O Meaalofa o le Filemu
Ou te faafetai lava e faasoa atu i lenei faamanatuga o le Kerisimasi faatasi ma outou. O lo tatou faamoemoega o le faamamaluina lea o lo tatou Alii, o Iesu Keriso. Ua tatou faamoemoe ia pu’eina le agaga moni o le Kerisimasi mo i tatou lava ma mo i latou tatou te alolofa i ai. O lena agaga ua faavasegaina e le filemu—e le o le filemu faaupufai, aua na soifua mai le Faaola i se taimi o le mata’u ma le atuatuvale tetele lea sa sosola ese ai Lona aiga o ni tagata sulufa’i i Aikupito; e le o se filemu tau tamaoaiga, aua na soifua mai o Ia i se fale o manu ma taoto ai i se faatanoavao faatauvaa; ma e le o filemu e oo mai pe a afifi uma ia meaalofa, laau ua teuteuina, ma ua setiina le laulau, ona o lena filemu ua na o sina taimi lava. O le filemu o le Kerisimasi “o le [filemu] foi mai le Atua, o loo silisili lava i mea uma e manatu i ai.”1 O le filemu lea na folafola mai e le Aposetolo o Paulo o le a “leoleoina ai o outou loto atoa ma o outou mafaufau ia Keriso Iesu.”2 Ma sa sa’o Paulo. O lena filemu o loo tatou sailia ua na’o Iesu Keriso lava ma ona o Ia.
O nisi o i tatou o loo nonofo i ni siosiomaga matagofie ma toafilemu, ae o loo tatou aafia i lagona faaletagata lava ia o le faigata ma le tauiviga. O isi e lagona le filemu ma le toafimalie atoatoa i le lotolotoi ai o ni aafiaga lofituina faaletagata lava ia, o faalavelave, ma tofotofoga faifai pea.
Ia i tatou uma o e ua o mai i lenei olaga faaletino, sa fetalai mai le Faaola, “E maua foi outou e le puapuaga i le lalolagi.”3 Ae sa Ia avatu lava lenei folafolaga matagofie i Ona soo i le taimi o Lana auaunaga i la le tino: “Ou te tuuina atu ia te outou le [filemu], o lou [filemu] ou te avatu ai ia te outou,ou te le avatu ia te outou e pei ona avatu e le lalolagi.”4 E toafimalie le iloaina, o lenei folafolaga o le filemu faaletagata lava ia e faaauau pea mo Ona soo uma i aso nei.
O se folafolaga na tuuina mai i le po tonu na soifua mai ai o Ia. Ina ua faailoa atu e avefeau o le lagi le soifua mai o le Faaola, sa latou tautino atu, “O le viiga i le Atua i mea aupitoaluga, ma le [filemu] i le lalolagi.”5
I lenei vaitau faamanuiaina o le tausaga, ua tatou saili atu—i lo se isi lava taimi muamua—i le filemu e ala i Le e foaiina maia meaalofa uma. Ou te manao i lenei po e faasoa atu nao ni nai auala o le mau auala e mafai ai ona tatou faateleina le filemu tatou te lagonaina i lenei vaitau ma le tausaga atoa a sau.
Muamua, e pei o agelu na pepese i le po o Lona soifua mai, e mafai foi ona tatou lagonaina le filemu pe a tatou faamanatuina lo tatou Faaola, o Iesu Keriso. E mafai ona tatou “o mai [ma] vivii ia te ia.”6
O le Kerisimasi o le faamanatuga o se aso fanau. Ua tatou tofu lagona uma le ofoofogia o le vaaia o se pepe fou e fanau mai. E faamaualaloina i tatou pe a tatou vaai i se vavega o se foliga itiiti ma le folafolaga o le lumanai. Tatou te lagonaina le agamalu. Tatou te lagonaina le lotofaafetai. Tatou te lagonaina le filemu. Ma oo mai ai se lagona o le alofa i o tatou loto lea e mafua ai ona tatou mananao e foai atu ma ia agamalu pe a tatou manatua lē e ana le aso fanau o loo tatou faamanatuina. Aua o le Kerisimasi o se faamanatuga o se aso fanau e le pei o isi aso fanau. O le soifua mai o Iesu na muai vāai i ai perofeta a le Atua i le tele o tausaga. O [Lona] soifua mai o le faataunuuga lea o se folafolaga na faia ia i tatou i le lalolagi o agaga e se Tama Faalelagi alofa. O le soifua mai lea o le Mesia folafolaina.
E toe manatuaina upu ma oo ifo ai i lo’u loto i vaitau uma o le Kerisimasi. E mafai ona ou lagonaina i lo’u mafaufau siufofoga fiafia o se aufaipese maoae o loo vivii: “Aua ua fanau mai mo i tatou le tama, ua foaiina mai mo i tatou le atalii; e i lona ua le malo; e igoa foi o ia o le Silisili ese, o le Faipule, o le Atua malosi, o le Tamā o le Faavavau, o le Alii o le filemu.”7
O le taimi muamua e mafai ona ou manatuaina le faalogo atu i na upu o le taimi sa ou nofonofo ai le faapaologa o le Tapeneko i Sate Leki. Sa lagiina e le aufaipese le viiga a Handel. Ou te manatuaina le lagonaina o se mea i lo’u loto. Sa ou laitiiti lava i lena taimi. Ua ou matua nei, ma ou te iloa lena lava lagona. O le Agaga Paia lea, le ana le mafutaga faalesoa na ofo mai ia te au ina ua valu o’u tausaga. Na faamautu mai e le Agaga i lo’u loto ia upu na ou faalogo i ai i lena po o usuina sa moni.
O le pepe na soifua mai i Peteleema i se taimi ua leva lava o le Alo o le Atua, le Toatasi na Fanaua a le Tama. O e na tootutuli i Ona luma na o atu e tapuai i le Faaola. O Ia o le Tamai Mamoe a le Atua, na auina mai e motusia noataga o le oti e ala i Lana taulaga togiola. Na afio mai o Ia ma le mana e tauave o tatou faanoanoaga ma lo tatou tiga ina ia mafai ona Ia silafia le auala e fesoasoani mai ai ia i tatou. Ma sa soifua mai o ia e togiola a tatou agasala uma ma mafai ai ona Ia:
Fanau mai mo tatou ia le toe oti.
Fanau mai e faaola,
[Fanau mai] ia tatou fanaufouina.
Au agelu pese ai
Le Tupu ua fanau mai!8
O le lagona na ou maua i le faapaologa o le Tapeneko i lena po, o le faatuatua ma le faamoemoe. Sa ou lagonaina le faatuatua ona “ua fanau mai mo i tatou le tama,” na mafai ai ona ou maua le faamoemoe i lo’u loto o le oti e le o le mutaaga lea. O le a ou toetu, ma o le tui o le oti o le a aveesea mo fanau uma a le Tama Faalelagi.
Ae sa ou lagonaina nisi mea se tele atu. Sa ou lagonaina le faamoemoe ona o Ia, sa mafai ai ona ou mulimuli ma auauna atu ia te Ia ma toefanauina ai i se olaga fou faaleagaga. Ona o le meaalofa o Lona soifua mai, e mafai ai ona suia lo’u loto, lou loto, ma loto uma o tagata soifua ia toe avea e faapei o le loto o se tamaitiiti—e paia, mama, ma agavaa ai e toe foi atu i le Atua o le na foai maia ia i tatou se Faaola ma saunia le auala e toefoi atu ai ia te Ia i Lona aiga faalelagi. Sa ou lagonaina le lotofaafetai ma le filemu, ma e mafai foi e i tatou uma ona o le meaalofa o le Tama ma le Alo.
Lua, e pei o leoleo mamoe na vaai i le pepe o Keriso ma “faailoa”9 atu tala lelei o Lona soifua mai, e mafai foi ona tatou aoao atua le filemu i o tatou aiga ma isi tatou te alolofa i ai. Tatou te faia lea mea pe a tatou tatala atu tusitusiga paia i o latou mafaufau ma loto.
A o laiti lava le ma fanau, sa ma faia se tala faatino o le Kerisimasi faaleaiga i upu uma na aumai i mau. Sa ma faatinoina le tala i le Afiafi a o lumanai le Kerisimasi. E toatele outou ua faia se mea faapenei.
O mamanu muamua o le matou tala faatino sa faia mo se aofai faatapulaaina e toavalu, sa faatinoina uma ni vaega mai tusitusiga paia. O au sa fai ma Iosefa, lo’u toalua o Maria, ma se pepe meataalo sa fai ma pepe o le Kerisimasi. Sa faatumuina le aofai o tagata o le tala i le gasologa o le taimi. Sa matou faaopoopoina se tagata laitiiti na fai ma sui o le pepe o Iesu, ona o mai ai lea o leoleo mamoe—sa oofu i solotaele talaloa—e tapuai i le faatanoavao, i le isi [tausaga] na sosoo ai sa mafai ona matou faaopoopoa i ai tupu na aumaia pusa o maataua e faamamalu ai le Tupu fou ua fanau mai.
I le mavae ai o ni nai tausaga, sa matou tatalaina le tala faatino i se tamaitiiti na faatinoina Samuelu le sa Lamana o loo tu ma molimau atu ma le mana faaperofeta e uiga i le soifua mai i le lumanai o le Mesia folafolaina. I le tasi taimi, na matou faaopoopoa i ai se motu o tagata le talitonu na faaauupegaina i polo e fai mai le foil ma tau’ai ai Samuelu a o ia tu ai i o latou luga a’e. O tausaga taitasi, a o faatupulaia pea le malosi ma le ma’oti o le vaega ita, sa ao ona matou faamanatu atu ia i latou ma le malosi o Samuelu e le mafai ona lavea ona o ia o le auauna puipuia a le Atua—ma ona o loo matou valaauliaina ma faamanatuina le filemu!
Sa matou manaomia ni vaega iti mo fanau iti, ma o lea sa matou faaopoopo i ai mamoe ma tamai mamoe ia fetolofi atu i tua o leoleo mamoe i le faatanoavao.
Ae ina ua mavae atu taimi—e pei ona i ai. Ua matutua ē faatinoina le tala, ma o lea ua matou toefoi atu ai i le amataga. Ua ou vaaia na Iosefa, o Maria, o leoleo mamoe, mamoe, tamai mamoe, ma tupu ua see atu i le aoaoina o latou lava fanau e uiga i le Faaola ma e uiga i le filemu ua mafai ona o Lona soifua mai.
Sa faamanuiaina i latou e aoao i vaega na latou faatinoina i a matou tala faatino se mea e uiga i le Faaola ma le mafuaaga matou te alolofa ai ia te Ia. Ou te faafetai lava na vaai le ma fanau ma a latou fanau o matou faamamaluina le pepe o Iesu, na fanau mai e avea ma taulaga le i’u, le meaalofa le mafaatauina o le filemu na foai mai e le Tama Faalelagi i Ana fanau uma.
Tolu, e pei o Makoi, e mafai ona tatou avatua ni meaalofa o le alofa ma le filemu i le avea ai ma soo o le Alii toetu.
Sa faia faapea e Bishop Sellers i Rexburg, Idaho, i le tele o tausaga ina ua valaauina o ia e avea ma epikopo. Sa latalata le latou falesa i le alatanu lea na oso atu i totonu o se tamai aai. I na aso o le leai o ni galuega, sa toatele tagata matitiva na femalagaai solo mai lea nofoaga i lea nofoaga, ma le faamoemoe ia maua lava se auala e tausi ai i latou. E tele lava ina latou saili atu i se tasi o epikopo o le Au Paia o Aso e Gata Ai mo se fesoasoani. E masani lava, o epikopo latou te talanoa atu i ai o le a auina atua i latou i le aiga o Bishop Sellers.
Sa i ai se mafuaaga mo lena mea. E talileleia e le aiga o Sellers tagata ese e manaomia le fesoasoani. Nai lo se taumafataga o le afiafi mo na o se ‘aiga faaleaiga, e tasi pe lua, po o nisi taimi e toatele atu tagata ese e i ai i le laulau. A maea ona olioli malo faaaloalogia i se taumafataga manogi na saunia e Sister Sellers, e foai atu i ai e le epikopo se pulupulu mai le sapalai o pulupulu faasili a le vaegaau na ia faatauina mai.
A ofi loa se pulupulu mafanafana ma uuina se tagapepa o se isi meaai na saunia e Sister Sellers, latou te o ese atu i aso o le taumalulu ma ni loto mafanafana. O vaaiga ma leo ma lagona o le aso o le a tumau pea ia i latou i o latou ala. Ona o nisi o taimi sili ona malulu i Rexburg o le vaitau o le Kerisimasi, ma ona o le tumasani a le aiga o le agaalofa atu i le tausaga atoa, ua tauave ai lava e le fanau i le aiga o Sellers se mea e manatuaina pea o le faia o se mea e ono faia e le Faaola—ma le faia lea mo Ia.
O le a e fausiaina ma lou aiga a outou lava tumasani o le Kerisimasi ia talafeagai ma o outou tulaga, ae o le a latou maua ni mea e tutusa ai. O le a latou taaina atua ni loto i le Faaola. Ma o le a latou faaaofia ai ma ni faatinoga o le agalelei ia o le a agavaa ai mo le faamaoniga a le Faaola: Na Ia fetalai mai:
“Aua na ou fia ai, ona outou avane ai lea ni mea ou te ai ai: Na ou fia inu, ona outou avane ai lea ni vai ou te inu ai: Sa fai a’u ma tagata ese, ona outou talia lea o a’u:
“Na ou le lavalavā, ona outou faaofuina lea o a’u: Na ou ma’i, na outou asiasia mai lea o a’u. Na ou i le falepuipui, ona outou o ane ai lea ia te au.”10
Ma o le a Ia tali mai, “E moni, ou te fai atu ia te outou, aua na faia e outou i le tasi o e aupito itiiti o ou uso nei, o au lea na outou faia i ai.”11
O agelu, leoleo mamoe, ma Makoi na saili atu ma maua le filemu mai lo latou faatuatua ia Iesu Keriso. O le a faapena foi outou. O le soifua mai o le Faaola o le meaalofa lea ua mafai ai e le Tama ona foai mai le “filemu lea i le lalolagi lenei ma le ola e faavavau i le lalolagi a sau.”12 Sa tatou alalaga atu i le olioli i le lalolagi o agaga ina ua tatou faalogo atu i lena folafolaga. E oo mai le filemu ma le olioli ia i tatou pe a tatou faalogo atu i upu o lagiina ma tautino mai ai le tausisia o le folafolaga alofa a le Atua:
Ou te tatalo ia oo mai lena filemu ma tumau ma i tatou taitoatasi a o tatou manatua ai, alofa, ma tapuai atu i lo tatou Tama Faalelagi e ala i le tausiaina o a tatou feagaiga ma Ia. Tau ina ia tatou manatua pea le auaunaga ma le agalelei na tuuina mai e Iesu Keriso i le taimi o Lana auaunaga i la le tino—ma naunau ia faia lea lava mea e tasi.
Ou te molimau atu o Iesu o le Keriso, o le Alo pele o le Tama. Ou te molimau atu o Peresitene Thomas S. Monson o le perofeta soifua a le Atua. O lona moomooga ma le moomooga o le Au Peresitene Sili, ia outou maua i lenei vaitau ma aso uma lagona o le olioli, alofa, ma le filemu, ia na folafola mai e le Faaola i Ona soo faamaoni ma usiusitai. I le suafa o Iesu Keriso, amene.