O Le Meaalofa o le Agaga Paia

Saunia e Douglas D. Holmes

Fesoasoani Muamua i le Au Peresitene Aoao o Alii Talavou

Uso e ma tuafafine, o se faamanuiaga tele le faatasi ai ma outou i le po nei.

I le tolu vaiaso mai le asō, o le a aulia ai le Aso Kerisimasi. O lena taeao, e faitau miliona fanau iti o le a feala a’e i se itula e le masani ai ma, i se matafaioi mata’ina ua feua’i, ma toso ese mai o latou matua mai moega. I le faatumulia ai i lagona malolosi o le faamoemoe, ma mata ua sili atu le susulu i lo le laau Kerisimasi lava ia, o le a latou siomia ai meaalofa sa latou sioa ai mo le tele o aso.

Sa fiafia lo’u tama i le Kerisimasi; o le foai atu o meaalofa na ia maua ai le olioli tele, ma sa lelei tele i laua ma lo’u tina i lea mea. O matou ma o’u tei, faapea ai ma le toatele o isi, sa faamanuiaina i a la taleni. O nisi o a la meaalofa silisili sa le o ni meafaitino—ae o o la aafiaga na fatua’i ai ni sootaga o le alofa ma ni manatuaga faapelepele. O na manatuaga o loo aumaia ai pea ia te au le olioli.

E foliga mai e talafeagai le foai atu ma le mauaina o meaalofa o se vaega autu o le Kerisimasi. I mea uma, o loo tatou faamanatuina le meaalofa le maafaatusalia o le Alo o le Atua, le Faaola o Iesu Keriso. Ioe, o a tatou meaalofa i le tasi ma le isi e le mafai ona faatusalia i lenei meaalofa, ae ou te talitonu o le olioli o le foai atu ma le mauaina o meaalofa e mafai ona liliu atua o tatou loto i “meaalofa a le Atua.”¹

O le meaalofa faapelepele o le Alo o le Atua ua valaauliaina i tatou taitoatasi ia maua le “filemu i le lalolagi lenei ma le ola e faavavau i le lalolagi a sau.”² O le filemu e foliga mai e faigata ona maua i se lalolagi o loo faateteleina ai fetauaiga ma fevaevaeaiga. Ae o lena filemu o le mea tonu lava lea ua ofo mai e lo tatou Tama alofa ma Lona Alo ia i tatou taitoatasi, pe afai e tau na ona tatou taliaina.

Mafaufau i le uigaese e oo i ai pe afai, i le taeao o le Kerisimasi, tatou te saofafai faataamilo i le laau Kerisimasi, ma faamemelo i meaalofa na afifiina ma le matagofie, ma talanoa po o a ni mea o i ai i totonu, ona feoai lea i le aso atoa e aunoa ma le tatalaina o meaalofa!

Paga lea, o le mea lenei tatou te faia i nisi taimi i meaalofa a le Atua e aumai ia i tatou. Mafaufau i le fetalaiga lenei a le Faaola: “Aua o se a se aoga i se tagata pe a tuu atu se meaalofa i ona luga, ae na te lē taliaina le meaalofa? Faauta, e lē olioli o ia i le mea ua tuu atu ia te ia, pe olioli foi ia te ia o lē na tuuina mai le meaalofa.”³

O le po nei ou te fia valaauliaina i tatou uma ia mafaufau loloto pe faapefea ona tatou taliaina moni ia meaalofa ua ofo mai e le Atua ia i tatou. Ae patino lava, ou te fia taulai atu i le meaalofa le mafuatia o le Agaga Paia. A o ou faia, ou te tatalo ia fesoasoani mai le Agaga Paia ia i tatou ia malamalama i le taua tele o lenei meaalofa, ma aoao i tatou i mea e mafai ona tatou faia ia taliaina atili atoatoa ai, ma foai mai ia i tatou le alofa tunoa e faatino ai mea tatou te lagonaina.

Aisea ua Matua Taua Tele ai le Meaalofa o le Agaga Paia?

O le Agaga Paia o le tagata lona tolu o le Aiga Atua. O Ia o le faamafanafana,⁴ o se taiala,⁵ o se faiaoga,⁶ o sē faapaia mai,⁷ ma o lea, o ia e suia loto o tagata soifua.⁸ E ala mai ia te Ia, e mafai ai ona tatou maua ia mana ma uiga paia o le Atua i o tatou olaga.

E te manatuaina nisi o na uiga: “alofa, olioli, filemu, onosai, mataalofa, agalelei, faatuatua, agamalu, [ma le] amio mama.”⁹ Ia te a’u e foliga mai e pei o se faamatalaga lelei lea o le mea e tele ina ta’ua “o le agaga o le Kerisimasi.” O folafolaga a agelu o “tala lelei o le olioli tele” ma le “manuia, i tagata ua alofagia e ia”¹⁰ mai lena uluai po o le Kerisimasi ua faataunuuina, i ni vaega, a o tatou taliaina le Agaga Paia.

E tele ina tatou talanoa e uiga i le taumafai e tausi le agaga o le Kerisimasi i le tausaga atoa. Tatou te mananao i nei uiga paia ia maua moni i o tatou agaga e faavavau. Ma e finagalo lo tatou Tama atoatoa ia i tatou, o Lana fanau, ia mauaina nei meaalofa. O le folafolaga sili lenei o le talalelei a Iesu Keriso—ia suia ai o tatou loto, ia “le toe i ai [se] manao e fai mea leaga, ae ia faia mea lelei e le aunoa,”¹¹ina ia faatumulia i le “faamoemoe ma le alofa atoatoa.”¹² O le mauaina moni o le Agaga Paia e matala ai nei meaalofa taua ia i tatou.

O le mea taua, o le meaalofa o le Agaga Paia ua ofoina mai ia i tatou faatasi ma upu nei: “Talia le Agaga Paia.”¹³ Ou te fia fautuaina atu ni ki se tolu o le a fesoasoani ia i tatou ia talia moni ai lenei meaalofa taua. Ina ia faia lea mea, ou te liliu atu i se vaaiga loloto mai le Tusi a Mamona. Sa faaalu e le Keriso toetu se aso ofoofogia e auauna atu ai i tagata, ma folafola atu e toefoi ifo i le aso na sosoo ai. Sa salalau atu le tala, ma i se naunautaiga tele na faapotopoto ai tagata mai le laueleele atoa, o nisi sa galulue i le po atoa ina ia oo ifo i le taeao ua mafai ona i ai i le nofoaga o le a toe faaali atu i ai Iesu.

1. O Se Manao Laualuga Faaleagaga

A o latou faatalitali mo le Faaola e toefoi atu, sa aoao atu e le ausoo i le motu o tagata mea na aoaoina e Iesu i le aso na mavae ai.¹⁴ O loo faapea mai talafaamaumau sa latou tootutuli ma tatalo atu “mo lena mea na sili ona latou mananao i ai; ma sa latou mananao ia tuuina mai le Agaga Paia ia te i latou.”¹⁵ Mafaufau mo sina taimi i le taua tele o lena mea—sa latou faamoemoe ma le naunautai i le folafolaga o le toefoi atu o le Faaola, ae sa latou lei tatalo mo lena mea. I le aoaoina ai e le faiaoga atoatoa ona sosoo ai lea ma Ona soo, o le mea sa sili ona latou manaomia o le meaalofa o le Agaga Paia. O lenei manao malosi, ma laualuga faaleagaga o se ki taua tele lea i le mauaina o lenei meaalofa.

Na aoao mai Peresitene Henry B. Eyring: “O le toatele o i tatou … e lava le faatuatua e manao ai i le Agaga Paia i lea taimi ma lea taimi. O lena manao e ono faavaivaia ma lē tausisi i ai, ae e oo mai, e masani lava i taimi tatou te oo ai i faafitauli. [Ae] mo i tatou ina ia taitaiina agai i luga i le saogalemu i taimi o i luma atu, e tatau ona tumau ma malosi.”¹⁶ Uso e ma tuafafine, mo i tatou ina ia mauaina lenei meaalofa e manaomia ona tatou mananao i ai ma o tatou loto atoa.

2. Auai ma le Amiotonu i Sauniga

I le toe foi atu ai i le vaaiga i le Tusi a Mamona, tatou te mauaina ai le isi ki. I le mavae ai ona aioi atu mo le meaalofa na sili ona latou mananao i ai, le Agaga Paia, sa o atu ai soo i lalo i le vai ma sa papatisoina ai. “Ma sa oo ina ua uma ona papatisoina i latou uma … sa oo ifo le Agaga Paia i luga o i latou, ma sa faatumuina i latou i le Agaga Paia ma le afi.”¹⁷ O le sauniga o le papatisoga ua fai ma molimau faaletino o lo tatou tautinoga ia manatua ma usiusitai, lo tatou naunautaiga ia ave le suafa o Keriso i o tatou luga, ma lo tatou manao ia talia le Agaga Paia.¹⁸

O vaiaso taitasi tatou te maua ai le avanoa e faafou ai lena molimau e ala i le taumamafa i le faamanatuga, “ina ia [tatou] maua pea lona Agaga e faatasi ma i [tatou].”¹⁹ O le faigapaaga o sauniga o le papatisoga ma le faamanatuga ua fesoasoani e aumai “le mana o le faaleatua” i o tatou olaga.²⁰ I se ala, ua fai ai ia sauniga uma ma faatusa i le taunuuga ma le faagasologa o le avea ma atua. O le avea ma tagata fou ia Keriso, “o ona atalii, ma afafine,”²¹ o lo tatou taunuuga manaomia lea. O lena taunuuga e ausia i lea vaiaso ma lea vaiaso pe a tatou tauivi ia manatuaina ma usiusitai. Ou te valaaulia outou ia o mai i vaiaso taitasi i le faamanatuga a le Alii ma se faatuatua i Lana folafolaga e faapea pe a tatou tausia a tatou feagaiga o le a faatumulia i tatou i le Agaga, i lea tikeri ma lea tikeri, “seia oo i le aso e atoatoa ai.”²²

I lenei tausaga e pa’u ai le Kerisimasi i le Aso Sa. O se faamanuiaga le faamanatuina o le soifua mai o Keriso ma Lana Togiola atoatoa a o tatou taliaina le faamanatuga i lena aso.

3. Faateleina le Faatuatua

O le ki mulimuli ma e sili ona taua o le a ou ta’ua o le faatuatua ia Iesu Keriso. Ina ua alu ifo le Agaga Paia i luga o soo i le mana tele, sa faaali atu Keriso ma tatalo, ma faafetai i Lona Tama mo le foaiina atu o lenei meaalofa taua ia i latou. Ona Ia fetalai atu lea o upu taua nei: “Ua e tuuina mai ia te i latou le Agaga Paia ona ua latou talitonu mai ia te au.”²³ O le faatuatua i le Faaola ma Lana Togiola atoatoa o le puna lea o meaalofa lelei uma.²⁴

O le faateleina o le faatuatua e aumaia ai le faaeega tele atu o le Agaga i o tatou olaga. E faapefea la ona tatou faateleina lo tatou faatuatua ia Keriso? Tatou te aai ma usiusitai i Lana afioga. Sa aoao mai Elder D. Todd Christofferson, “O le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama ma Lona Alo, o Iesu Keriso.”²⁵ O lenei upumoni o loo maua i le Tusi a Mamona. Mo se faataitaiga, sa aoao e le Tupu o Peniamina lona nuu i upu na ia maua mai se agelu, lea na fesoasoani ia i latou ia maua le “faatuatua tele” ia Iesu Keriso, ma ona o lena faatuatua sa faia ai e le Agaga se suiga tele i o latou loto.”²⁶

Afai tatou te mananao ia avea le Agaga Paia ma a tatou soa i aso uma, o le a tatou aai ma usiusitai i afioga a Keriso e maua e ala mai i tusitusiga paia, o perofeta soifua, ma musumusuga a le Agaga. O lenei sailiga o le malamalama ma le upumoni i aso uma o le a faateleina ai lo tatou faatuatua ia Keriso, lo tatou manao ia avea e pei o Ia, ma lo tatou gafatia e taliaina le tagata lona tolu o le Aiga Atua e fai ma a tatou soa tumau.

Uso e ma tuafafine, o loo ofo fua mai e le Atua Ana meaalofa lemafaatauina ia i tatou, i le Kerisimasi ma i le tausaga atoa. Ou te tatalo o le a tatou le tuua lava ia [meaalofa] e le tatalaina ae taliaina e ala i le faaaogaina o nei ki. Ou te molimau atu a tatou faia, o le a faatumuliaina i tatou, i lea laasaga ma lea laasaga, i lea tikeri ma lea tikeri, i le alofa, olioli, filemu, mama, ma le mana. O le a avea i tatou ma “[ē] tofusia i le amio Atua.”²⁷ O le a tatou olioli i le meaalofa ma le ua foai mai ai le meaalofa. Ma a toe afio mai o Ia, o le a tatou saunia e “taliaina [lo tatou] Tupu.”²⁸ I le suafa o Iesu Keriso, amene.