“ຈົ່ງມາສັກກາລະພຣະອົງ”

ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ປີ 2023

ຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ວັນອາທິດ, ວັນທີ 3 ເດືອນທັນວາ, 2023

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຊ່າງມີຄວາມສຸກຫລາຍແທ້ໆ ທີ່ໄດ້ເລີ່ມຕົ້ນເທດສະການບຸນຄຣິດສະມາດອີກຄັ້ງເມື່ອເຮົາລະນຶກເຖິງການກຳເນີດມາຂອງພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ອົງພຣະເຢຊູຄຣິດເຈົ້າ.

ນັ້ນແມ່ນເຫດການທີ່ສັກສິດ ທຸກໆ ຄັ້ງທີ່ເດັກນ້ອຍຄົນໜຶ່ງໄດ້ເກີດມາ. ຈົ່ງເບິ່ງປະຕິກິລິຍາຂອງເຫລນຊາຍຄົນໜຶ່ງຂອງພວກເຮົາຂະນະທີ່ລາວໄດ້ອູ້ມແອນ້ອຍນ້ອງຊາຍຂອງລາວເປັນຄັ້ງທຳອິດ.

[ວິດີໂອ]

ບໍ່ເປັນໜ້າປະຫລາດໃຈເລີຍທີ່ໃນຄືນອັນສັກສິດທີ່ສຸດເມື່ອຫລາຍກວ່າ 2,000 ປີຜ່ານມາ ໃກ້ກັບເມືອງນ້ອຍໆຂອງເບັດເລເຮັມ, ເຫລົ່າທູດສະຫວັນໄດ້ຮ້ອງເພງດ້ວຍຄວາມຊື່ນຊົມ! ທູດອົງໜຶ່ງໄດ້ສິດສອນພວກຜູ້ລ້ຽງແກະເຖິງຄວາມຈິງອັນງົດງາມນີ້ວ່າ:

“ຈົ່ງເບິ່ງ, ເຮົານຳຂ່າວດີມາບອກໃຫ້ພວກເຈົ້າຮູ້, ເປັນຂ່າວທີ່ນຳຄວາມຊົມຊື່ນຍິນດີອັນໃຫຍ່ ມາສູ່ປະຊາຊົນທັງໝົດ.

“ເພາະວ່າໃນວັນນີ້ [ພຣະຜູ້ຊ່ວຍໃຫ້ລອດ] ອົງໜຶ່ງ ຄືພຣະຄຣິດ ໄດ້ມາບັງເກີດຢູ່ໃນເມືອງຂອງດາວິດ ສຳລັບເຈົ້າທັງຫລາຍ.”¹

ແລະ ບັດນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, “ຈົ່ງມາສັກກາລະພຣະອົງ.”²

ເຊັ່ນດຽວກັນກັບຫລາຍໆທ່ານ, ບຸນຄຣິດສະມາດໄດ້ມີການປ່ຽນແປງສຳລັບຂ້າພະເຈົ້າຕະຫລອດຫລາຍປີທີ່ຜ່ານມາ. ຄວາມຊົງຈຳໃນໄວເດັກຂອງຂ້າພະເຈົ້າຖືກຝັງຢູ່ຜ້າສາກເບື້ອງຫລັງຂອງພາວະເສດຖະກິດຕົກຕ່ຳໃນຊ່ວງຊຸມປີ 1930. ເງິນກໍຫາຍາກ. ຂອງຂວັນກໍເລີຍມີຄຸນຄ່າເປັນພິເສດ.

ພໍ່ແມ່ຂອງຂ້າພະເຈົ້າໄດ້ເຮັດໃຫ້ບຸນຄຣິດສະມາດເປັນສິ່ງອັດສະຈັນສຳລັບຂ້າພະເຈົ້າ ແລະ ອ້າຍເອື້ອຍນ້ອງຂອງຂ້າພະເຈົ້າ. ໃນແຕ່ລະປີພວກເຮົາກໍໄດ້ກາຍເປັນ “ຕົວແທນແຊນຕາ” ໃຫ້ກັບຄອບຄົວໜຶ່ງ. ພວກເຮົາໄດ້ກະກຽມຂອງຂວັນທີ່ເໝາະສົມ ແລະ ເອົາໄປໃຫ້ເຂົາເຈົ້າໃນວັນຄຣິດສະມາດ ອີບ. ຂະນະທີ່ພວກເຮົາຂັບລົດອອກຈາກບ້ານຂອງເຂົາເຈົ້າໄປ, ການໂບກມືອຳລາ ແລະ ໃບໜ້າທີ່ຫລັ່ງນ້ຳຕາຂອງເຂົາເຈົ້າໄດ້ນຳຄວາມສຸກທີ່ແທ້ຈິງຂອງການໃຫ້ມາສູ່ພວກເຮົາ.

ຂ້າພະເຈົ້າມັກເພງຄຣິດສະມາດໃນຕອນນັ້ນ—ແລະ ຕອນນີ້ກໍຍັງມັກຢູ່. ທຸກໆປີ, ຊິດສະເຕີແນວສັນ ແລະ ຂ້າພະເຈົ້າມັກຈະຟັງເພງ ແລະ ຮ້ອງເພງນຳກັນ ໃນເພງຂອງທ່ານແຮນແດວ ຊື່ວ່າ Messiah [ພຣະເມຊີອາ]. ຂ້າພະເຈົ້າມັກຄວາມໝາຍໃນພາສາເຮັບເຣີ ຂອງຄຳວ່າ ອາເລລູຢາ. ມັນໝາຍຄວາມວ່າ “ສັນເສີນພຣະເຈົ້າພຣະຜູ້ເປັນເຈົ້າພຣະເຢໂຮວາ.”³ ຖ້ອຍຄຳທີ່ຮ້ອງໃນບົດປະພັນນີ້ບໍ່ພຽງແຕ່ຖືກຮ້ອງໃຫ້ເຂົ້າກັບການກຳເນີດຂອງພຣະຜູ້ເປັນເຈົ້າເທົ່ານັ້ນ ແຕ່ໃຊ້ກັບຍຸກການປົກຄອງໃນຊ່ວງພັນປີຂອງພຣະອົງນຳອີກ.

ເດັກ​ນ້ອຍ​ຜູ້​ໜຶ່ງ​ຈະ​ເກີດ​ມາ​ເພື່ອ​ພວກ​ເຮົາ,
ຈະ​ປະ​ທານ​ບຸດ​ຊາຍ​ຜູ້​ໜຶ່ງ​ໃຫ້​ແກ່​ພວກ​ເຮົາ:
ແລະ ພຣະ​ອົງ​ຈະ​ເປັນ​ຜູ້​ປົກ​ຄອງ​ພວກ​ເຮົາ:
ແລະ ພຣະ​ນາມ​ຂອງ​ພຣະ​ອົງ​ຈະ​ຖືກ​ເອີ້ນ​ວ່າ ຜູ້​ປະ​ເສີດ, ຜູ້​ປຶກ​ສາ,
ພຣະ​ເຈົ້າ​ຜູ້​ຊົງ​ລິດ​ທາ​ນຸ​ພາບ,
ພຣະ​ບິ​ດາ​ຜູ້​ເປັນ​ນິດ,
ອົງ​ສັນ​ຕິ​ລາດ.4

ມັນເປັນຊ່ວງໄວໜຸ່ມຂອງຂ້າພະເຈົ້າທີ່ຂ້າພະເຈົ້າເລີ່ມໄດ້ຮັບປະຈັກພະຍານອັນເລິກເຊິ່ງເຖິງພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ. ຂ້າພະເຈົ້າຮູ້ດ້ວຍຕົວເອງວ່າພຣະເຢຊູຄຣິດໄດ້ກຳເນີດຈາກນາງມາຣີຍິງພົມມະຈາລີ, ຜູ້ທີ່ເປັນ “ພາຊະນະທີ່ປະເສີດ ແລະ ຖືກເລືອກໄວ້ແລ້ວ.”⁵ ຂ້າພະເຈົ້າຮູ້ວ່າພຣະອົງ ຄື ພຣະບຸດຂອງພຣະເຈົ້າແທ້ໆ⁶ ແລະ ເປັນຈຸດສູນກາງໃນປະຫວັດສາດຂອງມະນຸດຊາດ ທັງໝົດ.

ໃຫ້ຄິດເບິ່ງກ່ຽວກັບຜົນສຳເລັດອັນຍິ່ງໃຫຍ່ຂອງພຣະເຢຊູຄຣິດທີ່ເຮົາບໍ່ສາມາດເຂົ້າໃຈໄດ້—ທັງໝົດແມ່ນເປັນໄປຕາມພຣະປະສົງຂອງພຣະບິດາຂອງພຣະອົງ! ພຣະເຢຊູຊົງເປັນພຣະເຈົ້າຢູ່ແລ້ວໃນຕອນທີ່ພຣະອົງໄດ້ສະເດັດຈາກສະຫວັນມາສູ່ໂລກ ເພື່ອເຮັດຄວາມສຳເລັດທີ່ສຳຄັນທີ່ສຸດສຳລັບເຮົາແຕ່ລະຄົນ. ຄວາມສຳເລັດນັ້ນຄືການຊ່ວຍຊີວິດ ແລະ ປ່ຽນແປງຊີວິດ. ຄວາມສຳເລັດທີ່ບໍ່ມີໃຜໃນເຮົາຈະເຮັດໄດ້ດ້ວຍຕົວເຮົາເອງ.

ພຣະຜູ້ຊ່ວຍໃຫ້ລອດ “[ໄດ້] ທົນກັບຄວາມເຈັບປວດ ແລະ ຄວາມທຸກທໍລະມານ ແລະ ຖືກລໍ້ລວງໃນທຸກຮູບແບບ”⁷ ເພື່ອພຣະອົງຈະຮູ້ຈັກ “ຕາມທາງຂອງເນື້ອໜັງວ່າ ຈະຊ່ວຍເຫລືອ [ເຮົາ] ຕາມຄວາມບົກພ່ອງຂອງ [ເຮົາ] ໄດ້ແນວໃດ.”⁸

ໃນຊ່ວງສອງສາມເດືອນຜ່ານມາ, ຂ້າພະເຈົ້າໄດ້ຮຽນຮູ້ຫລາຍຂຶ້ນກ່ຽວກັບຄວາມເຈັບປວດ ແລະ ອິດທິພົນຂອງການຫລໍ່ຫລອມຂອງມັນ. ຫົວໃຈຂອງຂ້າພະເຈົ້າໄດ້ຫຍັບອອກໄປຫາພຣະຜູ້ຊ່ວຍໃຫ້ລອດໃນຂະນະທີ່ຂ້າພະເຈົ້າໄດ້ພະຍາຍາມຈິນຕະນາການເຖິງຂອບເຂດຄວາມທຸກທໍລະມານຂອງພຣະອົງ. ຈິດໃຈມະຕະຂອງຂ້າພະເຈົ້າກໍບໍ່ສາມາດເຂົ້າໃຈໄດ້ເລີຍວ່າພຣະອົງຊົງຮັບເອົາຄວາມເຈັບປວດ ທັງໝົດ, ຄວາມຜິດບາບ ທັງໝົດ, ຄວາມທໍລະມານ ທັງໝົດ, ແລະ ຄວາມທຸກ ທັງໝົດ ຂອງ ທຸກຄົນ ທີ່ເຄີຍມີຊີວິດຢູ່ ມາໄວ້ກັບພຣະອົງໄດ້ແນວໃດ!

ໃນການກະທຳແຫ່ງຄວາມເມດຕາອັນສຸດຂີດທີ່ຂັດກັບຄວາມເຂົ້າໃຈ ຫລື ການອະທິບາຍຂອງມະນຸດ, ພຣະຜູ້ຊ່ວຍໃຫ້ລອດພຣະອົງເອງໄດ້ຍອມຈຳນົນຕໍ່ຄວາມເຈັບປວດທາງວິນຍານ ແລະ ທາງຮ່າງກາຍທີ່ບໍ່ມີຫຍັງທຽບໄດ້.

ເຮົາເຄົາລົບກຸມມານນ້ອຍແຫ່ງເບັດເລເຮັມຢ່າງແນ່ແທ້ ເນື່ອງຈາກວ່າຕໍ່ມາພຣະອົງໄດ້ຖວາຍການເສຍສະລະທີ່ບໍ່ສາມາດເຂົ້າໃຈໄດ້ ແລະ ບໍ່ມີຂອບເຂດ ຢູ່ໃນສວນເຄັດເຊມາເນ ແລະ ຢູ່ເທິງໄມ້ກາງແຂນທີ່ພູກະໂຫລກຫົວ. ການຖວາຍນີ້ໄດ້ໄຖ່ເຮົາແຕ່ລະຄົນເມື່ອເຮົາເລືອກທີ່ຈະກັບໃຈ ແລະ ຕິດຕາມພຣະອົງ. ຈາກນັ້ນ, ດັ່ງທີ່ພຣະອົງໄດ້ປະຕິບັດຢູ່ເທິງແຜ່ນດິນໂລກຢ່າງດີເດັ່ນ, ພຣະອົງຊົງລຸກຂຶ້ນຈາກອຸບມຸງໃນມື້ທີສາມ, ໂດຍປະທານພອນແຫ່ງການຟື້ນຄືນຊີວິດຫລັງຄວາມຕາຍຢ່າງທີ່ບໍ່ເຄີຍມີມາກ່ອນໃຫ້ກັບເຮົາແຕ່ລະຄົນ.

ໃນຊ່ວງເທດສະການນີ້, ເຮົາມັກຈະຮ້ອງເພງ ຫລື ກ່າວຢ່າງມີຄວາມສຸກວ່າ, “ສຸກສັນວັນຄຣິດສະມາດ.” ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຄວາມປາດຖະໜາຈາກໃຈຂອງຂ້າພະເຈົ້າທີ່ມີຕໍ່ທ່ານແຕ່ລະຄົນໃນຄ່ຳຄືນນີ້ມີຫລາຍອົງປະກອບ. ແທ້ຈິງແລ້ວ, ມັນບໍ່ແມ່ນຄວາມ ປາດຖະໜາ ຂອງຂ້າພະເຈົ້າສຳລັບທ່ານ; ແຕ່ມັນຄື ຄຳອະທິຖານ ຂອງຂ້າພະເຈົ້າສຳລັບທ່ານ ໃນເວລາທີ່ສັກສິດຂອງບຸນຄຣິດສະມາດນີ້.

ກ່ອນອື່ນ, ຂ້າພະເຈົ້າອະທິຖານວ່າທ່ານຈະຮູ້ສຶກເຖິງຄວາມຮັກອັນເລິກເຊິ່ງ ແລະ ເປັນນິລັນດອນຂອງພຣະຜູ້ຊ່ວຍໃຫ້ລອດຂອງເຮົາທີ່ມີຕໍ່ທ່ານເປັນການສ່ວນຕົວ. ພຣະເຢຊູຄຣິດໄດ້ຮູ້ຈັກກັບທ່ານຕັ້ງແຕ່ພົມມະຈັກກ່ອນເກີດ. ພຣະອົງຮູ້ຈັກ ແລະ ເຫັນທ່ານຢູ່ ປະຈຸບັນນີ້. ພຣະອົງເຫັນຄວາມສຸກ ແລະ ຄວາມໂສກເສົ້າຂອງທ່ານ. ພຣະອົງໄດ້ປະສົບກັບມັນທັງໝົດມາກ່ອນແລ້ວ.

ພຣະອົງມີຄວາມເມດຕາຢ່າງສົມບູນຕໍ່ການດີ້ນລົນຂອງທ່ານ ແລະ ປິຕິຍິນດີທຸກຄັ້ງທີ່ທ່ານມຸ້ງໜ້າຕໍ່ໄປໃນຄວາມຊອບທຳ, ໃນຊ່ວງເວລາທີ່ດີ ແລະ ບໍ່ດີ.

ຂ້າພະເຈົ້າອະທິຖານວ່າທ່ານຈະໄດ້ຮັບປະຈັກພະຍານສ່ວນຕົວດ້ວຍຕົວເອງວ່າພຣະເຢຊູ ຄື ພຣະບຸດຂອງພຣະເຈົ້າ, ວ່າພຣະອົງເຕັມໄປດ້ວຍອຳນາດຂອງພຣະເຈົ້າ, ແລະ ເນື່ອງຈາກການເສຍສະລະຊົດໃຊ້ອັນຍິ່ງໃຫຍ່ຂອງພຣະອົງ, ທ່ານຈຶ່ງບໍ່ຈຳເປັນຕ້ອງຮູ້ສຶກວ່າ ທ່ານຈະຕ້ອງ ປະເຊີນໜ້າ ກັບຄວາມທ້າທາຍທີ່ຍາກລຳບາກໃນຊີວິດຕາມລຳພັງ. ຂະນະທີ່ທ່ານໝັ່ນຂໍ, ໝັ່ນຊອກ, ແລະ ໝັ່ນເຄາະຢ່າງຈິງໃຈ,⁹ ທ່ານຈະສາມາດເຂົ້າເຖິງອຳນາດຂອງພຣະອົງໄດ້ຢ່າງບໍ່ຢຸດຢັ້ງ ເພື່ອຊ່ວຍເຫລືອທ່ານ, ເສີມສ້າງຄວາມເຂັ້ມແຂງໃຫ້ກັບທ່ານ, ແລະ ປິ່ນປົວທ່ານ.¹⁰

ຂ້າພະເຈົ້າອະທິຖານວ່າທ່ານຈະໃຊ້ປະໂຫຍດຈາກການຊົດໃຊ້ຂອງພຣະຜູ້ຊ່ວຍໃຫ້ລອດຢ່າງເຕັມທີ່ໂດຍການກັບໃຈໃນທຸກວັນ, ເຮັດໃຫ້ຊີວິດຂອງທ່ານບໍລິສຸດຫລາຍຂຶ້ນ, ແລະ ສະແຫວງຫາການນຳພາຈາກສະຫວັນໃນທຸກສິ່ງທີ່ທ່ານເຮັດ. ໃນອີກຄຳໜຶ່ງ, ຂ້າພະເຈົ້າອະທິຖານຂໍໃຫ້ທ່ານປະສົບກັບຄວາມສຸກໃນການຄິດກ່ຽວກັບຊັ້ນສູງຕະຫລອດເວລາ.

ຂ້າພະເຈົ້າອະທິຖານເຊັ່ນກັນວ່າທ່ານຈະໃຊ້ຊ່ວງເວລາຂອງເທດສະການວັນພັກນີ້ເພື່ອເລີ່ມຕົ້ນເທດສະການແຫ່ງການນະມັດສະການສ່ວນຕົວທີ່ຍິ່ງໃຫຍ່ຫລາຍຂຶ້ນ. ເລີ່ມຕົ້ນໃໝ່ກ່ຽວກັບການສຶກສາຄຳສອນ ແລະ ການຊົດໃຊ້ຂອງພຣະເຢຊູຄຣິດ. ບໍ່ມີໃຜຢູ່ເທິງໂລກໃບນີ້ຮັກທ່ານໄດ້ເທົ່າກັບພຣະອົງ. ບໍ່ມີໃຜຢູ່ທີ່ນີ້ເຂົ້າໃຈທ່ານດີໄປກວ່າ ຫລື ຮູ້ຈັກຄວາມເສົ້າໂສກ ແລະ ຄວາມອ່ອນແອຂອງທ່ານຢ່າງແທ້ຈິງເທົ່າກັບພຣະອົງ. ບໍ່ມີໃຜຢູ່ເທິງໂລກໃບນີ້ມີອຳນາດເໝືອນກັບພຣະເຢຊູຄຣິດ. ບໍ່ມີໃຜຢູ່ທີ່ນີ້ກະຕືລືລົ້ນໃຫ້ທ່ານກາຍເປັນທຸກສິ່ງທີ່ທ່ານເຮັດໄດ້ເທົ່າກັບພຣະອົງ. ບໍ່ມີໃຜອ້ອນວອນຕໍ່ພຣະບິດາແທນທ່ານໄດ້ຄືກັບພຣະອົງ.

ອົງພຣະເຢຊູຄຣິດເຈົ້າ ຄືພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ພຣະອົງຄືພຣະບຸດຂອງພຣະເຈົ້າ, ພຣະຜູ້ບໍລິສຸດຂອງອິດສະຣາເອນ. ພຣະອົງຄືຜູ້ທີ່ພຣະເຈົ້າໄດ້ຫົດສົງ.¹¹ ພາຍໃຕ້ການຊີ້ນຳຂອງພຣະບິດາ, ພຣະອົງຄືພຣະຜູ້ສ້າງຂອງທຸກສິ່ງທີ່ຖືກສ້າງຂຶ້ນ.¹² ພຣະເຢຊູຄຣິດຄືພຣະເຢໂຮວາຜູ້ຍິ່ງໃຫຍ່, ພຣະເຈົ້າຂອງພຣະຄຳພີເດີມ.¹³ ພຣະອົງຄືເອມານູເອນທີ່ຖືກສັນຍາໄວ້.¹⁴ ພຣະອົງຄືແບບຢ່າງທີ່ຍິ່ງໃຫຍ່ຂອງເຮົາ¹⁵ ແລະ ເປັນຜູ້ວິງວອນນຳພຣະບິດາແທນເຮົາ.¹⁶ ຍ້ອນພຣະກິດຕິຄຸນຂອງພຣະອົງທີ່ຖືກຟື້ນຟູ, ພອນທັງໝົດແຫ່ງຖານະປະໂລຫິດຂອງພຣະອົງຈຶ່ງໄດ້ມີໃຫ້ກັບມະນຸດທັງໝົດ ເມື່ອເຂົາເຈົ້າມາຫາພຣະອົງ ແລະ ຖືກເຮັດໃຫ້ດີພ້ອມໃນພຣະອົງ.

ອ້າຍເອື້ອຍນ້ອງທັງຫລາຍ, ຂໍໃຫ້ເຮົາຈົ່ງດຳລົງຊີວິດຕາມວິນຍານແຫ່ງ “ອາເລລູຢາ,” ສັນເສີນພຣະເຈົ້າພຣະຜູ້ເປັນເຈົ້າພຣະເຢໂຮວາຢູ່ສະເໝີ. ໃນເທດສະການບຸນຄຣິດສະມາດທີ່ສະຫງ່າລາສີນີ້, ຈົ່ງມາສັກກາລະພຣະອົງ, ພຣະຄຣິດອົງເປັນພຣະຜູ້ເປັນເຈົ້າ!

ຂ້າພະເຈົ້າຮູ້ວ່າ ພຣະເຈົ້າຊົງພຣະຊົນຢູ່! ພຣະເຢຊູຄືພຣະຄຣິດ! ນີ້ແມ່ນສາດສະໜາຈັກຂອງພຣະອົງ. ພຣະອົງຊົງຊີ້ນຳການຟື້ນຟູພຣະກິດຕິຄຸນຂອງພຣະອົງຢ່າງຕໍ່ເນື່ອງ. ຂ້າພະເຈົ້າເປັນພະຍານເຖິງສິ່ງນີ້ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.