« Haere mai, ’ārue ana’e iāna »
Purera’a Noera a te Peresidenira’a Mātāmua nō 2023
Sābati 3 nō Tītema 2023
E tō’u mau taea’e ’e mau tuahine here, ’auē te ’oa’oa ’ia ha’amata i te tahi atu pu’e tau Noera ’ia fa’ahanahana ana’e tātou i te fānaura’a o tō tātou Fa’aora ’e tō tātou tāra’ehara, te Fatu ’o Iesu Mesia.
E ’ohipa mo’a i te mau taime ato’a e fānauhia te hō’ē tamari’i. ’A hi’o na i te huru o te hō’ē o tā māua hina a tāpe’a ai ’oia i tōna taea’e ’aiū nō te taime mātāmua.
Video
’E’ita e māerehia i taua ’āru’i mo’a roa ra, ’ua hau i te 2 000 matahiti, i pīha’i iho i te ’oire iti na’ina’i ra o Betelema, ’ua hīmene te mau nu’u o te ra’i ma te ’oa’oa ! ’Ua ha’api’i atu te hō’ē melahi i te mau tīa’i māmoe i teie parau mau nehenehe :
« Inaha ho’i e parau maita’i tā’u e hōpoi mai ia ’outou nei, ’o te riro ïa ’ei ’oa’oara’a nō te ta’ata ato’a.
« I na’uanei ho’i i fānau ai te Ora nō ’outou i te ’oire o Davida, ’oia ho’i te Mesia ra ’o te Fatu ».1
’E, i teienei, e au mau taea’e, e au mau tuahine here, « Haere mai, ’ārue ana’e iāna ».2
Mai ia ’outou e rave rahi, ’ua taui te noera iā’u i te roara’a o te mau matahiti. ’Ua nana’ohia tō’u mau ha’amana’ora’a tamari’i i roto i te ’ārepurepura’a rahi o te mau matahiti 1930. E mea varavara ria te moni. E mea faufa’a rahi ta’a’ē te mau tao’a hōro’a.
’Ua fa’ariro tō’u nā metua i te noera ’ei mea manamana nō’u ’e nō tō’u mau taea’e ’e mau tuahine. I te matahiti tāta’itahi, e riro mātou ’ei ’utuāfare « mono nō pāpā noera » nō te tahi atu ’utuāfare. E fa’aineine mātou i te mau tao’a hōro’a tano ’e e haere mātou e ’ōpere i te reira i te mahana noera. ’Ia fa’aru’e ana’e mātou i tō rātou fare, e fa’atupu tā rātou mau tā’iri’irira’a rima ’e tō rātou hōho’a mata ta’i, i te ’oa’oa mau o te hōro’ara’a, i roto ia mātou.
E mea au nā’u te mau pehe noera i terā ra tau—’e tē au noa nei ā vau. I te mau matahiti ato’a, e mea au roa nā māua te tuahine Nelson ’ia fa’aro’o ’e ’ia hīmene i Messiah [Mesia] nā Haendel. E mea au nā’u te aura’a o te ta’o hallelujah [Aleluia] i roto te reo hebera. Tōna aura’a ’oia ho’i, « ’ārue i te Fatu te Atua ’o Iehova ».3 Te mau parau i hīmenehia i roto i teie hīmene, e ’ere ïa nō ni’a ana’e i te fānaura’a o te Fatu nō ni’a ato’a rā i te fa’aterera’a tausani matahiti a te Mesia :
ʼUa fānau mai hoʼi te hōʼē tama nā tātou,
ʼUa hōro’ahia mai te hō’ē tamaiti nā tātou :
’Ei ni’a i tōna ra tapono te te hau vai ai ;
E ma’irihia tōna i’oa ’ia Hau ’ē, e a’o,
Te Atua pūai
Te Metua nō te u’i a muri atu
Te Ari’i nō te hau.4
I te mau matahiti a riro ai au ’ei feiā pa’ari ’āpī tō’u ha’amatara’a i te fa’ari’i i te hō’ē ’itera’a pāpū hōhonu nō ni’a i te Atua te Metua ’e i tāna tamaiti here, ’o Iesu Mesia. ’Ua ’ite au nā roto iā’u iho ē, ’ua fānauhia Iesu Mesia nā te pāretenia Maria, « e fa’ari’i maita’i ’e te mā’itihia ho’i ».5 ’Ua ’ite au ē e tamaiti mau ’oia nā te Atua6 ’e te ta’ata faufa’a roa’e i roto i te ’ā’amu ato’a o te ao nei.
’A feruri noa na i te ’ohipa rahi fāito ’ore tā Iesu Mesia i rave—te tā’āto’ara’a mai te au i te hina’aro ’o tōna Metua ! E Atua a’ena Iesu Jesus ’a fa’ari’i ai ’oia e haere mai i ni’a i te fenua nei nō te fa’atupu i te ’ohipa faufa’a rahi roa a’e nō tātou tāta’itahi. Hō’ē ’ohipa fa’ahiahia tei fa’aora ’e tei taui i te orara’a. Hō’ē ’ohipa fa’ahiahia e ’ore roa e ti’a i te hō’ē o tātou ’ia rave nō tātou iho.
’Ua fa’a’oroma’i te Fa’aora i « te māuiui ’e te mau ’ati, ’e te mau huru fa’ahemara’a ato’a »7 ’ia ’ite ’oia « nā roto i te tino i te rāve’a e fa’aora ai [ia tātou] i tō [tātou] paruparura’a ra ».8
I roto i nau ’āva’e i ma’iri a’e nei, ’ua rahi atu ā tō’u ’ite nō ni’a i te māuiui ’e te maita’i tāna e hōro’a mai. ’Ua hutihia tō’u māfatu i ni’a i tō tātou Fa’aora a tāmata ai au i te feruri i te fāito rahi o tōna māuiui. ’E’ita tō’u ferurira’a tāhuti e hāro’aro’a e mea nāhea ’oia i te ravera’a i ni’a iāna i te tā’āto’ara’a o te māuiui, te tā’āto’ara’a o te mau hara, te tā’āto’ara’a o te hepohepo, ’e te tā’āto’ara’a o te pe’ape’a o te mau ta’ata ato’a tei ora na !
I roto i te ’ohipa aroha teitei roa a’e ’e’ita te ferurira’a ta’ata ’e te tāhuti e hāro’aro’a, ’ua auraro te Fa’aora i te mamae fāito ore i te vārua ’e i te tino.
Tē fa’atura nei tātou i te ’aiū nō Betelehema nō te mea i muri a’era ’ua pūpū ’oia i te tusia fāito ’ore ’e te mure ’ore i roto i te ’ō nō Getesemane ’e i ni’a i te satauro nō kalavari. E fa’aora teie pūpūra’a ia tātou tāta’itahi mai te mea e mā’iti tātou ’ia tātarahapa ’e ’ia pe’e iāna. ’E, ’ei ’ohipa teitei roa a’e nāna i ni’a i te fenua nei, ’ua haere mai ’oia i rāpae i te mēnema i te toru o te mahana, ma te hōro’a ia tātou tāta’itahi i te ha’amaita’ira’a fāito ’ore o te ti’a-fa’ahou-ra’a ’e o te ora mure ’ore i muri a’e i te pohe.
I teie pu’e tau, pinepine tātou i te hīmene ma te ’oa’oa ’e i te parau ē, « Ia ’oa’oa i te Noera ». E tōʼu mau taeaʼe ʼe mau tuahine here ē, e rave tuha’a o te hina’aro o tō’u ’ā’au nō ’outou tāta’itahi i teie ’āru’i. Te ti’ara’a mau, e ’ere tō’u hina’aronō ’outou, tā’u rā purenō ’outou i teie taime mo’a nō te noera.
A tahi, tē pure nei au ’ia fāri’i ’outou i te here hōhonu ’e te mure ’ore o tō tātou Fa’aora nō ’outou. ’Ua ’ite Iesu Mesia ia ’outou mai te bāsileia hou te tāhuti nei. ’Ua ’ite ’oia ’e te hi’o mai nei ’oia ia ’outou i teienei. Tē ’ite mai nei ’oia i tō ’outou mau ’oa’oa ’e tō ’outou mau ’oto. ’Ua tupu tāta’itahi te reira i ni’a iāna.
E aroha maita’i roa tōna nō tā ’outou mau a’ora’a ’e e ’oa’oa ’oia i te mau taime ato’a e haere ’outou i mua i roto i te parau ti’a, i roto i te mau taime maita’i ’e i te mau taime ino.
Tē pure nei au ’ia fa’ari’i ’outou i tō ’outou iho ’itera’a pāpū ē, etamaiti ’o Iesu Mesia nā te Atua, ’ua ’ī ’oia i te pūai hanahana, ’e maoti tōna tusia tāra’ehara rahi, e ’ore roa ’outou e hina’aro ’ia ’ite ē, e tītauhia ia ’outou ’ia fa’aruruoutou ana’e i te mau tāmatara’a o te orara’a. Mai te mea e ani ’outou, e ’imi, ’e e pātōtō,9 ma te ’ā’au tae mau, e fa’ari’i tāmau ’outou i tōna mana nō te tauturu ia ’outou, ’ia ha’apūai ia ’outou ’e ’ia fa’aora ia ’outou.10
Tē pure nei au ’ia fāna’o hope roa ’outou i te tāra’ehara o te Fa’aora nā roto i te tātarahapara’a i te mau mahana ato’a, nā roto i te fa’arirora’a i tō ’outou orara’a hau atu i te vi’ivi’i ’ore, ’e nā roto i te ’imira’a i te arata’ira’a o te ra’i i roto i te mau mea ato’a tā ’outou e rave. Te aura’a ra, tē pure nei au ’ia fāri’i ’outou i te ’oa’oa o te ferurira’a tiretiera i te mau taime ato’a.
Tē pure ato’a nei au ’ia fa’a’ohipa ’outou i teie pu’e tau fa’afa’aeara’a nō te ha’amata i te hō’ē pu’etau ha’amorira’a rahi a’e nō ’outou iho. ’A ha’amata fa’ahou i te tuatāpapa i te mau ha’api’ira’a ’e te tāra’ehara a Iesu Mesia. ’Aore e ta’ata i ni’a i teie fenua e here ia ’outou mai iāna te huru. ’Aore e ta’ata i ’ōnei e hāro’aro’a maita’i a’e ia ’outou ’aore ato’a e ’ite maita’i a’e i tō ’outou mau ’oto ’e te mau paruparu. ’Aore e ta’ata i ni’a i te fenua nei tei fa’ari’i i te mana e mauhia nei e Iesu Mesia. ’Aore e ta’ata i ’ōnei tei hau atu te hina’aro ’ia riro mai ’outou mai te mau mea ato’a tā ’outou e hina’aro ia riro mai. ’Aore e ta’ata e tāparu i te metua nō tātou mai tāna e rave.
Te Fatu ’o Iesu Mesia tō tātou Fa’aora ’e Tāra’ehara. ’Oia te Tamaiti a te Atua, tei Mo’a i ’Īserā’ela. ’Oia tei fa’atāhinuhia.11 I raro a’e i te arata’iraa a te Metua, nāna i hamani i te mau mea ato’a i hāmanihia ra.12 Iesu Mesia, ’oia ’o Iehova, te Atua nō te Faufa’a Tahito.13 ’O ’oia te Imanuela i fafauhia mai.14 ’Oia tō tātou hi’ora’a rahi15 ’e tō tātou arai i te Metua.16 Maoti tāna ’evanelia i fa’aho’i-fa’ahou-hia mai, e nōa’a te mau ha’amaita’ira’a ato’a o tōna autahu’ara’a i te mau ta’ata ato’a mai te mea e haere atu rātou iāna ra ’e ’ua ha’amaita’ihia i roto iāna.
E te mau taea’e ’e e mau tuahine, e ora ana’e tātou i roto i te vārua o te « haleluia », ma te ’ārue tāmau noa i te Fatu Atua ’o Iehova. I teie pu’e tau hanahana nō Noera, haeremai, ’ārue ana’e iāna, te Mesia te Fatu !
’Ua ’ite au ē, tē ora nei te Atua ! ’O Iesu te Mesia ! Teie tāna ’Ēkālesia. Tē arata’i nei ’oia i te fa’aho’ira’a mai e tupu tāmau noa nei o tāna ’evanelia. Tē fa’a’ite pāpū nei au i te reira nā roto i te i’oa mo’a ’o Iesu Mesia ra, ’āmene.