“Chalqo chixnimankil”
2023 Li ch’utam re Ralankil re li Xb’eenil Awa’b’ejil
Domingo, 3 diciembre, 2023
Ex raarookil was wiitz’in, k’a’jo’ xsahilal xtikib’ankil jun chik xhoonalil li Ralankil naq naqaninq’ehi lix yo’lajik laj Kolol qe ut aj Tojol qix, li Qaawa’ Jesukristo.
Jwal loq’ lix yo’lajik li junjunq chi k’uula’al. Ilomaq li kixk’ul jun reheb’ li ralal li qimam naq naxq’alu xb’een sut li riitz’in.
[video]
Ak re naq sa’ li q’ojyin q’axal sant li kiwan numenaq 2000 mil chihab’ chaq nach’ sa’ li ch’ina tenamit Belen, ke’b’ichan li teep re choxa xbʼaan xsahilebʼ xchʼool! Jun li anjel kixk’ut li xnimal ru na’leb’ a’in chiruheb’ laj ilol karneer:
“Tinye eere jun chaab’il esilal, ut a’an jun xnimal sahil ch’oolej choq’ re chixjunil li tenamit
“Anajwan sa’ lix tenamit laj David, xyo’laak choq’ eere jun aj Kolonel, a’an li Kristo, li Qaawa’.”1
Ut anajwan, ex raarookil was wiitz’in, “Chalqo laa’o chixnimankil.”2
Jo’ naab’alex eere, yoo chi jalaak li Ralankil choq’ we chiru xnumikeb’ li chihab’. Naq toj ka’ch’inin, najultiko’ we naq yooko chi nume’k chiru li nimla ch’a’ajkilal reheb’ li chihab’ 1930. Maak’a’ li tumin. Q’axal loq’eb’ li maatan.
Eb’ lin na’ inyuwa’ ke’xk’e naq jwal chaab’il li Ralankil choq’ we ut eb’ li was wiitz’in. Rajlal chihab’ kiqatenq’a jalan chik li junkab’al. Kiqakawresiheb’ li chaab’il maatan ut kiqaq’axtesiheb’ sa’ li santil q’ojyin. Naq yooko chi elk aran, kiqileb’ a’an chireek’asinkileb’ li ruq’, ut xya’aleb’ li ru kohe’xk’e chireek’ankil xtz’aqalil li sahilal li nachal rik’in k’ehok maatan.
Jwal ke’wulak chiwu li b’ich re Ralankil—ut toj neke’wulak chiwu. Rajlal chihab’, li Hermana Nelson ut laa’in nawulak chiqu rab’inkil ut xb’ichankil li b’ichanb’il aatin re El Mesias xb’aan laj Handel. Jwal nawulak chiwu lix yaalalil li aatin aleluya sa’ Hebreo. A’an naraj naxye “xnimankil ru li Qaawa’ Dios Jehova.”3 Eb’ li aatin li neke’b’ichaman sa’ li b’ichanb’il aatin a’in ink’a’ ka’ajwi’ neke’aatinak chirix lix yo’lajik li Qaawa’, chirix b’an ajwi’ lix wanjik jo’ rey chiru li jun mil chihab’:
Xb’aan naq yo’lajenaq choq’ qe jun li k’uula’al,
Kʼeebʼil chaq qe jun li alalbʼej:
Ut li jolomink tenamit taawanq saʼ xbʼeen xtel:
Ut aʼinaq lix kʼabʼaʼ: Aj sachol chʼoolej, Aj kʼehol naʼlebʼ,
Li Dios Kaw Xmetzʼew,
Li Yuwaʼbʼej li junelik taawanq,
Li Awaʼbʼej re Tuqtuukilal.4
Sa’ inch’ajomil kin’ok chixk’ulb’al jun xnawom inch’ool jwal cham chirix li Dios Yuwa’b’ej ut lix Raarookil Alal, Jesukristo. Kin’ok chixnawb’al naq li Jesukristo kiyo’la rik’in li tuq’ixq xMaria, li kiwan jo’ “jun li kʼulebʼaal loqʼ ut sikʼbʼil ru.”5 Kinnaw naq a’an li Ralal li Dios6 chi yaal ut naq a’an li ani nim xwankil sa’ chixjunil li resilal li winqilal.
K’oxlahomaq xnimal ru li kixb’aanu li Jesukristo—chixjunil a’ yaal li rajom lix Yuwa’! Li Jesus a’an ak wan jo’ jun Dios naq kixkub’si rib’ re chalk sa’ li ruchich’och’ re xtz’aqob’resinkil ru li k’anjel q’axal aajel ru choq’ qe. Jun k’anjel li nakolok yu’amej ut li najalok yu’amej. Jun k’anjel maa’ani chik sa’ qayanq kooru raj chixb’aanunkil.
Li Kolonel “kixnumsi li rahilal ut chʼaʼajkilal ut xyalbʼal rix, li jar paay wan”7 re naq tixnaw “saʼ li tzʼejwalej chanru xkʼeebʼal qatenqʼankil joʼ chanru xmajelal li qakawilal.”8
Chiruheb’ li po xe’nume’, naab’al kintzol chirix li rahilal ut lix wankilal aj saqob’resinel. Li waam yoo chixb’oqb’al li qaKolonel naq kinyal xk’oxlankil xnimal li rahilal kixk’ul a’an. Lin k’a’uxleb’aal ink’a’ naru naxtaw ru chan ru naq a’an kixk’ul sa’ xb’een chixjunil li rahilal, chixjunil li maak, chixjunil li yot’e’k, ut chixjunil li ch’a’ajkilal numsinb’il xb’aan chixjunileb’ li wanjenaqeb’ xyu’am!
Sa’ li xnimal ru b’aanuhom aj toq’ob’anel li ink’a’ naru chi tawe’k ru chi moko ch’olob’aak xb’aaneb’ li winq, li Kolonel kixq’axtesi rib’ chiru li rahilal q’axal nim sa’ musiq’ej ut tib’elej.
Naqoxloq’i li k’uula’al re Belen xb’aan naq moqon kixq’axtesi li xnimal ru ut junelikil mayej sa’ li awimq aran Getsemani ut chiru li krus aran sa’ li Calvario. Li mayej a’in naxtoj qix chiqajunjunqal wi naqasik’ ru xjalb’al qak’a’uxl ut xtaaqenkil a’an. Chirix a’an, rik’in xnimal ru xb’aanuhom sa’ ruchich’och’, a’an kiwakli chaq sa’ li muqleb’aal sa’ rox li kutan, ut kixq’axtesi re li junjunq qe li xnimal ru maatan re li wakliik chi yo’yo ut li yu’am chirix li kamk.
Chiruheb’ li kutan a’in, naqab’icha malaj naqaye chi kok’ aj xsa’: “Sahil Ralankil choq’ aawe.” Ex was wiitz’in, wankeb’ wiib’ oxib’ li rajom inch’ool choq’ eere chejunjunqalex chiru li ewu a’in. Relik chi yaal, moko yal wajom ta; nintz’aama b’an a’in choq’ eere chiru lix loq’laj q’ehil li Ralankil.
Xb’een, nintz’aama naq teereek’a lix chamal ut junelikil rahom li qaKolonel choq’ re li junjunq eere. Li Jesukristo ak naxnaw eeru rub’elaj naq xexyo’la sa’ li ruchich’och’ a’in. A’an naxnaw eeru ut nekexril anajwan. Naril lix sahil jo’ ajwi’ lix rahil eech’ool. A’an ak xnumsihom chixjunileb’ a’an.
Tz’aqal lix toq’ob’ahom chirix lee ch’a’ajkilal ut nasaho’ xch’ool rajlal sut naq neketiikisi eerib’ chi uub’ej sa’ tiikilal, sa’ xq’ehil li usilal jo’ ajwi’ li rahilal.
Nintz’aama naq teetaw xnawom eech’ool naq li Jesukristo a’an li Ralal li Dios, naq a’an nujenaq rik’in diosil wankilal, ut naq b’antiox re lix mayej aj tojol-ix, maajo’q’e tento teereek’a naq eejunes tento teenumsiheb’ lix ch’a’ajkilal li yu’am. Naq chi anchal eech’ool nekexpatz’ok, nekexsik’ok, ut nekextoch’ok,9 rajlal naru nekek’ul lix wankilal a’an re eetenq’ankil, eekawob’resinkil, ut eek’irtesinkil.10
Nintz’aama naq teeroksi chi anchal ch’oolej lix tojb’al rix li maak xb’aan li Kolonel rik’in xjalb’al eek’a’uxl wulaj wulaj, xsantob’resinkil lee yu’am, ut xsik’b’al li choxahil b’eresinkil sa’ chixjunil li nekeb’aanu. Sa’ jalan chik aatin, nintz’aama naq teek’ul xsahilal li xk’oxlankil rajlal li k’a’ru re choxa.
Nintz’aama ajwi’ naq teeroksiheb’ li kutan a’in re ok sa’ jun kutan re xnimal li loq’onink sa’ junesal. Tikib’omaq chi ak’il xtzolb’aleb’ lix k’utum li Jesukristo ut lix mayej re xtojb’al rix li maak. Maajun chik sa’ li ruchich’och’ jwal nekexxra chiru a’an. Maajun chik arin jwal naxtaw eeru chi moko naxnaw xrahil eech’ool ut xq’unal eemetz’ew. Maajun chik sa’ li ruchich’och’ wan xwankilal jo’ xwankilal li Jesukristo. Maajun chik arin jwal naroyb’eni naq texwulaq jo’ li ani naru texwulaq wi’. Maajun chik na’elajin chiru li Yuwa’b’ej sa’ lee k’ab’a’ jo’ naxb’aanu a’an.
Li Qaawa’ Jesukristo a’an aj Kolol qe ut aj Tojol qix. A’an li Ralal li Dios, lix Santil Dios laj Israel. A’an li Yulb’il.11 Chi b’eresinb’il xb’aan li Yuwa’b’ej, a’an laj yo’ob’tesihom re chixjunil li xyo’ob’tesiik.12 Li Jesukristo a’an li Nimla Jehova, li Dios re li Najter Chaq’rab’.13 A’an li yeechi’inb’il Emmanuel.14 A’an laj K’amol qab’e15 ut aj Aatinanel chiqix chiru li Yuwa’b’ej.16 Xb’aan lix evangelio li k’ojob’anb’il wi’chik, naru neke’k’ehe’ chixjunileb’ li rosob’tesihom li tijonelil reheb’ chixjunileb’ li kristiaan naq neke’chal rik’in a’an ut neke’tz’aqlok re ru rik’in.
Ex was wiitz’in, chiqayu’ami li musiq’ej re “aleluya,” xnimankil rajlal ru li Qaawa’ Dios Jehova. Chiru li xchaq’al ru Ralankil a’in, chalqo chixnimankil, li Kristo li Qaawa’!
Ninnaw naq yo’yo li Dios! Li Jesus a’an li Kristo! A’an a’in lix Iglees. A’an naxb’eresi lix k’ojob’ankil wi’chik lix evangelio. Ninch’olob’ xyaalal a’in sa’ lix loq’laj k’ab’a’ li Jesukristo, amen.