Lub Txiaj Ntsim Vaj Ntsuj Plig Dawb Huv
Cov kwv tij thiab cov muam, zoo siab uas kuv koom nrog nej hmo no.
Peb lub lim tiam tom ntej, yog Hnub Christmas. Hnub ntawd, ntau tus me nyuam tub thiab ntxhais yuav sawv ntxov ntxov heev, thiab rub lawv niam lawv txiv tawm saum txaj mus. Lawv tos tsis taus, es lawv mus nyob ze ze cov khoom plig uas lawv twb saib ntsoov tau ntev loo lawm.
Kuv txiv nyiam Christmas heev; kev yuav khoom plig ua rau nws zoo siab kawg, thiab nws thiab kuv niam yeej txawj nrhiav khoom plig zoo tshaj plaws. Kuv cov muam thiab cov kwv tij, thiab coob tug ntxiv, yeej tau khoom plig zoo heev vim nkawd txawj yuav. Tej lub khoom plig uas nkawd foom pub tsis yog tej yam uas yus kov tau—yog tej lub sij hawm uas nkawd tsim kom peb sib hlub thiab nco ntsoov. Niaj hnub kuv tseem nco txog tej lub sij htawm ntawd ua rau kuv xyiv fab.
Yeej tsim nyog uas lub ntsiab ntawm Christmas yog kev pub thiab kev txais khoom plig. Vim hais tias peb ua koob tsheej txog lub txiaj ntsim zoo tshaj plaws uas yog Vajtswv Leej Tub, tus Cawm Seej Yexus Khetos. Peb tej khoom plig yeej yuav tsis tseem ceeb npaum li lub txiaj ntsim no, tiam sis kuv xav tias kev zoo siab los ntawm qhov uas peb pub thiab txais tej khoom plig ua rau peb tig peb lub siab rau “Vajtswv tej txiaj ntsim.”1
Lub txiaj ntsim uas yog Vajtswv Leej Tub ua rau peb xav nrhiav “kev kaj siab lug rau lub ntiaj teb no, thiab lub neej nyob mus ib txhis rau lub ntuj tom qab lub neej no.”2 Tej zaum ua rau peb xav tias nrhiav tsis tau kev kaj siab lug hauv ib lub ntiaj teb uas ntxhov hnyo thiab muaj kev sib cav sib ceg ntau heev. Tiam sis peb Leej Txiv thiab Nws Leej Tub uas hlub peb muab qhov ntawd rau peb txhua tus, yog peb kam txais.
Cia li xav seb yuav txawv npaum li cas yog tias, thaum hnub Christmas, peb zaum ib ncig ntawm tus ntoo Christmas, saib cov khoom plig uas tau qhwv kom zoo nkauj, sib tham seb muaj dab tsi nyob haud, ces cia li mus ua tej yam thiab tsis muab tej khoom plig ntawd qhib!
Ntshe tej lub sij hawm peb ua li no rau Vajtswv tej lub txiaj ntsim uas Nws foom pub rau peb. Cia li xav txog tus Cawm Seej tej lus no hais tias: “Yog tias muab ib lub txiaj ntsim rau ib tug neeg, tiam sis nws tsis kam txais lub txiaj ntsim ntawd, ces yuav muaj nqi dab tsi rau nws? Saib seb, nws tsis zoo siab rau qhov uas tau muab rau nws, yeej tsis zoo siab rau tus uas tau muab lub txiaj ntsim ntawd rau nws.”3
Hmo no kuv xav caw peb txhua tus xav txog qhov uas peb yuav ua li cas kom txais Vajtswv tej lub txiaj ntsim uas Nws xav muab rau peb. Qhov tseem ceeb, kuv xav hais txog lub txiaj ntsim Vaj Ntsuj Plig Dawb Huv. Thaum kuv hais txog qhov no, kuv thov kom tus Vaj Ntsuj Plig Dawb Huv pab peb to taub lub txiaj ntsim tseem ceeb no, qhia peb tias peb yuav ua li cas kom txais tau tag nrho, thiab muab kev tshav ntuj rau peb kom peb ua raws li peb kawm.
Vim Li Cas tus Vaj Ntsuj Plig Dawb Huv Yog Ib lub Txiaj Ntsim Zoo?
Tus Vaj Ntsuj Plig Dawb Huv yog tus thib peb hauv Pawg Vajtswv. Nws nplij peb lub siab,4 coj peb kev,5 qhia peb,6 ua rau peb dawb huv,7 es nws thiaj li yog ib tug uas hloov tib neeg lub siab.8 Dhau los ntawm Nws, peb txais tau Vajtswv lub hwj chim thiab cwj pwm hauv peb lub neej.
Nej nco ntsoov ib txhia ntawm tej cwj pwm ntawd: “kev hlub, kev xyiv fab, kev kaj siab lug, ua siab ntev, muaj siab dawb siab zoo, kev ntseeg, lub siab mos muag thiab lub siab ncaj.”9 Ua rau kuv xav tias tej lus no piav txog lub ntsiab ntawm Christmas. Muaj raws li cov tim tswv cog lus thaum thawj hmo Christmas tias yuav muaj “txoj kev zoo siab kawg nkaus” thiab kev kaj siab lug,10 thaum peb txais tau tus Vaj Ntsuj Plig Dawb Huv.
Peb pheej hais txog qhov uas peb xav nco ntsoov lub ntsiab ntawm Christmas tas ib xyoos. Peb yeej xav muaj Vajtswv tej cwj pwm no mus ib txhis li. Thiab peb Leej Txiv xav kom peb, uas yog Nws cov me nyuam, txais tau tej lub txiaj ntsim no. Nov yog kev cog lus zoo kawg ntawm Yexus Khetos txoj moo zoo—peb lub siab yuav hloov, kom “tsis muaj siab xav ua phem ntxiv lawm, tiam sis ua zoo kom tsis tu ncua mus li,”11 thiab muaj Vajtswv txoj kev hlub puv npo.12 Thaum peb txais tau tus Vaj Ntsuj Plig Dawb Huv tiag tiag ces peb yuav muaj tej lub txiaj ntsim no.
Yog ib qho tseem ceeb uas peb txais tau lub txiaj ntsim Vaj Ntsuj Plig Dawb Huv thaum peb hnov cov lus no hais tias “Txais tau tus Vaj Ntsuj Plig Dawb Huv.”13 Kuv xav qhia txog peb yam uas yuav pab peb txais tau lub txiaj ntsim uas muaj nqi heev no. Ua li no, kuv yuav siv ib zaj los ntawm Phau Ntawv Maumoos. Tus Khetos uas sawv rov los tau siv ib hnub txhawb pab cov neeg, thiab cog lus tias nws yuav rov qab los hnub tom qab ntawd. Tib neeg hnov xov, es cov neeg nyob thoob plaws thaj av los sib sau ua ke, ib txhia tau siv zog tas ib hmo kom lawv yuav nyob hauv qhov chaw uas Yexus yuav rov qab los tshwm sim thaum sawv ntxov.
1. Kev Xav Tau ntawm Sab Ntsuj Plig
Thaum lawv tos ntsoov tus Cawm Seej rov qab los, cov thwj tim tau qhia cov neeg tias Yexus ua li cas hnub ua ntej.14 Ces phau ntawv qhia tias lawv tau txhos caug thiab thov Vajtswv “rau yam uas lawv xav tau tshaj; thiab lawv tau xav kom [muab] tus Vaj Ntsuj Plig Dawb Huv … rau lawv.”15 Cia li xav seb qhov no tseem ceeb npaum li cas—lawv yeej tos ntsoov tus Cawm Seej txoj kev rov los, tiam sis lawv tsis tau thov Vajtswv kom muaj li ntawd. Tom qab lawv tau kawm los ntawm tus xib hwb zoo tag nrho ces los ntawm Nws cov thwj tim uas Nws tau xaiv, qhov uas lawv xav tau tshaj yog lub txiaj ntsim Vaj Ntsuj Plig Dawb Huv. Qhov uas yus xav tau lub txiaj ntsim kawg yus siab lub ntsws yeej yog qhov tseem ceeb kom txais tau.
Thawj Tswj Hwm Henry B. Eyring qhia hais tias: “Peb feem coob … muaj kev ntseeg txaus kom xav tau tus Vaj Ntsuj Plig Dawb Huv tej lub sij hawm. Tej zaum tej kev xav li ntawd tsis muaj zog thiab tsis khov, tiam sis, haj yam ua rau peb xav tau thaum peb raug teeb meem. [Tiam sis] yog peb xav muaj kev puaj phais thaum yav tom ntej, peb txoj kev ntseeg yuav tsum muaj zog thiab nyob ruaj nrees.”16 Cov kwv tij thiab cov muam, yog peb xav txais lub txiaj ntsim no peb yuav tsum xav tau kawg siab kawg ntsws.
2. Ua Kab Ke Raws Li Kev Ncaj Ncees
Kuv rov qab hais txog zaj i nyob hauv Phau Ntawv Maumoos, kom peb kawm txog ib yam ntxiv. Tom qab lawv thov Vajtswv kom txais tau lub txiaj ntsim uas lawv xav tau tshaj txhua yam, uas yog tus Vaj Ntsuj Plig Dawb Huv, cov thwj tim tau mus rau hauv dej thiab ua kev cai raus dej. “Thiab tau muaj tias thaum lawv tag nrho tau raug ua kev cai raus dej tag … tus Vaj Ntsuj Plig Dawb Huv tau poob los rau saum lawv, thiab lawv tau muaj puv npo nrog tus Vaj Ntsuj Plig Dawb Huv thiab nrog hluav taws.”17 Txoj kab ke ua kev cai raus dej yog ib qho uas ua tim khawv txog peb txoj kev cog lus tias peb yuav nco ntsoov thiab mloog lus, peb txoj kev ris Yexus Khetos lub npe, thiab peb txoj kev xav txais tus Vaj Ntsuj Plig Dawb Huv.18
Txhua lub lim tiam peb muaj cib fim rov qab cog lus li ntawd thaum peb txais lub cim nco txog, “xwv kom peb yuav muaj nws tus Ntsuj Plig niaj hnub nrog [peb] nyob.”19 Ob txoj kab ke ua kev cai raus dej thiab lub cim nco txog pab peb muaj “Vajtswv lub hwj chim” nyob hauv peb lub neej.20 Ob txoj kab ke no yog ib lub cim txog txoj kev ua neeg zoo li Vajtswv. Peb yeej xav rais los ua neeg tshiab zoo li Khetos, “nws cov tub, thiab cov ntxhais.”21 Peb yuav ua li ntawd txhua lub lim tiam thaum peb siv zog nco ntsoov thiab mloog lus. Kuv caw nej mus txais tus Tswv lub cim nco txog txhua lub lim tiam nrog kev ntseeg tias yuav muaj raws li Nws txoj kev cog lus tias thaum peb ua raws li peb tej kev khi lus peb yuav muaj tus Ntsuj Plig ntau zuj zus tuaj, “mus txog hnub zoo tag nrho.”22
Xyoo no Hnub Christmas yog ib Hnub Sunday. Yeej yog ib txoj koob hmoov uas peb ua koob tsheej txog Yexus Khetos txoj kev yug los thiab Nws txoj Kev Theej Txhoj thaum peb txais lub cim nco txog hnub ntawd.
3. Ua rau txoj Kev Ntseeg Loj Tuaj
Yam kawg thiab yam tseem ceeb tshaj kuv yuav hais txog yog kev ntseeg Yexus Khetos. Tom qab tus Vaj Ntsuj Plig Dawb Huv los rau cov thwj tim nrog lub hwj chim loj kawg, Khetos tshwm sim thiab thov Vajtswv, Nws ua Nws Leej Txiv tsaug vim tau muab lub txiaj ntsim uas muaj nqi heev no rau lawv. Ces nws cia li hais tej lus tseem ceeb no: “Txiv es, koj tau muab tus Vaj Ntsuj Plig Dawb Huv rau lawv vim lawv ntseeg kuv.”23 Kev ntseeg tus Cawm Seej thiab Nws txoj Kev Theej Txhoj yog lub hauv paus ntawm txhua lub txiaj ntsim zoo.24
Kev ntseeg uas muaj zog ntxiv ua rau peb txais tau tus Ntsuj Plig ntxiv nyob hauv peb lub neej. Yog li ntawd peb yuav ua li cas kom muaj kev ntseeg Khetos ntxiv? Peb mloog ntsoov thiab ua raws li Nws txoj lus. Txwj Laug D. Todd Christofferson qhia hais tias, “Lub ntsiab ntawm tag nrho cov vaj lug kub yog ua kom peb muaj txoj kev ntseeg Vajtswv Leej Txiv thiab ntseeg Nws Leej Tub, Yexus Khetos.”25 Peb kawm txog qhov tseeb no nyob thoob plaws Phau Ntawv Maumoos. Piv txwv hais tias, tus Vaj Ntxwv Npeyamis qhia nws cov neeg txog cov lus uas tus tim tswv hais rau nws, uas pab nws “txoj kev ntseeg [Yexus Khetos] heev” thiab vim muaj kev ntseeg li ntawd, tus Ntsuj Plig ua rau lawv hloov siab loj heev.26
Yog peb xav tau tus Vaj Ntsuj Plig Dawb Huv txhua hnub, peb yuav mloog ntsoov thiab ua raws li Yexus Khetos txoj lus uas peb txais los ntawm cov vaj lug kub, cov yaj saub, thiab tus Ntsuj Plig tej lus ntxhi. Qhov uas peb niaj hnub xav tau qhov kaj thiab qhov tseeb, ua rau peb txoj kev ntseeg Khetos, peb txoj kev xav ua neeg zoo li Nws, thiab peb txoj kev txawj txais tau tus thib peb hauv Pawg Vajtswv nrog nraim peb nyob loj zuj zus.
Cov kwv tij thiab cov muam, Vajtswv muaj lub siab dawb siab zoo muab Nws tej lub txiaj tsim pub rau peb thaum lub caij Christmas thiab txhua xyoo. Kuv thov kom peb yuav tsis txhob tso tej ntawd tseg thiab cia li txais tej ntawd thaum peb siv cov yuam sij no. Kuv ua tim khawv tias tham peb ua li no, peb yuav muaj kev hlub, kev xyiv fab, kev kaj siab lug, kev dawb huv, thiab lub hwj chim ntxiv zuj zus tuaj. Peb “lub neej [yuav] zoo ib yam li Vajtswv lub.”27 Peb yuav zoo siab vim peb tau txais lub txiaj ntsim no thiab zoo siab rau tus uas foom pub lub txiaj ntsim ntawd rau peb. Thiab thaum Nws rov qab los, peb yuav npaj siab “txais [peb] tus Vaj Ntxwv.”28 Los ntawm Yexus Khetos lub npe, amees.