Zaj Christmas Tag Nrho
Christmas ua rau txhua tus muaj kev zoo siab, thiab kev sib hlub. Thiab txhua tus niam tsev txiv tsev yeej ua pov thawj tias lawv xav zoo ib yam li ntawd thaum yug txhua tus me nyuam mos liab. Tiam sis, Yexus Khetos txoj kev yug los yeej tsis zoo li lwm tus. Tej yam muaj nqi xws li—txoj kev mus rau Npelehees, ib lub tsev so uas puv dhau, ib lub dab nyuj, ib lub hnub qub tshiab, thiab cov tim tswv uas qhuab qhia—ua rau txhua tus nco txog Nws txoj kev yug los. Tiam sis zaj hais txog tus Cawm Seej txoj kev yug los yeej yog ib feem xwb ntawm qhov uas ua rau peb hnov tus Ntsuj Plig thaum lub caij Christmas. Christmas yeej tsis yog kev ua koob tsheej txog qhov uas muaj li cas thaum Yexus yug los rau hauv lub ntiaj teb xwb tiam sis yog qhov uas peb paub Nws yog leej twg—peb tus Tswv thiab tus Cawm Seej Yexus Khetos—thiab vim li cas Nws los.
Thawj Tswj Hwm Thomas S. Monson tau qhia hais tias: “Vim Nws tau los rau hauv lub ntiaj teb, … peb yuav muaj kev xyiv fab hauv peb lub neej thiab kev kaj siab lug txhua hnub. … Vim Nws los, peb lub neej hauv lub ntiaj teb thiaj muaj lub ntsiab.”1
Leej Txiv Thawj tus Tub
Lub ntsiab no yeej meej heev thaum peb xav txog zaj Christmas tag nrho. Raws li Thawj Tswj Hwm Gordon B. Hinckley piav hais tias: “Yeej yuav tsis muaj Christmas yog tias tsis tau muaj Easter. Tus me nyuam Yexus ntawm Npelehees yeej yog ib tug me nyuam mos liab zoo li lwm tus xwb yog tias Nws tsis yog tus Khetos ntawm Khexemanes thiab Khaulakhauthas, thiab yog tsis muaj txoj Kev Sawv Rov Los.”2
Yexus txoj kev yug los nyob hauv Npelehees tsis yog qhov pib ntawm zaj dab neeg no, thiab Khaulakhauthas tsis yog qhov kawg. Cov vaj lug kub qhia tias Nws nyob nrog Vajtswv thaum chiv keeb3 nyob hauv Pawg Sab Laj Saum Ntuj. Peb kuj nyob ntawd, es peb hu Nws ua Yehauvas, Thawj tus Tub ntawm peb Leej Txiv Mus Ib Txhis.4 Peb kawm hais tias Nws yuav ua txoj hauj lwm Tsim lub ntiaj teb thiab Txhiv Dim neeg ntiaj teb. Peb qw zoo siab thaum peb pom zoo rau peb Leej Txiv txoj hau kev zoo siab.5 Txawm yog muaj ib txhia uas ntxeev siab tawm tsam Vajtswv txoj hau kev, peb yog cov uas rau siab ntseeg Yexus Khetos. Peb txaus siab los raug tej xwm txheej ntawm lub neej no vim peb paub tias Yexus yuav ua raws li Leej Txiv lub siab nyiam—Nws yuav cawm peb dim.
Vajtswv Tib Leeg Tub txoj Kev Yug Los
Nyob hauv lub ntiaj teb no, peb tsis nco qab txog peb lub neej ua ntej. Peb los rau hauv lub ntiaj teb no kom kawm mus kev raws li kev ntseeg, tsis yog raws li peb pom.6
Xwv kom peb txoj kev ntseeg muaj zog, Vajtswv txib cov yaj saub uas pom thiab qhia txog tus Mexiyas txoj kev los. Ib tug yaj saub zoo li no yog Nifais, uas ua yog toog pom ib tug ntoo uas dawb thiab zoo nkauj kawg. Thaum nws thov kom paub nws txoj kev ua yog toog txhais li cas, tus tim tswv ua rau nws pom lub nroog Naxales thiab Maivliag, ib tug nkauj xwb, uas zoo nkauj heev. Tus tim tswv nug Nifais lo lus nug tseem ceeb no hais tias: “Koj puas paub hais tias Vajtswv twb yuav nqis los nrog neeg nyob?” Los yog hais tias, “Koj puas to taub vim li cas Vajtswv yuav los rau hauv lub ntiaj teb, vim li cas Nws yuav nqis los kom qis tshaj txhua yam?” Nifais tsis paub zoo es nws teb hais tias: “Kuv paub tias nws yeej hlub nws cov me nyuam; txawm li ntawd los, kuv twb tsis paub tej ntsiab lus ntawm txhua yam.”
Ces tus tim tswv hais tias, “Tus nkauj xwb uas koj pom yog Vajtswv tus Tub leej niam.” Nifais pom Maivliag puag ib tug me nyuam nyob hauv nws txhais tes, thiab tus tim tswv zoo siab hais tias, “Saib seb Vajtswv tus Me Nyuam Yaj, … twb yog leej Txiv uas Nyob Mus Ib Txhis Leej Tub!” Tam sim ntawd, ua rau Nifais to taub meej txog lub ntsiab ntawm tus ntoo—thiab vim li cas peb ua koob tsheej txog Yexus Khetos txoj kev yug los. Nws hais tias, “Nws yog kev hlub los ntawm Vajtswv, uas tau nthuav kom dav rau txhua txhia qhov chaw nyob rau hauv noob neej tej siab tej ntsws; yog li ntawd, nws yog yam uas xav tau tshaj plaws txhua txhia yam huv tib si.” Tus tim tswv hais ntxiv tias, “Muaj tseeb tiag, thiab yog ib qho kev zoo siab tshaj plaws rau tus ntsuj plig.”7
Ces, yauv luag 600 xyoo tom qab Nifais ua yog toog li no, twb txog hnub uas cov yaj saub qhia txog tau ntev lawm. Yexus tau mus dhau daim ntaub thaiv thiab yug los rau hauv lub ntiaj teb no ua ib tug me nyuam mos liab, uas tsis zoo li lwm tus hlo li. Vajtswv Thawj tus Tub ntawm sab ntsuj plig tau los ua Nws Tib Leeg Tub ntawm sab nqaij daim tawv. Tus me nyuam no, uas yug los rau ib tsev neeg txo hwj chim heev, tau ris Vajtswv tsev neeg nyob mus ib txhis txoj kev cawm seej. Muaj tseeb tiag, “muaj raws li neeg cia siab rau” nyob hauv “lub me zej zos Npelehees” hmo ntawd.8
Tiam sis, zaj dab neeg tsis kawg li ntawd. Txawm yog tus Cawm Seej txoj kev yug los yeej yog ib qho txuj ci tseem ceeb, yeej muaj tej yam tseem ceeb tshaj tom qab ntawd.
Leej Txiv txoj Hauj Lwm
Peb tsis paub ntau txog Yexus thaum nws yog ib tug me nyuam. Peb kawm hais tias Nws twb “loj hlob zoo, muaj tswv yim, nws ua haum Vajtswv siab thiab haum neeg siab.”9 Thaum nws muaj 12 xyoos, nws xav “ua [Nws] Leej Txiv txoj tej hauj lwm.”10 Tej hauj lwm ntawd yog ua kom Nws Leej Txiv cov me nyuam paub txog Leej Txiv “txoj kev hlub zoo kawg nkaus.”11
“Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb, … los cawm neeg ntiaj teb kom lawv dim lawv lub txim.”12
Nws Leej Txiv tej hauj lwm yog kev “mus thoob plaws ua zoo.”13 Yog tej hauj lwm ntawm kev khuv leej—“kho tej neeg muaj mob, tsa tej neeg tuag, ua kom tej neeg ceg tawv mus taus kev, cov neeg dig muag lawv rov txais pom kev, thiab cov neeg lag ntseg rov hnov lus.”14
Nws Leej Txiv tej hauj lwm yog kom qhib peb qhov muag ntawm kev ntseeg, kom peb sab ntsuj plig muaj zog, thiab kho peb txoj kev mob, kom tsis muab hlob, tsis muaj kev mob kev nkeeg, thiab peb tej kev txhaum. Yog ua kom “pab [peb raws li peb] tej kev qaug dag qaug zog.” Thiab kom muaj li no, Yexus txaus siab raug mob, raug xyeej, raug txom nyem, thiab raug txhua yam kev ntxias.15
Nws Leej Txiv tej hauj lwm yog ua kom peb ua raws li peb lub hom phiaj nyob hauv lub ntiaj teb—kom peb haum Vajtswv siab peb thiaj yuav nrog Nws nyob.16 Los yog hais tias, Nws Leej Txiv tej hauj lwm yog kom tib neeg txais tau txoj kev tsis txawj tuag thiab txoj sia nyob mus ib txhis.17
Yexus Khetos txoj Kev Theej Txhoj
Qhov tseem ceeb tshaj plaws, zaj Christmas tag nrho hais txog peb hnub kawg ntawm tus Cawm Seej lub neej. Thaum lub sij hawm tseem ceeb ntawd, tus Cawm Seej nyob hauv lub Vaj Khexemanes mus rau tus ntoo khaub lig nyob saum Khaulakhauthas mus rau lub Ntxa hauv lub Vaj. Raws li Txwj Laug Jeffrey R. Holland qhia hais tias, “txoj kev pab” ntawm lub sij hawm ntawd yuav “rov qab … mus txij puag thaum chiv keeb los, thiab mus tom ntej … mus ib txhiab thiab ib txhis.”18
Vim Nws yuav tsum cawm txhua leej txhua tus dim, Yexus mus rau hauv lub Vaj Khexemanes Nws ib leeg xwb. Tom qab ntawd Nws raug liam, raug nplawm, thiab raug tua tuag saum tus ntoo khaub lig. Nrog kev txo hwj chim thiab lub siab mos siab muag uas Nws muaj thaum chiv keeb hais tias, “Kuv nyob ntawm no, xa kuv mus,”19 thaum ntawd Nws hais tias, “Txiv, kuv muab kuv txoj sia tso rau hauv koj txhais tes.”20
Lub ntiaj teb ntxhov hnyo, Nws cov phooj ywg nyuaj siab kawg, thiab kev tsaus ntuj ri mus thoob plaws lub thaj av. Tus Cawm Seej nkag mus rau hauv lub ntuj ntsuj plig, nyob ntawd ib pawg ntsuj plig ncaj ncees—cov neeg ncaj ncees uas tau tas sim neej lawm—lawv tos ntsoov Nws los. Zoo ib yam li muaj puag thaum chiv keeb, Vajtswv cov tub thiab cov ntxhais qw zoo siab thiab pe hawm teev tiam lawv tus Txhiv Dim.21
Tus uas Sawv Rov Los thiab txoj Kev Kaj rau lub Ntiaj Teb
Tsis ntev tom qab ntawd twb txog lub sij hawm rau tus Cawm Seej rov qab los koom nrog Nws lub cev nqaij daim tawv thiab kov yeej kev tuag tag nrho. Thaum sawv ntxov hauv lub caij nplooj ntoo hlav, yog hnub ib, Maivliag Madalas mus rau Nws lub ntxa thiab pom tsis tsis muaj leej twg nyob haud. Nws yog thawj tug uas hnov Nws lub suab thiab pom Nws lub ntsej muag. Tom qab ntawd Yexus tshwm sim rau Nws cov Thwj Tim, caw lawv saib Nws txhais tes thiab txhais ko taw, “kov [Nws], thiaj li yuav paub”22 hais tias yog Nws tiag tiag—lawv tus Txhiv Dim yeej rov qab muaj txoj sia!
Nov yog “txoj moo zoo uas yog txoj kev zoo siab kawg nkaus”23 uas peb ua koob tsheej txog thaum lub caij Christmas—tsis yog qhov uas Khetos yug los xwb tiam sis yog qhov uas Nws nrog peb nyob, txo Nws txoj sia kom pab peb, Nws sawv rov los, thiab “ua tej hauj lwm uas [Nws Leej Txiv txib Nws] ua.”24 Peb zoo siab kawg vim tej kev nyuaj siab txhawj xeeb ntawm lub ntiaj teb no yuav tu vim muaj kev cog lus uas hais ua ntej ntuj tim teb raug—yog kev cog lus uas muaj los ntawm Yexus Khetos txoj Kev Theej Txhoj. Yog li ntawd, hais tsis tau zaj Christmas tag nrho yog tsis hais txog zaj Easter. Yog vim tus Cawm Seej theej peb lub txhoj thiaj ua rau hmo uas muaj hmoov zoo dawb huv nyob hauv Npelehees. Yog vim Nws txhiv peb dim thiaj li ua rau peb qw zoo siab nyob hauv lub neej ua ntej lub neej no—yog ib lub txiaj ntsim uas kho peb txoj kev mob, ua rau peb pom kev, thiab so peb tej kua muag tag nrho.25
Txoj kev kaj uas peb nyiam thaum lub caij Christmas yeej los ntawm txoj Kev Kaj ntawm lub Ntiaj Teb, Yexus Khetos. Zaj dab neeg uas peb nyiam thaum lub caij Christmas hais txog peb Leej Txiv txoj hau kev zoo siab, uas Yexus Khetos tau qhib kev kom muaj. Lub txiaj ntsim uas ua rau lub caij Christmas dawb huv yog Nws txoj sia, uas Nws txo kom peb yuav muaj txoj sia kav ib txhis. Thov kom peb yuav txais lub txiaj ntsim no thiab faib Nws txoj kev hlub thiab Nws txoj moo zoo rau tag nrho lub ntiaj teb, qhov tseem ceeb yog thaum lub caij zoo kawg nkaus no, kuv thov los ntawm Yexus Khetos lub npe dawb huv, amees.