໆລາຍລະອຽດຂອງການໃຫ້ຂອງຂວັນຂອງເຮົາ ອາດບໍ່ສົມບູນແບບສະເໝີໄປ. ນາງໄດ້ຂຽນວ່າ:
“ພວກເຮົາໄດ້ວາງຂອງຂວັນ … ລັບໄວ້ ມື້ຄືນກ່ອນ. ພວກເດັກນ້ອຍໄດ້ວາງແຜນການຫລົບໜີ ແລະ ບ່ອນລີ້ທີ່ດີທີ່ສຸດ.
“‘ແຕ່ຖ້າຫາກເຂົາເຈົ້າເຫັນພວກເຮົາ …’ ແຊມໄດ້ເວົ້າຢ່າງຈິງຈັງ, ແລະ ອີກສອງຄົນກໍໂນ້ມຕົວເຂົ້າຢ່າງກັງວົນໃຈ. ‘ພວກເຮົາຄວນຈະມີກ້ອນຫິມະຢູ່ໃນມືຂອງພວກເຮົາ.’
“ເຈມສ໌ເຂົ້າໃຈແລ້ວ. ‘ໂອເຄ, ໄດ້. ເພື່ອໃຫ້ມັນຖືກປະຕູເພື່ອປິດມັນແມ່່ນບໍ່?’
“‘ບໍ່,’ [ແຊມຕອບ], ‘ພວກເຮົາຈະໃຫ້ມັນຖືກໜ້າເຂົາເຈົ້າ.’”15
ອາລິສາໄດ້ແບ່ງປັນການແລກປ່ຽນທີ່ອ່ອນໂຍນຍິ່ງກວ່າກັບລູກຊາຍຫລ້າຂອງນາງ, ລຸກ, ຜູ້ທີ່ອາຍຸພຽງແຕ່ຫົກປີໃນຕອນນັ້ນ. ນາງໄດ້ຂຽນວ່າ:
“ຄືນນີ້ ຂະນະທີ່ພວກເຮົາກຳລັງນອນຢູ່ຕຽງຂອງລາວທີ່ສ່ອງແສງດ້ວຍໄຟແສງສີເປັນແຖວຢູ່ເທິງປ່ອງຢ້ຽມຂອງລາວ, ຂ້ອຍໄດ້ຖາມລາວວ່າ … , ‘ເອົາລະ, ລູກຢາກຂໍ … ຫຍັງ?’
“‘ອໍ, ລູກຄິດບາງຢ່າງອອກແລ້ວ.’
“‘ໂອ້?’
“‘ມັນສາມາດຖືກໃຊ້ໄດ້ທຸກໆລະດູການ.’
“‘ໂອ້?’
“ການຢຸດຊົ່ວຄາວທີ່ໜ້າຕື່ນຕາ. ‘ອ້ອມກອດ ແລະ ຈູບຈາກແມ່.’
“ນັ້ນສົມຄວນໄດ້ຮັບ 100 ຈູບນ້ອຍໆ ແລະ ອ້ອມກອດໝີໃຫຍ່ໆຄາທີ່. ‘ລຸກ ຄົນໂງ່ເອີຍ, ລູກສາມາດຮັບສິ່ງນັ້ນໄດ້ຕະຫລອດເວລາ!’
“ແຕ່ຂະນະທີ່ຂ້ອຍຍ່າງອອກຈາກປະຕູໄປ ຫົວໃຈຂອງຂ້ອຍກໍຊຸດລົງໜ້ອຍໜຶ່ງ. ຂ້ອຍເດົາວ່າ ມັນອາດຈະບໍ່ແມ່ນຄວາມຈິງສະເໝີໄປ. ຂ້ອຍຮູ້ສຶກກະຕັນຍູຫລາຍທີ່ປີນີ້ ລາວສາມາດມີສິ່ງນັ້ນ ແລະ ຂອງຂວັນເຊັ່ນກັນ.”16
ຂ້າພະເຈົ້າຮູ້ສຶກປະທັບໃຈເປັນພິເສດກັບຄວາມຄິດຂອງອາລິສາກ່ຽວກັບຄວາມຫວັງກ່ຽວກັບຄຣິດສະມາດ. ນາງໄດ້ຂຽນວ່າ:
“ຂ້ອຍຮູ້ສຶກຕຶງໃຈກັບຄວາມຫວັງໃນເທດສະການນີ້. ຂະນະທີ່ຂ້ອຍຄິດກ່ຽວກັບການອັດສະຈັນຂອງພຣະຄຣິດ ແລະ ຂອງຂວັນຫລາຍໆຢ່າງຂອງພຣະເຈົ້າ, ຂ້ອຍຮູ້ສຶກເຖິງຄວາມຫວັງສຳລັບທຸກຢ່າງ ແລະ ທຸກຄົນ. ມັນບໍ່ຈຳເປັນຕ້ອງເປັນຄວາມຫວັງຊະນິດທີ່ວ່າ ທຸກຢ່າງຈະສົມບູນແບບ, ແຕ່ແມ່ນວ່າ ທຸກຢ່າງຈະເປັນໄປດ້ວຍດີ, ແລະ ໃນທີ່ສຸດ ຄວາມດີຈະມີໄຊ. ໃນຊີວິດຂອງເຮົາທຸກຄົນ. ຂ້ອຍບໍ່ຄິດວ່າ ມັນສາຍເກີນໄປສຳລັບການອັດສະຈັນ, ສຳລັບການປ່ຽນແປງ, ສຳລັບສັນຕິສຸກ. ຂ້ອຍເຊື່ອສິ່ງນັ້ນແທ້ໆ ເລິກລົງໄປທາງໃນ ແລະ ທົ່ວທັງໝົດ. ຂ້ອຍຍອມຮັບວ່າ ມັນເບິ່ງຄືວ່າງ່າຍກວ່າທີ່ຈະຮູ້ສຶກເຖິງຄວາມຫວັງນີ້ສຳລັບຄົນອື່ນ, ແຕ່ຍາກກວ່າທີ່ຈະນຳມັນມາໃຊ້ກັບໂຕເອງ. ແຕ່ຂ້ອຍກຳລັງຮຽນຮູ້. ‘ເຊື່ອໃນທຸກສິ່ງ, ຫວັງໃນທຸກສິ່ງ, ອົດທົນຕໍ່ທຸກສິ່ງ.’ ລຽບງ່າຍ. ງົດງາມ.”
ເມື່ອເວົ້າເຖິງລູກຊາຍຂອງນາງແລ້ວ, ນາງໄດ້ເວົ້າຕື່ມວ່າ, “ໃນວັນຄຣິດສະມາດ ອີບ ເຈມສ໌ໄດ້ຫລິ້ນ [ເພງຄຣິດສະມາດໃຫ້ຂ້ອຍຟັງ ແລະ ຂ້ອຍ] ມັກຂໍ້ຄວາມໃນເພງນີ້ວ່າ:
ຊາວຄຣິດສະຕຽນທີ່ດີເອີຍ, ຈົ່ງປິຕິຍິນດີ
ດ້ວຍຫົວໃຈ, ແລະ ຈິດວິນຍານ, ແລະ ສຽງ;
ບັດນີ້ ເຈົ້າບໍ່ຕ້ອງຢ້ານຂຸມຝັງສົບ:
ສັນຕິສຸກ! ສັນຕິສຸກ!
ພຣະເຢຊູຄຣິດໄດ້ມາກຳເນີດເພື່ອຊ່ວຍໃຫ້ລອດ!
ເອີ້ນເຈົ້າຄົນໜຶ່ງ, ແລະ ເອີ້ນເຈົ້າທຸກຄົນ,
ໃຫ້ມາຮັບຫ້ອງໂຖງອັນເປັນນິດ:
ພຣະຄຣິດໄດ້ມາກຳເນີດເພື່ອຊ່ວຍໃຫ້ລອດ!
ພຣະຄຣິດໄດ້ມາກຳເນີດເພື່ອຊ່ວຍໃຫ້ລອດ!”17
ພຣະອົງໄດ້ມາກຳເນີດເພື່ອຊ່ວຍໃຫ້ລອດ. ເພື່ອຊ່ວຍທ່ານ ແລະ ເພື່ອຊ່ວຍຂ້າພະເຈົ້າໃຫ້ລອດ. ຊ່າງເປັນຂອງຂວັນທີ່ບໍ່ສາມາດປຽບທຽບໄດ້ ທີ່ສາມາດຖືກມອບໃຫ້ໂດຍພຣະອົງເທົ່ານັ້ນ. ບໍ່ວ່າສະພາບການປະຈຸບັນຂອງເຮົາຈະເປັນແນວໃດກໍຕາມ, ຂໍໃຫ້ເຮົາສຳຜັດເຖິງຂອງຂວັນຂອງພຣະອົງໃນຊີວິດຂອງເຮົາຢ່າງເຕັມທີ່ ໃນຊ່ວງເທດສະການຄຣິດສະມາດນີ້.
ໃນພຣະນາມຂອງພຣະເຢຊູຄຣິດ, ອາແມນ.