10:29

អំណោយដែលមានតម្លៃមិនអាចកាត់ថ្លៃបាន

ការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយ ឆ្នាំ២០២៤

អេស ម៉ាក ផលម័រ

ក្នុងគណៈប្រធាននៃពួកចិតសិបនាក់

ថ្ងៃអាទិត្យ ទី៨ ខែធ្នូ ឆ្នាំ២០២៤

នារាត្រីនេះ ខ្ញុំក៏និយាយដោយអំណរ និងអស្ចារ្យអំពីសារៈសំខាន់ដ៏ពិសិដ្ឋនៃពិធីបុណ្យគ្រីស្ទម៉ាស់ផងដែរ ។ គ្មានព្រឹត្ដិការណ៍ណាមួយក្នុងប្រវត្តិសាស្ត្រពិភពលោកនេះដែលមានឥទ្ធិពលអស្ចារ្យជាងការប្រសូត និងបេសកកម្មរបស់ព្រះយេស៊ូវនៃណាសារ៉ែតកាលពីពីរពាន់ឆ្នាំមុននោះទេ ។ នៅក្នុងពិភពលោកសម័យទំនើបទាំងមូល ពេលវេលានេះត្រូវបានវាស់វែងពីព្រឹត្តិការណ៍អព្ភូតហេតុនេះ ។

ការប្រសូតនៃព្រះអម្ចាស់របស់យើងត្រូវបានប្រារព្ធតាមរបៀបផ្សេងៗគ្នាជាច្រើននៅជុំវិញពិភពលោក ប៉ុន្តែមានប្រពៃណីនៃពិធីបុណ្យគ្រីស្ទម៉ាស់មួយដែលហាក់ដូចជាមានលក្ខណៈសកល ។

ទំនៀមទម្លាប់នេះទំនងជាចាប់ផ្ដើមដោយដំណើររឿងក្នុងម៉ាថាយអំពីពួកអ្នកប្រាជ្ញពីទិសខាងកើតមកថ្វាយបង្គំព្រះយេស៊ូវ ។ នៅពេលពួកគេមកដល់ ពួកគេបាននាំយកអំណោយដ៏មានតម្លៃ ។ សព្វថ្ងៃនេះ ប្រពៃណីនៃការជូនអំណោយគឺជាផ្នែកដ៏សំខាន់មួយនៃការប្រារព្ធពិធីបុណ្យគ្រីស្ទម៉ាស់ ។

អនុស្សាវរីយ៍ដំបូងរបស់ខ្ញុំអំពីអំណោយនាបុណ្យគ្រីស្ទម៉ាស់ គឺកាំភ្លើងជ័រក្មេងលេងដែលមានឆ្នុកគ្រាប់ចងជាប់នឹងខ្សែ និងម៉ាស៊ីនអាចធ្វើឲ្យសត្វទាផ្អើលបាន ។ នេះគឺជាសេចក្តីសុខសម្រាប់ក្មេងអាយុបួនឆ្នាំ ។ ខ្ញុំពិតជារំភើបចិត្តនឹងបាញ់កាំភ្លើងដែលឮសូរផែសៗរបស់ខ្ញុំពីចម្ងាយប្រាំមួយអ៊ិញ ហើយសត្វទាដែលដើរទ្រេតទ្រោតជារង្វង់មួយនៅលើឥដ្ឋ នោះវាពិតជាមិនមានឱកាសគេចពីការបាញ់របស់ខ្ញុំឡើយ ។ ប៉ុន្តែ មិនយូរប៉ុន្មានប្រដាប់ក្មេងលេងនោះបានខូច ហើយដូចជាសម្ភារទូទៅទាំងអស់ដែរ សុភមង្គលដែលវាបានផ្តល់ឲ្យគឺគ្រាន់តែបណ្តោះអាសន្ន ហើយត្រូវបានបំភ្លេចចោលយ៉ាងឆាប់រហ័ស ។

នារាត្រីនេះ ខ្ញុំសូមណែនាំអំណោយចំនួនបីដែលយើងម្នាក់ៗអាចជូននៅក្នុងរដូវកាលបុណ្យគ្រីស្ទម៉ាស់នេះ ហើយពេញមួយជីវិតយើង ដែលនឹងមិនត្រឹមតែនាំមកនូវសុភមង្គលបណ្តោះអាសន្ននោះទេ ប៉ុន្តែផ្ទុយទៅវិញនឹងនាំមកនូវអំណរដ៏ពិត និងយូរអង្វែង ។

ទីមួយ គឺអំណោយនៃទីបន្ទាល់ នេះគឺជាអំណោយផ្ទាល់ខ្លួនដែលបង្ហាញពីអារម្មណ៏ដ៏ជ្រាលជ្រៅបំផុតនៃព្រលឹងរបស់យើង នៅពេលដែលវាត្រូវបានចែកចាយឲ្យដោយសេរី និងដោយគ្មានកំហុស ។ មានតម្លៃជាងមាស កំញាន ឬជ័រល្វីងទេស ទីបន្ទាល់ដ៏បរិសុទ្ធអំពីព្រះយេស៊ូវគ្រីស្ទ ជាព្រះអង្គសង្គ្រោះ និងជាព្រះប្រោសលោះផ្ទាល់ខ្លួនយើង គឺជាចំណុចសំខាន់នៃអ្វីទាំងអស់ដែលយើងប្រារព្ធនៅពិធីបុណ្យគ្រីស្ទម៉ាស់ ។

នៅពេលកូនប្រាំមួយនាក់របស់យើងនៅក្មេង ជេកគី និងខ្ញុំបានសម្រេចចិត្តនៅយប់មួយថា សម្រាប់រាត្រីជួបជុំក្រុមគ្រួសារ ជំនួសឲ្យការរៀនមេរៀន ពួកយើងគួរតែចែកចាយទីបន្ទាល់ជាមួយគ្នាទៅវិញទៅមកវិញ ។ បន្ទាប់ពីខ្ញុំបានចែកចាយទីបន្ទាល់របស់ខ្ញុំហើយ កូនស្រីដ៏ជាទីស្រឡាញ់របស់យើង ឆែលសៀ ដែលប្រហែលជាអាយុ ១៦ឆ្នាំនៅពេលនោះ បាននិយាយដោយបើកភ្នែកធំៗថា « ប៉ា កូនមិនដែលបានស្ដាប់ទីបន្ទាល់របស់ប៉ាពីមុនមកទេ ! » ។ ខ្ញុំរាងភ្ញាក់ផ្អើលបន្តិច និងចាប់អារម្មណ៍ចំពោះពាក្យសម្តីរបស់នាង ។ ដូចបងប្អូនដឹងហើយ នៅគ្រានោះខ្ញុំធ្វើជាប្រធានស្តេក ហើយដឹងថា ឆែលសៀ បានឮខ្ញុំថ្លែងទីបន្ទាល់រាប់មិនអស់នៅក្នុងបរិយាកាសនៃព្រះវិហារជាច្រើន និងនៅឯផ្ទះ ។ ប៉ុន្តែបែរជាពេលនោះ នាងថែមទាំងបានឮ ហើយទទួលអារម្មណ៍ពីទីបន្ទាល់របស់ខ្ញុំ តែហាក់ដូចវាជាលើកដំបូងទៅវិញ ។ នាងបានបង្រៀនខ្ញុំនូវមេរៀនមួយដែលខ្ញុំមិនដែលភ្លេចឡើយ ៖ អំណោយទាននៃទីបន្ទាល់គឺមានតម្លៃ ហើយមានអំណាចក្នុងការចែកចាយវាជាញឹកញាប់ ។

ទីពីរ អំណោយទាននៃការអភ័យទោស ប្រាកដណាស់ យើងទាំងអស់គ្នានៅពេលណាមួយបានរងការឈឺចាប់ដោយពាក្យសម្ដី ឬទង្វើមិនល្អរបស់អ្នកដទៃ ។ ហើយបើយើងស្មោះត្រង់នោះ យើងក៏ធ្លាប់បានធ្វើឲ្យអ្នកដទៃឈឺចាប់ដែរ ។ ព្រះយេស៊ូវគ្រីស្ទបង្រៀនថា « យើងជាព្រះអម្ចាស់នឹងអត់ទោសដល់អ្នកណា ដែលយើងនឹងអត់ទោស ប៉ុន្តែរីឯអ្នកវិញ គឺតម្រូវឲ្យអត់ទោសដល់មនុស្សទាំងអស់ » ។ បន្ទាប់មក ទ្រង់បានបោះជំហានមួយជំហានទៀត ហើយមានព្រះបន្ទូលទៀតថា នៅពេលយើងមិនអត់ទោសឲ្យអ្នកដទៃពីអំពើបាបរបស់ពួកគេទាស់នឹងយើង នោះអំពើបាបដ៏ធំធ្លាក់មកលើយើង ។

នៅពេលយើងអត់ទោសឲ្យអ្នកដទៃដោយសុទ្ធចិត្ត និងស្មោះត្រង់ នោះយើងនឹងរួចផុតពីថ្នាំពុលនៃភាពជូរចត់ ការវិនិច្ឆ័យ ឬការសងសឹក ។

ខ្ញុំមានមិត្តជាទីស្រឡាញ់ម្នាក់នៅប្រទេសអាហ្វ្រិកខាងត្បូងដែលមានឈ្មោះថា សេនដាល ម៉ាកាស៊ី ។ ដោយទទួលបានការអនុញ្ញាតពីគាត់ ខ្ញុំសូមចែកចាយរឿងផ្ទាល់ខ្លួនរបស់គាត់អំពីការអភ័យទោស ។ នៅពេលដែល សេនដាល មានអាយុក្រោមពីរឆ្នាំ ឪពុករបស់គាត់ដែលមានអាយុត្រឹមតែ ២៨ឆ្នាំប៉ុណ្ណោះត្រូវបានប៉ូលិសធ្វើទារុណកម្ម និងសម្លាប់នៅក្នុងរបបបំបែកពូជសាសន៍ដ៏ឃោរឃៅ ។ ក្រោយមក សេនដាល បានដឹងពីព័ត៌មានលម្អិតអំពីឃាតកម្មដ៏គួរឲ្យតក់ស្លុតរបស់ឪពុកគាត់ ។ ឥឡូវនេះ ខ្ញុំសូមដកស្រង់សម្ដីរបស់គាត់ថា ៖

« ក្នុងវ័យកុមារភាព ខ្ញុំមានអារម្មណ៍ជូរចត់ និងស្អប់ដោយសារអ្វីដែលពួកគេបានធ្វើចំពោះឪពុកខ្ញុំ ។ តើពួកគេអាចយកគាត់ចេញពីយើងដោយរបៀបណាទៅ ? គេប្លន់ឪពុក និងអ្នកណែនាំពីខ្ញុំ ហើយគេប្លន់ដៃគូជាទីស្រឡាញ់ និងខ្វល់ខ្វាយពីម្តាយខ្ញុំ ។

« នៅពេលដែលខ្ញុំបានដឹងពីរបៀបដ៏ឃោរឃៅដែលពួកគេធ្វើទារុណកម្មគាត់ វាបានដុតដួងចិត្ត និងគំនិតខ្ញុំដោយកំហឹង ស្អប់ និងភាពជាសត្រូវយ៉ាងខ្លាំងចំពោះមន្រ្តីប៉ូលិស និងចំពោះជនជាតិស្បែកស ។

« ខ្ញុំបានបន្តទុកអារម្មណ៍ទាំងនេះ រហូតដល់ខ្ញុំបានរកឃើញដំណឹងល្អដែលបានស្ដារឡើងវិញនៃព្រះយេស៊ូវគ្រីស្ទ ។ ដំណឹងល្អនេះបានជួយខ្ញុំយល់ថា ខ្ញុំគួរតែអភ័យទោសដល់មន្ត្រីប៉ូលិសចំពោះឧក្រិដ្ឋកម្មរបស់ពួកគេ ហើយថាអំណរ និងការរីកចម្រើនខាងវិញ្ញាណរបស់ខ្ញុំអាស្រ័យទៅលើវា ។

« ការណ៍នេះវាងាយក្នុងការនិយាយ ប៉ុន្តែខ្ញុំបានពុះពារនឹងការអធិស្ឋានជាច្រើន ហើយយូរៗទៅព្រះអម្ចាស់បានជួយខ្ញុំអត់ទោសដល់ខ្មាំងសត្រូវ ។… ជំនួសឲ្យការឈឺចាប់ ខ្ញុំមានអារម្មណ៍ធូរស្រាល ជំនួសឲ្យភាពជាសត្រូវ និងការស្អប់ ខ្ញុំមានសេចក្តីស្រឡាញ់ ជំនួសឲ្យភាពងងឹតនៅក្នុងចិត្ត និងគំនិតរបស់ខ្ញុំ ខ្ញុំមានពន្លឺ និងសេចក្តីសុខសាន្ត » ។

សូមអរគុណ សេនដាល សម្រាប់គំរូរបស់លោកក្នុងការផ្តល់អំណោយនៃការអភ័យទោស ។

ទីបី អំណោយនៃសេចក្តីស្រឡាញ់ដូចជាព្រះគ្រីស្ទ ក្នុងចំណោមអំណោយខាងវិញ្ញាណទាំងអស់ គ្មានអ្វីធំជាងសេចក្ដីសប្បុរសឡើយ ។ ព្រះយេស៊ូវបង្ហាញសេចក្តីស្រឡាញ់របស់ទ្រង់សម្រាប់អ្នកដទៃដោយបើកចំហ និងបានបង្រៀនយើងឲ្យស្រឡាញ់គ្នាទៅវិញទៅមក ។

នៅពេលយើងធ្វើតាមគំរូរបស់ព្រះអង្គសង្គ្រោះ ដោយការបង្ហាញសេចក្ដីស្រឡាញ់របស់យើងចំពោះអ្នកដទៃទាំងពាក្យសម្ដី និងសកម្មភាព នោះពួកគេអាចទទួលបទពិសោធន៍នៃសេចក្ដីស្រឡាញ់របស់ព្រះតាមរយៈយើង ។

កាលពីប៉ុន្មានឆ្នាំមុន ខ្ញុំបានជួបយុវជនមានអាយុ ២៣ឆ្នាំម្នាក់ ដែលរស់នៅក្នុងទីក្រុងវ៉ាស៊ីនតោន ដែលជាគំរូដ៏អស្ចារ្យនៃការណ៍នេះ ។ ពួកអ្នកផ្សព្វផ្សាយសាសនាបានបង្រៀនគាត់អស់រយៈពេលបីខែ ហើយគាត់បានដកពិសោធន៍នូវការផ្លាស់ប្តូរដ៏ធំនៅលើទឹកមុខរបស់គាត់ និងរបៀបរស់នៅរបស់គាត់ ។ នៅយប់មួយ គាត់កំពុងនិយាយជាមួយពួកអ្នកផ្សព្វផ្សាយសាសនាតាមទូរសព្ទ ហើយនៅពេលពួកគេដាក់ទូរសព្ទចុះ ពួកគេបាននិយាយថា « ពួកខ្ញុំស្រឡាញ់បង ម៉ៃឃើល » ។ គាត់ដាក់ទូរសព្ទចុះ ហើយគិតក្នុងចិត្តថា « អីយ៉ា ! នោះគឺជាអ្វីដែលខ្ញុំមិនធ្លាប់ទទួលបានមកទេ ។ ខ្ញុំមិនអាចនិយាយបែបនោះទៅអ្នកដទៃទៀតផង » ។ គាត់បានសម្រេចចិត្តប្រមូលផ្ដុំភាពក្លាហានប្រាប់ម្តាយគាត់ថា គាត់ស្រឡាញ់ម្តាយគាត់ ។ គាត់រស់នៅចម្ងាយពីរបីម៉ោងឆ្ងាយពីគ្នានៅផ្នែកផ្សេងទៀតនៃរដ្ឋនោះ ។ ពេលគាត់ទូរសព្ទទៅម្តាយរបស់គាត់ ប្រាប់គាត់ថា « ខ្ញុំស្រឡាញ់ម៉ាក់ » គាត់ឆ្លើយភ្លាមថា « តើកូនមានបញ្ហាអ្វី ? តើកូនបានទៅជួបគ្រូពេទ្យហើយទទួលបានដំណឹងមិនល្អមែនទេ ? តើកូនត្រឡប់ទៅពន្ធនាគារវិញឬ ? ដូច្នេះ គាត់បានប្រាប់ម្តាយគាត់អំពីការរកឃើញដំណឹងល្អ និងរបៀបដែលដំណឹងល្អបានផ្លាស់ប្តូរគាត់ ហើយថាឥឡូវនេះគាត់បានបោះបង់ការជក់បារី និងប្រើប្រាស់គ្រឿងញៀន ហើយថាគាត់បានគ្រោងនឹងទទួលពិធីបុណ្យជ្រមុជទឹកហើយ ។

ខ្ញុំគិតថា នេះគឺជាការប្រៀបធៀបដ៏អស្ចារ្យនៃអ្វីដែលកើតឡើងនៅពេលដែលមនុស្សទទួលអារម្មណ៍ពីសេចក្ដីស្រឡាញ់របស់ព្រះតាមរយៈអ្នកដទៃ ។ វាធ្វើឲ្យដួងចិត្តទន់ភ្លន់ ហើយបន្ទាប់មកបង្កើតឲ្យមានបំណងប្រាថ្នាដើម្បីចែកចាយអំណោយនៃសេចក្ដីស្រឡាញ់នោះជាមួយអ្នកដទៃ ។

ឥឡូវនារាត្រីនេះ យើងចាប់ផ្តើមនិយាយអំពីអំណោយដ៏មានតម្លៃ ដោយនិយាយអំពីមាស កំញាន និងជ័រល្វីងទេស ។ ខ្ញុំបានពិនិត្យមើល ហើយបងប្អូនថែមទាំងអាចទិញអំណោយទាំងនោះនៅលើវិបសាយ Amazon ទៀតផង ។ ប៉ុន្តែបងប្អូននឹងមិនអាចរកឃើញអំណោយផ្សេងទៀតដែលយើងបាននិយាយ នៅក្នុងហាងទំនិញណាមួយឡើយ ។ វាជាអំណោយដែលពុំគិតពីតម្លៃ ប៉ុន្តែវានឹងនាំមកនូវអំណរដ៏យូរអង្វែង និងពិតប្រាកដដល់ទាំងអ្នកទទួល និងអ្នកផ្តល់ឲ្យ ។

ដូច្នេះ នៅពេលបងប្អូនគិតអំពីអ្វីដែលបងប្អូននឹងផ្តល់ឲ្យក្នុងបុណ្យគ្រីស្ទម៉ាស់នេះ ខ្ញុំសូមអញ្ជើញបងប្អូនឲ្យ ៖

ចែកចាយទីបន្ទាល់របស់បងប្អូនជាមួយនឹងគ្រួសារ និងមនុស្សដែលបងប្អូនស្រឡាញ់ ។ នៅពេលបងប្អូនចែកចាយអំណោយដ៏មានតម្លៃនេះ ទីបន្ទាល់ផ្ទាល់ខ្លួនរបស់បងប្អូននឹងត្រូវបានពង្រឹង ។
អត់ទោសឲ្យនរណាម្នាក់ដែលបងប្អូនមានអារម្មណ៍ថាបានធ្វើខុស ឬធ្វើឲ្យបងប្អូនឈឺចាប់ ។ ក្នុងការផ្តល់អំណោយនេះ បងប្អូនក៏នឹងមានអារម្មណ៍សុខសាន្ត និងការព្យាបាលផងដែរ ។
ជួយអ្នកដទៃឲ្យទទួលអារម្មណ៍ស្រឡាញ់ព្រះតាមរយៈបងប្អូន ។ បើសមរម្យ សូមប្រាប់ពួកគេថា បងប្អូនស្រឡាញ់ពួកគេ ។ នៅពេលបងប្អូនមើលឃើញអ្នកដទៃដូចដែលព្រះទតឃើញពួកគេ នោះសេចក្តីស្រឡាញ់របស់បងប្អូនចំពោះពួកគេនឹងកើនឡើង ហើយបងប្អូនក៏នឹងទទួលអារម្មណ៍នៃសេចក្តីស្រឡាញ់របស់ព្រះនៅក្នុងជីវិតរបស់បងប្អូនដែរ ។

នៅទីបញ្ចប់នេះ ខ្ញុំសូមជូនពរបងប្អូនរាល់គ្នាក្នុងរដូវកាលបុណ្យគ្រីស្ទម៉ាស់នេះ សូមពេញដោយអំណរដ៏អស្ចារ្យ ។ ខ្ញុំថ្លែងជាសាក្សីថា ព្រះយេស៊ូវគឺជាព្រះគ្រីស្ទ ។ ទ្រង់មានព្រះជន្មរស់ ។ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។ ខ្ញុំកោតសរសើរទ្រង់ ។ ខ្ញុំស្រឡាញ់ទ្រង់ ។ ដោយសារតែអំណោយរបស់ទ្រង់ នោះយើងម្នាក់ៗបានទិញក្នុងតម្លៃដែលមិនអាចយល់បាន យើងអាចមានភាពស័ក្តិសមដើម្បីទទួលអំណោយដ៏មហិមាជាងគេបំផុត—សូម្បីតែជីវិតដ៏នៅអស់កល្បជានិច្ច នៅក្នុងទីវត្តមាននៃព្រះវរបិតាដែលពេញដោយក្តីស្រឡាញ់ ដែលគង់នៅស្ថានសួគ៌ ។

នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។