Tej Txiaj Ntsim Kaj Siab Lug
Kuv zoo siab koom nrog nej hauv lub caij Christmas. Peb lub hom phiaj yog hwm peb tus Tswv Yexus Khetos. Peb cia siab tias peb yuav nco ntsoov lub ntsiab ntawm lub caij Christmas rau peb tus kheej thiab cov uas peb hlub. Lub ntsiab ntawd yog kev nyob kaj siab lug—tsis yog kev thaj yeeb, vim tus Cawm Seej yug los hauv ib lub caij uas txhaus ntshai thiab ntxhov siab heev Nws tsev neeg thiaj li yuav tsum khiav mus rau hauv teb chaws Iyiv; tsis yog kev muaj nyiaj txiag, vim Nws yug los nyob hauv ib lub dab nyuj; thiab tsis yog kev kaj siab uas muaj thaum yus twb muab khoom plig tag nrho qhwv tas lawm, tau tso khoom rau tus ntoo, thiab muab twj tais tso rau saum lub rooj lawm, vim kev kaj siab li ntawd nyob ib me pliag xwb. Kev nyob kaj siab lug ntawm lub caij Christmas yog “txoj kev kaj siab ntawm Vajtswv, uas yeej tsis muaj leej twg yuav paub li.”1 Yog kev kaj siab lug uas tus Thwj Tim Povlauj cog lus tias yuav “nyob hauv [peb] lub siab lub ntsws dhau los ntawm Yexus Khetos.”2 Thiab Povlauj hais yog. Kev kaj siab lug ntawd los peb yuav tau los ntawm Yexus Khetos xwb.
Peb ib txhia nyob huav ib qho chaw zoo nkauj thiab muaj kev thaj yeeb, tiam sis peb ntxhov siab heev. Lwm tus nyob kaj siab lug thiab tsis siab tus txawm lawv raug xwm txheej loj heev, thiab raug kev txom nyem thiab kev sim siab.
Tus Cawm Seej hais rau peb txhua tus uas tau yug los hauv lub ntiaj teb no hais tias, “Neeg ntiaj teb yuav tsim txom nej.”3 Tiam sis Nws cog lus qhov zoo kawg no rau Nws cov thwj tim thaum Nws ua hauj lwm qhuab qhia hauv lub ntiaj teb no: “Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab.”4 Qhov uas peb paub tias Nws cog lus txog kev kaj siab lug rau tag nrho Nws cov pab coj niaj hnub no yeej nplij peb lub siab.
Tau muab kev cog lus no thaum hmo uas Yexus yug los. Thaum cov tim tswv tshaj tawm txog tus Cawm Seej txoj kev yug los, lawv hais tias, “Thov kom Vajtswv tus uas nyob saum ntuj ceeb tsheej tau koob meej, thiab thov kom cov neeg uas nyob hauv ntiaj teb … tau zoo nyob kaj siab lug.”5
Thaum lub caij zoo kawg no, peb nrhiav kev kaj siab lug dhau los ntawm tus uas pub txhua lub txiaj ntsim zoo. Hmo no kuv xav qhia ob peb yam uas yuav pab peb nyob kaj siab lug ntxiv hauv lub caij no, tas ib xyoo yav tom ntej, thiab tas peb lub neej.
Yam thib ib, xws li cov tim tswv uas hu nkauj thaum hmo Nws yug los, peb yuav nyob kaj siab lug thaum peb ua koob tsheej txog peb tus Cawm Seej, Yexus Khetos. Peb yuav los cuag Nws thiab hwm nws.6
Lub caij Christmas yog kev ua koob tsheej txog kev yug los. Peb txhua tus xav tsis thoob thaum peb pom ib tug me nyuam mos liab uas nyuam qhuav yug los. Peb txo hwj chim thaum peb pom lawv lub ntsej muag me me thiab xav txog lawv yuav zoo li cas thaum yav tom ntej. Peb lub siab mos muag. Peb ris Vajtswv txiaj. Peb nyob kaj siab lug. Thiab muaj txoj kev hlub nyob hauv peb lub siab uas ua rau peb xav ua siab dawb siab zoo rau lwm tus thaum peb nco txog Yexus Khetos txoj kev yug los. Vim Christmas yeej yog kev ua koob tsheej txog tus uas tseem ceeb tshaj. Vajtswv cov yaj saub puag thaum ub twb pom Yexus Khetos txoj kev yug los ua ntej. Nws txoj kev yug los yeej yog los ntawm qhov uas peb Leej Txiv Saum Ntuj Ceeb Tsheej uas hlub peb ua raws li Nws tau cog lus hauv lub ntuj ntsuj plig ua ntej. Yog tus Mexiyas txoj kev yug los.
Ua rau kuv rov qab nco txog tej lus nyob hauv kuv lub siab txhua lub caij Christmas. Ua rau kuv nco txog ib pawg loj hu nkauj tej lus no: “Vim ib tug me nyuam yuav yug los rau peb, yuav muab ib tug me tub rau peb; thiab nws yuav kav teb chaws, thiab nws lub npe yuav raug hu ua, tus Hwj Sawv Zoo, tus uas Taw kev, Vajtswv Tus uas Muaj Hwj Chim loj, Leej Txiv tus uas Kav Ib Txhis, tus Tub Vaj Ntxwv ntawm txoj kev Thaj Yeeb Nyab Xeeb.”7
Thawj zaug kuv nco qab tias kuv hnov tej lus ntawd yog thaum kuv zaum saum lub lawj nyob hauv lub Tsev Kheej hauv Salt Lake. Ib pawg hu nkauj hu Handel ib zaj nkauj. Kuv nco qab tias kuv hnov ib yam dab tsi hauv kuv lub siab. Kuv hluas thaum ntawd. Kuv laus laus tam sim no, kuv thiaj li paub qhov kuv hnov ntawd yog dab tsi. Yog tus Vaj Ntsuj Plig Dawb Huv, uas kuv txais tau thaum kuv muaj yim xyoo. Tus Ntsuj Plig qhia rau kuv lub siab tias tej lus uas kuv hnov lawv hu nkauj hmo ntawd muaj tseeb.
Tus me nyuam mos liab uas yug los hauv lub zos Npelehees puag thaum ub yeej yog Vajtswv Leej Tub, Leej Txiv Tib Leeg Tub. Cov uas txhos caug rau ntawm Nws twb los teev tiam tus Cawm Seej. Nws yog Vajtswv tus Me Nyuam Yaj, uas Vajtswv txib kom theej txhoj ua rau tej hlua ntawm kev tuag tu nrho. Nws muaj hwj chim ris peb tej kev nyuaj siab thiab kev tu siab Nws thiaj yuav paub pab peb. Thiab Nws yug los kom theej peb sawv daws lub txhoj:
Yug los kom tib neeg tsis tuag:
Yug los pab tib neeg tag nrho,
Yug los kom lawv sawv rov los.
Mloog! Cov tim tswv hu nkauj qhuas
Tus Vaj Ntxwv uas nyuam qhuav yug!8
Qhov kuv hnov nyob saum lub lawj hauv lub Tsev Kheej hmo ntawd yog kev cia siab thiab kev ntseeg. Kuv muaj kev ntseeg tias vim “ib tug me nyuam [tau] yug los rau peb,” kuv thiaj yuav muaj kev cia siab tias kev tuag tsis yog qhov kawg. Kuv yuav sawv rov los, thiab yuav muab kev mob ntawm kev tuag tshem rau tag nrho Leej Txiv Saum Ntuj Ceeb Tsheej cov me nyuam.
Tiam sis tseem muaj ntxiv thiab. Kuv muaj kev cia siab vim muaj Nws, kuv thiaj muaj peev xwm coj raws li Nws thiab ua hauj lwm rau Nws ua rau kuv yug dua tshiab ntawm sab ntsuj plig. Vim muaj lub txiaj ntsim uas yog Nws txoj kev yug los, kuv lub siab, nej lub siab, thiab txhua leej txhua tus lub siab yeej hloov tau los ua li me nyuam yaus—ib lub siab uas dawb huv thiab tsim nyog rov qab mus cuag Vajtswv tus uas muab ib tug Cawm Seej thiab npaj ib txoj kev kom rov qab los rau Nws nyob saum ntuj ceeb tsheej. Kuv ris Vajtswv txiaj thiab muaj kev kaj siab lug, thiab peb txhua tus muaj tau los ntawm Leej Txiv thiab Leej Tub lub txiaj ntsim.
Yam thib ob, ib yam li cov tswv yug yaj uas pom tus me nyuam mos liab Khetos thiab tshaj tawm9 txog txoj moo zoo ntawm Nws txoj kev yug los, peb kuj qhia tau kev kaj siab lug rau peb tsev neeg thiab lwm tus uas peb hlub. Peb ua li ntawd zoo tshaj thaum peb qhib cov vaj lug kub rau lawv lub siab thiab lub ntsws kom to taub.
Thaum wb cov me nyuam tseem me me, wb tsev neeg ua yeeb yam txog Christmas thiab siv cov lus tag nrho los ntawm cov vaj lug kub. Peb ua yeeb yam thaum Hmo Ua Ntej Christmas. Tej zaum nej tau ua zoo ib yam.
Thaum xub thawj peb ua yeeb yam siv ob peb tug neeg xwb, txhua tus yog ib tug los ntawm cov vaj lug kub. Kuv yog Yauxej, kuv tus poj niam yog Maivliag, thiab ib tug me nyuam roj hmab yog tus me nyuam mos liab Khetos. Cov neeg ua yeeb yam los muaj ntau ntxiv zuj zus tuaj. Muaj ib tug me nyuam uas ua yeeb yam txog tus me nyuam Yexus, ces muaj cov tswv yus yaj—uas hnav tsho khuam da dej—kom teev tiam ntawm lub dab nyuj, thiab tom qab ntawd muaj cov vaj ntxwv uas nqa cov phij xab zoo nkauj kom hwm tus Vaj Ntxwv tshiab.
Ob peb xyoos tom qab ntawd, peb qhib kev ua yeeb yam nrog ib tug me nyuam uas yog Xamuyees tus Neeg Lamas uas sawv ua tim khawv txog tus Mexiyas txoj kev yug los thaum yav tom ntej. Sij hawm zuj zus mus, es peb ua yeeb yam ua ib pawg tsis ntseeg uas muab cov pob pej chum txawb rau Xamuyees thaum nws sawv pem hauv ntej. Txhua xyoo, thaum cov nyob hauv pawg neeg npau taws loj zuj zus tuaj thiab txawj txawb pob raug nws, peb twb hais nrov nrov kom lawv nco ntsoov tias lawv raug tsis tau Xamuyees vim nws yog Vajtswv tus tub qhe uas Vajtswv pov hwm—thiab vim peb xav ua koob tsheej txog kev thaj yeeb!
Muaj cov me nyuam yaus uas xav ua yeeb yam thiab, yog li ntawd peb cia lawv ua cov yaj uas nrog cov tswv yug yaj mus rau lub dab nyuj.
Ces sij hawm dhau mus—zoo ib yam li ib txwm mus. Cov uas ua yeeb yam loj hlob, thiab peb rov qab ua zoo li qub. Kuv twb pom cov uas ua yeeb yam txog Yauxej, Maivliag, cov tswv yug yaj, cov yaj, thiab cov vaj ntxwv uas loj hlob lawm thiab qhia lawv cov me nyuam txog tus Cawm Seej thiab txog kev kaj siab lug uas peb muaj vim Nws yug los.
Lawv tau koob hmoov thaum lawv ua yeeb yam vim lawv kawm tej yam txog tus Cawm Seej thiab vim li cas peb hlub Nws. Kuv zoo siab ua Vajtswv tsaug tias kuv cov me nyuam thiab lawv cov me nyuam pom peb hwm tus me nyuam mos liab Yexus, tus uas yug los ua kev txi mus ib txhis, yog lub txiaj ntsim kev kaj siab lug uas Leej Txiv Saum Ntuj Ceeb Tsheej pub rau tag nrho Nws cov me nyuam.
Yam thib peb, ib yam li tus Neeg Txawj Ntse, peb pub tau tej lub txiaj ntsim ntawm kev hlub thiab kev kaj siab lug vim peb yog cov thwj tim ntawm tus Tswv uas sawv rov los.
Npisov Sellers nyob hauv Rexburg, Idaho, twb ua li no tom qab lawv hu nws ua tus npisov ntev dhau los lawm. Nws pawg ntseeg nyob ze txoj kev loj uas dhau nws lub zos me me. Thaum lub sij hawm ntawd, muaj neeg coob uas tsis muaj hauj lwm ua, es cov neeg txom nyem mus ub mus no, lawv cia siab yuav nrhiav kev pab lawv tus kheej. Lawv pheej nrhiav kev pab los ntawm ib tug npisov ntawm Tsoom Haiv Neeg Ntseeg hauv Hnub Nyoog Kawg. Feem ntau, cov npisov yuav xa lawv mus rau Npisov Sellers lub tsev.
Vim li cas yuav ua li ntawd? Tsev neeg Sellers yeej ib txwm tos txais cov neeg uas xav tau kev pab. Thaum lawv noj hmo, tsis yog lawv muaj lawv tsev neeg xwb, tiam sis kuj muaj ib tug los ob tug los sis ntau tus neeg qhua uas nrog lawv noj. Tom qab lawv noj hmo uas Muam Sellers tau npaj, tus npisov muab ib lub tsho rau lawv los ntawm tej lub tsho tub rog uas nws twb yuav lawm.
Tom qab lawv muaj ib lub tsho loj thiab txais ib pob ntim su uas Muam Sellers npaj lawm, lawv yuav mus sab nraud nrog lub siab sov so. Tej yam uas lawv pom thiab hnov hauv lawv lub siab yuav nrog nraim lawv nyob thaum lawv taug kev. Vim lub caij no tshaj nyob hauv Rexburg yog thaum lub caij Christmas thiab vim tsev neeg ntawd pheej muaj lub siab dawb siab zoo pub rau lwm tus, tsev neeg Sellers cov me nyuam nco ntsoov tias lawv twb ua li tus Cawm Seej yuav ua—thiab lawv ua rau Nws.
Tej zaum nej thiab nej tsev neeg nyias muaj nyias kab lis kev cai thaum lub caij Christmas npaum li nej ua tau, tiam sis txawm nej ua li cas los muaj tej yam uas zoo ib yam. Tej yam nej ua yuav ua rau nej muab siab npuab tus Cawm Seej. Thiab tej yam siab zoo uas nej ua mas tus Cawm Seej yeej yuav pom zoo. Nws tias:
“Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev:
“Thaum kuv tsis muaj ris tsho hnav; nej muab rau kuv hnav. Thaum kuv muaj mob, nej tuaj tu kuv. Thaum kuv raug kaw rau hauv tsev loj cuj, nej tuaj saib kuv.”10
Thiab Nws yuav hais tias, “Thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag.”11
Cov tim tswv, cov tswv yug yaj, thiab cov Neeg Txawj ntse nrhiav tau kev kaj siab lug los ntawm lawv txoj kev ntseeg Yexus Khetos. Nej yuav zoo ib yam thiab. Tus Cawm Seej txoj kev yug los yog ib lub txiaj ntsim uas ua rau Leej Txiv muaj peev xwm muab kev kaj siab lug rau lub ntiaj teb no, thiab txoj sia nyob mus ib txhis hauv lub ntuj tom qab lub neej no.12 Peb twb qw zoo siab thaum peb hnov txog txoj kev cog lus ntawd. Peb rov qab muaj kev kaj siab lug thiab kev xyiv fab thaum peb hnov cov lus uas neeg hu nkauj txog qhov uas tau muaj raws li Vajtswv txoj kev cog lus:
Neeg sawv daws pw ntsiag to. …
Cov tub txib saum ntuj qhuas Tswv Yexus;
Lawv hu nkauj hais tias Aleluyas!
Cawm Seej Yexus tau los!13
Kuv thov Vajtswv tias kev kaj siab lug yuav los thiab nrog nraim peb txhua tus thaum peb nco ntsoov, hlub, thiab teev tiam peb Leej Txiv Saum Ntuj Ceeb Tsheej thaum peb ua raws li peb tej kev khi lus rau Nws. Thov kom peb yuav nco ntsoov Yexus Khetos txoj kev pab thiab kev ua siab zoo uas Nws ua rau peb thaum Nws ua hauj lwm hauv lub ntiaj teb no—thiab rau siab ua zoo ib yam.
Kuv ua tim khawv tias Yexus yog tus Khetos, Vajtswv Leej Tub uas Nws hlub. Kuv ua tim khawv tias Thawj Tswj Hwm Thomas S. Monson yog Vajtswv tus yaj saub. Nws, thiab Thawj Pawg Thawj Tswj Hwm, xav kom nej yuav muaj kev xyiv fab, kev hlub, thiab kev kaj siab lug uas tus Cawm Seej cog lus tias Nws cov thwj tim uas rau siab ntseeg yuav muaj hauv lub caij Christmas no. Los ntawm Yexus Khetos lub npe, amees.