ພຣະຄຣິດ, ພຣະຜູ້ຊ່ວຍໃຫ້ລອດຂອງເຮົາ, ໄດ້ມາກຳເນີດ

ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2023

ແກຣິດ ດັບເບິນຢູ ກອງ

ແຫ່ງກຸ່ມອັກຄະສາວົກສິບສອງ

ວັນອາທິດ, ວັນທີ 3 ເດືອນທັນວາ, 2023

ອ້າຍເອື້ອຍນ້ອງທີ່ຮັກແພງ, ສຸກສັນວັນຄຣິດສະມາດ!

ພວກເຮົາກະຕັນຍູທີ່ໄດ້ມາເຕົ້າໂຮມຮ່ວມກັບຝ່າຍປະທານສູງສຸດທີ່ຮັກແພງຂອງພວກເຮົາ ໃນລາຍການໃຫ້ຄຳດົນໃຈ ເນື່ອງໃນໂອກາດເທດສະການບຸນຄຣິດສະມາດນີ້. ບໍ່ວ່າທ່ານຈະຢູ່ບ່ອນໃດໃນຊ່ວງເທດສະການຄຣິດສະມາດນີ້, ຂໍໃຫ້ທ່ານຈົ່ງຮູ້ສຶກເຖິງຄວາມຮັກຂອງພຣະເຈົ້າ ຂະນະທີ່ເຮົາສະເຫລີມສະຫລອງພຣະເຢຊູຄຣິດ ໃນຖານະຫົວໃຈຂອງຄຣິດສະມາດ.

ຄຣິດສະມາດເປັນຊ່ວງເວລາແຫ່ງດົນຕີ, ກິ່ນ ແລະ ລົດຊາດ, ຄວາມຄາດຫວັງ ແລະ ຄວາມມີນ້ຳໃຈ. ຊ່ວງເວລາແຫ່ງການເຕົ້າໂຮມ, ບໍ່ວ່າເຮົາຈະຢູ່ໃກ້ ຫລື ໄກ.

ສ່ວນຫລາຍຄຣິດສະມາດກາຍເປັນຄຣິດສະມາດ ເມື່ອເຮົານຳຄວາມສຸກໃນຄຣິດສະມາດມາສູ່ຜູ້ອື່ນຢ່າງງຽບໆ. ຫລາຍຄອບຄົວເປັນຕົວແທນໃຫ້ແຊນຕາ. ຫລາຍໆຄົນສ່ອງແສງໂລກດ້ວຍແສງສະຫວ່າງຂອງພຣະເຢຊູຄຣິດ.

ຄວາມຊົງຈຳຄຣິດສະມາດທີ່ຈື່ຈຳໄດ້ຄືຄວາມຊົງຈຳຄຣິດສະມາດທີ່ສ້າງຂຶ້ນໃໝ່. ການປະຕິບັດຊ້ຳດົນນານ, ຄວາມຊົງຈຳຄຣິດສະມາດຈະກາຍເປັນປະເພນີ, ຊຶ່ງສາມາດເຮັດໃຫ້ເຮົາຮັກພຣະເຢຊູຄຣິດເລິກເຊິ່ງຫລາຍຂຶ້ນ—ພຣະເມສານ້ອຍຂອງພຣະເຈົ້າ, ພຣະບຸດຂອງພຣະບິດານິລັນດອນ, ພຣະຜູ້ຊ່ວຍໃຫ້ລອດຂອງໂລກ.¹

ຖ້າຫາກທ່ານມີຄວາມຊົງຈຳທີ່ທ່ານໂປດປານ, ຂໍໃຫ້ທ່ານດື່ມດ່ຳກັບສິ່ງເຫລົ່ານັ້ນຢ່າງມີຄວາມສຸກໃນເທດສະການນີ້. ຖ້າຫາກທ່ານກຳລັງສ້າງປະເພນີຄຣິດສະມາດຢູ່, ຂໍໃຫ້ມັນຈົ່ງເຮັດໃຫ້ຄວາມຮັກຂອງທ່ານທີ່ມີຕໍ່ພຣະເຢຊູຄຣິດເລິກເຊິ່ງຫລາຍຂຶ້ນ ແລະ ອວຍພອນທ່ານໃນແຕ່ລະປີ.

ຂ້າພະເຈົ້າຂໍແບ່ງປັນປະເພນີຄຣິດສະມາດຂອງຄອບຄົວກອງທີ່ໂປດປານສາມຢ່າງຊິໄດ້ບໍ?

ຢ່າງທີໜຶ່ງ, ແຕ່ລະປີ, ຊິດສະເຕີກອງກັບຂ້າພະເຈົ້າມັກເບິ່ງເຄື່ອງປະດັບຄຣິດສະມາດເກົ່າ ຊຶ່ງບອກເລົ່າເລື່ອງລາວຄອບຄົວຂອງພວກເຮົາ.

ສະໄໝເປັນຄູ່ສາມີພັນລະຍາໜຸ່ມສາວ, ຊິດສະເຕີກອງກັບຂ້າພະເຈົ້າໄດ້ເຂົ້າມະຫາວິທະຍາໄລຢູ່ປະເທດອັງກິດ. ພວກເຮົາໄດ້ອາໄສຢູ່ເຮືອນຫ້ອງແຖວຂະໜາດນ້ອຍ ທີ່ມີງົບປະມານນັກສຶກສາທີ່ຈຳກັດ. ພວກເຮົາໄດ້ນັບເງິນໝາກເຊັນຂອງພວກເຮົາ ກ່ອນຈະຊື້ຕົ້ນຄຣິດສະມາດນ້ອຍໆ ແມ່ນແຕ່ ຊາລີ ບຣາວ ກໍຍັງຄົງຮູ້ສຶກອີດູຕົນນຳ.

ມີຄວາມຄິດສ້າງສັນສະເໝີ, ຊິດສະເຕີກອງໄດ້ໃຊ້ໄມ້ໜີບຜ້າເຮັດເຄື່ອງປະດັບເປັນຫຸ່ນທະຫານອັງກິດນ້ອຍສຳລັບຕົ້ນຄຣິດສະມາດຂອງພວກເຮົາ. ລາວໄດ້ໃສ່ໝວກຂົນແກະສີດຳ ແລະ ຮອຍຍິ້ມໃຫ້ແຕ່ລະຄົນ.

ເປັນເວລາ 43 ປີ, ທີ່ທະຫານອັງກິດໄມ້ໜີບຜ້າ ໄດ້ຢືນໃຫ້ຄວາມສົນໃຈຕໍ່ຕົ້ນຄຣິດສະມາດຂອງພວກເຮົາ. ເຂົາເຈົ້າເຕືອນພວກເຮົາໃຫ້ນຶກເຖິງຄຣິດສະມາດຄັ້ງທຳອິດຂອງພວກເຮົາ—ຫ່າງໄກຈາກບ້ານ—ແລະ ຄຣິດສະມາດແຕ່ລະຄັ້ງຕໍ່ຈາກນັ້ນມາ.

ຄອບຄົວຂອງລູກຊາຍຂອງພວກເຮົາໄດ້ເຮັດຫຸ່ນເອ້ຈາກໄມ້ໜີບຜ້າ “ນ້ອຍໆ” ເຫລົ່ານີ້. ມັນເປັນຕົວແທນໃຫ້ຜູ້ສອນສາດສະໜາທົ່ວໂລກ. ທ່ານສາມາດເຫັນຮອຍຍິ້ມຂອງເຂົາເຈົ້າບໍ່? ເຫັນການແຕ່ງກາຍແບບສາກົນບໍ? ເຫັນບັດຊື່ບໍ? ຂ້າພະເຈົ້າຖືກບອກວ່າ ມີອັນໜຶ່ງທີ່ຖືກເຮັດໃຫ້ເໝືອນຂ້າພະເຈົ້າ.

ເຄື່ອງເອ້ຄຣິດສະມາດຂອງພວກເຮົາຊ່ວຍຟື້ນຄວາມຊົງຈຳອັນອົບອຸ່ນຂອງໝູ່ເພື່ອນ ແລະ ປະສົບການໃນສະຖານທີ່ຕ່າງໆ. ຂະບວນແຫ່ແຫ່ງຄວາມຊົງຈຳຄຣິດສະມາດທີ່ສະໜຸກສະໜານ ແລະ ຄັດເລືອກມາໃນແຕ່ລະປີ ເຮັດໃຫ້ເຮົາຍິ້ມໄດ້.

ສາດສະດາແອວມາເປັນພະຍານວ່າ ແຜ່ນດິນໂລກເຄື່ອນທີ່ໃນຮູບແບບປົກກະຕິບົ່ງບອກວ່າ ມີພຣະເຈົ້າ. ຄຣິດສະມາດເປັນຈຸດທີ່ຄຸ້ນເຄີຍໃນການໂຄຈອນຄົບຮອບດວງຕາເວັນຂອງໂລກ 365¼ ວັນຕໍ່ປີ. ເນື່ອງຈາກການໝຸນວຽນປະຈຳປີນີ້ ໄດ້ເຮັດໃຫ້ເຮົາກັບໄປສູ່ເທດສະການຄຣິດສະມາດ, ຂ້າພະເຈົ້າຄິດເຖິງສິ່ງທີ່ນັກຂຽນ ອີ ບີ ໄວ້ ໄດ້ຂຽນກ່ຽວກັບ “The Ring of Time.”²

ເພິ່ນແນະນຳວ່າ ພຽງແຕ່ປະສົບການເທົ່ານັ້ນທີ່ເຮົາຈະເຂົ້າໃຈ “ເວລາບໍ່ໄດ້ເຄື່ອນທີ່ເປັນວົງມົນແທ້ໆເລີຍ.” ວົງແຫວນແຫ່ງເວລາອາດເບິ່ງຄືກັບວ່າ “ຖືກປະກອບຢ່າງສົມບູນແບບ, ບໍ່ປ່ຽນແປງ, ຄາດເດົາໄດ້, ປາດສະຈາກການເລີ່ມຕົ້ນ ຫລື ສິ້ນສຸດ.” ແຕ່ເມື່ອເຮົາຍັງນ້ອຍເທົ່ານັ້ນທີ່ເຮົາຈິນຕະນາການໄດ້ວ່າ ເຮົາສາມາດສ້າງວົງມົນທີ່ສົມບູນແບບ ແລະ ບໍ່ມີອາຍຸແກ່ກວ່າຕອນທີ່ເຮົາເລີ່ມຕົ້ນ.

ສຳລັບຂ້າພະເຈົ້າແລ້ວ, ການມາຂອງຄຣິດສະມາດແຕ່ລະຄັ້ງຈະຄືກັນ ແຕ່ຈະບອກໂດຍທາງອ້ອມວ່າ ເວລາ (ແລະ ສະຖານທີ່) ສາມາດເປັນເສັ້ນຊື່ ແລະ ວົງມົນພ້ອມໆກັນ. “ທາງຄັບ ແລະ ແຄບ”³ ແລະ “ໜຶ່ງຮອບນິລັນດອນ”⁴ ສາມາດເປັນຄຳອະທິບາຍທີ່ສົມບູນແບບກ່ຽວກັບຄວາມເປັນຈິງຂອງພັນທະສັນຍາທີ່ຕັ້ງຢູ່ໃນກຸມມານນ້ອຍພຣະຄຣິດທີ່ເບັດເລເຮັມໄດ້.

ດ້ວຍວິທີນີ້, ສຳລັບຂ້າພະເຈົ້າແລ້ວ, ສ່ວນໜຶ່ງຂອງຄວາມອັດສະຈັນໃຈຂອງຄຣິດສະມາດ ແມ່ນການເປັນເດັກນ້ອຍ ແລະ ເປັນຜູ້ໃຫຍ່ໃນເວລາດຽວກັນ. ເຮົາຍິນດີໃນຖານະທີ່ເປັນຜູ້ໃຫຍ່ ໃນສິ່ງທີ່ຕອນນີ້ເຮັດໃຫ້ເດັກທີ່ເຮົາເຄີຍເປັນພໍໃຈ. ແລະ ເຮົາຍິນດີກັບເດັກ ຂະນະທີ່ເຮົາສ້າງ ແລະ ສ້າງຊ້ຳຄວາມຊົງຈຳ ແລະ ປະເພນີນຳກັນ.

ປະເພນີຄຣິດສະມາດທີ່ໂປດປານຢ່າງທີສອງຂອງຄອບຄົວກອງແມ່ນການຈັດສະແດງສາກຮາງຫຍ້າຂອງຄອບຄົວພວກເຮົາ, ຫລື ສາກເລື່ອງລາວການກຳເນີດ—ຊຶ່ງເປັນພາບການກຳເນີດຂອງກຸມມານນ້ອຍພຣະຄຣິດທີ່ບໍລິສຸດ.

ທ່ານມັກສາກເລື່ອງລາວການກຳເນີດທີ່ສຸມໃສ່ພຣະເຢຊູຄຣິດ, ເຊື້ອເຊີນໃຫ້ເຮົາເຮັດເຊັ່ນດຽວກັນຫລືບໍ່? ດັ່ງທີ່ຜູ້ສອນສາດສະໜາຄົນໜຶ່ງທີ່ຫາກໍກັບບ້ານ ໄດ້ກ່າວວ່າ, “ກ່ອນການເຜີຍແຜ່ຂອງຂ້ານ້ອຍ, ພຣະເຢຊູຄຣິດໄດ້ເປັນສ່ວນໜຶ່ງໃນຊີວິດຂອງຂ້ານ້ອຍ. ບັດນີ້ ພຣະອົງເປັນຊີວິດຂອງຂ້ານ້ອຍ.”

ສາກຮາງຫຍ້າຂອງຄອບຄົວພວກເຮົາມີທຸກຂະໜາດ ແລະ ທຸກສະພາບແວດລ້ອມ ເທົ່າທີ່ຈະຈິນຕະນາການໄດ້, ເຮັດຈາກວັດຖຸທຸກຢ່າງເທົ່າທີ່ຈະຈິນຕະນາການໄດ້, ຈາກທຸກບ່ອນເທົ່າທີ່ຈະຈິນຕະນາການໄດ້. ສາກຮາງຫຍ້າແຕ່ລະຊຸດເປັນພະຍານເຖິງພຣະເຢຊູຄຣິດ ແລະ ເປັນພອນໃຫ້ແກ່ທຸກປະຊາຊາດ, ທຸກຕະກຸນ, ທຸກພາສາ, ແລະ ທຸກຜູ້ຄົນທັງປວງ.

ເຮົາມັກທີ່ລູກໆຂອງພຣະເຈົ້າໃນທຸກບ່ອນພັນລະນາເຖິງກຸມມານນ້ອຍເຢຊູ, ມາຣີ, ໂຢເຊັບ, ພວກໂຫລາຈານ, ພວກຜູ້ລ້ຽງແກະ, ແລະ ສັດຕ່າງໆກັບສະພາບແວດລ້ອມ, ລັກສະນະ, ແລະ ລາຍລະອຽດທີ່ຄຸ້ນເຄີຍ ແລະ ກ່ຽວຂ້ອງກັນ. ສາກຮາງຫຍ້າເຫລົ່ານີ້ກໍຍັງເຕືອນເຮົາວ່າ ພຣະເຈົ້າຮັກລູກໆທຸກຄົນຂອງພຣະອົງ; ເຮົາເຫັນຄວາມຮັກຂອງພຣະເຈົ້າໄດ້ໃນລັກສະນະຂອງສາກຮາງຫຍ້າ ແລະ ສາກເລື່ອງລາວການກຳເນີດຂອງເຮົາ ບໍ່ວ່າມັນຈະມາຈາກໃສກໍຕາມ.

ປະເພນີຄຣິດສະມາດທີ່ໂປດປານຢ່າງທີສາມຂອງຄອບຄົວກອງ, ນອກເໜືອຈາກການອ່ານເລື່ອງລາວພຣະຄຳພີກ່ຽວກັບການກຳເນີດຂອງພຣະຜູ້ຊ່ວຍໃຫ້ລອດນຳກັນແລ້ວ, ກໍຄືການອ່ານເລື່ອງຂອງ ຊານ ດິກເກັນສ໌ A Christmas Carol ອອກສຽງເປັນຄອບຄົວ.

ຖ້າຫາກຂ້າພະເຈົ້າມັດຜ້າພັນຄໍ ແລະ ສວມໝວກທົງສູງ, ທ່ານລອງຈິນຕະນາການ, ຈັກບຶດໜຶ່ງ, ວ່າຂ້າພະເຈົ້າເປັນ ເອເບເນເຊີ ສະກຣູດຈ໌ ໃນ A Christmas Carol ຊິໄດ້ບໍ?

ບາງປີ, ຄອບຄົວຂອງພວກເຮົາຈະອ່ານ A Christmas Carol ຈາກຕົ້ນຈົນຈົບ. ພວກເຮົາຄົນນ້ຳຊັອກໂກແລັດຮ້ອນ ດ້ວຍໄມ້ເທົ້າເຂົ້າໜົມ ແລະ ຫົວກັບການອ້າງອີງເຖິງ “Norfolk biffins” ແລະ “smoking bishop.” ພວກເຮົາຂົນໜາວລຸກຂະນະທີ່ ຜີຂອງເຈກັບ ມາເລ ກະທົບໂສ້ຂອງມັນ. ພວກເຮົາຮູ້ສຶກຍິນດີທີ່ວິນຍານແຫ່ງຄຣິດສະມາດໃນອະດີດ, ປະຈຸບັນ, ແລະ ອະນາຄົດ ຊ່ວຍໃຫ້ ເອເບເນເຊີ ສະກຣູດຈ໌ ກາຍເປັນຄົນໃໝ່.

ບາງປີ, ຄອບຄົວຂອງພວກເຮົາກໍອ່ານ A Christmas Carol, ສະບັບຫຍໍ້ ຊຶ່ງຫຍໍ້ໂດຍລູກໄພ້ກັບລູກຊາຍຂອງພວກເຮົາ ເພື່ອໃຫ້ເໝາະສົມກັບຊ່ວງຄວາມສົນໃຈທີ່ສັ້ນກວ່າຂອງສະມາຊິກຄອບຄົວທີ່ອາຍຸນ້ອຍກວ່າ.

ແລະ ບາງປີ, ດ້ວຍຮອຍຍິ້ມ ແລະ ອາລົມດີ, ຄອບຄົວຂອງພວກເຮົາຈະອ່ານເລື່ອງ A Christmas Carol ແບບອ່ານສະຕິກເກີຕິດລົດ. ມັນມີພຽງສອງແຖວ: “ບາ, ຮຳບັກ” ແລະ “ຂໍພຣະເຈົ້າອວຍພອນເຮົາທຸກຄົນ.”

ຊານ ດິກເກັນສ໌ ໄດ້ເລີ່ມຕົ້ນຂຽນເລື່ອງ A Christmas Carol ໃນເດືອນຕຸລາ ແລະ ໄດ້ສຳເລັດໃນຕົ້ນເດືອນທັນວາ ປີ 1843—ເປັນໄລຍະເວລາພຽງແຕ່ຫົກອາທິດເທົ່ານັ້ນ. ສະບັບຊຸດທຳອິດ 6,000 ຫົວໄດ້ຖືກຈັດພິມໃນກຸງລອນດອນ ໃນວັນທີ 19 ເດືອນທັນວາ, 1843. ທຸກເຫລັ້ມຂາຍໝົດພາຍໃນວັນຄຣິດສະມາດ ອີບ.

ຜູ້ທີ່ບັນທຶກຄວາມເປັນມາຂອງ A Christmas Carol ອະທິບາຍວ່າ ຊານ ດິກເກັນສ໌ ໄດ້ຂຽນໃນຊ່ວງເວລາທີ່ອັງກິດໃນຍຸກວິກຕໍເຣຍກຳລັງພິຈາລະນາຄວາມໝາຍຂອງຄຣິດສະມາດອີກຄັ້ງ. ເທດສະການຄຣິດສະມາດ, ຕົ້ນຄຣິດສະມາດ, ຄຳທັກທາຍຄຣິດສະມາດ, ການເຕົ້າໂຮມຂອງຄອບຄົວໃນວັນຄຣິດສະມາດ, ບັດຄຣິດສະມາດ, ແມ່ນແຕ່ເພງຄຣິດສະມາດ ສາມາດມີ ຫລື ຄວນມີໃນສັງຄົມແນວໃດ?

ໃນຊ່ວງເວລາທີ່ຫລາຍຄົນຮູ້ສຶກບໍ່ໝັ້ນຄົງ, ໂດດດ່ຽວ, ແລະ ດຽວດາຍ, ເລື່ອງ A Christmas Carol ຂອງດິກເກັນສ໌ ກ່າວເຖິງຄວາມປາດຖະໜາຢ່າງເລິກເຊິ່ງຕໍ່ມິດຕະພາບ, ຄວາມຮັກ, ແລະ ການຍຶດໝັ້ນໃນຄຸນຄ່າຂອງຄຣິດສະຕຽນ, ຍ້ອນວ່າ ເອເບເນເຊີ ສະກຣູດຈ໌ ໄດ້ພົບສັນຕິສຸກ ແລະ ການປິ່ນປົວໃນອະດີດ, ປະຈຸບັນ, ແລະ ອະນາຄົດຂອງລາວ.

ແລ້ວ ໃນເວລານີ້, ຄວາມໝາຍທີ່ແທ້ຈິງຂອງຄຣິດສະມາດກໍດຶງເຮົາໃຫ້ເຂົ້າໃກ້ພຣະເຢຊູຄຣິດຫລາຍຂຶ້ນ, ກຳເນີດເປັນກຸມມານນ້ອຍໃນຮາງຫຍ້າ. ພຣະເຢຊູຄຣິດຮູ້ຕາມທາງແຫ່ງເນື້ອໜັງວ່າຈະຊ່ວຍເຮົາດ້ວຍອຸທອນທີ່ເຕັມໄປດ້ວຍຄວາມເມດຕາແນວໃດ. ແລ້ວໃນເວລານີ້, ຄຣິດສະມາດສະເຫລີມສະຫລອງການເປັນສ່ວນໜຶ່ງຂອງພັນທະສັນຍາ, ການມີສ່ວນຮ່ວມ, ແລະ ຊຸມຊົນໃນພຣະເຢຊູຄຣິດ ແລະ ກັນແລະກັນ.

ຂ້າພະເຈົ້າຂໍຖາມຄຳຖາມ A Christmas Carol ທີ່ແຕກຕ່າງໜຶ່ງຂໍ້. ເປັນຫຍັງ, ເມື່ອເຮົາຄິດກ່ຽວກັບ ສະກຣູດຈ໌, ເຮົາຈະນຶກເຖິງຄົນຂີ້ໜຽວຂີ້ໂມໂຫເປັນຫລັກ, ຄົນທີ່ເຍາະເຍີ້ຍຄຣິດສະມາດວ່າເປັນການສິ້ນເປືອງຢ່າງຫລວງຫລາຍ?

ເປັນຫຍັງເຮົາຈຶ່ງບໍ່ຮັບຮູ້ສະກຣູດຈ໌ ຄົນໃໝ່ຫລາຍກວ່າ? ສະກຣູດຈ໌ ຄົນໃໝ່, ຜູ້ໃຈດີທີ່ສົ່ງໄກ່ງວງໂຕໃຫຍ່ທີ່ສຸດໄປໃຫ້ເປັນຂອງເຊີໄພ້ວັນຄຣິດສະມາດ? ສະກຣູດຈ໌ ຄົນໃໝ່, ຜູ້ທີ່ໄດ້ຄືນດີກັບ ເຟຣດດີ ຫລານຊາຍທີ່ລ່າເລີງຂອງລາວ? ສະກຣູດຈ໌ ຄົນໃໝ່, ຜູ້ໄດ້ຂຶ້ນເງິນເດືອນໃຫ້ ບອບ ແຄຣດ ຈິດ ແລະ ດູແລ ທ້າວໄທນີ ທິມ?

ປ່ອຍໃຫ້ພວກທີ່ບໍ່ເຊື່ອເຍາະເຍີ້ຍ. ສະກຣູດຈ໌ ຄົນໃໝ່ “ໄດ້ເຮັດມັນທັງໝົດ, ແລະ ຫລາຍກວ່ານັ້ນ.” ລາວໄດ້ກາຍເປັນຄົນດີ ແລະ ເປັນເພື່ອນທີ່ດີ ດັ່ງທີ່ໂລກເກົ່າຮູ້.

ສະນັ້ນ ເປັນຫຍັງເຮົາຈຶ່ງບໍ່ຈື່ທ່ານ ສະກຣູດຈ໌ ຄົນນັ້ນ? ມີຜູ້ໃດບໍທີ່ຢູ່ອ້ອມຕົວເຮົາ, ບາງທີຕົວເຮົາເອງ, ຜູ້ທີ່ອາດຈະເປັນຄົນແຕກຕ່າງ ຖ້າຫາກເຮົາພຽງແຕ່ຈະຢຸດສັນນິຖານ ຫລື ລະບຸລວມວ່າ ເຂົາເປັນຄົນແບບເກົ່າ?

ບໍ່ມີບຸກຄົນໃດ ແລະ ບໍ່ມີຄອບຄົວໃດທີ່ສົມບູນແບບ. ເຮົາແຕ່ລະຄົນມີຂໍ້ບົກພ່ອງ ແລະ ຄວາມຜິດ—ສິ່ງທີ່ເຮົາປາດຖະໜາຈະເຮັດໃຫ້ດີຂຶ້ນ. ຄຣິດສະມາດນີ້, ບາງທີເຮົາສາມາດໄດ້ຮັບ—ແລະ ສະເໜີມອບ—ຂອງປະທານອັນລ້ຳຄ່າຂອງພຣະເຢຊູຄຣິດແຫ່ງການປ່ຽນແປງ ແລະ ການກັບໃຈ, ການມອບຂອງປະທານເຫລົ່ານັ້ນໃຫ້ຄົນອື່ນ ແລະ ຕົວເຮົາເອງ.

ຂໍໃຫ້ເຮົາຈົ່ງສ້າງສັນຕິສຸກກັບປີທີ່ຜ່ານມາ. ຈົ່ງປ່ອຍວາງຄວາມກັງວົນທາງອາລົມ ແລະ ສຽງດັງ, ຄວາມຂັດແຍ້ງ ແລະ ຄວາມລຳຄານ ທີ່ວຸ້ນວາຍຊີວິດຂອງເຮົາ. ຂໍໃຫ້ເຮົາມອບຄວາມເປັນໄປໄດ້ໃໝ່ໆໃຫ້ກັນແລະກັນ ແທນທີ່ຈະຍຶດຕິດຢູ່ກັບຂໍ້ຈຳກັດໃນອະດີດ. ມາເປີດໂອກາດໃຫ້ສະກຣູດຈ໌ ຄົນໃໝ່ໃນຕົວເຮົາແຕ່ລະຄົນເພື່ອປ່ຽນແປງ.

ພຣະຜູ້ຊ່ວຍໃຫ້ລອດຂອງເຮົາໄດ້ມາໃນວັນຄຣິດສະມາດ ເພື່ອປົດປ່ອຍຊະເລີຍ—ແລະ ບໍ່ພຽງສະເພາະຜູ້ທີ່ຢູ່ໃນຄຸກເທົ່ານັ້ນ. ພຣະອົງສາມາດປົດປ່ອຍເຮົາຈາກຜີໃນອະດີດ, ປົດເຮົາຈາກຄວາມເສຍໃຈກັບບາບຂອງເຮົາ ແລະ ຂອງຜູ້ອື່ນ. ພຣະອົງສາມາດໄຖ່ເຮົາຈາກການເອົາແຕ່ໃຈຕົວເອງ ແລະ ຄວາມເຫັນແກ່ຕົວຂອງເຮົາ ຜ່ານທາງການເກີດໃໝ່ໃນພຣະອົງ.

ເພາະວ່າໃນວັນນີ້ ອົງພຣະຜູ້ໂຜດຊ່ວຍໃຫ້ພົ້ນອົງໜຶ່ງ, ຄືພຣະຄຣິດ [ອົງເປັນພຣະຜູ້ເປັນເຈົ້າ] ໄດ້ມາບັງເກີດ … ສຳລັບ ເຈົ້າ.”⁵

ສະນັ້ນ ສຸກສັນວັນຄຣິດສະມາດ!

ຂໍໃຫ້ປະເພນີຄຣິດສະມາດ ແລະ ຄວາມຊົງຈຳຂອງທ່ານຈົ່ງສຸກສັນ ແລະ ສົດໃສ.

ຂໍໃຫ້ເຮົາຈົ່ງປິຕິຍິນດີໃນພຣະເຢຊູຄຣິດ, ໃນວັນຄຣິດສະມາດ ແລະ ທຸກໆວັນ.

ຂ້າພະເຈົ້າເປັນພະຍານເຖິງພຣະອົງດ້ວຍຄວາມສຸກ ໃນພຣະນາມອັນສັກສິດ ແລະ ບໍລິສຸດຂອງພຣະອົງ, ພຣະເຢຊູຄຣິດ, ອາແມນ.